diff --git "a/mhw_Latn/fineweb-2_000001_keep.jsonl" "b/mhw_Latn/fineweb-2_000001_keep.jsonl"
new file mode 100644--- /dev/null
+++ "b/mhw_Latn/fineweb-2_000001_keep.jsonl"
@@ -0,0 +1,5 @@
+{"text":"5. Kenge, tegherere ndani Pare Mbapira 5 Maghukukutu ghomwa Nyambi\nเค้าโครง: Elisha, Daniel, Jonah, Nehemiah, Esther. 24 sections. It has a picture book to go along with the recording.\n|รหัสบทความ:||422|\n|ภาษา:||Thimbukushu|\n|หัวข้อ:||Multiple themes|\n|ผู้ฟัง:||General|\n|รูปแบบ:||Monolog|\n|ประเภท:||Bible Story|\n|ระดับของผู้ฟัง:||Simple|\n|เป้าหมายของสื่อบันทึกเสียง:||Evangelism; Teaching|\n|ข้ออ้างอิงจากพระคัมภีร์:||Direct|\n|สถานะ:||Approved|\nบทความนี้เตรียมเพื่อแปลและบันทึกเสียงในภาษาต่างๆ ควรประยุกต์กับวัฒนธรรมและภาษาต่างๆ เพื่อความเหมาะสมกับแต่ละท้องถิ่น คํำบางคําหรือบางความหมายอาจต้องอธิบายเพิ่มเติม หรือบางทีต้องตัดออกเพื่อให้เหมาะสมกับแต่ละวัฒนธรรม\nMwingeneno\nMurumere. Yithimwetwedha yomumbapira dho thina mahako yatunda mumbapira dha Nyambi, Bayibiri. Adho kututongwera handwarume wa ha wanine maghamweno kwa Nyambi mumanako ghomaghukukutu. Tegherere! Kenge thiperende apa sho yuve muyoyo. (Mughuma)\nThiperende 1 Namani ghana kadhingura Elisha\n2 Hafumu 5:1-12\nElisha kwa karire muhongi gho mukuru no karo mu porofeta wa Nyambi mu Isragheri. Aye gha dimukire eshi, Nyambi ne kukona kutenda kehethino. D iyuwa dimweya katughuru gho dina dyo Namani gheyire kundhugho dhendi. Namani gha karire mukuru wawa kayita homu Siriya, haka Siriya ne ha karire hanyathi wawaka Isragheri. Awo ne mbadi ha karerire Nyambi ghoshemwa ghopithendi, ene yitjwandjo. Namani gha karire katughuru gho mutjima gho kutanara, gha wanine fumwa dhodhikuru kwafumu wendi, ene gha karire noyi n̂ondwe. Gheyire ku Isragheri yoyishi gha yuvire eshi, Elisha ne kukona gha mwirukithe. Ene Elisha mbadi gha shwayireko eshi gha mu morore. Elisha gha tumineko mupikendi mu katongwera Namani eshi, \"Yende, no kakuyoghe murware rwa Jorodani rukwoko no ruwadi, no thikumba thoye n̂anyi thikahukeremo no nanyi thi keruke.\" Namani gha patire thikuma no gha ghambire eshi, \"Na ghayara eshi n̂anyi gha ni shwaghere, no kwitha dina dya Nyambi wendi, no kuyeyura nyara dhendi kuyitombo yange no kunirukitha kuyin̂ondwe yange.\" Po digho Namani gha hukire no ghupata ghoghukuru. (Mughuma)\nThiperende 2 Namani murware\n2 Hafumu 5:13-19\nHapika Namani ha mu kumberire eshi, gha kuthighure. Gho ha ningire eshi, \"Wihetu, ngeshi muporefeta ghana kutongwera eshi ghutende yinu yimweya yoyikukutu, ngo ghuna yi tendi. Yinye ghuna kupira kutenda yi ghana kutongwera? Yende ghu ka kuyoghe n̂anyi wiruke.\" Munyima Namani gha yendire murware rwa Jorodani no gha kakuyoghire yikandho kwoko noyiwadi. Kenge kuthiperende! Namani ghana shamberera thikuma. Yin̂ondwe yendi yinerukerera kupitera muyitenda yi yoyiredhu mumatawero. Namani gha hukire kwa Elisha gha ka mudimukithe, \"Kenge ne na dimuka eshi Nyambi wa Isragheri ne yo Nyambi gha huru mukaye kokaheya.\" Gha kwedherire eshi mbadi mbo gha karera kehe thino thitjwandjo, shimengwa Nyambi gha huru ghoshemwa. Nyambi kukona kurughanitha tjitju dhetu mu kutuhenyitha kukwendi thinda. (Mughuma)\nThiperende 3 Elisha no hakayita wa Nyambi\n2 Hafumu 6: 8-17\nPoruya ruvedhe haka Siriye ha karire muyita nawaka Isragheri. Nyambi nga konekithanga mupikendi Elisha, mu porofeta wa Nyambi, kehe ruvedhe nga ha turithangapo haka Siriye eshi hahomokere haka Isragheri. Na Elisha ne nga konekithanga fumu wa Isragheri po diyo ha Siriya mbadi ha konine kumuwitha. Fumu waSiriye gha tumine hakayita wendi eshi, \"Muyende mukashane oku gha di Elisha, po diyo eshi na kumukwate.\" Diyuwa dimweya mathiku-thiku, Elisha na mupikendi ha shwaghire panunda no ha monine mashurundate ghawa ka Siriya ghana kumu no ha mukwate. Mupikendi ha diri kwendi no kukugherera eshi, \"Hekudyange, ngepi di sho tu tende?\" Elisha ha mu ningire eshi, \"Wayapa. Awa hadi netu ne hengi kupitakana wa hadi nawo.\" Podigho Elisha ghepurire Nyambi mukuyandhurura meho gha mu pikendi. Mupika yu gha kengire no gha monine mandundu ghana yara tukambe no matemba gho mudiro ghana wa dhingumutwedha. Awo ne hakayita wa Nyambi. Nyambi gha gha tumine mu kuna wa kunga. (Mughuma)\nThiperende 4 Elisha nawa kayita ho hakunga\n2 Hafumu 6:17-23\nApa heyire haka Siriye mu kuna shimba Elisha, aye gha rapererire kwa Nyambi, ghuninga eshi, \"Wamwashure ha kare ghukunga!\" Kapupi kamanana hamashurundate wahe mbadi ha konine kumona. Elisha gha wa yendeghere nokawaninga eshi, \"Mu nikuthe ni mu tware kwa katughuru yu muna kushana.\" Popo Elisha kokuwatwara ku thitata tho thikuru tha Samaria, mu Isragheri kwa Fumu shokuru. Elisha gha ka rapererire karo kwa Nyambi eshi, \"Fumu Nyambi, yandhurure meho gho wa harume.'' Nyambi gha yandhururire meho ghawo, po digho ha monine haka Siriya eshi muthitata thawa nyathi wawo ha di! Apa gha wa monine fumu wa Isragheri ghepurire kwa Elisha eshi, \"Tate, ni wa paghe ndi?\" Elisha gha huthire eshi, \"Aa! kadi muyita ghuna ka wa kwatera, po digho eshi mbadi ghu di no ngcamu dho kuwapagha. Mu wa pe yidya no meyu, ha dye no kunwa ndani po sha huke ku kwagho.\" Fumu gha tendire thika di gha mu tongwerire Elisha. Nyambi wa Elisha ne mukuru kupitakana han̂ore dhetu. Mbadi tuku hutherange ghuyi ngeshi twe twa kurupera Nyambi. Nyambi gha tu rawera mun̂ando dhendi eshi, mbadi twa kona kuhuthera ghuyi han̂ore dhetu, Nyambi gha ghamba eshi, \"Yokuhutha nyara ne yange; No mbo na ruweritha.\" Nyambi gha ninga karo eshi, \"Ngeshi n̂ore dhoye ndhara, mwikutithe; ngeshi dinota, mupe yokunwa.\" (Mughuma)\nThiperende 5 Diyerenge dyo muSamariya\n2 Hafumu 6:24-7:2\nHakayita wa Siriya heyire karo no ha rwithe ha Isragheri. Ha dhingumwetwedhire mbara dha Samaria nako dhodhire. Kate ha Isragheri homu mbara ha pirire yidya yo kudya. Kenge kuthiperende! Fumu wa Isragheri gha yendaghurire pawiru dho dikuma dyo thitata. Hambuyama hawadi gho heyire kukwendi. Hakumberire fumu mukuwaghamwena. Ha fire ndhara kate ha dire hanawo! Fumu mbadi gha dimukire eshi ngepi sho ghatende, no gha patire thikuma yoyishi Nyambi mbadi gha wa ghamwenine kwa waka Siriya. No gha tokorire mukupagha Elisha, mupika Nyambi. Elisha gha tumine diywi kwafumu eshi, \"Nyambi kuna kughamba eshi, 'Pa nako dhodhi peghundha, n̂anyi ha kughurithe mburumera no mavumbukiro pamengeneno gha Samariya!'\" (Mughuma)\nThiperende 6 Haka yin̂ondwe hane\n2 Hafumu 7:3-20\nMunako dhodhiya, pa karire hatutughuru hane pamengeneno gha Samaria. Wahe ha karire no yin̂ondwe. Ha ghambathanine ghuninga eshi, \"Pashanye sho tu karere pano tufe? Tu yende kukamba dhawa mashurundate ghawaka Siriya.\" Popo vene, haka Siriya ha yuvire muyoyo ghoghukuru yira hakayita hana kwiya.\nHa yapire thikuma no ha thiyire yinu yawo yoyihe hatjire. Apa hana kumine hakayin̂ondwe mu kamba dhiya, mbadiko yu hana wanine mo! Haka yin̂ondwewa ha shimbire yidya no yoyihe eyi ha shanine. Ha ghamba thanine ghuninga eshi, \"Eyi ne mbadi thiwana. Edi ne diyuwa dyo mbudhi dhodhiwa ene twe ne mbadi tuna kutongwerako hayendhetu.\" Pawangu ha hukire ku Samaria ha ka tongwerire fumu. Popo vene hanu ha tangire kughuritha yidya yomukamba dhawa ka Siriya pa thero dha Samaria, thika di gha ghambire Nyambi kupitera mwa Elisha. Nyambi gha ghamwenine Isragheri, ndani Nyambi gha ghamwenine karo mupikendi Elisha. (Mughuma)\nThiperende 7 Jona ghana kutjira kwaNyambi\nJona 1:1-7\nApa gha fire Elisha, pa kare muporofeta ghumweya mu Isragheri gho dina dyo Jona. Nyambi gha ningire kwa Jona eshi, \"Yende kuthitata tha Ninive no kawayawere, yoyishi ghuyi wawo ghunana kumu kukwange.\" Haka Ninive ha tongamenine yitjwandjo no hakarerire haNyambi hombango. Nawo ha karire hanyathi wawa ka Isragheri. Jona mbadi gha himine kuyendako gho gha shanine kutjira, gha wanine thikepa ethi tha tambire ku ditunga dyo kayenda.\nGha ruwerire no kudhina ha thekuke ha yende. Kapupi kamanana dingundunga dishokuru dyeyire pa dikuruviya. Hanu ha yapire thikuma no ha ningire eshi, \" Tutende fungu-fungu tu mone eshi yidye ghana kuretedherapo ghuyi ghuno.\" Hatendire thika dyo no hawanine eshi Jona ghana ghuretedherapo. (Mughuma).\nThiperende 8 Jona mu dithi dishokuru\nJonah 1:8-2:10\nHa kakuvugha ha ningire kwa Jona eshi, \"Nye ghuna tendi?\" Gha wa tongwerire eshi kuna tjira niyakunuke kwa Nyambi. Podiyo ha mu ningire eshi, \"Ngepi edi sho tu kutende, mukuporeritha dikuruviya?\" Gha wa huthire eshi, \"Muni kwate no kunivukumena mu dikuruviya. Na dimuka eshi murandu wange dineyera dingundunga di.\" Hatutughuru wa mbadi ha himine kupagha Jona, ene dingundunga dya kumaninemo. Podiyo ha mu vukumine mo mudikepa gho gha wereghere mudikuruviya. Ngambi kemo, Jona mbadi gha fire. Kenge kuthiperende! Dithi dyodikuru dya minine Jona. Mayuwa mahatu gha karire mudira dyo thi ghuyumi momo mogha kadirerire kwa Nyambi gha mu ghamwene. Nyambi gha huthire kumandapero gha Jona. No dithi dya ka mu rutherire pandundu. (Mughuma)\nThiperende 9 Jona ku Ninive\nJona 3:1-10\nNyambi gha ghambire karo na Jona eshi, \"Yende ku Ninive ghu kayawere hanu dhino mbudhi na kukupa.\" Jona gha tawire Nyambi no gha yendire ku Ninive, gho gha ka konekithire hanu eshi, \"Mayuwa makumi mane ghana thigharako, Ninive mbo ghana pu kuharanganya.\" Fumu na wanu wahe ha dirire no kukumbera Nyambi gha wa ghamwene. Hapirukire kumayira ghawo gho mayi, na Fumu Nyambi gha tokorire mukupira kuwahanyaghurapo. Nyambi ne muwa, thin̂eke, munongo ndani mudhughutjima mukuhumbitha. Twahe tuna pitura yira Jona no hanu homu Ninive. Twahe twa nyatha Nyambi no twa tenda ghuyi. Nyambi ne gha tu haka, podigho gha tumine Jesusi mu kunatufera no mukunatukomonona. Gha karire mumbira mayuwa mahatu, thikadi gha karire Jona mudira dyo thi mayuwa mahatu. Ndani Jesus gha vumbukire mwawafu. Apano keho aye mbo ghana tu huthera ghundambo wetu na Nyambi nokutapa moyo ghororuheya kowa ha mu tawa nokutambura makomweneno ghendi ghothin̂eke. (Mughuma)\nThiperende 10 Estera na fumu\nEstera 1:1-2:18\nEstera ne kwa karire mukamadighana gho mu Juda gho muditunga dya Isragheri. Hakuru wendi ha fire waheya, podigho mwedyendi Mudekayi, nga mu takamithanga kumurera. Apa ya pwire yita, ha Estera na mwedyendi Mudekayi ha wa kwatire no hamweya homu Isragheri no ha wa twarire kuditunga dya Peresiya. Fumu wa Peresiya gha karire katughuru gho ngcamu, na keheyu gha muyapire. Apa gha mu patithire herekadhi wendi, gha tokorire mukuhangitheramo ghumwe. Ghethire keho hakamadighana hohawa ha wa rete mumbara dhendi. No mukatji kawo ne, gha tororire mo Estera gha kare herekadhi wendi gho mupya. Ene Estera ne mbadiko yu gha tongwerire eshi ye ne mu Juda. (Mughuma)\nThiperende 11 Mudekayi ghana kushwena kutongamena\nEstera 3:1-4:17\nHamani katughuru gho mudyo no dikuto gha karire mu Peresiya. Hanu wahe nga ha tongamenanga mu kunegha dikuto kwa Hamani kehepano nga pitanga. Mudekayi gha shwenine kutongamena Hamani. Mudekayi nga tongamenanga Nyambi yofotji ghoghushemwa no yo nga kughanga pithendi ti. Hamani gha patire thikuma, no gha shanine kuhutha nyara kwa Mudekayi. Diyuwa dimweya Hamani gha ningire kwa fumu eshi, \"Hengi hanu wa hana kuhanya no kuyara mukatji kawanu mu mikunda dho ghu fumu ghoye. No hamweya yitjo yawo ne ya kutjaka no ya wa mweya, no mbadi hana kukutha muragho wa fumu. Kadi thiwana kuwatawedhera eshi hakare mu ghufumu ghoye. Mututurithepo muragho gho kuwa yipitha.\" Hamani gha pire fumu masherenyi, yodigho fumu gha tawedheghere makumbeghero ghendi, ene gha shwenine masherenyi. Ha turithirepo muragho mughufumu wa Peresiya ghoghuhe mukupagha ha Juda wahe, mudiyuwa dimweya nokushimba ghushwiwawo. Hamani gha yuwirere thitondo thikare ghutjongwi hakukurekeko Mudekayi. Mudekayi ghepurire Estera mu kuyenda kwafumu gha ka mukumbererepo haguva wendi. Ene Estera gha ningire eshi, \"Keheyu gho kuyenda kwa fumu, ngeshi ku mbadi hana mwitha kwakara muragho ghofotji ngenyu kumu pagha!\" Estera po digho ghepurire ha Juda wahe eshi, hadhirerekedhe no ha murapererithe kwa Nyambi. Ndani gho gha ningire eshi, \"N̂anyi na kuyende kwafumu. Ngeshi kufa, naghakafe ngenyu.\" (Mughuma)\nThiperende 12 Mukandi wa Estera\nEstera 5:1-9:16\nNyambi gha huthire mandapero ghawa Juda. Fumu gha tawedhire Estera mu kughamba nendi. Ndani Estera gha rayire fumu eshi, gheye kumukandi wendi pofotji na Hamani. Kumukandi ghu, fumu gha kepurire eshi,''Herekadhi Estera, yinye ghuna kushana?\" Estera gha huthire eshi, \"Ni ghamwene no ghamwene haguva wange! Yoyishi name nawaguva wange hatughuritha mu kutupagha.\" Fumu gha ningire eshi, \"Yidye yu ghokuvurumukera kutenda yinu yokengeyo?\" Estera gha huthire eshi, \"N̂ore dhetu ne yoyu murume ghomuyi Hamani!\" Fumu gha patire thikuma apa gha yuvire dighano dyodiyi dyaHamani. Gho gha mu ndhendherithire thinda kumuhenga ghu gha tendeghere Mudekayi, ha Juda wahe ha pwire kukomonona. Estera gha himine eshi aye gha fe ene haguva wendi ne ha pare ku yifa. Thikadi gha shuturire Nyambi haguva wendi haJuda, aye gha tapa mashutwero kukwetu kupitera mwa mukareri wendi ghokupongoka yu gha tumine Jesusi. (Mughuma)\nMwingeneno 2\nHakafumu hawadi hoha Isragheri Daniyera na Nehemiya nawo karo thika Mudekayi na Estera, ha wa thinenekire mu kutunga mu ditunga dya wa nyathi wawo. Awo nawo nga ha kughanga Nyambi ghoghushemwa no ha karire ha tutughuru ho ngcamu wa Nyambi. Kenge ku thiperende tho thokurandako mumbapira apa sho yuve. (Mughuma)\nThiperende 13 Daniyera nawa yendhendi\nDaniyera 1:1-20\nEthi thiperende kuna kuneghadha Daniyera no hayendhendi hahatu. Nawo ha karire ha Juda. Ha wa twarire ku ditunga dya Babiloni hanyathi wawo. Fumu wa Babiloni gha shanine eshi hanu hamukughe yodighe. Po diyo shi ha kona kukuhonga ndimi no thitjo tha Babiloni. Ene Daniyera nawa yendhendi, mbadi ha hakire kukunyateka hathinda noyidya yokuthidyero tha fumu. Mbadi ha shanine kutamenena yikaritha yawaka Babiloni. Po digho ha rombire ngenyu rwidhi no meyu gho kunwa kwa katughuru yu nga wa kunganga, gha karire no woma eshi pamwe kukona ha kuyonde no kukorwa. Ene Nyambi ghawa pakere thinga no ha karire ndjewa – ndjewa no ghu nyanyami kupitakana hangaghu homu Babiloni. (Mughuma)\nThiperende 14 Daniyera na fumu wa Babiloni\nDaniyera 2:1-49\nDiyuwa dimweya fumu wa Babiloni gha karire no yirota. Ghepurire hatutughuru hohanyanyami nawaka mahanga eshi ha mu tongwere yirota yendi no eyi ya tongora. Ene mbadiko yu gha yi konine, podigho gha tokorire kupagha wahe.\nDaniyera nawayendhendi nawo ngo kuwapagha, ene wo ha kumberire kwafumu eshi gha wa peko ruvedhe ro kukonakona yirota nonye ya ninga. Ha rapererire kwa Nyambi na Nyambi gho gha hokorire yirota yafumu kwa Daniyera. Daniyera gha yendire kwafumu no gha ka ningire eshi, \"Kadiko mu nyanyami endi mukahanga ghokukona kutenda yi ghuna kushana. Ene po gha di Nyambi mudiwiru oyu gha hokoranga yinu yo kunda. Nyambi shokuru kuna kutongwera fumu yinu yi mboyi hokoka mayuwa gha mbo gheya kughutho.\" Muyirota yendi ne ghana mono maghufumu ghomahe ghomukaye. Ndani ghamonine ghufumu ghumweya ghoghukuru oghu wa withire maghufumu ghomahe. Oghu ne ghufumu wa Nyambi gho kukarerapo kuroruheya. Daniyera ghatongorire yinu yi kwa fumu. Popo vene fumu gho gha tongamenine kughutho wa Daniyera, no gha mu fumanekire, ghogharaghurire eshi yitapa nomuyambo ha yi mu retere. Hanyanyami hapwire kughamwena. Daniyera ha mu turire gha kare nguvuru mu Babiloni yomuhe. (Mughuma)\nThiperende 15 Thitjwandjo tho mangondo\nDaniyera 3:1-12\nFumu wa Babiloni ghaturithirepo thitjwandjo thothikuru tho mangondo. Ghethire hakamakuto wendi wahe mukwiya no ha kare pamakandadhekero gho thitjwandjo. Apa ha konganine wahe, hapika wa fumu gho ha yuvithire ghukugherera eshi, \"Apa sho ha yuvange mughuma gho rwimbo ne ha kona kutongamena no kukugha thitjwandjo tho mangondo. Kehe yu gho kushwena kukugha thitjwandjo thi ne mbo hana mu vukumena mudidiro dyo kwekeshera.\"\nHayendha Daniyera, Shadraka, Mishaki na Abedinego ne ha shwenine kukugha thitjwandjo thi. Awo ne ha kughire Nyambi pithendi. Hamweya ha yendire kwa fumu ghuninga eshi, \"Po ha di ha Juda hamweya awa wa tura mumukunda ghomwishi dha Babiloni, Shadraka, Mishaki, na Abedinego, awa hakunyatha. Mbadi ha kughanga no kukarera temba ha Nyambi ghoye endi thitjwandjo thi wa tenda.\" (Mughuma)\nThiperende 16 Dyekeshera dyo mudiro\nDaniyera 3:13-30\nFumu gha tumenine ha Shadraka, Mishaki na Abedinego no gha ningire kukwawo eshi, \"Ngeshi mbadi sho mu tongamene thitjwandjo thomangondo, n̂anyi ha mu vukumene mudyekeshera dyomudiro. Nyambi munye ngo yu sho gha mu ghamwene?\" Awo ha mu huthire eshi, \"Nyambi yu twa rughanenanga kukona kutughamwena no n̂anyi gha tu ghamwene kungcamu dhoye, fumu. Ene ngambi ngo gha pire kutughamwena mbadi sho tu karere thitjwandjo.\" Fumu ghayarire no ghupata gho gha tapire marawero mukuhangeka mudiro yikandho kwoko no yiwadi dyekeshera kupitakana pakutanga. Ndani gha rawerire hamashurundate apa havukumene ha Shadraka, Mishaki na Abedinego mumudiro. Mudiro wa karire ghukuru thikuma, maretha gha payire hamashurundate apa ha vukumenine mo wa harume hahatu mudyekeshera dyo mudiro. Fumu gha kughererire ghuninga eshi, \"Napo kadi harume hahatu naghanga nokuwavukumena mumudiro? Kenge! Ame kuna kumona harume hane, hana kuyendaghura mumudiro, ndani yu ghoghune ne kunakumoneka yira mwana Nyambi.\" Munyima po gha wethire ha shwaghe mumudiro. Apa ha shwayire wa harume hahatu mumudiro, mbadi ha pire, nohuki dhawo temba mbadi dha vavukire, noyitere yawo nayo mbadi ya yipire no mwithi temba mbadi wawanukire! Po gha ningire fumu eshi, \"Ghusho kwa Nyambi wa Shadraka, Mishaki na Abedinego, oyu ghana tumu mu engeli wendi mu kuna ghamwena ha kareri wendi wa ha mu kurupera, hana shwena kutawa marawero ghange. Ghii, hana himi kufa mudyango dyokukarera Nyambi wange, shimengwa wawo ndani. Ame kuna kutapa marawero: Ku kehe marudhi endi mandimi oyu ghokughamba yoyimango kwa Nyambi wa Shadraka, Mishaki na Abedenigo mbo ghana pu kutetaghura no ndhugho dhendi mbo dhi kare diyara dyomawe. Kadiko Nyambi ghumweya ghokukona kughamwena kenge.\" (Mughuma)\nThiperende 17 Daniyera ghana ku raperera kwaNyambi\nDaniyera 6:1-13\nDaniyera gha karire no ngcamu dhishokuru mu ditunga diya. Hakamakuto hamweya ha karire no nya kukwendi. Ene mbadiko murandu ghu ha wanine mumwendi, yoyishi Daniyera gha karire ghutawedhi no makurupero muyirughana yendi kwa fumu. Han̂ore dha Daniyera hayendire kwa fumu no ha ningire eshi, \"Fumu gha turithepo muragho eshi keheyu ghoku raperera haNyambi hawo nawo, kutundithako kwa fumu, mumayuwa makumi mahatu agha gha di paghutho, mbo ghana pu kuvukumena mudikwina dyo nyime.\" Fumu gha kwatithireko hatutughuru no ha turithirepo muragho ghuya ghoghupya. Daniyera gha yuvire yokuhatera kumuragho wafumu ghoghupya, ene ghatwarire kughutho kuraperera kwaNyambi yikandho yihatu mudiyuwa, thikadi nga rapereranga pakutanga. Apa ha monine han̂ore dha Daniyera ghana kuraperera, ha yendire kwa fumu no ka mu tongwera eshi, \"Daniyera ne mbadi ghana kukutha muragho ghu ngaghu turithapo.\" (Mughuma)\nThiperende 18 Daniyera mudikwina dyo nyime\nDaniyera 6:14-24\nFumu ne mbadi ya mu roghere pakuyiyuvayi, diyuwa dyodiheya gha yerekire kughayadhara eshi, ngepi di sho gha kone kughamwena Daniyera. Ene ya mu kangire yo kutjindja muragho. Gho gha raghurire eshi Daniyera ha mu vukumene mudikwina dyo nyime, ene gha hengaghurire Daniyera ghuninga eshi, ''Nyambi ghoye, oyu wa kareranga no makurupero, ngo gha kughamwene.'' Podiyo Daniyera ha mu vukumenine mu dikwina dyo nyime. Fumu yu mbadi gha dire runguro, no mbadi gha rarire ghuthiku ghoghuheya. Mathikuthiku diyuwa dyokurandako, fumu gha tjirire kudikwina dyo nyime no gha kethire eshi, \"Daniyera, mukareri wa Nyambi ghomuyumi, ghana kughamwena Nyambi ghoye kunyime ndi?\" Daniyera gha huthire eshi, \"Nyambi wange ghana tumu mu engeli, oyu ghana mumu tunwa to nyime. Mbadi dhina ni humu, yoyishi Nyambi wange ghana dimuka eshi, ame ne na pira murandu. Kadiko ghuyighu na tenda kukoye fumu.\" Fumu gha shambererire thikuma, gho gha raghure eshi, ha mu shwaghithe mo mudikwina. Daniyera ha mu shwayithire mo mudikwina dyo nyime. Pamarawero gha fumu, hanyathi wa Daniyera awa hamu runderire, ha wa vukumenine mo mudikwina dyo nyime, popo vene nyime dha wa papaghurire. (Mughuma)\nThiperende 19 Nehemiya kughutho wa fumu shokuru\nNehemiya 1:1-2:8\nNehemiya gha karire mu Juda yu gha karerire Nyambi. Gha tungire mu Babiloni munyima dha Daniyera. Jerusalema, mbara dhawakerekando wendi, dha karire dighundu, no haguva wa ha tungire mo ha karire mumaghukukutu ghomakuru no kushwahuka. Nehemiya gha karire mupika fumu shokuru. Diyuwa dimweya oku ye kuna kuhindera fumu vinyu, fumu ghamwipurire eshi, \"Pashanye ghuna kukarera noyitokota murupara roye?\" Podiyo Nehemiya gha tongwerire fumu kuhatera ku Jerusalema no hanu wa haka ramo ha Juda. Fumu kokwipura eshi, ''Yinye eyi ghuna kushana?\" Nehemiya gha raperire kwa Nyambi muthipore, no gha ningire kwa fumu, eshi, ''Ngeshi yi kuroghere, ni tume kumbara dhawa tate ni ka dhi tendurure.\" Nyambi gha huthire ndapero dha Nehemiya, fumu gha mu tawedhire makumberero ghendi. (Mughuma)\nThiperende 20 Nehemiya ghana kukengurura mbara dhokuyipa\nNehemiya 2:7-20\nFumu gha tapire kwa Nehemiya yirughanitha no harume ho kumughamwena. Nehemiya nawaghamweni wendi ha yendi kuJerusalema. Han̂ore dhawa Juda ha yuvire yokuhatera kwa Nehemiya, gho ha patire. Mbadi ha hakire keheyu eshi ngo gha ghamwene ha Juda. Ene Nehemiya mbadi gha wa yapire. Nehemiya gha hakire kutendurura Jerusalema. Gha yendire ghukunduruka makuma gho mbara agha ghawa. Gha yendire ghuthiku yoyishi mbadi gha shanine eshi keheyu gha dimuke eyi ghana kutenda. Mathiku-thiku Nehemiya ghethire haJuda nokuninga eshi, \"Mwiye, mututendurure makuma ghaJerusalema, po digho eshi mbadi mbo tufe karo honyi.\" Gha wa tongwerire eshi Nyambi nendi gha di; mbadi ha yape. HaJuda ha huthire eshi, \"Tutange kutenda popano!\" (Mughuma)\nThiperende 21 Kutenda makuma\nNehemiya 3:1-6:19\nKenge kuthiperende! HaJuda ha tangire kurughana. Hamweya ha kenithire oku hamweya pakutenda makuma nokuroghitha mengeneno. Hakan̂ore dhawo ha patire thikuma. No ha tangire kushamuna ha tendi. Ha shedhaghurire nokuhomoka eshi, ha paghe ha Juda oku wo pakurughana. Po digho Nehemiya gha rapererire karo kwa Nyambi, yoyishi gha dimukire eshi, ghunya-nyami nongcamu dhodhiheya ne kwa Nyambi ya kara. Aye gha shanine eshi, Nyambi gha mu neghedhe eshi, yinye sho gha tende. Ghaturire hakayita kumakuma ha kunge harughani. Keheyu gha shimbire yirwitha no kukuroyithera yita. Hakan̂ore mbadi ha konine kupagha Nehemiya nawa Juda, yirughana ya yendire po mumayuwa makumi kwoko nomawadi ngenyu, makuma gha pwire kutendurura. Apa ha yi monine hakan̂ore dhawo no marudhi ghamweya agha gha wa kundurukedhire ha kumbirupithire. Yoyishi ha dimukire eshi, eyi yirughana ne yina kumumo pamaghamweno gha Nyambi. (Mughuma)\nThiperende 22 Esera ghanakutoya miragho\nNehemiya 8:1-10:39\nApa gha pwire kutenda makuma, haJuda heyire pofotji muJerusalema. Esera mupristeri waNyambi, gha watoyere mumatjangwa. Hanu hamweya ha tangire kudira yoyishi ha dimukire eshi mbadi ha karire ghutawedhi kumiragho dha Nyambi. Othdithothitambo gha tawedherire Nyambi han̂ore dhawo ha yipithe mbara dhawo. HaJuda ha shanine kushwagha kuyikara yawo yoyimango, no ha kuthire mayira ghaNyambi karo. Nehemiya gha ningire kwa wanu eshi, \"Mwa kara no tokotoko. Yishamberera ya Nyambi ne mu dho ngcamu dhenu.\" Hanu ha kughire Nyambi, gho ya tangire yishamberera yoyikuru, awo ha hakire karo n̂ando dha Nyambi kudhiwatjwathanitha thikuma. Kukona natwe tu shamberere, ngambi kenge shi twa harura, yoyishi Nyambi gha kuroyithera mu kututhigherera, aye mbo ghana pirura yitokota yetu yomaharwero kuyishamberera. Aye karo mbo ghana tupa ngcamu dhokukutha mayira ghendi nokumufumaneka. (Mughuma)\nThiperende 23 Jesusi pathikurushe\nMateghusi 4:1-11; Marukusi 11:27 12:17; Luke 22:63; 23:12; Johanesi 19:17-30;...\nMateghusi 4:1-11; Marukusi 11:27 12:17; Luke 22:63; 23:12; Johanesi 19:17-30; Hakaroma 5:8; HaEfesus1:7, 20; Hakolose1:20; 1 Hakorinte 15:42-44; Hakafilipi 3:20-21\nApa gha karire Jesusi pano pakaye naye gha patire mumayerekero gho mengi, yira kenge ha kareri wa Nyambi hamweya homumbapira dhi. Shatani gha mu yerekire eshi gha mu karere, mudyango dya Nyambi, ene Jesusi gha withire mayerekero. Hapiterithi wawaJuda ha mu homokerire no kumuyereka mumaruvedhe ghomengi, kuyereka kumupemukitha noyighamba yokupira ghushemwa. Ha mu mwayire ha kareri wendi. Ha mu kwatire, ha mu shererire, ha mu pumurire, ha mu runderire yombango kughutho gho ndhango. Paghuhura hamu pagherire pathikurushe. Nyambi gha ghamwenine ha Elisha na Daniyera no hamweya kuyifa mumaruvedhe gho kukuthighathigha. Ene mbadi gha ghamwenine Jesusi kuyifa. Aye gha tawedherire Jesusi gha pite muyinu yoyiheya yi podiyo gha kone kushimba honyi no maharwero ghetu mumwendi thinda yira mukareri wa Nyambi ghokunyanda. Ene yoyishi gha karire ghutawedhi kuyifa, Nyambi mbadi gha mu thiyire eshi gha kare mumbira. Gha vumbukire mudiyuwa dyoghuhatu no gha mu pire dikuto dyodikuru. Mayuwa makumi mane munyima dho muvumbukero Jesusi hamu dhinekire mudiwiru no gha hungumana kurudyo rwa Nyambi. Kupitera mwa Jesusi maharwero ghetu gha pwa kuthigherera no honyi dha tu shwagha. Ghundambo wetu na Nyambi wa hukera po. Kukona tu pare yipara yi yina kufumaneka Nyambi. No mbo tuna ka para nendi kuroruheya mughurwedhima wendi ghoghukuru munyima dhokufa yirama yetu yopa nyama. (Mughuma)\nThiperende 24 Jesusi gha neghedha ndhira dhokumoyo ghororuheya\nMateghusi 7:13; Johanesi 14:6\nThiperendethi ne kutuneghedha eshi yipara ne yira mukuyenda mundhira dhodhikuru, dhodhiyaghuyu dho kutwara kuyifa. Keheyu munu mbadi gha haka Nyambi. Twahe mundhira dha Shatani twa kara. Adho ne kutwara kumahanyaghukero ghororuheya munyima dhokufa kwetu. Jesusi gha nyandire no gha fire mu kutughamwena kumahumbithero gha. Munyima gho gha karire muyumi karo. Apano ne kuna kutuneghedha ndhira dho kwa Nyambi. Twa kona kukutha ndhira dha Jesusi keho. Adho ne ndhira dho dhikukutu no dhithorokoto. Maruvedhe ghamweya kukona tu nyande muyipara yino, pofotji yira Daniyera nawayendhendi. Ene ndhira dha Jesusi kutwara mudiwiru. Omu mwa pira yinyanda, adyo ne dyango dyo yishamberera yokuroruheya nothiraro thokuroruhe. Ghomuya mo gha kara Nyambi. Jesusi gha ningire eshi, \"Yame ndhira no ghushemwa no moyo. No yofotji temba ghokukuma kwatate shimengwa papange.\" Raperere kwa Jesusi keho. Mwipure gha kuneghedhe ndhira dhokwa Nyambi.\n----------------------------------------------------------------------------------------------------------\nGhuhura.","id":"<urn:uuid:028813cc-9b3a-4135-a957-448e6c024fbc>","dump":"CC-MAIN-2019-30","url":"http:\/\/globalrecordings.net\/th\/script\/mhw\/422","date":"2019-07-19T12:29:42Z","file_path":"s3:\/\/commoncrawl\/crawl-data\/CC-MAIN-2019-30\/segments\/1563195526237.47\/warc\/CC-MAIN-20190719115720-20190719141720-00510.warc.gz","language":"mhw","language_score":0.9999541044,"language_script":"Latn","minhash_cluster_size":67,"top_langs":"{\"mhw_Latn_score\": 0.999954104423523}","num_words":3774,"character_repetition_ratio":0.062,"word_repetition_ratio":0.0,"special_characters_ratio":0.193,"stopwords_ratio":0.302,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"text":"3. Kenge, tegherere ndani pare mbapira 3 Mawithero gho mwa Nyambi\nOutline: Joshua, Deborah, Gideon, Samson. 24 sections. It has a picture book to go along with the recording.\n|Script Number:||420|\n|Language:||Thimbukushu|\n|Theme:||Victory; Multiple themes|\n|Audience:||General|\n|Style:||Monolog|\n|Genre:||Bible Story|\n|Sophistication:||General|\n|Purpose:||Evangelize and Teach|\n|Bible Quotation:||Direct|\n|Status:||Approved|\nScripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.\nMwingeneno\nDiyuwa dyodiwa, mukasete n̂anyi ghu yuve eshi yidye gha randire mwa Mosesi mukupiteritha ha Isragheri. No n̂anyi ghu kuhonge karo eshi ngepidi gha wa yendithire Nyambi ha shwaghe mumamboreya ha kakume mu Kanaghani, ndani ngepi di gha wa ghamwenine ha withe hakan̂ore dhawo. Kenge muthiperende mumbapira dho dhihakuki, no ghufikure apa sho yuve. (Mughuma)\nThiperende 1 Joshua ghana kurwa no Hamarekite\nMashwaghero 17:8-13\nHanu wa Isragheri mbadi ha karire no dyango. Ha yendaghurire mumamboreya kutunda pa gha wa shwayithire Nyambi mu Egiptena. Ene gha wa toyedhere kuwapa ditunga dya Kanaghani. Nyambi gha tororire mungaghu gho dina Joshua gha kare mukuru wa wakayita wa Isragheri. Hanu hamweya heyire no ha rwithe ha Isragheri, hanu wa ne Hamarekite. Ndani Mosesi gha ningire kwa Joshua eshi, \"Mwa kuyende mwa karwithe Hamarekite. N̂anyi na kemane pandundu no muramu waNyambi munyara dhange.\" Pakuyeyura Mosesi muramu waNyambi muwiru, Joshua no ha Isragheri ha withire Hamarekite. Ene moko gha Mosesi gha tangire kughayerera no mbadi gha konine kughayeyura shime kwa Nyambi. No Hamarekite ha tangire kuwitha yita. Po diyo harume hawadi ha yeyurire moko gha Mosesi katerunguro, Nyambi gha ghamwenine Joshua mukuwitha Hamarekite. (Mughuma)\nThiperende 2 Hakahoka no mbuyo dhomu Kanaghani\nManomora 13:1-14:35\nApa haka kokere ha Isragheri kumururwani wa Kanaghani, Mosesi gha tumine hapiterithi dikumi no hawadi (12), Joshuwa na Karebu, nawopo pathipani thi ha tumine mukanongonona ditunga, munyima dhomayuwa makumi mane (40), ha ka hukire no ha tape yitundamo kwa Mosesi. \"Twa yendire kuditunga di wa tu tumine, adyo dya kara no ghuyeghave! Edhi ne dho mbuyo dha dyo. Ene haguva wa mo ne ngcamu shemwa, no mambara gha mone makuru no ngcamu shemwa.\" Ene Karebu gha porerithire hayendhendi ghuninga eshi, \"Kukona tuyende no kashimba ghushwi gho diya ditunga. Ngeshi yina mu roghera Nyambi, aye kukona shemwa gha tutware muditunga diya kukona tu yende.\" Ene hayendhendi ha ningire eshi, \"Mbadi wakukona tu homokere wa hanu; ha kara no ngcamu dhokupitakana twe!\" Ha yapithire ha Isragheri kungena mu Kanaghani. Hanu ha dirire no ha shivanine kuhutho wa Mosesi na Aroni no kwiman̂anyena Nyambi. Ndani ghurwedhima wa Nyambi wa hokokire kwawa Isragheri wahe no gha ningire eshi: \"Rure rokukuma papi sho ha tware kughutho mu kuninyatha me, norure rokukuma papi ha kupira kutawa mumwange ngambi kenge na tendire yidimukitho mukatji kawo?\" Aye gha shanine kudhongonona po ha Isragheri. Ene Mosesi gha wa kumbererepo, na Nyambi gha yi wa thigherirepo. Ene mudifumanekero dyendi mbadi gha wa tawedhere kangena muditunga dyo makuruperitho. Gha wa huthire munyima mumamboreya myaka makumi mane (40). Ha Isragheri wahe awa ha pirire kukurupera mwa Nyambi ha ferere mumamboreya. (Mughuma)\nThiperende 3 Haka Isragheri hana kuregha rware\nJoshua 1:1-9. Joshua 3:1-17\nMunyima dhoyifa ya Mosesi, Nyambi gha tororire Joshua gha piterithe ha Isragheri. Nyambi gha ningire kwa Joshua eshi, \"Apa no keho nowe no haguva wahe, mukuroghithere mwa kureghe rware rwa Jorodani muditunga di naku mupa. Kare no ngcamu notjimape, yoyishi kuna kuyenda ghuka piterithe hanu wa mukatambura ditunga edi nedhere kwa wa kerekandongo wawo.\" Nyambi gha tongwere Joshua eshi ngepi edi sho ha tende. Hapristeri wa Isragheri ha karire no dimbangu edi ha tire eshi Ariki, omu mwa karire muragho dha Nyambi payikwere yomawe. Nyambi gha tongwere mukushimba dimbangu kurware. Rware rwa handjire, ene pa ku djata ha Pristeri mapadhi ghawo mumeyu, rware rwa shaghekire kupuka no kwancandukire.\nHa pristeri hemanine pakatji korware, oku haguva wahe pa kuregha rware hayende muKanaghani parukukutu. (Mughuma)\nThiperende 4 Kuwa ko Makuma gha Jeriko\nJoshua 6:1-27\nHa Isragheri ha rarere muKanaghani pepi no mbara dha Jeriko. Nyambi gha ningire kwa Joshua eshi, \"Na tapa Jeriko munyara dhoye. Mwa kona kudhinguruka mbara nawamashurundate, mwa kuyitende yi mayuwa kwoko nodyo fotji. Ture haPristeri kwoko no hawadi (7) ha pitere kughutho oku wo hana shimbi matorombita ghomanyiha kughutho gho dimbangu dya Nyambi. Ene mudiyuwa dyoghukwoko noghuwadi (7), mwa kona kudhinguruka mbara paru kwoko noruwadi, oku haPristeri pakushiya matorombita. No hanu wahe hakuyerere thikuma. Dikuma dyo mbara ne gho dyakumbanduke diwe ndani haguva ghoha kungene mo wangu.\" Joshua no haguva wendi ha yi tendire thika di gha yi wa rawerire Nyambi. Makuma gha Jeriko gha wire ndani ha Isragheri ha shimbire mbara. Nyambi gha wa tongwere eshi mbadi ha kona kushimba kehe ghugavo endi ghushwi ghomu Jeriko ghu kare wawo. (Mughuma)\nThiperende 5 Isragheri ghana kutjira kwa Ayi\nJoshuwa 7:1-12\nPepi na Jeriko pa karire karo mbara dhawa n̂ore edhi ha tire eshi Ayi. Joshua ghakona kuwitha gha shimbe karo yu Ayi. Gha tumine harume ha kakonakone mbara dhiya. Ha kahukire no kuna tongora eshi, \"Mbadi ha tumeko hakayita hakarwithe Ayi, yoyishi hanu wapo ne hapu hakaramo.\"\nJoshua gha tumine ha kayita hohapu eshi haka kungure Ayi. Ene hanu wa Ayi ha withire ha Isragheri. No haka Isragheri hamwe ha wa paghire ndani hamweya ha tjirire ha parithe moyo dhawo. Joshua no hakuru waka Isragheri, hanyongokire marupara ghawo kughutho wa Nyambi, muyitokota yishokuru wipura Nyambi eshi pashanye ghana tawedhera yinu yi yokemo yihokoke. Ene Nyambi gha ningire eshi, \"Isiragheri nga harura; ame na raweghere mukuharanganya yinu yoyihe yomumbara dha Jeriko. Ene wo ne nga hedhi, nga hangera, yo hana katjirera kwawa n̂ore dhawo mukuwakona. Mbadi sho ni kare nenu ngeshi mbadi sho mu hanyaghure yinu yowidhi yi hatungwera kumaharanganyeno.\" (Mughuma)\nThiperende 6 Ndhango dha Akana\nJoshua 7:14-8:29\nJoshua gha kongwedhire hanu homu Isragheri wahe kughutho wa Nyambi.\nNyambi gha mu neghedhire eshi Akana ne yo nga harura kughutho wa Nyambi. Joshua gha ningire kwa Akana eshi, \"Fumaneke Fumu Nyambi wa Isragheri nonitongwere eshi, yinye nga ghu tendi; Wayini horeka.\" Na Akana gha huthire eshi, \"Yoghushemwa! Nga ni harura kwa Nyambi. Apa nga ni mono mo muyinu yomu Jeriko thivata thothiwa, siriveri no mangondo gho nga ni shimbi. Gho nga ni vumbeka mutende wange.\" Joshua gha tumine harume hamwe nohakawanine yo yinu gha kedhire Akana no ghayihorekire mutende wendi. Akana no didhiko dyendi dyodiheya ha pwire kupagha, hikadi gha yi raghurire Nyambi. Nyambi gha thighire ghupata wendi noghaningire eshi, \"Shimbe hakayita wahe, noghuyende ghukarwithe Ayi. Wa yapa, yoyishi na tapa mumoko ghoye mbara dha Ayi.\" Ha Isragheri hatawire yaNyambi no ha kawithire ha ka Ayi. (Mughuma)\nThiperende 7 Diyuwa nokaghonda yemanine tete\nJoshuwa 10:1-14\nHaguva hohayi homu Kanaghani ha tangire kuyapa ha Isragheri. Ha fumu wawo hakwoko heyire pofotji ha rwithe ha Isragheri. Ene Nyambi gha ghambire kwa Joshua eshi, \"Wa wa yapa. Mbo na kughamwena mukuwa witha, noghofotji temba yu gha kukona kwimana noye.\" Ndani Joshua ghemanine nomashurundate ghendi gha rwithe mako gha, ene ha tjirire kwa Isragheri. Nyambi gha withire mbwe dhodhikuru no hanu hohengi ha fire.\nYita ya yendire kughutho diyuwa dyodihe. Joshua gha ningire eshi, \"Diyuwa no kaghonda, yimane teghete!\" Nyambi gha ningire diyuwa no kaghonda yimane kate hamanine ha Isragheri kurwitha han̂ore dhawo nokuwawitha. Mbadi ya karireko no mbadi mbo yi karako eshi, Nyambi gha huthe ndapero dhamunu mumuhingo ghokemo. (Mughuma)\nThiperende 8 Joshua ghana rawera hanu\nJoshua 23:1-24:31\nNyambi gha tawedhere ha Isragheri mukupara muthiraro no haka maparaghumbo ghawo nako dhodhihe. Apa gha kuruparire Joshua, ghethire hanu wahe pofotji. Gha wa vurukithire yinu yoyikuru eyi gha wa tendere Nyambi no ngepi di gha wa rwererepo. Joshuwa gha wa tongwere eshi, \"Mutanare; no mwa kona kutakamitha no kukumithamo eyi ha tjanga muMbapira dhoMuragho wa Nyambi. Muhake Fumu Nyambi wenu nomukunge ghundambo wendi! Ngo n̂anyi gha kutjidhe mako agha ghana thigharako no mbo muna yoro ditunga dyodihe dya Kanaghani. Ene ngeshi mwa ka karere hanyambi hawo nawo, n̂anyi mwa kuyongare mu ditunga dyodiwa edi ghamupa Nyambi. Mutokore dyarero eshi yidye yu shogha mukarere.\" Haguva wahe ha toyedhere mukukarera nomukufumaneka Nyambi. Munyima Joshua gha fire. (Mughuma)\nThiperende 9 Debora gha kughamberapo Nyambi\nHapanguri 4:1-9\nMunyima dhoyifa ya Joshua, hanu wa Isragheri ha shwaghire kwa Nyambi.\nHa raperere yitjwandjo yawa kaKanaghani. Nyambi gha tapire ngcamu kwawa kaKanaghani no ha pethire ha Isragheri momuyi thikuma. Ha Isragheri hadirerire kwa Fumu Nyambi wawo ha shanine maghamweno. Debora gha karire mukamiti wa Isragheri. Hanu nga heyanga kukwendi nohawane maghano, no nga gha mwenanga kushwayithapo marwanamvo ghawo.\nGha kondjire gha wa huthere kwa Nyambi wa Isragheri. Diyuwa dimweya ghethire Baraka mukuru wa wakayita wa Isragheri, gha mu ningire eshi, \"Shimbe harume mayovi dikumi (10000) ghuyende kudirundu dya Tabori. Sisera no hakayita wa Kanaghani n̂anyi ha kukurwithe. Ene Nyambi n̂anyi gha kukupe mawithero kukwawo.\" Baraka gha yapire, o gha ghambire kwa Debora eshi, \"Ngeshi mbadi sho yende nange, name mbadi sho ni yende!\" Debora gha huthire eshi, \"N̂anyi ni yende noye, yoyishi Nyambi N̂anyi ghawithe Sisera kupitera mwa mbuyama. Ene fumwa mbadi shodhi kare dhoye.\" (Mughuma)\nThiperende 10 Nyambi gha ghamwenine hamu wine Sisera\nHapanguri 4:10-17, 5:19-21\nDebora na Baraka ha piterithire hakayita wa Isragheri kuDirundu dya Tabori.\nSisera no haka Kanaghani hayendire haka rwithe ha Isragheri. Sisera gha karire no matemba ghoyikuvo mathere kwoko no mane (900). Ha Isragheri wo ne kwa karire ngenyu noyimende mumoko ghawo. Haka Kanaghani heyire muthikorongwa tho pepi no Dirundu dya Tabori, ene matemba ghawo mbadi gha konine kukanduka pa ndundu. Munyima mvura gha tangire kuroka no matemba ghawo gho gha patamenine mumatapa no hapwire kukomba kuruhandjo romeyu. Hakayita wa Isragheri, ha henyine ha homokere hakan̂ore dhawo no matemba ghawaka Kanaghani no ha paghire mbunga dhodhihe. Sisera pithendi gha parirepo gho gha tjirire pamuve. (Mughuma)\nThiperende 11 Jagheri gha paghire Sisera\nHapanguri 4:17-23\nSisera gha tjirere mutende wambuyama gho dina Jagheri, mukadidhiko dya Heberi. Jagheri gha ningire kwa Sisera eshi, \"Wiye ghungene mwishi, no ghuturumuthe, fumu wange! Wayapa!\" Jagheri ne mbadi mu Isragheri, Sisera gho gha yendire gha konde mutende wendi. Gho gha mupire mahwe ghanwe, no gha mu fikire no ngugho, Sisera ghayendire gha karare.\nJagheri gha tumburire thikuvo thotende ndani hamara. No ghayendire kawana- kawana kwa Sisera oku ye muturo shime, no gha mu pamarere nothikuvo thotende mumutwi kate kashisha mumuve. Kapupi kamanana Baraka naye kokuna pita, ghushana- shana Sisera. Jagheri ghamwithire ghuninga eshi, \"Wiye, nanikuneghedhe katughuru yu ghuna kushana.\" Gha monine Sisera mutwi wendi hana ghupamarera mu muve. (Mughuma)\nThiperende 12 Ha Isragheri hana kushamberera\nHapanguri 5:1-31\nNyambi yo gha tapire ngcamu kwa waka Isragheri ha withe haka Kanaghani.\nDebora na Baraka hembire dimbo dyokutapa matumero kwa Nyambi. Ndani hanu nawo ha shambererire. Ha shambererire mu kuwana mupiterithi yira Debora. Aye gha karire yira yo nyokwawo. Ha kughire karo Jagheri naye, yoyishi mbadi gha yapire kwa Sisera. Nyambi gha rughanithire wa hambuyama hawadi mukughamwena Isragheri. Nyambi ne kurughanitha wa hana kumoneka yira ha kashu mukuwitha haka ngcamu.\nMwingeneno 2\nShatani mbo ghana rwitha waheya wa hokukutha Jesusi, ene Nyambi gha tu neghedha eshi ngepi di sho tu kare no ngcamu dhokwa Shatani. Tegherere ndani kuhonge mu yithimwetwedha yi yomu Bayibiri. Kenge kuthiperende thokurandako apa sho yuve. (Mughuma)\nThiperende 13 Gidiyoni na mu engeli wa Nyambi\nHapanguri 6:1-24\nMuditunga dya Isragheri mwa karire thiraro mughure gho myaka makumi mane (40). Ha Isragheri ha yipithire karo kwa Nyambi no ha karerire yitjwandjo ya waka Kanaghani. Nyambi gha tawedhere ha Midiyanite ha wa raghure myaka dho kupitakana pa kwoko no dhiwadi. Haka Midiyanite nga hayipithanga mbuto dhawaka Isragheri. Ndani ha Isragheri ha direrere kwa Nyambi shi gha wa ghamwene. Diyuwa dimweya murume ghodina Gidiyoni gha purire mavumbukiro. Ghondekire mavumbukiro ghendi eshi maghana sho gha wane ha Midiyanite. Mu engeli wa Nyambi gha hokokire kwa Gidiyoni no gha mu ningire eshi,mu, \"Yende ghu ka ghamwene ha Isragheri kwawaka Midiyanite.\" Gidiyoni ghamuhuthire eshi, \"Ngepi di sho ni kaghamwene ha Isragheri? Ame ne no munu vene!'' Ene Nyambi gha ningire eshi, \"Mbo na kara noye no mbo ghuna ru nokuwitha mashurundate ghomahe ghawaka Midiyanite!\" Gidiyoni gha tapire yidya kwa mu engeli. Gha kundamine yidya no muramuwendi. Popo vene kokutumbuka mudiro na mu engeli gha dhongonokire. Gidiyoni gha dimukire eshi Nyambi ghana ghamba nendi. (Mughuma)\nThiperende 14 Gidiyoni gha hanyaghurire yitjwandjo\nHapanguri 6:25-32\nHakadiko dya Gidiyoni nga ha kareranga Baghari na Ashera, yitjwandjo yawa ka Kanaghani. Nyambi ghaningire kwa Gidiyoni eshi, \"Yondaghure thinyaku thawiho thokwa Baghari ndani tete dighundhi dya Ashera pepi natho.\nNdani gho tenderepo thinyaku mwene tha Nyambi.\" Gidiyoni gha yapire hanu, ene gha karire ghutawedhi kwa Nyambi, mughuthiku ghoghuya gha shimbire harume dikumi no hahanyaghurire yitjwandjo. Ene hanu apa ha yi monine mathiku-thiku, eyi gha tendire Gidiyoni ghuthiku ha patire na Gidiyoni no ha shanine kumupagha. Ene wihe gha mu ghamwenine no gha ningire eshi, \"Ngeshi thi thitjwandjo ne Nyambi ghoshemwa, n̂anyi ghakughamwene yithinda.\" Ene mbadiko eyi ya hokokirepo. Nyambi ne mukuru kupitakana kehe thitjwandjo thi hatenditha kuyitondo, mawe endi kukehethi. Aye gha haka eshi tu mu fumaneke. (Mughuma)\nThiperende 15 Hamashurundate wa Gidiyoni hana kunwa meyu\nHapanguri 7:1-7\nHa Midiyanite ha kukongwedhire pofotji ha rwithe Isragheri. Mupepo wa Nyambi wa kungire Gidiyoni gha kongwedhire mashurundate gha Isragheri pofotji. Ene Nyambi gha ningire kwa Gidiyoni eshi, \"Ghu di nohanu hohengi thikuma. Isragheri maghana gha kukutanaghura eshi, pangcamu dhawo hana kughamwena hathinda. Keheyu ghana kututuma nowoma gha kona kuhuka kudighumbo.\" Thingithawo haguva wa Gidiyoni ha hukire kudighumbo. Nyambi gha ningire kwa Gidiyoni eshi, \"Shime hengi thikuma. Wa tware kumeyu, ame n̂anyi ni kawakutorwere kuya.\" Gidiyoni naye gha shimbire mashurundate ghendi gha kanwe kumeyu. Thingithawo ha tongamene hanwe meyu yira runwitho ro mbwa. Harume mathere mahatu ngenyu wo ha nwine nonyara. Nyambi gha ningire eshi, \"No harume wa mathere mahatu (300) awa hana nu no nyara n̂anyi ha kuwithe ha Midiyanite.\" (Mughuma)\nThiperende 16 Harume wa Gidiyoni hana kudhingumutwedha kamba dha Midiyani\nHapanguri 7:12-25\nHakayita wa Midiyani ha tendire kamba dhawo muthikorongwa. Ha karire noharume hohengi nongameno dho kupira kukona kutara keheyu, wingi wawo ne yira mbathi-mbathi pamuve. Gidiyoni gha karire no mashurundate mathere mahatu ngenyu (300), Nyambi gha mu tongwerire yoyiheya edi sho gha tende. Gidiyoni gha pire keheyu murume torombita, ndani nokopi ghonyara nyara ndani noramba mo mwishi. Ha dhingumwetwedhire kamba dhawa Midiyanite pakatji koghuthiku. Wahe ha tendire muyoyo ghowingi. Ha shighire matorombita, kupumura makopi no hakuyererire eshi, \"Thimende tha Fumu Nyambi no tha Gidiyoni.\" Haka Midiyanite ha tutukwire no ha tangire kukupagha ha thinda. Ha tjirire kwa Gidiyoni no hakayita wendi. Gidiyoni gha tumine mbudhi ha kethe hakayita hamweya wa Isragheri. Ha tjidhire ha Midiyanite no ha paghire thingi thagho. (Mughuma)\nThiperende 17 Simsoni ghana kupagha Nyime\nHapanguri 13:1-14:19\nMunyima dhoyifa yendi Gidiyoni, haka Isragheri ha shwaghire karo kwa Nyambi. Nyambi gha tawedhere ha Filisteyini hohamango hawa raghure myaka makumi mane (40). Ndani Nyambi gha tumine mupiterithi no gha mu pire ngcamu gha ghamwene ha Isragheri, dina dyendi ne yo Simsoni. Apa weyire mupepo waNyambi pa Simsoni, gha karire nongcamu. Simsoni ne mbadi gha kururire huki dhendi norofotji temba. Huki dhendi dhodhire dha karire thothidimukitho eshi aye ne kwa Nyambi gha hatera. Gho ghudhindo wa karire gho ngcamu dhendi. Simsoni gha hakire mukamadi ghomu Filisteyine, gha ghambire kwa wihe na nyina eshi, \"Ha kaghumushimbere gha kumuyeke.\" Ha kuruwendi ha ningire ku kwendi eshi: \"Pashanye ghuna kupirera kuyekera murudhi roye?\" Ene Simsoni gha thinenekire eshi: \"Mu kaghunishimbere yoya, yoyishi yo ghana ni roghera.\" (Ene hakuruwendi mbadi ha nongononine eshi, eyi ne Nyambi ghana kuyitenda. Nyambi gha shanine dighano dyo kureta maghukukutu kwa wa Filisteyine.) Oku shime gha karera Simusoni mundhira dhokuyenda kudighumbo dya mukamadi, nyime gha mu homokerire. Simsoni ne gha karire no ngcamu dhodhikuru no gha paghire nyime no nyara dhendi vene. Ruvedhe rokurandako gha yendire karo no gha pitire paya gha paghere nyime no gha wanine mo mughuyoghoro gho nyime wiki ghomuka. Aye gha shimbire mo wiki ghumweya gho gha dire. Apa ha yendire nohakuruwendi kumuyekero wendi kumayekero, gha ningire mudithaghano kwa mu ngaghu ghomuFilisteyine eshi: \"Mothowa kudya munashwagha yokudya. Mothowa ngcamu munashwagha ghutowi.\" Gho gha ningire eshi ngeshi hamutongwere eshi yinye ya tongora ne, ngo n̂anyi gha wa pe yo kuvata makumi mahatu. Ene ngeshi mbadi sho ha yi kone kuyipathurura ha kona kumupa hodiyo yivata yokukuma pamakumi mahatu. Murume ghomu Filisteyine mbadi gha yi konine kuyipathurura gho gha ningire muna Simsoni gha kashane mapathwerwero kwa Simsoni, ngeshi kadikemo gho ha mu paghe no didhiko dya wihe dyodihe. Aye gho gha dirire ghukuhema kwa Simsoni eshi, gha mu tongwere dihuthero, munyima Simsoni gho gha mu tongweghere. Mu muhingo ghu mungaghu yu ne ghogha dimukire dihuthero, gho gha di tongorire kwa Simsoni: \"Nye yoyitowi kupitakana wiki? Yinye yongcamu kupitakana nyime?\" Mupepo wa Nyambi wa yarire mwa Simsoni gho gha yendire gha kapaghe haFilisteyini makumi mahatu (30) no gha kashimbireko yivata yawo ghana pire yo mungaghu pamayekero, gho gha yendire noghupata ghoghukuru kundhugho dha wihe. (Mughuma)\nThiperende 18 Simsoni no mbwawa dho kupya\nHapanguri 15:1-7\nMunyima dhoruvedhe, Simsoni gha hukire karo kwawaFilisteyine, kwamundambo wendi, ene wiha mukamadi gha mu tapire yu muna Simsoni kwamuka fumu ghumwe ghamuyeke. Simsoni gha ningire eshi, \"Pano keho ne ni di nothitambo mwene kohaFilisteyine mukuwa tjitjupitha!\" Gha yendire gha kakwatire mbwawa mathere mahatu (300). No gha dhi ghangire dhiwadi dhiwadi kumithira wadho. Gha shimbire karo maramba ghomunyenge no gha ghangerere kumithira dho mbwawa no gha dhi hayere mumapya ghawa Filisteyine. Yidya yawo yoyiheya ya pire kumudiro. Ha Filisteyine ha nyengire shemwa Simsoni. Ha shanine kumupagha, ene Simsoni gha shimbire thishokora tho momotji dho dongi gho gha payithireko ha Filisteyine diyovi (1000). (Mughumai)\nThiperende 19 HaFilisteyine hana kukurura huki dha Simsoni\nHapanguri 16:4-22\nSimsoni ghahakire karo mukamadi ghumweya gho muFilisteyine, ghodina dyo Derira. Haraghuri gho ha Filisteyine hayendire kwa mukamadi yu ha ruwerire manyinga eshi ha wane ghushemwa kwa Simsoni eshi nye eyi ya mu tanaritha kemo. Derira gha ningire kwa Simsoni eshi: \"Ni tongwere eshi, yinye ya kutanaritha kemo? Ngepi di gho kukukona?\" Simsoni gha ningire eshi, \"Ngeshi kunighanga no mikweri kwoko no dhiwadi dhodhiyu kukona ni kashe name yira kenge hamweya.\" Derira ghayitendire oku haFilisteyine hanondu momo mungonda ha karire. Kokukugherera kwendi eshi, \"Simsoni, ha Filisteyine kuna kukuhomokera!\" Simsoni gha tjinunine makweri noghuredhu no haFilisteyine mbadi ha konine kumukwata. Eyi ne gha yi hukurukire paruwadi. Rokutanga Simsoni gha ningire eshi ha mu ghangithe no mighodhi dhodhipya, ene gha dhi tjinunine pakumuhomokera ha Filisteyine. Ndani po gha ningire eshi ngeshi kuruka huki dhange yiho nokuyipamarera mudikuma kukona ni kashe. Ene gha pweyurire ndungo mudikuma no huki dhendi dha shwayire kundungo pakukuyerera Derira eshi, \"Simusoni, haFilisteyine kuna kukuhomokera!'' Mukamadi gha twarire shime kughutho kumuhengaghura no kumudirera. Ndani paghuhura gha mu tongwerire, \"Nyambi gha tongwerire ha nawe na tate eshi ha ni pongwere muyirughana ya Nyambi. Ngeshi kunikurura huki dhange, mbo na yongaritha ngcamu dhange.\" Mughuthiku ghumweya oku Simsoni ghana rara, Derira ghethire haFilisteyine. Gho ha kururire hukidhendi. Derira kokukugherera eshi, \"Simsoni, haFilisteyine hana kukuhomokera!\" Simsoni gha pindukire ene mbadi gha konine kukughamwena thinda. Nyambi gha thiyire Simsoni. Ha Filisteyine ha ghangire Simsoni no ha mu tuyaghurire meho. Ha mu turire mukashitiko, no ha mu pire yirughana yo kutwa. Ene hukidhendi dha tangire kukura karo. (Mughuma)\nThiperende 20 Simsoni ghana kuhanyaghura haFilisteyine\nHapanguri 16:23-31\nHapiterithi gho haFilisteyine ha shambererire thikuma eshi hana witha Simsoni paghuhura. No ha ningire eshi, \"Nyambi wetu ghana tapa n̂ore dhetu Simusoni, mumoko ghetu.\" No ha karire noyishamberera yoyikuru gho ha tendire muyambo kuthitjwandjo thawo. Ha kashimbire Simsoni ghokufa meho mukashitiko, gho ha mu turire mukatji kodiyugho dyawo ghanyanyukithepo. Simsoni gha kumberire mupika ghomuFilisteyine gha mu tware gha kayeghamene kumaghundhi gha gha kwata temberi ghoyitjwandjo. Temberi dhayarire hakafumu no hakamadi. Haraghuri wahe hoha Filisteyine mo ha karire, noyira mayovi mahatu (3000) hakafumu no hakamadi wa ha karire pawiru ghurorera. Ndani Simsoni gha raperere kwa Nyambi eshi ''Gho Nyambi, nivuruke, nonitanarithe karo rokuhurerera.\" Simsoni gha yeghamenine ku maghundhi ghodiyuwo dishokuru no ngcamu dhendi dho dhiheya, ndhugho dhawa mbandukere wahe. Simsoni ndani nawa piterithi wawaFilisteyine ha fire wahe pofotji. Diyuwa dyo yifa yendi, Nyambi gha tapire mawithero kwa Simsoni kwawa Filisteyine. Gha paghire haFilisteyine hohengi mudiyuwa diya kupitakana apa gha karire muyumi. (Mughuma)\nThiperende 21 Jesusi ghana kutjidha mipepo dhodhi mango\nLukasi 8:26-39\nMyaka dhodhingi dha pitirepo munyima dha Gidiyoni na Simsoni, Jesusi gha tungire muditungu dya Isragheri. Diyuwa dimweya ha wanine murume oyu dha nyikire mipepo dhodhimango. Murume yu gha wire pamuve kughutho wa Jesusi no gha ningire eshi, \"Nye ghuna kushana kutenda nange, Jesusi, ghomwana Nyambi shokuru ghokundagha- ndagha?\" Mipepodhi, dhadimukire eshi Jesusi ne mwana Nyambi. Jesusi gha rawerire mipepo dhi shwaghe mwa murume yu. No mipepo dhaka ngenine muyinguru eyi ya karire popepi. Yinguru yi yandandumukere mudikuruviya noyafire yoyiheya. Hanu ha tangire kumona eshi Jesusi ne gha kara nongcamu dhokupitakana Shatani no mipepo dhodhimango. Yoghushemwa, ngambi mipepo dha kona kutawa kukwendi. Man̂ando gha Nyambi kuna kutuhonga eshi Jesusi gha wana ngcamu dhodhihe mudiwiru no pamuve. Gha kara no ngcamu dhokutjidha mipepo dhodhimango. Mipepo dhodhimango dha kara no ngcamu dhodhikuru, ene kukona kudhitjidha Mudina dya Jesusi kupitera mwa Mupepo ghokupongoka. (Mughuma)\nThiperende 22 Jesusi ghana kushwaghitha harume hohayi mundhugho dha Nyambi\nLukasi 19:45-48, Johanesi 2:13-21\nDiyuwa dimweya Jesusi gha yendire mundhugho dhaNyambi muJerusalema. Mundhugho dha Nyambi mwa karire haghurithi. Hanu wa ha ghurithire yimuna yomuyambo. Ene ha karire ghukutendera masherenyi hathinda pakwangereka hamweya. Jesusi gha patire thikuma. No gha wa tongwerire eshi, \"Nyambi gha ghamba eshi, 'Ndhugho dhange mbo dhina kara ndhugho dhondapero, ene mwe muna dhitendi dhi kare dikwina dyohashondoro.'\" Aye gha tjidhire mo haghurithi wa hohayi no yimuna yoyiheya. Jesusi ne mwana Nyambi. Aye gha kara no ngcamu dhokutjidha harume hohayi mundhugho dha wihe. Ene hamwe hopawa Juda ha patire no hamuningire eshi, \"Tu neghedhe eshi owe ne wa kara nomatawedhero mukutenda yinu yi!\" Jesusi gha wa huthire eshi, \"Mu hanyaghure yirama yange no mbo na vumbuka munyima dho mayuwa mahatu!\" (Mughuma)\nThiperende 23 Jesusi ne kuna kupara munyima dhoyifa\nMateghusi 27:33-28:20\nMunyima dho myaka dhihatu dhoyirughana ya Jesusi haJuda wa hamu paghire. Jesusi ha mupamareghere pa thikurushe tho thitondo, no gha fire. Ene munyima dho mayuwa mahatu gha vumbukire karo. Nyambi gha tapire kwa Jesusi ngcamu dhokuyifa. Aye mbadi mbo gha fa karo. Hanu ha monine eshi yoghushemwa Jesusi ne mwana Nyambi gha karire. Jesusi gha ningire kwawa kathishongero wendi eshi, \"Kukwange ha tapa ngcamu dhodhihe mudiwiru no pamuve. Muyende kwa wanu wahe nomukawatende hakathishongero Wange. Mu kawahonge mu kukwata yoyihe eyi na murawera. No mudimuke eshi, amene nenu nidi.\" Jesusi gha kara no ngcamu kwa Shatani, kumaharwero no kuyifa. Aye kutapa moyo kwa yomuhe ghokumukutha. No ghana haka eshi tu tape mbudhi dhino kwakeheyu. (Mughuma)\nThiperende 24 Mukayita waNyambi\nHakaEfesusi 6:10-18\nTwa kara karo nan̂ore dhetu gho ngcamu Shatani. Ene Nyambi gha tumine Fumu Jesusi mukutughamwena twe kwa Shatani. Harume hohayi hapayire Jesusi, awo ha ghayarire eshi gha pira ngcamu. Ene Nyambi gha tumunine Jesusi mwawafu. Aye ghawithire Shatani. Jesusi ne kutupatwe ngcamu dho kwimana mukurwitha Shatani. Twa kona kukuroyithera yira mukayita yu ghana kukuroyithera yita. Pakutanga, twa kona kudimuka ghushemwa wa Nyambi nokutawa ko yi ghana kughamba. Twa nyanda ghushemwa mumwetu yira mikata dho mumambunda ghetu dhokutukunga kughumbango ghoghuhe wa Shatani. Tu shupate ghuhungami mwa kristusi yira thishupata tho pamuyidi. Ghuwa ghoyitenda yopapetu twa thinda, mbadi wakukona ghutukunge kumuhomo wa Shatani pakutuyereka kutura ye yirumbera yoyimango mumitjima dhetu. Shimengwa ngeshi ha tu kara mwa kristusi, kukona tu kare mumakungero paghuwa no ghuhungami ghu ghatupa ghopa ghatukomonona. Twa kona ku tongwera hamweya yokuhatera ndhira dha Jesusi dho thiraro. Eyi ne yira yishupata kumapadhi yo kutuyakunutha twe kumayira ghaShatani. Twa kona kukurupera Nyambi po digho shi tu kare mumakungero. Ethi ne yira thingandekitho thokutukunga kumuhomo wa Shatani. Jesusi gha tu komonona kumahumbithero ghomaharwero no honyi. Ghothine yira thigcoko thokukomonona mudhimu dhetu mukufa ko roruheya. N̂ando dha Nyambi ne Bayibiri yira dimende, twa kona kudhirughanitha mukuhanyaghura ghumbango wa Shatani. Twa kona kughamba naNyambi mumandapero no mumakukwatathano nendi. Ndani natwe ngo mbo tuna dimuka mawithero gho kwa Shatani, maharwero no yifa, kuroruheya. Jesusi mbo ghana reta moyo ghororuheya kwayomuhe ghokukurupera nokufumaneka Nyambi. Ndhokotwimbe ghushamberera nokukugha Nyambi ghoshemwa ghahuru. (Mughuma)\nGhuhura","id":"<urn:uuid:b55bc675-beba-470e-8d7d-a82d4bd5ffb1>","dump":"CC-MAIN-2019-30","url":"http:\/\/globalrecordings.net\/en\/script\/mhw\/420","date":"2019-07-15T18:32:56Z","file_path":"s3:\/\/commoncrawl\/crawl-data\/CC-MAIN-2019-30\/segments\/1563195523840.34\/warc\/CC-MAIN-20190715175205-20190715201205-00279.warc.gz","language":"mhw","language_score":0.9999524355,"language_script":"Latn","minhash_cluster_size":64,"top_langs":"{\"mhw_Latn_score\": 0.9999524354934692}","num_words":3890,"character_repetition_ratio":0.075,"word_repetition_ratio":0.0,"special_characters_ratio":0.185,"stopwords_ratio":0.304,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"text":"2. Kenge, tegherere ndani pare mbapira 2 Harume wa Nyambi hongcamu\nGaris besar: Jacob, Joseph, Moses. 24 sections. It has a picture book to go along with the recording.\n|Nomor naskah:||419|\n|Bahasa:||Thimbukushu|\n|Tema:||Law of God; Multiple themes|\n|Pengunjung:||General|\n|Gaya:||Monolog|\n|Jenis:||Bible Story|\n|Kecanggihan:||Simple|\n|Tujuan:||Evangelism; Teaching|\n|Kutipan Alkitab:||Paraphrase|\n|Status:||Approved|\nNaskah ini adalah petunjuk dasar untuk menerjemahkan dan merekam ke dalam bahasa-bahasa lain. Naskah ini harus disesuaikan seperlunya agar dapat dimengerti dan sesuai bagi setiap budaya dan bahasa yang berbeda. Beberapa istilah dan konsep yang digunakan mungkin butuh penjelasan lebih jauh, atau diganti atau bahkan dihilangkan.\nMwingeneno\nDiyuwa dyo diwa. Mwa dimuka Nyambi ghofotji ghoshemwa ndi? Ninge ni mutongwere ko hanu hamwe awa ha mu dimukire. Kenge kuthiperende thothina dihenga mumbapira ghokuwe pakutegherera mughuma no ghu vuruke mukufikura kuthiperende thimweya apa sho yuve. (Mughuma)\nThiperende 1 Hakaghukurwa hawadi\nMavarekero 25:21-34\nHa Isaka na Rebeka ha wanine mayovu munyima dhokukara myaka dhodhingi mbumi. Kughutho ghokuwashamuruka Nyambi gha tapire matoyedhero eshi mina munu mbo ghana kara no ngcamu dhokupitakana mukurwendi mukurwamunu mbo ghana rughanena minendi. Hakaghukurwa muthiperende hana kurwera makandadhekero. Mukurwamunu ghodina dyo Esaghu gha karire thiyambi. Apa gha ka hukire kukushana ghana wanine minendi ghana tereka yidya yoyitowi Jakopu minamunu, gha karire gha rughane yidya yoyitowi. Esaghu gha fire ndhara thikuma. Gha rombire kwa Jakopu eshi gha mu peko yo kudya. Ene Jakopu gha huthire kwa Esaghu eshi, \"Pakutanga ni ghurithere ndani ghumbedi ghoye.\" Gha shanine ghupingwa ghodiko, oghu wa roghera kuyenda kwa mukurwamunu Esaghu. Esaghu ghafire ndhara moruyaruvedhe mbadi gha tandhire yoghungavo. No gha ghurithire ghumbedi wendi kuyidya. (Mughuma)\nThiperende 2 Yirota ya Jakopu\nMavarekero 27:1-28:22\nApa gha kuruparire thikuma Isaka no gha kuyuvire eshi tamba gha kufe, ghethire Esaghu no gha mu tongwerire eshi, gha kamuretere nyama gho thiyama thomumuthitu podiyo eshi gha mu kandadheke yoyishi yo mbedi. Ene Rebeka gha yuvire eyi ha kuvurekire no gha tongwerire Jakopu eshi, gha kutendithe yira yodiye Esaghu. Rebeka gha terekire n̂ombo no gha vatekire Jakopu thikukumba thothimuna gho gha mu tumine gha twarere Isaka yidya. Jakopu gha tongwerire wihe eshi, yodiye Esaghu. Isaka mbadi nga monanga thiwana yoyishi gha kuruparire thikuma. Aye gha kwatire Jakopu gha mone eshi shemwa yo Esaghu ndi. Apa gha kwatire Isaka pathikukumba, gho gha ghayarire eshi ghuhuki wa Esaghu gho muyirama, gho mu dhonganithire. Aye gha dire yidya no gha tapire makandadhekero agha gha roghera kwa mbedi. Apa gha kahukire Esaghu kuna wana wihe ne ghana tapa makandadhekero ghendi kwa minendi, gha dirire thikuma. Kutunda diyuwa diya Esaghu gha nyengire Jakopu. No gha shanine kumupagha, naJakopu gha tjirire ghashwaghe mudighumbo. Paghuthiku, ghoghararire no ghaporokere muturo kumbadi dho ndhira. Gha rotire yirota. Gha monine thidhineno thina shughumuka kutunda mudiwiru kare pamuve no ha engeli wa Nyambi hana kushuruka. Nyambi ghemanine pawiru dhatho no gha ningire kwa Jakopu eshi, \"Ame yame Fumu Nyambi, Nyambi wawiho Abrahamu na Isaka. N̂anyi na kukupe nohakerekandongo ghoye ditunga edi ghuna rara. Hana hoka ghoye mbo hana kara yira rukungu rokaye. Hanu wahe homukaye mbo hana wana matungekero ghokupitera mumoye no hana hoka ghoye. N̂anyi nakukupe nohakere kandongo ghoye ditunga edi ghuna rara. Ame ne noye ni di kokuheya no mbo na kukungu kokuhe oku wa kuyenda, no mbo na kakuhutha karo modino ditunga. Mbadi na kukuthigha kate gha kukumemo matoyedhero ghange.\" Nyambi gha hakire Jakopu oku nokumushamuruka temba. Gha mu tororire no gha mu pire matoyedhero ghomawa, no gha mu kandadhekire, kadishikoyidiyi gha rughanine Jakopu, ene dyo gha yi shanene Nyambi eshi, dyo sho gha yi tende yoyishi Nyambi gha kara nongcamu dhokutenda keheyi ghana himi. Nokaro eshi pamurandu ghothin̂eke thendi. Thin̂eke kuninga eshi Nyambi kutupakera thinga ngambi mbadiko yi tuna mu tendera yoyiwa. (Mughuma)\nThiperende 3 Jakopu na Labani\nMavarekero 29:1-31:55\nJakopu gha yendire kwa mwedyendi gha karughanene Labani. Aye gha shanine karo kuyeka mwana Labani ghomumbirupo ghodina dyo Rakera. Gha rughanine myaka kwoko nodhiwadi yomaghondedhi. Munyima Labani gha mwangerire mu kumupa mwanendi ghomukuru ghombedi eshi yo shoghatange tango kuyeka. Labani gha ningire Jakopu gha rughane karo myaka kwoko no dhiwadi dha Rakera. Nyambi gha kandadhekire Jakopu thika di gha yi mu toyedherire, gha kandadhekire karo naLabani pamurandu wa Jakopu. Gha karire noyimuna yoyiwa eyi gha kutorwerire thinda eshi dho ndjambi dho yirughana yendi kwa Labani. Jakopu gha yuvire hana Labani hoharume hana kughamba eshi, \"Oyu Jakopu ne gha shimba yinu yoyiheya yawihetu no gha di noghushwi oghu wa karire wawihetu.\" Jakopu gha yi nongononine eshi Labani naye ghukarowendi nendi wakutjindjire mbadi yira kenge pamutango. Po gha ghambire Nyambi kwa Jakopu eshi, \"Huke kuditunga dya wawiho no kudiko dyoye, Amene noye nidi.\" (Mughuma)\nThiperende 4 Jakopu ghanakukuwana na Nyambi\nMavarekero 32:1-32\nJakopu gha shanine kuhuka kudighumbo ene gha karire no woma kwa Esaghu, yoyishi haka mbango hana kupara muwoma eshi, n̂anyi hakuwahuthe nyara awa ha shinyena. Mughuthiku ghumweya, mundhira dhokuhuka kuditunga dyendi, murume ghumwe gheyire kwa Jakopu. Gha kughoyire na Jakopu ghuthiku ghoghuhe. Apa dya vire diyuwa, murumeyu ne kokughoyora nyonga dha Jakopu. No gha ningire kwa Jakopu eshi, \"Nithiye niyende, dinavu keho diyuwa.\" Ene Jakopu ghahuthire eshi, \"Mbadi sho ni kuthiye eshi ghuyende shimenga ghu ni kandadheke ndani.\" Katughuru gha ningire eshi, \"Kutunda pano mbadi yowe karo shime Jakopu, ene Isragheri. Ghana kughogho Nyambi na munu gho yinamutomboka. Isragheri kuninga eshi 'Nyambi ne muraghuri' endi 'Nyambi ne mutombori.' Ndani poghamukandadhekire popo. Jakopu ha ghamba eshi, \"Namono Nyambi rupara no rupara, ene shime ghana paritha moyo wange.\" Isragheri gha hukire kudiko dyendi nothiraro. No gha kakarire wiha ghodiko dyodikuru edi dya kareranga Nyambi. (Mughuma)\nThiperende 5 Yirota ya Josefu\nMavarekero 37:1-11\nJakopu, oyu gha terughurire Nyambi gha kare Isragheri, ghakarire no hana dikumi nohawadi hohatutughuru. Mwanendipo oyu gha mu yendirepo kumutjimane Josefu. Josefu ne mwana Rakera, oyu Jakopu gha hakire thikuma. Jakopu gha pire Josefu baki ghomuwa. No ha kurwendi ha karire no nya nendi. Mughuthiku ghumweya gha rotire yirota, gha yi yarekire kwawakurwendi: \"Mutegherere kuyirota yange: Tuna kara mudipya tuna kughanganga yitungu yo mavumbukiro popo thitungu thange gho thi nemana, yenu ghoyina dhingumutwedha thange noyina kutongamena kothange.\" Hakurwendi ha patire nendi. Eshi eyi yirota kuna kuninga eshi n̂anyi ha kutongamene minawo ndi? Hanyengire minagho no ha shanine kambenene eshi hamuyipithe. (Mughuma)\nThiperende 6 Kuna kumughuritha Josefu\nMavarekero 37:12-36\nHa kurwa Josefu ha kaditherire yimuna yawo kokayenda no dighumbo.\nJakopu gha ningire kwa Josefu eshi, \"Yende kwawakuroye ghu kawakenge no yimuna ngwa thiwana ha di, gho no ni tongwere.\" Apa ha mu monine ha kurwendi Josefu ghana kwiya, ha tokorire eshi ha mu paghe. Ha mu shutaghurire yivata yendi yoyiwa no kumuvukumena mudithima dyokupira meyu. Ghofotji ghopa wa kurwendi gha ghambire eshi, \"Nye, sho tu wanepo ngeshi tu paghe yu minetu? Ha sha tu mu ghurithe.\" Ha kangeshefa nawo hana dhi pitire. Ha kurwendi ha mu ghurithire kumapeni makumi mawadi. No ha shimbire muthithi wendi no ha ghu kunya – kunyine manyinga gho ndjwi no ha ghu twarire kwa wihawo. Jakopu gha ghayarire eshi, Josefu ne yishereka yina mu pagha. Gha mu dirire notokotoko dhi shokuru. (Mughuma)\nThiperende 7 Josefu ghana kushwena muna potifari\nMavarekero 39:1-20\nHakangeshefa wa hakaghurithire Josefu muditunga dya Egiptena. Omuya mo gha kakarire mupika wa murume ghodina dyo Potifari, na Potifari gha karire murume ghodikuto muyirugha ne yafumu gho mu Egiptena. Nyambi gha karire na Josefu, noyoyihe yi gha rughanine ya kumenene mo thiwana. Munyima ha mu pakire gha kare muraghuri no kukunga dighumbo dya Potifari. Josefu gha karire mungawana ghomuwa. Mukamadi wa Potifari ghatangire kumurumbera eshi gha kare nendi panyama, gha kondjire no kuthineneka Josefu eshi gha rare nendi, ene Josefu gha yi di mukire eshi ghuyi no gha yi mu shwenenine. Diyuwa dimweya muna Potifari gha kwatire Josefu muyivata yendi mukuninga eshi, \"Gha rare nendi!\" Ene Josefu gha pothorire gha tjire nokumuthighera yitere munyara. Mukamadi gha shimbire yivata no gha yi twarire kwa munu wendi no kumurundera eshi, ghana shana kumukwatera mungcamu. Po gha shimbire Potifari Josefu ha kamupakire mudorongo. (Mughuma)\nThiperende 8 Josefu mudorongo\nMavarekero 39:20-40:23\nNyambi gha karire shime na Josefu, ngambi mudorongo. Gha mu neghedhire shime ruhakitho rwendi noghunongo. Joseph gha kamuturire gha kare mukuru wakadorongo waheya. Hapika fumu hawadi ghumweya oyu nga pundanga vinyu gha nwe fumu, na mukakuyotha ghuroto, nawo hana waturire mudorongo. Diyuwa dimweya mughuthiku momughuwadi wawo ha rotire yirota. No ha ghayarire eshi mbadiko yu sho gha wa pathwerere yirota yawo. Ene Josefu gha ningire eshi, \"Mwa dimuka eshi, Nyambi ne yo mukakupathurura yirota ndi? Mu ni tongwere yirota yenu.\" Mupika ghokutanga gha tongorire kwa Josefu, \"Muyirota yange pana kara thindjembere no mite dhatho dhihatu. Gho na shimbi mandjembere, gho na kamena mukopi, gho na tapa kwa fumu.\" Josefu gha mu tongwerire eshi nye yinakutongora, \"Mu mayuwa mahatu, fumu mbo ghana kushwaghitha no kakupa karo yirughana yoye.\" Mukangi ghuroto naye gha tongorire kwa Josefu yirota yendi, \"Muyirota yange ni na kara noyikote yoghuroto yihatu pamutwi wange. Thikote thopawiru thina yara yidya yafumu, ene nyunyi ne gho yina yi ngomongora.\" Josefu gha mu tongwerire naye eshi yinye yina kutongora yi yirota, \"Mu mayuwa mahatu mbo hana kundhe-ndheritha.\" Mu mayuwa mahatu mupika yu ha mu shwayithire ndani mukangi ha mu payire thikakenge di gha yi mu neghedhire Nyambi Josefu. (Mughuma)\nThiperende 9 Yirota ya Fumu\nMavarekero 41: 1-40\nJosefu gha karire shime mudorongo myaka dhiwadi. Ndani mughuthiku ghumweya fumu ghomu Egiptena naye gha rotire yirota. Gha monine ngombe kwoko nodhiwadi kumbadi dhorware. Ngombe kwoko nodhiwadi dhokuyonda thikuma, dhina shwagha murware no dhina mini ngombe dhokununa. Ene noyofotji temba yu gha konine kupathwerera fumu yirota yendi. Mupika wa fumu oyu gha karire mudorongo gha tongorire yokwa Josefu. Fumu po gha tumenine ha kashwaghithe Josefu mudorongo. Josefu ghana tongorire yirota yafumu ghuninga eshi, \"Nyambi ghana kuhokwera eyi ghana kuyenda ghakatende. Mbo dhina kara myaka kwoko nodhiwadi dho makuta no muyangu mwene mu Egiptena. Munyima ndani mbo dhina kara karo myaka kwoko nodhiwadi dho ndhara. Shane munu gho mu nyanyami no ghumu pake muraghuri mu Egiptena. Aye no haguva wendi ha kona kukongwedha yidya no kuyipungura thiwana mu myaka dhi kwoko no dhiwadi, dho muyangu mwene mu kukuroghithera kumyaka kwoko no dhiwadi, dho ndhara.\" Fumu ghamonine Josefu eshi, gha di nomupepo wa Nyambi, gha mu tumbire gha kare muraghuri ghomu Egiptena yomuheya. (Mughuma)\nThiperende 10 Josefu ghana kuraghura mu Egiptena\nMavarekero 41:47-42:28\nMumyaka dhi kwoko nodhiwadi dho muyangu mwene mu Egiptena, Josefu gha pungurire yidya yoyingi. Apa dheyire myaka kwoko nodhiwadi dhondhara, gha tangire kughuritha yidya kwawaka Egiptena. Mu kanaghani namo mwa karire ndhara. Ha kurwa Josefu dikumi heyire no ha ghurire yidya ku Egiptena. Awo mbadi ha mu dimukire yu muraghuri eshi Josefu, ene ye gha wa dimukire. Gha wa runderire eshi ha kahoka, gha wa kwatire no gha wa turire mudorongo. Munyima dhomayuwa mahatu gha wa ningire eshi, \"Ha kuneghe eshi awo ne hanu ho mughushemwa, mwa kona kareta minenu oyu munanitongwera, kuno kukwange.\" Gha thighire ghumweya gho pawa kurwendi shime mudorongo no gha thighire hamwe ha twarere diko dyagho yidya. (Mughuma)\nThiperende 11 Josefu ghana kukuhokora kwawakurwendi\nMavarekero 43:1-45:27\nHakurwa Josefu ha yapire kahuka karo ku Egiptena ene kapupi kamanana ha nyandire karo yokudya. Haka shimbire minawo ghomumbiru Benyameni no ha hukire kwa Josefu mu Egiptena. Ngambi kemo Josefu mbadi gha kuneghire shime eshi ngo yo dye. Gha wa ghurithire yidya no gha tongwere kwamupikendi eshi gha wa huthere masherenyi ghawo mumashaka ghawo ndani gho gha shimbe kopi wa Josefu gho silveri gho gha mu horeke mu shaka wamina wo. Ndani gho gha tumine mupikendi gha wa kuthe munyima nokuwarundera eshi hanedhi. Ha kurwendi ha kahukire wangu wangu kundhugho dhaJosefu. Okuya wahe hakanyongamenine mitwi dhawo kwa Josefu, yira yitungu ya Josefu yo muyirota yo kare; awo ha mu kanderere eshi gha wa feren̂eke. Josefu gha dirire no mbadi gha konine kuhoreka shime. Gha wa tongwera kwendi eshi, \"Yame Josefu, ghominenu oyu mwa ghurithire ku Egiptena.\" Gha ndhondhere Benyameni ghudira no ku muncumita nawa kurwendi wahe. Josefu gha wa pire yoyingi yawo no ya wihe. Josefu gha ningire kohakurwendi eshi hakona kahuka ku Egiptena no diko dyawo na wihawo. Ha kurwendi ha hukire kudighumbo no ha kathimwetwedhere wihawo eshi, \"Josefu ne muyumi! No yo muraghuri gho\nmu Egiptena!\" (Mughuma)\nThiperende 12 Ha Jakopu na Josefu mu Egiptena\nMavarekero 45:28-50:26\nJakopu gha shimbire diko dyendi dyodihe no yimuna yendi, no gha yendire gha katunge mu Egiptena. Apa gha monine Jakopu mwanendi Josefu, gha mu ndhondherire, wahe hatangire kudira. Mu nyima gha kambekire hana Josefu no kuwa kandedheka nawo; haka karire ha piterithi hoha kuru mu diko dya Isragheri. Jakopu gha fire mu Egiptena ghokuye ghana kurupara thikuma. Ha kurwendi Josefu ha yapire ko yi ha mu tendire yoyiyi. Ene Josefu gha wa tongwerire eshi, \"Mwa yapa. Eyi mwatendire eshi muniyipitheme, ene Nyambi gha yi tendire yi kare ghuwa, mukukumithamo yopashadyarero, mukughamwena mudhimu dhodhingi. Po diyo eshi mwa yapa. N̂anyi nimupe no hanenu.\"\nMwingeneno 2\nDiko dya Jakopu, ha Isragheri, ha katungire mu Egiptena no ha ka karire rudhi rorukuru, na fumu ghomu Egiptena gha tangire kuwayapa no hatangire kuwathineneka ha rughanene ghupika. Ene pa karire murume ghodina dyo Mosesi, naye mu Isragheri, oyu gha tanarire mwaNyambi noyu gha ghamwenine hanu wa Nyambi ha shwaghe mughupika mu Egiptena. Aye ghana kutuneghedha ghumweya gho kupitakana, oyu ghokutushutura kughupika wa Shatani, kumaharwero no kuhonyi. Kenge pathiperende owe ne pakutegherera kukaradiyo. Kuroghithere ghufikure kuthiperende thokurandako apa sho yuve mughuma. (Mughuma)\nThiperende 13 Kambututu Mosesi\nMashwaghero1:1- 2:1-10\nMunyima dhendi Josefu myaka mathere mahatu dha pitirepo ndani Mosesi hana kamushamuruka mu Egiptena. Ruvedhe ru ha Isragheri ne ha karire hengi, na fumu ghomu Egiptena gha tangire kuwanyandeka no kuwa rughanitha noghukukutu yira hapika. No gha raghurire karo eshi ha kona kupagha tumbututu totuhe twa waka Isragheri totukafumughana. Ene apa ha shamurukire Mosesi, nyina gha mu horekire. Apa gha kokomokireko, nyina gha mu turire muthikon̂o no gha kamuhorekire mudimbu kumbadi dhorware. Mukurwendi Miriyamu ghemanine pepi nendi gha mu kunge. Mwana fumu gheyire kurware na gha kuyogheko. Ghana wanine thikon̂o tha kambututu Mosesi. Mosesi gha tangire kudira. Mwana fumu gha fererire nêke kakambututu, no gha tokorire gha shimbe kambututu, ka kare mwanendi. Mosesi gha kurerire mumbara dha fumu. Aye gha kuhongire yipara yoyihe yo muEgiptena no gha ka karire katughuru gho mudyo no dikuto. (Mughuma)\nThiperende 14 Mosesi no thipumbu tho mudiro\nMashwaghero 2:11-4:17\nDiyuwa dimweya Mosesi gha monine mu Egiptena ghana kupumura mupika ghomu Isragheri. Mosesi gha shanine kughamwena haguva wendi, no gha paghire yu mu Egiptena. Podiyo Mosesi gha tjirire gha shwaghe kwa fumu.\nMyaka makumi mane gha ka tungire mumamboreya dyango dyo dina eshi Sinayi. Diyuwa dimweya gha monine yinu yokumutetukitha. Gha monine thipumbu thina kupya mudiro, ene mbadi wakwan̂a. Nyambi gha ghambire na Mosesi kutunderera muthipumbu thomudiro, no gha ningire eshi, \"Namono endi hana kuwanyandeka haguva wange momumango. Kuna kukutuma kwa fumu ghomu Egiptena po diyo eshi ghu ka shwayithe haguva wange mu ditungu diya.\" (Mughuma)\nThiperendi 15 Mosesi ghana kuhuka kwa fumu\nMashwaghero 5:1-10:29\nMosesi gha yapire ene gha kuruperire mwa Nyambi no gha hukire ku Egiptena. Mukurwendi, Aroni, gha yendire nendi. Ha ka ghambire kwa fumu eshi, \"Fumu Nyambi, Nyambi wawa Isragheri kuna kughamba eshi, 'Thighe haguva wange hayende, ha kanitendere mukandi mumamboreya.'\"(Mashwaghero 5:1) Ene fumu gha ghambire eshi, \"Mbadi na mu dimuka yo fumu no mbadi sho ni thighe ha Isragheri eshi ha yende.\" Munyima fumu yu gha wedheghererireko rupetho rwa Isragheri momuyi. Nyambi gha ningire kwa Mosesi eshi, \"Haka Egiptena n̂anyi ha kunidimuke eshi, Ame ne yame Fumu, apa na kughonyonona dyoko dyange kwawaka Egiptena no kwashwaghitha ha Isragheri.\" Nyambi gha ningire karo eshi, \"Ngeshi gha kakuninge Faragho eshi 'tende yitetukitho', ghowene ghoninge Aroni, 'Gha ka tumbure mutagha no kughuvukumena pamuve kughutho wa Faragho' no n̂anyi ghu ka kuthitunuke thiyoka.\" Aroni gha karire ghutawedhi, na fumu gha monine mangcamu gha Nyambi, ene mbadi gha tawedhire eshi haguva hayende. Po diyo Nyambi gha tendire yitetukitho yoyingi mu Egiptena. Gha tjindjire meyu gha kare manyinga mu Egiptena yomuheya, hanu ha thimine kumbadi dhorware rwa Neyiri hanwe meyu. Gha retire yihumbithitha yo manyudya, yina, ndhi, yitombo\/maronda kwa wanu no kuyimuna, Mbwe, dikokore no dimba\/ mbathimbathi mu Egiptena. Nyambi gha tawedhire hanganga homu Egiptena nawo hatendire yitetukitho, ene Nyambi gha tendire yoyingi kare yawa kangire hamanganga kuyitenda. Apano Nyambi gha konekithire fumu eshi, aye ne gha kara nongcamu dhishokuru kupitakana tunganga twendi. Ene shime fumu gha shwenine kutawa yaNyambi no gha shwenekire haIsragheri mukushwaghamo. (Mughuma)\nThiperende 16 Muyambo gho ndjwighana\nMashwaghero 13:17-14:31\nNyambi gha ghambire karo kwa Mosesi eshi, \"Ghu tongwere ha Isragheri eshi kehe dirapa dishimbe ndjwighana no kumupagha; no kushimba manyinga no kughakunya pawiru dho yero yawo. N̂anyi yi kare mu Egiptena yomuhe. Kuna kapagha kehe yu mbedi ghomukafumu. Ene ngeshi ni ka mone manyinga payero yenu, n̂anyi ni ka pitakane no mbadi shoni ka mu yipithe.\" Nyambi gha kumithiremo eyi gha ghambire. Mughuthiku ghuya hambedi wahe homu Egiptena ha fire. Ene noyofotji temba mbedi ghomu Isragheri gha fire ko. Ndani fumu gha tumeghene Mosesi nokumuninga eshi, \"Wimane! Thiye haguva wange, nowe no ha Isragheri. Muyende mu ka karere Fumu Nyambi thika di mwa yi kumberire.\" (Mughuma)\nThiperende 17 Kunakuregha dikuruviya\nMashwaghero 13:17-14:31\nMosesi gha piterithire haguva wa Isragheri ha shwaghire mu Egiptena.\nNyambi gha yendire nawo mutenya mudighundhi dyo divuyi, mughuthiku mudighundhi dyo mudiro. Apa gha yi yuvire fumu wa Egiptena eshi ha Isragheri ne hana piti, gha patire thikuma yoyishi gha dimukire eshi hana yongaritha hapika wawo. Po diyo fumu no mashurundate ghendi ghomahe ha kuthire eshi, haka huthe wa haIsragheri. Ha Isragheri ha ka kumine kudikuruviya edi ha pirire kukona kuregha. Haka Egiptena ne ha wa kuthire. No ha Isragheri mbadiko karo kokutjirera. Mosesi gha ningire kwa wa Isragheri eshi, \"Mwayapa! Mwimane ndjikiti no n̂anyi mumone dyarero mashutwero gha Fumu Nyambi agha sho ghatende gha mu ghamwene. Awa haka Egiptena muna kumona dyarero mbadi mbomuwamona karo.\" Nyambi gha yakunuthire dikuruviya no ha Isragheri hatjinaghanine dikuruviya kukutu. Haka Egiptena nawo hayerekire kuwakutha, ene meyu gha kuyandherire no kuwangambwathana wahe. Haka Egiptena wahe ha fire kumeyu ene haka Isragheri wo ne ha pwire kughamwena. (Mughuma)\nThiperende 18 Yidya no meyu mumamboreya\nMashwaghero 16:1-17:7\nMosesi gha piterithire hanu mumamboreya. Mbadi hakarire noyidya yokuwarikanyenena eshi ha dye, no hanyenine Mosesi, Aroni na Fumu Nyambi. Kehe runguro Nyambi nga tumanga yinyunyi no ha dye hanu. No kehe mathikuthiku tukukighana yira ghuroto ghokushwagherera mudiwiru ghuwe pamuve. Haguva gho ha ghu tire eshi 'Manna'. Apa ha pirire karo meyu, ha Isragheri ha rwithire Mosesi karo. Mosesi gha tongwerire eshi, ''Nye muna kunirwithera? Nye muna kuyerekera Nyambi?'' Mosesi gha raperire na Nyambi gha mu yuverire, ghuninga eshi, ''Shimbe muramu ghoye gho pumure padiwe pa Horebu meyu n̂anyi gha shwaghemo hanu hanwe.\" Myaka makumi mane (40) Nyambi gha dithire no kukunga hanu wa Isragheri mumamboreya. (Mughuma)\nThiperende 19 Mosesi pa dirundu dya Nyambi\nMashwaghero 19:1-20:17, Pisalemi19:11, Johanesi 14:15\nHa Isragheri ha ka kumine kudirundu dya Sinayi. Nyambi gha shurukire kudi rundu no kwandaghuka mishoro, mavuyi no mudiro. Mosesi gha yendire kudirundu gha ka ghambaghure na Nyambi, gha ningire eshi, \"Ame ne yame Fumu no Nyambi ghoye, mbadi mwa kona kukarera haNyambi hawonawo kughutho wange. Mbadi mwa kona kutongamena kukehe thitjwandjo endi mu thiraperere. Mbadi mwa kona kuredhupitha dina dyange. Mu vuruke diyuwa dyo Sabata no mu di pongore. Kukona ghurughane mayuwa kwoko no dyofotji, ene diyuwa dyoghu kwoko noghuwadi ne Sabata wa Fumu Nyambi wenu. Mu diyuwa di mbadi mwa kona kurughana kehe yirughana yenu. Yoyishi mayuwa kwoko no dyofotji gha varekire Nyambi diwiru no muve, dikuruviya no yoyiheya eyi yi di mukaye, ene mu diyuwa dyoghukwoko noghuwadi gha turumuthire. Podiyo Nyambi gha kandadhekire Sabata no kudi pongora. Fumaneke hawiho na Nyoko. Wapagha. Wahondera. Wedha. Wa rundera muyendhoye, wa tongora mbango. Warumbera yinu yamuyendhoye noyoyiheya eyi gha wana.\" Nyambi gha tjangire dhi miragho (pathikwere ndani Mosesi gha ka retiredhi miragho kudirundu gheye kwa wanu no kuna wa neghedha eshi hadhikuthe. Pashadyarero atwe ne tuna kuwana muragho wa Nyambi muMan̂ando, mu Bayibiri. (Mughuma)\nThiperende 20 Thiyoka kudighundhi\nNomora 21:4-9, Dotoronomi 18:18\nHanu wa ha tangire kushivana kwa Nyambi na Mosesi eshi, \"Nye mwa tu shwaghithere mu Egiptena muturete muno mumamboreya natufere mo? Mbadi mo ghuroto no mbadimo meyu! Ndani twe yina tukomena yidya yishamango!\" Nyambi gha wa humbithire pakuwatumena yiyoka yoghuhungu mukatji kawo. Hanu hohengi homu Isragheri ha fire apa ya wa humine yiyoka. Hanu ha yendire kwa Mosesi ndani no ha kutapire eshi awo ne ha harura. Ha direre karo Mosesi eshi gha wa ghamwene ndani Mosesi gha wa rapere. Nyambi gha tongwerire Mosesi eshi, \"Gha tende thiyoka no gha thi kureke kudighundhi; nokeheyu thina kuhuma thiyoka ghana kukengako no ghana kupara.\" Po diyo Mosesi gha tendire thiyoka tho mangondo ha thikurekire kudighundhi. No keheyu tha humine thiyoka gha kengire kuthiyoka tho mangondo, gha parire. Mosesi gha karire mu piterithi ghomukuru no muporofeta mu Isragheri. Myaka makumi mane gha piterithire hanu mumamboreya. Kughutho ghokufa Mosesi, Nyambi gha mu tongwerire eshi, \"Mbona tumbu muporofeta oyu gha kushwagha mumwawo; n̂anyi na kuture n̂ando dhange mukanwa kendi, no mbo ghana wa tongwera yoyiheyayi namurawera.\" (Mughuma)\nThiperende 21 Jesusi ghana kuditha hanu\nJohanesi 6:1-58\nMyaka dho dhingi ha Isragheri ha shanine muporofeta yira kenge Mosesi.\nPaghuhura Jesusi Kristusi ghapwire kushamuruka mu ditunga dya Isragheri.\nGha hongire hanu ya Nyambi thika Mosesi. Diyuwa dimweya hanu ha yendire kudyango dimweya ha ka tegherere kwa Jesusi. Ha fire ndhara ene mbadi ha karire noyo kudya. Mungaghu ghumweya gha karire no maghuroto kwoko ndani no thi dhiwadi. Jesusi gha tumburire ghuroto no thi no gha tumerire kwa Nyambi. No ha taperire hanu wahe ha dire no hekutire. Hanu hokupitakana pa mayovi kwoko ha karirepo. Hanu ha ghambire eshi, \"Yoghushemwa oyu ne muporofeta oyu gheya mukaye!\" Diyuwa dyokurandango Jesusi gha ghambire eshi, \"Yame ghuroto gho moyo. Keheyu ghokwiya kukwange mbadi mbo ghafa karo ndhara, no keheyu ghokutawa mumwange mbadi mbo ghafa dinota.\" Muthiperende thokughutho n̂anyi tukuhonge yoyingi yokuhatera kwa Jesusi. (Mughuma)\nThiperende 22 Jesusi ghana kughamba na Mosesi\nMateghusi 17:1-8, Lukasi 9:28-36\nDiyuwa dimweya Jesusi gha shimbire hakathishongero wendi hahatu kudirundu ha ka raperere. Hakathishongero kuninga eshi, hanu hokukara pepina Jesusi no kumukutha. Jesusi gha rapere norupara rwendi rwa rwedhimine yira diyuwa noyivata yendi ya kenaghanine yira thishe. Kokuhokoka ha Mosesi na Eliya kughutho wawo. Ha Mosesi na Eliya wahe ha karire haporofeta wa Nyambi awa ha tungire pakaye myaka dho dhingi, kughutho keya Jesusi mukaye. Mosesi na Eliya ha ghambire nendi yokuhatera kuyifa yendi. Haka thishongero wendi wa hahatu ha yuvire edi hana kughambaghura. Divuyi dyo kurwedhima dyeyire no kuwangambwera wahe. Diywi ha di shwagha mudivuyi eshi, \"Oyu ne yo mwanange, ghomuhakwa; oyu na menya-menyena. Mutegherere ku kwendi.\" Apa dya manine kughamba diywi, hakathishongero ha moninepo vene Jesusi pithendi. (Mughuma)\nThiperende 23 Jesusi gha tu fera\nJohanesi 3:14-16\nHanu hohengi ha munyathire Jesus ndani hakonine kumupagha. Hamashurundate ha mu pamarerire pathikurushe. Ha paghire karo harume hawadi. Awa hawadi ne ha karire hedhi no hapaghi, ene Jesusi mbadi gha tendire ghuyi kukeheghuno. Nyambi gha hakire roruhe eshi, tu kare pepi nendi, no gha hakire kukukwatakana netu, po diyo eshi tu mu fumaneke muyoyihe eyi tuna kutenda. Ene owe name, twa reghire muragho wa Nyambi. Thika kenge hanu wahe homukaye, twa roghera eshi Nyambi gha tuhumbithe mahumbithero ghoyifa. Ene Nyambi gha haka hanu wahe. Mbadi gha tushanena eshi twa kapye kumudiro ghororuheya. Po digho Nyambi gha tumine mwanendi Jesusi, mukuna tutunditha mahumbithero gho maharwero ghetu nokukushemwathanitha netu kupitera mwa Jesusi. Ngeshi ha tu tambura muyambo wa Jesusi mbo tu nemana thiwana-thiwana na Nyambi. Nyambi gha shwaghitha maharweroghetu ghomahe nohonyi, gha yi kambekire pa Jesusi. Mundhira dhi atwe twa rogherera popahe no gha tu tambura. Pano keho ne, kukona twimane kughutho wendi, kupira nowoma temba ghokumatetero ghendi nokumamwashwero. Aye gha tushutwera mukupara mundhira dhokufumaneka. Muruvedhe rwa Mosesi manyinga gho ndjwighana gho pasika, gha notokire mukukunga ha Isragheri ku ndhango dha Nyambi mu ditunga dya Egiptena. Mundhira dhofotji, Jesusi, ndjwighana wa Nyambi, gha fire mukutuyambatwe. Manyinga ghendi yoyiruwera yo maharwero ghetu, ghoye no ghange. Thika kenge di gha kurekire Mosesi thiyoka kudighundhi, na Jesusi naye ha mu kurekire ku thikurushe po diyo eshi keheyu ghokutawa mumwendi, gha pwe kughamwena no gha wane moyo ghororuheya, yira thitapa tha Nyambi. \"Yoyishi Nyambi gha hakire thikuma kaye pakutapa mwanendi ghopithendi, keheyu ghokutawa mumwendi mbadi mbo gha yongara ene mbo gha wane moyo ghororuheya.\" (Mughuma)\nThiperende 24 Jesusi mudiwiru\nJohanesi 19:38; Yitenda yawa postoli 1:6-11\nYirama ya Jesusi ha yamburire kuthikurushe no ha ka yi rangekire mumbira. No mudiyuwa dyoghuhatu Nyambi ghavumburire Jesusi mwawafu no munyima dho mayuwa makumi mane (40) hakathishongero wendi ha mu monine ghana kudhina mu diwiru. Jesusi ne shime ghapara no dyarero no gha hungumana kurudyo rwa Nyambi mughurwedhima. Mosesi no wahe wa ha fererire mwa Nyambi, oku wo shime ha tawera kupara hana kupara nawo mudiwiru ha ka di. Mosesi gha karire mu piterithi ghomukuru no mu porofeta wa Nyambi, ene Jesusi ye ne mwana Nyambi. No gha pitakana Mosesi. Mosesi gha pitithire mu dikuruviya haIsragheri no ha pwire kughamwena kwawa kaEgiptena. Ene Jesusi ye ne gheyire mu kuna ghamwena munu yomuhe oyu gho kutawa mu mwendi no kumukutha. Diyuwa dimweya Jesusi mbo ghana ka huka pano pakaye, thika di gha dhinine mudiwiru. No n̂anyi gha kuna shimbe wahe wa ha tawa mumwendi, ha ka kare nendi mudiwiru. Ghuna kuroghithera mu kuna yenda na Jesusi ndi? Kukona gheye dyarero. Tawe mwa fumu Jesusi Kristusi no n̂anyi ghupwe kughamwena.\n-----------------------------------------------------------------------------------------------------\nGhuhura","id":"<urn:uuid:89024423-4a90-4d2a-817c-5662b3fd6ac5>","dump":"CC-MAIN-2019-39","url":"http:\/\/globalrecordings.net\/id\/script\/mhw\/419","date":"2019-09-16T15:00:49Z","file_path":"s3:\/\/commoncrawl\/crawl-data\/CC-MAIN-2019-39\/segments\/1568514572744.7\/warc\/CC-MAIN-20190916135948-20190916161948-00495.warc.gz","language":"mhw","language_score":0.9999359846,"language_script":"Latn","minhash_cluster_size":59,"top_langs":"{\"mhw_Latn_score\": 0.9999359846115112}","num_words":4094,"character_repetition_ratio":0.064,"word_repetition_ratio":0.0,"special_characters_ratio":0.189,"stopwords_ratio":0.301,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"text":"8. Kenge, tegherere ndani Pare Mbapira 8 Yitenda yaMupepo ghokupongoka\nOutline: The young Church and Paul. 24 sections. It has a picture book to go along with the recording.\n|Script Number:||425|\n|Language:||Thimbukushu|\n|Theme:||Holy Spirit; Multiple themes|\n|Audience:||General|\n|Style:||Monolog|\n|Genre:||Bible Story|\n|Sophistication:||Simple|\n|Purpose:||Teaching|\n|Bible Quotation:||Direct|\n|Status:||Approved|\nScripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.\nMwingeneno\nDiyuwa dyodiwa. Mumakurando ghano na shana kumutongwera yokwa mupepo ghokupongoka waNyambi ghomuyumi. Kenge kuyiperende pambapira dho thinadiwiru okuwe pakutegherera ko yino. Fikure kuthiperende thokuranda ko apa shoyuve mughuma. (Mughuma)\nThiperende 1 Jesusi ghana kuhuka kudiwiru\nYitenda yawa postoli 1:1-11\nKenge kuthiperende. Fumu Jesusi ghana yeyuka ghashwaghe pamuve gha yende mudiwiru mumavuyi. Ha kathishongero wendi hana kumukengerera ghununguruka. Pashanye ghana kuyendera kudiwiru? Pakutanga Jesusi gha karire na Nyambi, karo aye ne yoNyambi ghoshemwa. Kupitakana myaka mayovi mawadi (2000) dhina kapita gha shwayire mudiwiru gheye mukaye. Ha mu shamurukire pamupepo ghokupongoka, mwa mbuyama yu gha pira kukara rumweya panyama namukafumu ghodina dyo Mariya mu Betelehema. Jesusi gha karire munu mu kuneghedha edi gha kara Nyambi. Nyambi gha hakire twahe eshi, tu kukwatakane nendi. Ene ngambi kemo, atwe ne twa nyatha Nyambi nokutjora ghundambo wetu nendi. Mu muhingo ghu twa kuretera honyi twathinda. Twa heya twa para muhonyi no mu maharwero. Mahumbithero ghomaharwero ne yifa. Ene Nyambi gha haka hanu wahe. Aye gha tendire ndhira dhokutuhutha kukwendi. Gha tumine Jesusi mukaye mu kuna fera honyi nomaharwero ghetu mudyango dyetu. Hanu hohayi ha payire Jesusi pakumupamarera pathikurushe ngambi kenge gha pirire kutenda keheyi mu kushamuna Nyambi. Yifa yendi ya tu shemwathanitha na Nyambi. Hanu hohengi hamu monine edi gha fire pathikurushe, ene thingi thawakathishongero wendi nowa ha mu kuthire hamumonine munyima dhokuvumbuka kwendi mwawafu. Kemo dyo ya hokokire no gha wa tongwerire eshi, \"Mbo muna tambura ngcamu apa mbo gheya mupepo ghokupongoka kukwenu; no mbo muna kara mwa tunonga wange mu Jerusalema, no mu Judeya ghomuheya na Samariya, kate kuyiyegheka muto yokaye.\" Apa gha manine kuwapa marawero gha Jesusi gha dhinine kudiwiru mumavuyi thika di ghuna kuyimona pathiperende thi. Diyuwa dimweya mbo ghana kahuka mukaye mughurwedhima mu kuna pangura hanu waheya mukaye. Keheyu ghokuyuva mbudhi dhodhiwa dha Jesusi hokudhi tawa nokumufumaneka ghana kuwana yitapa yokupara kuroruheya mughurwedhima na Nyambi yira hanendi. (Mughuma)\nThiperende 2 Mupepo ghokupongoka ghana kwiya nomudiro\nYitenda Yawa Postoli 2:1-12\nopo munyima dhopa gha dhinine Jesusi mudiwiru, hakathishongero ha kuyuvire no ha karire mundhugho ghuraperera. Kapupi kamanana wa karire muyoyo mudiwiru yira mupepo ghoghukuru. Hanu ha monine maretha ghomudiro. Maretha gha kuhanyine pakeheyu mutawi. Ha yarire namupepo ghokupongoka waNyambi, thika di gha kuruperithire Jesusi, no ha tangire kughamba yitetukitho yoyirughana ya Nyambi mumandimi gha mweya. Jesusi kukumitha mo keheyino ghana kutukuruperitha; Gha tuma Mupepo Ghokupongoka kwakeheyu gha mu fumaneka mughushemwa nokumutawa. (Mughuma)\nThiperende 3 Petrusi ghana kuyawera hanu\nYitenda Yawa Postoli 2:13-41\nApa weyire Mupepo Ghokupongoka waNyambi kwawa kathishongero mu mbara dha Jerusalema muditunga dya waJuda. Mo ro ruvedhe hengi haJuda muJerusalema awa ha shwayire kumatunga ghokutjaka -tjaka mu kuna djabwana difeste dyawa Juda. Ha ghambire mandimi ghokuku tjaka -tjaka. Mupepo Ghokupongoka wa ghamwenine hakathishongero waJesusi kughamba mandimi ghomahe gha, podiyo hanu hayuve no kutjwathana mbudhi dha Jesusi hekudyetu muma ndimi ghawo. Ene hamwe ha ghayarire eshi hakathishongero waJesusi ne hana terera marovu. Ghofotji ghopa wapostoli oyu hana kutoya eshi Petrusi ghemanine no hadikumi no yofotji. Ko kughamba kumbunga eshi, \"Hanu wane mbadi hana terera thikadyodi muna kughayara, ene hana yara naMupepo Ghokupongoka.\" Petrusi gha wa tongwerire mbudhi dhodhiwa dha Jesusi. Hengi hanu hatawire man̂ando gha Petrusi. No hapwire kuyogha mu kuneghedha eshi hana piruka kumaharwero ghawo. Nawo ha tamburire Mupepo Ghokupongoka ndani hatangire kukutha mayira gha Jesusi. (Mughuma)\nThiperende 4 Ngirishe dho kutanga dhawa Kriste\nYitenda Yawa Postoli 2:42-47; 1 Korinte 11:17-34\nDiyuwa diya hengi hanu muJerusalema ha kuruperire Jesusi no ha karire hakathishongero wendi. Hanu wa ha tamburire Mupepo Ghokupongoka munyima heyire pofotji no ha karire yira diko dyodikuru, ghomatangero gho ngirishe dhawa Kriste. Munyima hanu wa ne, gho ha wethire eshi haKriste. Ha kutaperire ghushwi wawo nokukupakera thinga. Kehe diyuwa nga ha yendanga ku ngirishe dhodhikuru dhaNyambi mu Jerusalema. Nga ha raperanga nokukugha Nyambi pofotji. Ha kathishongero wa, ha karire ha postoli, hahongire yoMan̂ando gha Nyambi. Karo haKriste ngahakuyenderanga kumaghumbo ghawo nokukuyumbura. Roruheya nga ha yondoranga ghuroto no kunwa vinyu nga ha yitoyanga eshi Murarero waFumu. Jesusi yo gha rawerire hakathishongero wendi ha yi tendange thika dyo. Mughuthiku ghu ya kughutho ghokamupamarera, gha karire no murarero nawakathishongero wendi. Apa gha manine kutumera, gha shimbire ghuroto ghumweya, no gha ghuyondorire kokughupa hakathishongero wendi. Ghuroto kuna kuneghedha eshi yirama ya Jesusi eyi yakuwanyandera pathikurushe. Shime karo Jesusi gha shimbire kopi ghovinyu gha pire hakathishongero hanwe. Yinwa ne kwa karire yo kuwavurukitha manyinga ghendi ghagha ghakuwandendeshera pathikurushe. Jesusi gha rawere hakathishongero wendi eshi ha yi tendange kehe pano kumavurukero ghendi. Podiyo keheyu gha kurupera nokukutapa thinda kwa hekudyetu Jesusi naye karo gha fumaneke Murarero wa Fumu thika dyo di ghana kughamba Man̂ando ghaNyambi eshi, \"Ngeshi oku muna kudya ghuroto nokunwa kopi yu, muna kuyuvitha yifa ya Fumu kate gha kwiye.'' (Mughuma)\nThiperende 5 Katughuru ghomukumberedhi ghothi hwere ghana kwiruka\nYitenda Yawa postoli 3:1-4:4\nDiyuwa dimwe Petrusi na Johanesi ha yendire kutembeli waNyambi ha ka raperere. Muka mukumberedhi gha hungumanine pathero. Gha karire thirema kutunda kumushamurukero wendi mbadi wakuyenda. Gha rombire haPetrusi na Johanesi manyinga. Petrusi gha mu ningire eshi, \"Manyinga ne mbadiko me, ene eyi na wana na kuyikupa. Mudina dya Jesusi Kristusi ghomuka Nasareti, wimane ghuyende!\" Petrusi ghakwatire katughuru yu padyoko dyorudyo gha mughamwene kwimana. Popo maghuru no mangongotji gha tanarire. Gha yendire mutembeli waNyambi naPetrusi naJohanesi. Gha yendire ghuregha noghukugha Nyambi. Mbadi Petrusi gherukithire katughuru yu. Matawero gho mwa Jesusi no ngcamu dhaNyambi mwa Mupepo Ghokupongoka dho dha mwirukithire. Gha wanine thitapa tho thikuru kupiterera masherenyi. (Mughuma)\nThiperende 6 Hanu namunuwendi awa hangerekire\nYitenda Yawa Postoli 4:32-37, Yitenda Yawa Postoli 5:1-11\nKatughuru oyu ha toyire eshi Baranabasi gha ghurithire dipya dyendi no gha shimbire manyinga gha gha tapire kungirishe haka ghamwenitheko hahepwe. Hanu namunu wendi, ghodina Ananiasi naSafira, ha kuyuvire ha tende thika dyo. Ene Ananiasi gha horekire manyinga ghamwe no gha munu wendi. Gho ha retireko dihenda dyo manyinga kwaPetrusi. No hangerekire Petrusi, mukumutongwera eshi po ghana hurera manyinga. Petrusi gha yi dimukire eshi kuna kwangera, no gha ningire kwa Ananiasi eshi, \"Ananiasi, ngepi di gha nengena Shatani mumutjima ghoye nokwangera Mupepo Ghokupongoka, gho ghuna horeka manyinga ghamwe agha ghuna wana mudipya dyoye? Mbadi munu ghu nangera ene Nyambi.'' Popo Ananiasi gha wire no gha fire. Ha ngaghu hamu shimbirepo no ka mu vumbeka. Popo Safira naye kokungena. Kadi gha dimukire eshi yinye yina hokoka kwa Ananiasi. Safira naye ghangerekire Petrusi yo manyinga. Petrusi gha ningire eshi, \"Ngepi di sho kone kwangera Mupepo waFumu? Kenge! Mapadhi ghowa hana ka vumbeka mu kafumu ghoye tamba ha kume muthero nowe karo noha kushimbe.\" Popo naye gha wire ku mapadhi gha Petrusi no gha fire. Ananiasi na Safira mbadi ha fumanekire Nyambi no Mupepo wendi pakwangereka. Ha kuneghire hahunga, napone hahorekire ko manyinga ghawo ghamweya. Nyambi ne gha dimuka yitenda yetu yoyiwa noyighayara yetu yoyimango. Kadiko yokunda kukwendi. (Mughuma)\nThiperende 7 Stefanusi hana kumupagha\nYitenda Yawa Postoli 6:1-8:3\nKenge! Mbunga dhawanu hana kuvukuma katughuru ghodina dyo Stefanusi. Gha karire mupiterethi gho mungirishe, kughamwena hahepwe homu Jerusalema. Ghahongire hanu Man̂ando gha Nyambi no gha tendere yitetukitho mungcamu dha Mupepo Ghokupongoka. Ene haJuda hamwe ha mwiman̂anyenine. Ha mu shimbire Stefanusi kundhango no kumurundera eshi ghana shamuna Nyambi no kwiman̂anyena Man̂ando ghendi. Ene Stefanusi kadi gha yapire, yoyishi Nyambi gha mu pire ngcamu paMupepo Ghokupongoka. Stefanusi gha tongwere haJuda eshi yamwe mwa payire Jesusi oyu gha retire moyo ghororuheya kwa wanu. Munyima gha di ghamenine kudiwiru gha monine Jesusi ghanemana kurudyo rwa Nyambi mughufumu wendi. No gha ningire eshi, \"Kenge! Na mono diwiru dina yandhuruka namwana munu gha nemana kurudyo rwa Nyambi!\" Ha Juda ha patire thikuma no ha paranyine Stefanusi ha mu shwayithe panunda dho mbara gho ha tangire kumuvukuma nomawe. Oku shime hamuvukuma, gha raperire eshi, \"Fumu Jesusi, tambure mupepo wange.\" Apa gha fire, gha kughererire eshi, \"Fumu, wawa wedherera ko no diharwero dino.\" Harume wa ha vukumine Stefanusi nomawe ha turire yitere yawo kumapadhi gha mungaghu ghomu Juda ghomupiterethi gho dina dyo Saghulu. Gha yi kumonene yifa ya Stefanusi. Ngambi dyarero hanu wa hana kushana kufumaneka nokukarera Jesusi, awo kuwakutha-kutha hanu hohayi. Ene Nyambi noMupepo wendi Ghokupongoka kadi mbo gha wa thigha, ngambi hanu ha kuwapaghe. (Mughuma)\nThiperende 8 Muka Ethopiya muruyendo\nYitenda Yawa Postoli 8:4-8, 26-40\nMu diyuwa di Saghulu, no hanyathi hamwe wawa Kriste mu ngirishe, gha tangire makuthakuthero kwawa tawi muJerusalema. Hengi ha tjirire hashwaghe mumbara. Katughuru gho dinashi Filipusi gha yendire kumbara dha Samariya. Gha katongwere hanu yo mbudhi dhodhiwa dha Jesusi no hengi ha tawire. Ndani kupitera mwamu engeli, Nyambi gha tongwere Filipusi eshi, \"Kuroyithere ghu yende mu mamboreya mundhira dho kushwagha ku Jerusalema dhi tambe ku Gaza.\" Filipusi gha tendire thika di gha mu ningire Nyambi. Pa thiperende tuna kumona katughuru ghomukadikuto ghana kutunderera kuditunga dya Ethopiya. Ghana kuyenda muditemba. Ghatoyire Man̂ando ghaNyambi mu mbapira dha Jesaya yokuhatera kwaghumweya ghoyu mbo gha nyanda thikuma, ene muka Ethopiya mbadi gha tjwathanine ko yi ghatoyire. Mupepo waNyambi wamutongwerire Filipusi eshi, \"Yende kuditemba diya.\" Filipusi gha tjirire ko no gha yuvire eyi ghana kutoya. Gho gha mwipurire eshi, \"Yo yi ghutjwathana eyi ghuna kutoya ndi?\" Katughuru yu gho gha huthire eshi, \"Ngepi di sho ni yi tjwathane, shimengwa ghumwe shogha yinitjwathanithe?\" Thipindhi tho yitjanga thi ghatoyire ne eshi, \"Thika ndjwi yu hana kutwara kukumupagha. No thika ndjwighana yu ghana kuporera pakumukurura, no mbadi gha yahurire kanwa kendi. Ha mushwahurire ene mbadi gha huthire. Gha fire kupira nohana. Moyo wendi ha ghu shwayithire mukaye.\" Mukatughuru yu ghomu Ethopiya ghepurire kwaFilipusi eshi, \"Nakanderera ni tongwere, kwadye ghana kughamba muporofita pano? Ku kwendi thinda ndi, endi kwa ghumweya?'' Filipusi gho gha tangire kutjwathanitha katughuru yu yo kwahekudyetu Jesusi oyu gha tumine Nyambi. Muka Ethopiya naye gha shanine kukutha Jesusi. Oku shime hana kuyenda pofotji gha ningire kwaFilipusi eshi, \"Kenge, meyu ne gha. Yinye karo sho yi ni shinge ku niyogha?\" Fillipusi gha yoyire muka Ethopiya no gha hukire ghushamberera kuditunga dyendi. Filipusi shime ghaka yuvithire mbudhi dhodhiwa mu mambara ghomengi. (Mughuma)\nThiperende 9 Yimonekera ya Petrusi yoyiyama\nYitenda Yawa Postoli 10:9-18\nDiyuwa dimweya Peturusi gha dhinine pamutuya gha karaperere. Gha ka fire ndhara thikuma, gha shanine yokudya. Popo kokumonekera yinu yimweya eyi ya pwire kutuma kwaNyambi. Gha monine dikehe dina kushuruka mudiwiru no yiyama yomarudhi gho mahe mwishi dhadyo. Diywi dya ningire kwa Petrusi eshi, \"Petrusi, wimane. Paghe no dye.\" Petrusi ne muJuda no gha karire mu muragho wawa Juda oghu waninga eshi, yiyama yi gha monine mbadi ya kushuka mbadi wakuyidya. Petrusi gha huthire eshi, \"Mbadi kemo, Fumu! Shime ni shemwa eshi kokudya yinu yokudhira kukushuka.\" Ndani diywi dya gha mbire eshi, \"Wa piritha ghukushuki yinu yi gha kushukitha Nyambi.\" Ya hokokire paruhatu ndani dikehe ha di huthire mudiwiru. Oku shime Petrusi handhu-ndhu eshi yinye yina kuninga yi monekera yi, harume hahatu heyire nohashane Petrusi. (Mughuma)\nThiperende 10 Mbudhi dhodhiwa kumarudhi ghomahe\nYitenda yawa postoli 10:1-8,19-48\nHa tutughuru hahatu hatundire mumbara dhimweya awa gha tumine murume ghodina Koronerighusi. Koronerighusi gha karire mukuru wawakayita waRoma. Gha fumanekire Nyambi no kumukarera. Mu engeli wa Nyambi gha mu hokokerire no gha mu tongwerire eshi gha yende ghaka wane Petrusi. Ha Juda edi ha yi dimukire eshi haka Roma ne mbadi ha kushuka, ene Nyambi gha neghedhire Petrusi yimonekera eshi mbadi gha kona kutoya munu eshi mbadi ghapongoka. Nyambi gha tambura hanu homu marudhi ghomahe awa hamuyapa no kutenda yoyihunga. Petrusi gha yendire noharume wa kudighumbo kwamushurundate gho muka Roma. Koronerighusi apa gha monine Petrusi, gha werere kumapadhi ghendi gha mu fumaneke, ene Petrusi gha ningire eshi, \"Wimane. Na me no munu vene. Kukona ni kwipure eshi yinye muna ni shanena?\" Koronerighusi gha tongwere Petrusi yo kwa mu engeli. Petrusi gha ningire eshi, \"Apano ne yinanikenena keho eshi, Nyambi ne mbadi gha taghura.\" Munyima shime gha mu tongwerire Koronerighusi yo kuhatera kwa Jesusi yu gha hokorire Nyambi kwa wanu. Koronerighusi nawakadiko dyendi ha tawire mwa Jesusi, hatamburire Mupepo Ghokupongoka wa Nyambi no ha karere Nyambi. Nyambi gha haka haguva wahe, yi kare eshi ndimi, rudhi endi rudhi ro thikova munye. Jesusi mbadi gheyire mukughamwena haJuda pithawo keho. Gha shana kutapa moyo ghororuheya kwa hanu wahe. Gha shana marudhi ghomahe eshi ha mu kurupere no kumu karera. (Mughuma)\nThiperende 11 Petrusi mukashitiko\nYitenda Yawa Postoli 12:1-11\nFumu wawa Juda, Herodesi, gha tangire ku kutha-kutha hakareri wa Jesusi, ngirishe dhawa Kriste. Gha kwatire Jakobusi no gha mu payire, petrusi gha mu turire mukashitiko. Ghuthiku ghumweya petrusi, ha mu ghangire nomenge mawadi, po gha rarire mukatji kawa kungi. Popo mu engeli gha mupinduthire petrusi no kumuninga eshi, \"Tambuke, wimane!\" Popo menge ghawire mu moko gha Petrusi. Gha kuthire mu engeli panunda dho kashitiko. Mayongaghothero dho kashitiko gha yandhurukire ghathinda no yofotji temba ghawa shingire. Petrusi gha ghayarire eshi ne yirota, kate gha kakumine panunda dho thitarata namu engeli gha dhongonokire. (Mughuma)\nThiperende 12 Hayendha Petrusi hana kuraperera\nYitenda Yawa Postoli 12:12-19\nOku shime gha karera Petrusi mukashitiko ha yendhendi ha kukongwedhire ha mu rapererithe. Apa gha shwayire Petrusi mukashitiko gha yendire kundhugho dhi ha karire thingi thohatawi, ha karire ghuthiku ghuya ghurapereritha Petrusi. Petrusi gha ngongonine pathero nomupika ghombuyama gho dina Roda gha yendire eshi gha ka yandhurure. Ene apa gha ka yuvire diywi dya Petrusi, mbadi gha ka yandhururire thero, gha hukire ghutjira nokuna tongwera hamweya eshi, \"Petrusi pathero!\" Mbadi ha yi tawire, gho ha ningire kwa mbuyama eshi, \"Ghuna ghundumuka.\" Ene Petrusi gha ngongonine shime. Apa haka yandhurire haka mu monine gha nemana, wahe ha tetukire. Petrusi gha wa tongwere eshi ngepi di ghana hutha Nyambi mandapero ghawo no ngepi di ghana mu shwayitha mukashitiko. Nyambi kuyuva nokuhutha mandapero ghowa ha tawa mumwendi. Jesusi gha ningire karo eshi, \"Ngeshi mwawadi hamu kuyuvu thinu pano pakaye nokuthikumbera mbo ghana thi mu tendera Tate ghomudiwiru. Ngeshi hawadi endi hahatu gha ha kara pofotji mudina dyange, name nawo ni di.\" (Mateghusi 18:19-20).\nMwingeneno 2\nMuyiperende yi yina kurandako n̂anyi ni kutongwere yokuhatera kwa katughuru gho dina Saghulu, munu yu gha karire payifa ya Stefanusi. Munyima dho yifa ya Stefanusi, Saghulu po gha tokorire kuyenda kumbara dha Damaskusi. Gha shanine ka kwata hatawi no ka wa tura mukashitiko. Mu ndhira dhawo yinu yo yi tetukitho ya hokokire. (Mughuma)\nThiperende 13 Thishe no diywi dyokushwagha mudiwiru\nYitenda yawa postoli 9:1-9\nOku shime gha karera Saghulu mundhira dhokuyenda ku Damaskusi thishe thothikuru tha shwayire mudiwiru thiwere pamuve. No diywi dya ghambire eshi, \"Saghulu, Saghulu yinye ghuna kuni kutha-kuthera?\" Saghulu ghepurire eshi, \"Yowe dye, Fumu?\" Diywi dya ni ngire eshi, \"Yame Jesusi, ghuna ku kutha-kutha. Wimane ghu yende mumbara, n̂anyi haka kutongwere eshi nye sho tende.\" Hatutughuru wa ha karire na Saghulu nawo ha yuvire diywi, ene mbadi ko yi ha monine. Saghulu ghemanine, ene mukunga. Ha mu kwatire padyoko ha mu tware ku mbara dha Damaskusi. Mayuwa mahatu Saghulu mbadi gha konine kumona. No mbadi gha dire nokunwa temba. (Mughuma)\nThiperende 14 Saghulu ghomukunga na Ananiyasi\nYitenda Yawa Postoli 9:10-20\nPano kuna kumona mukunga Saghulu mundhugho mu Damaskusi. Nyambi gha tumine murume gho dina Ananiyasi kukwendi. Ananiyasi mutawi no gha kuthire Jesusi Kristusi. Gha dimukire eshi Saghulu mukukutu kwa watawi homu Jerusalema. Ene Ananiyasi, ngambi kemo, gha tawire ya Nyambi no gha yendire kwa Saghulu. Ananiyasi gha ghambire kwa Saghulu eshi, \"Muyendhange Saghulu, Fumu Jesusi, oyu nga kuhokokera mundhira apa ngawiya kuno, yo ghana ni tumu eshi ghumone karo ndani gho yare keho naMupepo Ghokupongoka.\" Ananiyasi gha kambekire nyara pa Saghulu ndani Saghulu ghukunga wamushwayire popo. Gha tamburire Mupepo Ghokupongoka wa Nyambi no ha mu yoghire gha neghedhe hanu eshi aye ne mukakukutha Jesusi. Ndani Saghulu gha yendire kwa waJuda gha ka wa tongwere yokuhatera kwa Jesusi. (Mughuma)\nThiperende 15 Ngirishe dhinakuraperera mukutuma hayuvithi\nYitenda Yawa Postoli 11:25, 26; Yitenda Yawa Postoli 13:1-3\nMudoropa edhi ha toya eshi Antiyokiya, mbunga dha wa tawi ha karire pofotji nokukugha Nyambi. Ghodhi mbunga dha wanu wa, dho dha karire ngirishe mu Antiyokiya. Wo hanu ho kutangerera awa ha toyire eshi haKriste. Saghulu na Baranabasi ha yendire nawo eshi ha kahonge hanu koko. Diyuwa dimwe hakuru hongirishe ha dhirerekedhire nokurapera pofotji. Mupepo Ghokupongoka wa ghambire eshi, \"Mushwayithe haBaranabasi na Saghulu ha yende ha ka rughane eyi na wethera.\" Nyambi gha shanine Saghulu na Baranabasi ha yende kwa wanu wa ha dhira kuyuva yokwa Jesusi. Yoyi ghu mona ha Saghulu na Baranabasi hana tongamena pathiperende thi. Hakuru hongirishe hana kuwakambeka nyara no kuwaraperera. Ha tumine Saghulu na Baranabasi haka honge mbudhi dhodhiwa dha Jesusi kudyango dyo kayenda kushwagha mu Antiyokiya. Man̂ando gha Nyambi kutuhonga twe eshi, \"Muyende mu kaye kokahe, mu ka yuvithe mbudhi dhodhiwa kumarudhi ghomahe.\"\n(Markusi 16:15) (Mughuma)\nThiperende 16 Paghulusi ghana kuyaghura yokuhatera kwa Jesusi\nYitenda yawa postoli 13:4-54\nSaghulu na Baranabasi ha yendire kumango ghomengi no mikunda dhodhingi dho kayenda. Ruvedhe ruya Saghulu ha mu tire dina dyodipya eshi, Paghulusi. Nga ha kuwananga nawaguva mumayugho ghawa Juda gho kuraperera, thika dyo di ghuna kumona pa. Ha hongire eshi, \"Nyambi wo hanu wa Isragheri gha tororire ha wihetu noku watenda diko dyodikuru. Gha wapire haporofeta, hapiterethi no hahongi. Ha ghambire ko yu mbo gheya mu kuna wa ghamwena ku maharwero, aye ne yoFumu Jesusi. Apa gheyire Jesusi, haJuda hohengi mbadi ha mu tawire. Mbadi ha tjwathanine eshi yo dye no mbadi ha mu rapererire oyu gha pwire kutuma kwaNyambi. Mu tegherere kukwetu, mbudhi dho makomweneno ha dhi tupa. Hanu homu Jerusalema no hapiterithi wawo mbadi ha di mukire eshi, Jesusi ne yo dye. No mbadi ha mu tjwathanine man̂ando gha waporofeta agha nga hatoyanga mu kehe Shabata. Ha nyathire Jesusi thika kenge ha yi ghambire haporofeta. Ngambi kenge ha pirire kuwana mu mwendi murandu ghokumupagha, ha kumberire Pilatusi eshi, ha mu paghe. Munyima dho kufa Jesusi, ha mwamburire pathikurushe no ha mu turire mumbira. Ene Nyambi gha mu tumunine mwawa fu! Ndani mu mayuwa ghomengi Jesusi nga kuhokoranga kwawa kuthi wendi. Ho digho hana kutongwera haguva wetu yokuhatera ku kwendi. Aye mbadi mbo gha fa karo.\" Podigho Paghulusi gha ningire eshi, \"Mwayendhange, mutegherereshi! Atwe tuna muretera mbudhi dhino: kupitera mwa Jesusi maharwero ghenu ghana kupwa kuthigherera. Keheyu ghokukurupera mwa Jesusi mbo ghana mutambura Nyambi, no mbo ghana shutuka. Ghundambo wawo na Nyambi wapwa kuroghitha. Ene wa hana kutamangera no kunyatha ghushemwa wa Nyambi, n̂anyi mbo gha wa dhongonona Nyambi.\" HaJuda hamweya no hanu homu marudhi ghawo nawo hengi wa ha tawire mbudhi dhi, no ha tatekire mangirishe ghomengi, ene hamweya ne mbadi hatawire. Hanu roruheya mbadi wa kukona ku tawa ngeshi oku tuna kuwatongwera mbudhi dho kwa Jesusi. Ene Nyambi ghana haka hanu wahe ha yuve no hatawe mbudhi dhodhiwa dha Jesusi podigho eshi hapwe kughamwena. (Mughuma)\nThiperende 17 Paghulusi gha monine rupara rwa muka Masedoniya\nYitenda Yawa Postoli 16:6-10\nMa myaka gha ka pitirepo Paghulusi gha ka dhingurire mangirishe gha karo. Gha yendire noharume hohapu, nakatughuru ghodina Silasi. Ha shanine kuyenda kuditunga dya Betaniya, ene Mupepo waJesusi mbadi wawa tawedhere kuyenda ko. Mughuthiku ghogho Paghulusi gha monine yimona. Muyimona gha monine katughuru ghomuditunga dya Masedoniya oyu gha ghambire kukwendi eshi, \"Mwiye kuno kuMasedoniya no mu tu ghamwene.\" Popo Paghulusi gha dimukire eshi Nyambi ghana mwitha gha yende kuMasedoniya. Nyambi mbo ghana neghedha wa hana kushana kukutha Jesusi. Parumweya ghana kutuneghedha muyirota endi muyimonekera, ene thikumapo ne ghana kutuneghedha kupitera muman̂ando ghomumbapira dhendi Bayibiri, no kupitera mwaMupepo Ghokupongoka mu mutjima dhetu. (Mughuma)\nThiperende 18 Paghulusi na Silasi muma kin̂eno ghomuve\nYitenda Yawa Postoli 16:16-35\nPaghulusi na silasi ha karire ghutawedhi kwa Nyambi no ha yendire ku Filipusi muMasedoniya. Ha ka hongire hanu yo kwa Jesusi. Mudina dya Jesusi ha ka shwayithire mupepo gho ghumango mwa mu kamadighana. Ya tendithire hanu hamweya ha pate, yoyishi nga ha wananga manyinga ghomengi koyumukamadighana oyu ngapumbanga yo kughutho ene pano keho ne hana yongaritha yiwana mo yawo. Gho ha kwatire haPaghulusi na Silasi no kuwatwara kumuragho. Haka muragho ha pumurire ha Paghulusi no kuwatura mukashitiko. Pakatji koghuthiku Paghulusi na Silasi harapere nohembire ha kughe Nyambi mukashitiko, oku haka kashitiko hamweya pakuwategherera. Popo ko kukara makin̂eno ghomuve. Mathero gha yandhurukire nomenge ghawa kakashitiko gha shutaghukire. Mukakukunga kashitiko, gha ghayarire eshi hakakashitiko ne hana shwagha. Gha yapire thikuma no gha shanine kukupagha thinda. Paghulusi gha mu kughererire eshi, \"Wa kupagha ghothinda! Twahe mo tu di muno!\" Mukungi gha shimbire munyenge, gho gha reghere mwishi nokuwera kumapadhi gha Paghulusi na Silasi ghututuma. Ndani gha wa shwayithire ha Paghulusi na Silasi no kuwaninga eshi, \"Mwaka dikuto, yinye sho ni kone kutenda ni pwe kughamwena?\" Ha mu huthire eshi, \"Tawe mwa Fumu Jesusi, no n̂anyi ghu pwe kughamwena nodighumbo dyoye.\" Mukungi nohakadighumbo dyendi ha kuruperire mwa Fumu Jesusi no ha karire noyishamberera yoyikuru. Mukungi gha ghamwenine Paghulusi na Silasi no pamathikuthiku hawa shwayithire. Ha ka yendire hana shutuka. Ngeshi mumanako maghukukutu tu di twa kona kukugha shime Nyambi. (Mughuma)\nThiperende 19 Paghulusi nothinyaku thaNyambi wayenaye\nYitenda Yawa Postoli 4:12; 17:16-34\nPathiperende thi Paghulusi ghana kukenga kuthinyaku. Hatjanga po eshi, 'kwa nyambi ghokupira kudimuka.' Thinyaku thi themana mumbara dha Atene. Ya karire mo yitwandjo yo yingi, yoyishi hanu homu Atene ha rapererire ha nyambi hohengi hokukutjaka-tjaka. Kadi ha dimukire ghushemwa na Nyambi ghomuyumi. Hanu homu Atene ha shanine kudimuka ko yi ghana kuhonga paghulusi, no gha wa ningire eshi, \"Mwa ka Atene! Na mu mono eshi, mwaka kukarera hanyambi. Apa na yendaghura gho na mono thiwana mango gha mwa rapereranga, na kawana thinyaku noyitjanga po eshi, 'Kwa nyambi ghokupira kudimuka'. Nyambi yu mwa rapereranga oyu mwa dhira kudimuka, yoyunina kumutongwera yoku hatera kukwendi.\" Paghulusi gha watongwere yo kwa Nyambi oyu gha tenda yoyihe. Aye ne yo Fumu gho diwiru nomuve. Mbadi gha kara mutembeli ghokutenda hanu no nyara dhawo. Paghulusi gha wa tongwere ha dimuke Nyambi mwa Fumu Jesusi, oyu gha tumunine mwa wa fu. Hatutughuru hamwe ha hekire Paghulusi, ene hamwe ha shanine kukuhonga yokuhatera kwa Jesusi Kristusi ndani hamwe ha tawire muMwendi. Jesusi Kristusi yo mukomononi. Kadiko haNyambi hamwe no mbadiko ghukareri ghokukona kushutura hanu mudiharwero no muhonyi. (Mughuma)\nThiperende 20 Paghulusi hana kumutwara kundhango\nYitenda Yawa Postoli 18:1-17\nThika kenge ghuna kumona pathiperende, Paghulusi mughukukutu gha di. Aye ne mumbara dha Korinte. Hanu hohayi hohengi ha karire mudoropa dhiya. HaYuda mu Korinte heman̂anyenine Paghulusi, pamurandu gha wa hongire yokwa Jesusi eshi yoKristusi endi Mesiya, oyu gha pwa kutorora kwaNyambi thinda. Ghuthiku ghuya Fumu gha ghambire na Paghulusi eshi, \"Wa yapa; ghambe shime, nowaporera. Ame ne noye ni di, noyofotji temba yu sho gha kumbandukere endi kukushinya, yoyishi hengi haguva wange mo dhi mbara.\" Na Paghulusi naye gha karire mu Korinte mo gha hongire hanu, ndani hengi ha tawire kuman̂ando ghendi. Ene haJuda wa hamu rwithire pamurandu ghonya. Diyuwa dimwe ha mu kwatire Paghulusi ha mu tware kundhango. Haka mu runderire eshi yo mbango ghana kuhonga. Ngambi kemo, nguvuru kadi gha wa tegherere no gha wa shwayithire mo mu ndhango. Ene Paghulusi ha ka mu thighire no gha katwarire shime kughutho kutongora ya Jesusi, gha kuwanekerire no meman̂anyeno. (Mughuma)\nThiperende 21 Hamashurundate hana kughamwena Paghulusi kwawan̂ore dhendi\nYitenda Yawa Postoli 21:1-22:24\nPaghulusi gha kahukire na gha kenge endi kudhingura mangirishe ghomapya. Gha tjokedhire hatawi eshi ha tware shime kughutho kukutha Jesusi. Hatawi ha mu kandererire Paghulusi eshi kadi gha yende ku Jerusalema karo. Ha yi dimukire eshi hengi han̂ore dhendi awa ha shanine kumupagha. Ene Paghulusi gha huthire eshi, \"Na kuroghithera mbadi kunikwatakeho, ene mukafa mu Jerusalema mudina dya Fumu Jesusi.\" Apa gha kakumine muJerusalema, haJuda hadhongerire hanu ha mu nyenge. Mbunga dha shanine kumupagha muthitata. Ene mashurundate ghawakaRoma ha shimbire Paghulusi mu mbunga dho wa hapatire. Ene Paghulusi ghemanine po kuyeyuka mudyango dyawamashurundate. Gha ghambire kwa waguva eshi ngepi edi gha kuwanekerire na Jesusi nokumukutha. Ene haguva ha tangire kukuyerera eshi, \"Mu mu Paghe! Mbadi gharoghera kupara!\" Hamashurundate ha shimbire Paghulusi no haka muturire mukashitiko mu kumughamwena kwawahanu. Paghulusi mbadi gha yapire kufa. Gha dimukire eshi yiruwera yoyikuru yina tatera mudiwiru kowa hana kunyandera pamurandu waJesusi. (Mughuma)\nThiperende 22 Paghulusi ghana kuyawera haka makuto\nYitenda Yawa Postoli 23:11, 25-26\nPaghulusi gha karire mukashitiko myaka dhiwadi. HaJuda ha shanine kumupagha shime, ene Fumu Jesusi gha hokokerire kwaPaghulusi no ghamu ningire eshi, \"Tjimape! Thika kenge di waninongononine muJerusalema, wa kona kaninongonona karo muRoma.\" Hakuru wawa Juda ha runderire Paghulusi kughutho wa nguvuru wawa kaRoma nohamu tumine kwa Agiripa, fumu wawa Juda. Paghulusi mbadi ko yu gha yapire, gha tongwerire nguvuru, na fumu nawaherekadhi yokuhatera kwa Jesusi. Gha wa tongwere eshi ngepi gha mu hokokere Jesusi mundhira dhokuyenda ku Damaskusi no ngepi di gha mu tumine Jesusi eshi gha ka tongwere hanu yo mbudhi dhodhiwa kwawanu kehekuno. Fumu Agiripa momu gha tawe mwa Jesusi. Gha dimukire eshi Paghulusi kadiko thothimango thi gha tenda. Paghulusi ghaka hokokire karo kwa fumu shokuru waRoma. Ha shanine kumupangura fumu shokuru kuya. Ene Agiripa gha tawedhere Paghulusi eshi gha yende. Roma dha karire mbara dhodhikuru mukaye dhomarawero, mo ha tungire haraghuri hashokuru. Nyambi gha karire nodighano dyodiwa kwa Paghulusi. (Mughuma)\nThiperende 23 Paghulusi mu maghukukutu\nYitenda Yawa Postoli 27:13-44\nHamashurundate ha shimbire Paghulusi nohakakashitiko hamwe kuRoma. Ha yendere muthikepa thothimbiru ha tjinaghane dikuruviya. Mumayuwa dikumi nomane ene thikepa thakuwanine nodingundunga dyodikuru thikuma. Ene hanu muthikepa ha ghayarire eshi kuna kufa. Mu engeli wa Nyambi gha ningire kwa Paghulusi eshi, \"Wa yapa, Paghulusi. Wa kona kemana kughutho wa muraghuri shokuru ghoghufumu waRoma ndani Nyambi gha di no thin̂eke eshi, gha ghamwene awa muna kuvugha nawo.\" Popo thikepa theyire pepi nondundu no tha payaghukire mu meyu ghoma kandami. Hanu ha regherire mudikuruvigha. Hamwe hakonine kuyogha, nohamwe hakakaterire kuyipindhi yothikepa. Wahe haka kavere thiwana. Moyi kuna kutuhonga eshi, ngeshi Nyambi ghana tupa yirughana eyi sho tu tende, aye ne ngcamu mukutughamwena kukehe ghuno ghukukutu. (Mughuma)\nThiperende 24 Paghulusi mukashitiko muRoma\nYitenda Yawa Postoli 28:16-31; HakaRoma 8:38, 39\nPano tuna kumona Paghulusi muRoma. Gha karire mukashitiko myaka dhiwadi muRoma. Ha mutawedhere gha karange mundhugho dhendi dhokuruwera oku mashurundate ghaRoma pakumukunga. Gha tamburire yomuhe yu ngeyanga na gha mu dhingure. Gha wa hongire yokuhatera kughufumu waNyambi noya Fumu Jesusi. Paghulusi karo gha tjangire mambapira kumangirishe gha nga dhinguranga kughutho ghokumukwata, mu kuwahonga shime. Mambapira gha ne gho gha di mu Bayibiri kuhonga hanu mayira gha Nyambi. Paghulusi gha nyandire pamurandu wa Jesusi no pambudhi dhodhiwa. Roruheya nga wananga mamwashwero nokumuvukuma nomawe, nondhara nokupira dighumbo. Paghuhura ha mu payire hakaRoma. Ene mbapira dhokutanga kwawakaRoma hohatawi gha tjangire eshi, \"Ghana ninongononitha mbadiko yifa endi moyo, ha engeli endi mupepo dhodhimango, yo pasha dyarero endi yokughutho, endi mangcamu, ghure endi ghudhungi, kehethino thivareka, ethi thokukona kutu shwayitha kuruhakitho rwa Nyambi ghoru ru di mwa Kristusi Jesusi ghohekudyetu.\" Nyambi kutapa ngcamu kowahe hatawi nowa ha mu kareranga Jesusi Kristusi. Tutape keho moyo dhetu mu mwendi. Tukarere mu mwendi no tu hanyithe man̂ando ghendi mukaye kokahe po digho ha dimuke eshi, Jesusi kutapa moyo ghororuheya naNyambi.\nGhuhura","id":"<urn:uuid:6dd66138-d76b-4b79-a46d-8aa39bbe85de>","dump":"CC-MAIN-2019-39","url":"http:\/\/globalrecordings.net\/km\/script\/mhw\/425","date":"2019-09-22T20:53:14Z","file_path":"s3:\/\/commoncrawl\/crawl-data\/CC-MAIN-2019-39\/segments\/1568514575674.3\/warc\/CC-MAIN-20190922201055-20190922223055-00291.warc.gz","language":"mhw","language_score":0.9998685122,"language_script":"Latn","minhash_cluster_size":61,"top_langs":"{\"mhw_Latn_score\": 0.9998685121536255}","num_words":4395,"character_repetition_ratio":0.069,"word_repetition_ratio":0.0,"special_characters_ratio":0.18,"stopwords_ratio":0.272,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"text":"1. Kenge, tegherere ndani pare mbapira 1 Matamekero na Nyambi\nOutline: Adam, Noah, Job, Abraham. 24 sections. It has a picture book to go along with the recording.\n|Script Number:||418|\n|Language:||Thimbukushu|\n|Theme:||Creation; Multiple themes|\n|Audience:||General|\n|Style:||Monolog|\n|Genre:||Bible Story|\n|Sophistication:||Simple|\n|Purpose:||Evangelism; Teaching|\n|Bible Quotation:||Direct|\n|Status:||Approved|\nScripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.\nMutara 1 - Mwingeneno\nDiyuwa dyodiwa. Mwiye no tukuhonge yokuhatera kwawanu hokutanga awa ha tungire pakaye. Nyambi edi gha tendire nawo kuna kutuhonga tweyoyingi yokukwendi thinda. Kenge kuyiperende mumbapira dhodhikihu thikadi ghuna kutegherera. Mwa kara makuhongo mu mbapira dha Nyambi, Bayibiri. Fikure kumutara ghumweya kuthiperende thokurandako, apa sho yuve. (Mughuma)\nThiperende 1 Nyambi ghavarekire Adamu no yiyama\nMavarekero 1:1-2:14\nNyambi ghofotji keho. Aye ne mupepo. Gha dimuka yoyihe no aye ne gha kara kokuheya. Pakutanga Nyambi vene pithendi gha karireko; kupirako ye Nyambi mbadiko karo yivareka yoyiyumi yi ya karireko. Nokaye thikadi tuna dimuka pashadyarero, mbadi kakarireko. Nyambi yo gha varekire yoyiheya. Pakutanga gha tendire thishe. Ndani ghatendire diwiru, mavuyi ndani noMuve. Gha yakunuthire dikuruviya kumuve noyimena ya tangire kumena. Ndani Nyambi gha tendire diyuwa, no kaghonda no tutumwedhi.\nGha tendire karo yokupara yoyihe yopamuve no yomudikuruviya. Gha tendire munu kurukungu romuve, ghoghahetherire mumwendi mun̂u ghokuparitha. Aye yomunu ghokutangerera oyu gha parire. Nyambi gha tapire kwa munu dikuto dyodikuru: Aye gha mutendire kuthishwi thendi. Nyambi gha tendire munu eshi, gha mu dimuke podiyo shi mupepo wendi ghu kare pofotji no mupepo wa Nyambi. Kehe yiyedhekera noyirumbera yamunu yakuwire pofotji na Nyambi, no ghayendire pofotji na Nyambi. Nyambi gha mutire eshi Adamu. (Mughuma)\nThiperende 2 Mbuyama wa Adamu\nMavarekero 1:27-28 Mavarekero 2:15-25\nNyambi gha turire Adamu mudipya dyodiwa dyodina eshi Edeni (Paradishi) no gha mu tongwerire eshi gha dikunge. Mwa karire yitondo yokehe marudhi, no thitondo thokudimuka ghuwa no ghuyi no thitondo thomoyo. Nyambi gha rawerire Adamu gha te mena yiyama yoyihe no yinyunyi yoyihe. Yoyirume no yoyikadhi yokupara pano pamuve. Ene mbadipa karire muyendhendi ghokumuroghera ye Adamu. Ndani Nyambi po gha tokorire kutenda mbuyama gha kare muyendhendi Adamu. Nyambi gha rarithire Adamu muturo tushokuru no gha shimbire kapatji koku matji dha Adamu. Kukapatji ka Adamu gha tendithireko mbuyama. Nyambi gha retire mbuyama kwakatughuru. Mukafumu na mbuyama ha karire thiheha, ene mbadi haku fire honyi. Nyambi gha wa kandadhekire eshi, \"Mukwerukurure no muyarithe kaye. Muyarithe kaye nokukaraghura. Mwa kona kuraghura thi dhomudikuruviya, no yinyunyi yomuwiru, no yiyama yoyihe yo mukaye.\" Gha wapire karo yimena no yitondo yoyihe yokwimambuyo dhokudya. (Mughuma)\nThiperende 3 Thiyoka mu dipya\nMavarekero 2:16-17; 3:18; Isiah 14:12\nMu dipya, Nyambi gha raweghere munu, Adamu, \"Kukona ghu dye kukehe thitondo thomudipya; ene mbadi wa kona kudya kuthitondo tho kudimuka ghuwa no ghuyi, ene ngeshi wa kudyeko mbo ghuna fu yoshemwa.\" Ene Shatani gha hongaghurire muna Adamu. Shatani ne dye? Aye gha karire mu engeli wa Nyambi, gho gheman̂anyenine Nyambi yu gha mu tendire. Gha shanine eshi gha piterere Nyambi mughukuru, po gha mu vukumenine gha shwaghe mudiwiru, podigho Shatani gha karire keho n̂ore dha Nyambi. Pano keho mudipya, gheyire kwambuyama muthishwi thothiyoka. Gha mwangerekire no haghamba eshi, mbadi wa kufa ngeshi kudya kumbuyo dhi ha wa shweneka, ene ngo mbo ghana kara yira Nyambi, mukudimuka ghuwa no ghuyi. Mbuyama gha dire no gha tapire mbuyo dhimweya kwa Adamu. Pakumana kudyako popo vene kokuyidimuka eshi awo ne thiheha ha di no ha fire honyi. Ha yi kunongononine eshi mbadi ha kutekerire no kupira ghutawedhi kwa Nyambi. No ghundambo wawo na Nyambi wa kutjindjire. Ha tendire ma hako havate no hondere kughutho wa Nyambi.\n(Mughuma)\nThiperende 4 Adamu na munu wendi panunda dho dipya\nMavarekero 3:8-24\nNyambi gheyire kwa Adamu na munu wendi mukughamba nawo kuhatera ko yi ha tendire. Apa ha mu tongwerire eshi ngepi di tha wa hongaghurire thiyoka, Nyambi gha ghambire kwathiyoka eshi: \"Ko yi ghuna tendi, kuna kukupa thikuto, mbo ghuna kokawanga no dira dyoye.\" Nyambi gha tongwerire ha Adamu na munu wendi yitundamo yokumaharwero gha wo. Nyambi gha ghambire kwambuyama eshi: \"Mbo na wedherera tjitju dhoye pakushamuruka.\" Ndani kwa Adamu gha ghambire eshi, \"Yoyishi ghuna tegherera yamunu ghoye no ghunadi kuthitondo, muve ne kuna kughukuta. Mbo ghuna rughana thikuma podiyo eshi wa kuwane yokudya.\" Nyambi gha wa tenderire ha Adamu na Eva yivata yo thikukumba tho thiyama ha vate mudyango dyo yivata yo mahako. Na Nyambi gha wa tjidhiremo mudipya. Adamu gha tire mbuyama eshi Eva, kuninga eshi 'ghuparo'. Herekire hana. No hanu waheya ne hanahoka wa Adamu na Eva. No hanu waheya ho munyima dhawo ne ha pinga maharwero ghawo. Waheya ha harura mukupira kukutekera Nyambi, pamurandu ghoyinuyi, po ha pirera kukara ghundambo na Nyambi. Ene Nyambi gha wa kuruperithire ha Adamu na Eva eshi diyuwa dimweya mbo gha neya mwanahoka wawo mu kuna witha Shatani. Munu yo mbo gha kona kutuhutha kwa Nyambi, mukuhutherapo ghundambo wetu na Nyambi no kutapa moyo ghoghupya. (Mughuma)\nThiperende 5 Noghe no dyato\nMavarekero 6:1-7:5\nHana Adamu na Eva no diko dyokurandako dya tangire kuvura. Ha kuthire mayira gha Shatani no kuyipitha kughutho waNyambi. Na Nyambi gha tokotire thikuma no gha kwerire eshi, nye gha tendeghere munu. Ene pakarire ghofotji munu yu gha karire ghutawedhi kwa Nyambi. Munuyu ne Noghe. Diyuwa dimweya Nyambi gha tongwerire Noghe eshi, \"Amene kuna kuyenda ni kadhimithepo hanu wahe, yoyishi kaye kana yara no ghuyi thikuma. Tende keho dyato dyoye ghothinda. Kuna kuyenda ni katume divavure di kayipithe yoyihe yokupara pakaye. Ene nânyi na kutende ghundambo noye. Wa kona kungena mu dyato na munu ghoye no hanoye hohakafumu no hanu wawo. Ndani wa kona kushimba kukehe thiyama no kukehe thinyunyi thothikadhi no thothirume wakona kungena nayo mudyato, podiyo shi ya kupareko. Wa kona karo kushimba kehe marudhi ghoyidya yenu no yoyiyama no kuyipungura.\" Nyambi gha tongwere Noghe thiwana-thiwana eshi ngepi edi sho ha tende di dyato. Na Noghe gha tendire thika di gha yi mu rawerire Nyambi. Noghe gha yaghurire kwawanu eshi, ngepi di ghokupara mughuhunga no ghundambo na Nyambi. (Mughuma)\nThiperende 6 Divavure dishokuru\nMavarekero 7:6-23\nApa dya pwire kutenda dyato, Noghe, no diko dyendi no yiyama yoyihe yengenine mu dyato, na Nyambi gha yandherire dyato. Munyima dhomayuwa kwoko nomawadi mvura gha tangire kuroka. Gha rokire mayuwa makumi mane nomithiku makumi mane. Meyu ghamwe gha shwaghire mwishi dhomuve no kaye kokahe kayarire meyu no divavure dishokuru. Hanu waheya noyiyama eyi ya karire panunda dho dyato ya fire. (Mughuma)\nThiperende 7 Mutoghomvura ndani matoyedhero gha Nyambi\nMavarekero 7:24-9:17\nNoghe no diko dyendi no yiyama ha karire mudyato ghure ghokupitakana Mwaka. Paghuhura mvura gha kavukire no muve nagho wa kukutire, no ha shwaghire mu dyato. Ndani Noghe gha tendire thinyaku thaNyambi, thika di muna kuyimona pano. Gha payire yiyama yimweya no gha yambire muyambo ghokukon̂erera. Na Nyambi ya mu roghere. Nyambi gha toyedhere karo eshi mbadi mbo gha yipitha karo yopakaye no divavure yo gha turere muto ghomvura kuwiru no dyarerodi. Eyi dyarero kutuvurukitha twe makuruperitho ghendi. (Mughuma)\nThiperende 8 Mushoke wa Baberi\nMavarekero 11:1-9\nNyambi gha tongwerire Noghe no hanendi hohatutughuru eshi ha kwerukure ha kare no hana hohengi no ha yarithe kaye. Ene hana hoka wawo mbadi ha tegherere. Po ha tokwere hakare padyango dhofotji no hatendire mbaradhodhikuru no mushoke ghoghure ghukakume kudiwiru. Ha hakire kukufumaneka hathinda mudyango dyo kuninga shi hafumaneke Nyambi. Nyambi gha monine mbara dhi no mushoke wadho. Gha monine karo kupira ghutawedhi no kukununeka kwawo. Po gha ghambirire Nyambi eshi, \"Ngeshi hanu kughamba ndimi dhofotji no hana tanga kutenda yi, ngo mbadiko yi mbo yi wa kanga kutenda. Tuyende tuka vunga-vunge ndimi dhawo podiyo shi ha pire kukuyuvathana.\" Ha shaghekire kutenda mbara ndani ha yendire ha katunge kumango ghokukutjaka tjaka. (Mughuma)\nThiperende 9 Jobi gha rapererire Nyambi\nJobi 1:1-12\nPakarire murume ghodina dyo Jobi. Jobi gha raperere Nyambi ghoghushemwa ghofotji. Aye gha karire muhungami no gha shwenine kutenda ghuyi. Jobi gha karire no hana kwoko nohawadi ghohakafumu ndani hahatu hohakamadighana. Gho gha yambire muyambo ghohanendi no kwipura Nyambi gha wa thighererepo, pamwe hayipitha kughutho wendi Nyambi. Na Nyambi gha mu hafithire Jobi. Gha mu kandadhekire no gha wanine yoyi ngi. Jobi gha karire no yimuna yoyingi no harughani hohengi. Diyuwa dimweya Nyambi gha tongwere Shatani eshi Jobi ne gha ni hafithire me. Shatani gha tangire kumurundera eshi thitambo tha Jobi thi ghana kareranga Nyambi ne gha wana ghushwi endi ghutungi.\nShatani gha ghambire eshi, \"Ngeshi ghu yi mu shimbe yoyiheya yi gha wana, ngo mbadi gha kukukarera karo ngo n̂anyi gha kukute thikuto.\" Nyambi gha yi dimukire eshi, Shatani ne mukaghumbango; Nyambi gha yi dimukire eshi Jobi ne katughuru ghomuhunga no gha fumanekire Nyambi pithendi.\nPo gha tawedhere Shatani gha kungure yinu yoyiheya ya Jobi mukumuyereka. (Mughuma)\nThiperende 10 Jobi mu thidiro\nJobi 1:13-22\nThiperende thi kuna kuneghedha diyuwa dyodikuru dyo yitokota ya Jobi. Harughani wendi ha mureterire mbudhi dhodhiyi. Murughani ghokutanga gheyire ghutjira no kuna tongora kwa Jobi eshi, hakan̂ore hana pagha harughani waheya no hanedhi mapuru noyi dongi. Nokumana temba kutongora murughani wendi ghumwe kokuna kuma. Noku ghamba shi mushoro ghuna rengi ndjwi no hadithi hondjwi. Waheya ha fire. Gho ghuhatu gheyire no gha tongwere Jobi eshi hashondoro ha neya nokuna homokera ndani gho hana nedhi mangameno. Ghumweya gheyire gha retire mbudhi dhodhimango thikuma, \"Apa hana djabwana hanoye difeste gho di neya dingundunga dina yambaghura mayugho nawomo hana fera momo.\" Pakuyiyuva yi, Jobi gha kururire mutwi wendi no gha werere pamuve muyitokota. Gho gha ghambire eshi, \"Fumu kutapa, ndani Fumu kuhutha; difumane dina dya Fumu.\" Ngambi kenge yoyi heya yoyingi ya hokokire, Jobi mbadi gha harurire no mbadi gha pire Nyambi murandu. (Mughuma)\nThiperende 11 Jobi muyinyanda\nJobi 2:1-41:34\nShatani shi Jobi shime gha fumaneka Nyambi, gha ningire kwa Nyambi eshi, \"Ngeshi ghu yuvithe tjitju yirama ya Jobi, ngo n̂anyi gha kumwaghe nokukukuta.\" Nyambi gha tawe dhere karo Shatani gha yereke Jobi. Shatani gha tapire yi korwa kwa Jobi. Jobi gha shwaghire panunda no gha shimbire thipara thopoto gha ku nyanyithireko yitombo yendi. Mukamadi wendi gha mu ningire eshi, \"Kute Nyambi ne ghofe!\" Ene Jobi gha mu huthire eshi, \"Atwe ne mbadi wakutambura ghuwa kwa Nyambi, nombadi maghukukutundi?\" Hashere wendi Jobi hane heyire nohaghamba ghure nendi mayuwa ghomengi. Awo ha shanine kudimuka thitambo thoyinyanda ya Jobi. Haningire eshi ngwa koyidi ghana harura yo nga mu humbithera Nyambi. Jobi mbadi gha yi tawire. Jobi ghepurire mayira gha Nyambi, ene mbadi gha mwayire Nyambi. Ndani Nyambi thinda gha hokokire kukwagho. Nyambi gha wa neghedhire eshi mbadi ha tjwathanine eshi pashanye yahokokerire. Ngcamu dha Nyambi dha pira ghuhura. Nyambi gha dimuka yoyiheya. Gha dimuka eshi yinye yoyiwa kukwetu, yodiye pithendi keho yo gha yi dimuka eshi pashanye gha tawedheranga maghukukutu muyipara yetu. (Mughuma)\nThiperende 12 Jobi hana Muhuthera yoyihe\nJobi 42:1-17\nMo thi thiperende Jobi ne thiwana gha di karo mutungi shime. N̂anyi ni mu tongwere shi ngepi ya hokokire. Opa gha kuwanine na Nyambi Jobi, gha dimukire ghukuru wa Nyambi no gha kuthighurire kumepwero gha ghepurire mayira gha Nyambi. Ndani Nyambi gha tongwere ghumwe ghodina dyo Elifasi, ghumweya ghopawa yendha Jobi eshi, \"Napata noye ndani no hayendhoye, yoyishi mbadi nga mu ghamba yoyiwa, yokuhatera kukwange thika mupikange Jobi.\" Po gha watongwerire Nyambi eshi hayende kwa Jobi no ha kayambe muyambo ghokukon̂erera wawo hathinda na mupikendi Jobi gho gha kawaraperere. Podiyo eshi Nyambi gha ka kone kuwathighererapo. Jobi gha waraperithire hashere wendi na Nyambi gha tamburire ndapero dhendi. Mu nyima dhopo Nyambi gha tendire Jobi gha kare thiwana no gha mu pire ghutungi karo. Hashera Jobi nodiko dyendi heyire na ha dye difeste nendi no ha mu reterire maghushwi. Nyambi gha mu pire karo hana kwoko nohawadi ghohakafumughana ndani hahatu ghohakamadighana hohawa shemwa. Jobi gha parire no gha monine hekurwendi hokutukokona no ghakuruparire thikuma poghafire.\nMatangero na Nyambi Mutara 2 Mwingeneno\nTango ni mu tongwere murume ghodina dyo Abramu. Gha karire ghutawedhi kwa Nyambi; kupitera mumwendi hanu hohengi ha wanine makandadhekero. Kuroghithere mukufikura kuthiperende thokurandako apa sho yuve. (Mughuma)\nThiperende 13 Abramu ghana kushwagha mu dighumbo\nMavarekero 12:1-13:4\nPathiperende thi ghuna kumona Abramu, namunuwendi Sarayi, na mwependi Loti no harughani wawo. Hana kuyenda ndhira dhokayenda yoyishi Nyambi gha ghambire na Abramu eshi, \"Thiye ditunga dyoye, haguva ghoye no dighumbo dya wiho gho yende kuditunga edi mboni kuneghedha. Mbo ghuna kakara diko dyodikuru ndani mbo na kukandadheka; nohanu waheya mbo hana pu kukandadheka kupitera mumoye.\" Abramu gha tawire matoyedhero gha Nyambi. Aye nawayendhendi ha shimbire yimuna yawo no ha yendire mayuwa ghomengi kate kakuma muditunga dya Kanaghani. Nyambi gha kakuhokorire kwa Abramu no gha ningire eshi, \"Kohana hoka ghoye nakutapa ditungadi.\" Abramu gha yendaghurire mumukunda, ene pa gha kakumine mumu kunda Negeve muthiko thoghucuma wa Kanaghani, diyerenge dyeyire muditunga no mbadi ha karire no yidya yokudya. Abramu no haguva wendi ha konine kayenda kuditunga dimweya dyodina Egiptena, haka wane yidya. Munyima ndani po gha kahukire karo ku Kanaghani, yoyishi gha tawire matoyedhero gha Nyambi mu mwendi. (Mughuma)\nThiperende 14 Abramu na Loti\nMavarekero 13:5-18\nHa Abramu na Loti ha tungire pofotji mu Kanaghani. Awo ha karire no yimuna yoyingi thikuma no mbadi ha wanine dyango dyomadyeromwene yimuna yawo padyango dyofotji. Hakungi yimuna wa Abramu nowa ha Loti nga ha rwaghuranga. Ndani Abramu pogha ningire kwa Loti eshi, \"Mbadi twa kona kukurwitha nowe name, endi harughani ghoye no hange, yoyishi twaka ghukurwa. Torore kehe mutara ghoditunga oku ghuna haka ghothinda.'' Loti gha tororire mukunda ghoghuyeghave, no madyero mwene ghoyikorongwa ya Jorodani, amo karo mwa karire mambara mokukona kutunga. Loti gha yendire gha katunge pepi no mbara dha Sodomu. Hanu homu Sodomu ha kare hanu hohayi thikuma. Ha nyathire Nyambi. Abramu ye gha thigharire mu Kanaghani, na Nyambi gha ghambire karo nendi eshi, \"Dyodiheya di ditunga ghuna kumona, mbo na dikupa no hana hoka ghoye kuroruheya.\" (Mughuma)\nThiperende 15 Abramu ghanakukuwana na fumu gho thiraro\nMavarekero 14:1-24\nShime ghatungera Loti muyidhamena, yita yatjavukire. Ha Loti no diko dyendi dyodiheya dya pwire kukwata pofotji na wa ka Sodomu wahe. Abramu no mashurundate ghendi hayendire haka shuture Loti. Awo ha kawithire ha ka n̂ore no kaghamwena hakan̂wato wahe no maghugavo ghawo ghomahe.\nMundhira dhawo dhokahuka kuyita, ha kuhanganine na fumu, thika di ghuna kumona pathiperende. Fumu ghodina Malekisedeki. Aye gha karire fumu ghokambaraghana ko dina Salemu, kutongora eshi 'thiraro', aye gha karire mu kareri\/pristeri wa Nyambi shokuru no gha mu fumanekire. Malekisedeki gha reterire ghuroto no vinyu kwa Abramu no gha ghambire eshi, \"Nyambi shokuru gha kukandadheke, yoyishi ghana kughamwena kwawan̂ore dhoye.\" Abramu gha tongamenine kughutho wa Malekisedeki no gha tapire yitapa. Fumu wa Sodomu naye gha shanine kutapa yitapa kwa Abramu, ene Abramu mbadi gha yi tamburire yoyishi fumu yu gha karire fumu ghomuyi thikuma. (Mughuma)\nThiperende 16 Abramu notu tungwedhi\nMavarekero 17:1-19, Mavarekero 15:1-21\nMunyima dhokakomonona Abramu Loti no haguva wahe homu Sodomu, Loti gha hukire gha katunge mukambara ko kayi. Nyambi gha ningire kwa Abramu eshi, \"Wa yapa, Abramu. Ame ne yame thingandekitho thoye muruwerighoye shokuru.\" Ene Abramu mbadi gha shamberire yoyishi Nyambi mbadi gha mu pire mwana ghokatughuru gho yu mbo gha yora ghushwi wendi. Nothitambo thotho, Nyambi ghashimbire Abramu panunda, \"Kapuke noyereke kutara nungwedhi. Mbo ghuna kara no hanahoka hohengi yira thika nungwedhi.\" Abramu gha tawire matoyedhero gha Nyambi, ngambi kenge dighakarire no kuwana temba hana. Na Nyambi ghatamburire matawero ghendi, nomatawero gha ghamutendire ghakare muhunga kwa Nyambi. (Mughuma)\nThiperende 17 Kambututu Ishmaeli\nMavarekero 16 ndani 17\nMone! Abramu ghadi no kambututu koka rume. Ngeno yahokokire: Abramu gha tungire mu Kanaghani myaka dikumi, mukutaterera gha wane eyi gha mu toyedhere Nyambi; na Sarayi, mukamadi wendi, mbadi gha wanine mwana.\nSarayi gha karire na mupikendi Hagara. Sarayi gha shanine shi Hagara gha wane mwana na Abramu ndani munyima dhokumushamuruka Sarayi, ghakushimbe ye yu mwana gha kukare wendi. Dyo ya rughanine ruya ruvedhe pathina muragho. Hagara gha remine, na Sarayi gha tangire difupa nendi. Mbadi gha mu tendire thiwana, kate Hagayi gha matukire gha tjire rupetho. Ene mu engeli wa Nyambi gha mu wanine. No kumutongwera eshi, \"Mbo ghuna wana kambututu kokarume. No wa kukate Ishmaeli, yoyishi fumu ghana yuvu madiro ghoye.\" Ishmaeli kuninga eshi 'Nyambi ne kuyuva'. \"Aye ne mbo ghana kara yira thidongi thamunu thomumuthitu; No dyoko dyendi mbo dineman̂anyena keheyu, no keheyu mbo ghana mwiman̂anyena no mboghana kara no ghukore no haminendi wahe.\" Ishmaeli ha mu shamurukire munyima gha karire wiha wawa Arabu. Myaka dikumi no dhihatu dhina kapita munyima dhomu shamurukero wa Ishmaeli, Nyambi gheyire kwa Abramu ghuninga eshi, \"Yame Nyambi ghongcamu dhodhihe; yende kughuthowange no ghu pire murandu. Ame n̂anyi ni dimukithe ghundambo ghoye name nokuwedherera thivarero thoye. Oghu ne ghoghundambo wange noye: Mbo ghuna kara gho wiha ghomarudhi ghomengi. Mbadi mbo ha kwitha karo eshi Abramu; dinadyoye mbo dina kara Abrahamu, mbo na kutura endi mbo na kutendi gho wiha ghomarudhi ghomengi.\" Pamurandu ghodina dyo dipya Abrahamu gha dimukire shi Nyambi mbo ghana mupa hanahoka. Na Nyambi gha ghambire kwa Abrahamu, \"Mbona kupa ditunga dyodi heya dya Kanaghani, no kwa hanahoka ghoye awa mba heya munyima dhoye; no mbo na kara no Nyambi wawo.\" Nyambi gha ningire kwa Abrahamu eshi, \"Pano munu ghoghe, mbadi wa ku mwithe karo dina Sarayi; di kare keho Sara. No kumutoyedhera makandadhekero no mwana ghomukafumughana. N̂anyi na kumukandadheke mbo ghana kara nyina ghomarudhi. Hama fumu homumatunga mbo hana shwagha mumwendi!\" (Mughuma)\nThiperende 18 Hatumi hahatu\nMavarekero 18:1-15\nDiyuwa dimweya hatumi hahatu wa Nyambi heyire kutende wa Abrahamu. Gho fotji ghopawashahatu gha karire fumu thinda Nyambi. Abrahamu gha tongamenine paghutho wagho, gho ghethire Sara gha roghithereko hagenda yidya, gha yi wapire thinda. Mu nyima hepura kwagho Abrahamu, \"Kupi munu ghoye Sara?\" Abrahamu gha huthire eshi, \"Muya, mutende.\" Fumu gha ningire kwa Abrahamu eshi, ''N̂anyi na kahuke thika ruvedhe roru rofotji mwakomwa, na munu ghoye Sara mbo ghana wana mwana ghokaturughana.\" Apa gha yi yuvire Sara gha hekire yoyishi ruvedhe rwendi rokureta hana ne rwapwire no mbadi gha yi tawire ye. Nyambi gho gha ningire kwa Abrahamu eshi, \"Nye ghana kuheka Sara no kughamba shi, 'Shemwa mbo na reta karo mwana ndi, ndani ame ne na kurupara?' Ko yi di yoyikukutu kukwendi Nyambi ndi? Mbo na kahuka paruvedhe ru rwapwa kutorora mwakomwa na Sara mbo ghana wana mwana ghokatughuru.\" (Mughuma)\nThiperende 19 Abrahamu ghana kuraperera Sodomu\nMavarekero 18:16-19:29\nApa hemanine hagenda hahatu hayende, Abrahamu naye gha wa thindekedhire mundhira dhawo. Awo hatambire ku Sodomu ndani Nyambi ghatongwere Abrahamu eshi kuna kuyenda hakadhingure Sodomu, Thitambo ne ha kahanyaghure mambara gha Sodomu na Gomora yoyishi haguva wapo ha yipithire. Ngaha yipithanga kurupara rwa Nyambi. Ha mwayire thitambo tha Nyambi tho ghundambo ghokupongoka pakatji ka mukafumu na mukamadi. Ha karire no nyanya dhodhikuru. Abrahamu ghavurukire Loti gha ningire kwa Nyambi eshi, \"Kukona mukakomberere hahunga pofotji nawa yi ndi? Namupanguri gho kaye kokahe mbadi wa kutenda ghuhunga ndi?\" Abrahamu gha tangire kukanderera Nyambi. Paghuhura, Nyambi ghaningire eshi mbadi sho ha ka hanyaghure Sodomu ngeshi gha kawane mo hanu dikumi hohawa. Apa ghamanine kughamba fumu na Abrahamu, gha shwayirepo na Abrahamu gha hukire kudighumbo. Ene mbadi mwa karire hapika Nyambi hokukuma kudikumi mu Sodomu. Hatumi wa hawadi haNyambi hakakumine ku Sodomu, no hamonine ghuyi gho hanu wamo. Ene Nyambi gha fererire n̂eke Loti. Hatumi wa ha rawere Loti no diko dyendi hatjire ha shwaye mu Sodomu no ha wa tongwere eshi mbadi ha kona kuthetuka munyima. Nyambi gha tumine mudiro ghokutunda kudiwiru. Sodomu na Gomora no haguva wamo yapwire kudhimangedha. Loti no diko dyendi ha shwayire mo noruvedhe-vedhe, ene mundhira dhawo muna Loti gha kengire munyima, popo vene ghakuthitunukire dighundhi dyo mungwa. Abrahamu gha kumberire kwa Nyambi gha gha mwene hahunga. Loti pithendi vene no hanendi hawadi hohakamadi haparireko, yoyishi Nyambi gha vurukire Abrahamu edi gha rapere po Loti. (Mughuma)\nThiperende 20 Muyambo wa Abrahamu\nMavarekero 21:1-22:19\nApa gha kumine Sara ku myaka makumi kwoko no mane gha wanine mwana ghokatughuru, thika di gha yi mutoyedhere Nyambi kwa Abrahamu. Oku ye Abrahamu gha di kare no myaka dithere. Gha tire mungaghu yu Isaka, kuninga eshi 'gha hekire'. Apa gha kokomokire ko mungaghu Isaka, Nyambi gha yerekire Abrahamu gha mu mone eshi kukona gha kare ghutawedhi kukwendi ndi. Nyambi gha mu tongwerire eshi, \"Shimbe mwanoye ghopithendi Isaka, oyu wa haka, no kamuyambe muyambo kukwange.\" Abrahamu gha tawire ya Nyambi. Abrahamu gha shimbire yikunyi no kuyipaka pathifudhi tha Isaka, aye gha shimbire mudiro no moko. Momu ghuwadi wawo ha yendire pofotji, kokwipura Isaka eshi, \"Kupi keho gha di ndjwi ghana ghomuyambo ghokakon̂erera?\" Abrahamu gha mu huthire eshi, \"Nyambi thinda yo sho gha katape ndjwi ghokayambitha kuthinyaku, mwanange.\" Abrahamu gha tendire thinyaku, gha turirepo yikunyi no gha wangire mwanendi no gha mu rangekirepo pa thinyaku. Pakuyeyura vene Abrahamu moko eshi gha paghe Isaka, mu engeli wa Nyambi gha ningire kwa Abrahamu eshi, \"Wapaka nyara pamungaghana watenda thinu papendi. Pano nayidimuka keho wa yapa Nyambi, yoyishi mbadi ghuna ni shweneka mwanoye, ghopithendi.\" Ndani Abrahamu kokumona kwendi ndjwi ghomurume muthipumbu. No gha yambire muyambo kwa Nyambi no ndwji mudyango dya mwanendi. Na Nyambi gha ghambire nendi eshi, \"Pamurandu ghokudhira kunishweneka mwanoye ghopithendi kukwange, kuna kukwedhera mudina dyange: Yoshemwa mbo na kukandadheka nokukupa hanahoka hohengi. Mbo hana vuru yira nungwedhi dhokudiwiru no yira ruheke rokodikuruviya. Mohana hoka ghoye marudhi ghomahe gho mu kaye mbo ghana pu kukandadheka, yoyishi ghuna kara ghutawedhi kukwange.\" (Mughuma)\nThiperende 21 Abrahamu na mupikendi\nMavarekero 24:1-25:11\nApa gha kuruparire Abrahamu, hetha kwendi mupikendi no gha mu nigire eshi, \"Kwedhere shi n̂anyi wakuhuke kuditunga dyange no kudiko dyange, no wa kashimbeko mukamadi wamwanange, Isaka.\" Abrahamu mbadi gha shanine shi Isaka gha thiye ditunga edi gha mu toyedhere Nyambi, endi gha yeke mukamadi gho mu Kanaghani. Mupikendi Abrahamu gha mu yuvire no gha yendire kumbara dha Nahori. Oku ko gha kepwerire Nyambi eshi gha mu piterere gha wane mbuyama ghomuhunga wa Isaka. Mukamadighana ghomuwa ghodina dyo Rebeka gha shwaghire mumbara no gha yendire kudithima gha kavete meyu. Aye gha yi tawire mukuvetera meyu mupika Abrahamu no ngameno dikumi. Mupika yu gha yi dimukire eshi Nyambi ghana mu yenditha koyu mukamadi no yo ghana kushana mukamadi ghoyira yu. No gha yi wanine eshi mbuyama yu ne mwikurwa, minendi Abrahamu. Mupika yu gha nyongamenine Nyambi yoyishi ghana yuvu ndapero dhendi no kumu twara kudiko dya hekudyendi. Na Rebeka gha karire keho muna Isaka. Abrahamu gha fire ghana kurupara thikuma oku ye ne myaka dithere no makumi kwoko no mawadi no kwoko (175). Muyipara yendi yoyiheya gha kuruperire mwa Nyambi kuyoyiheya yi gha mu toyedherire, na Nyambi ghamutamburire no ghamu kandadhekire. Nyambi shime gha kandadheka awa hana kumukurupera thika Abrahamu. (Mughuma)\nThiperende 22 Kuna kumushamuruka Jesus\nMateghusi 1:18-25, Hakagalasiye 4:4,5\nMan̂ando gha Nyambi ne gha ghushemwa. Nyambi ne mbadi wakwangera. Nyambi gha tongorire kwa Adamu eshi n̂anyi gha kutume oyu gha pwa kutorora gha kuna withe Shatani. Gha konekithire Noghe eshi n̂anyi ghakuhanyaghure hanu wahe awa hana kutenda ghuyi. Nyambi gha neghedhire Jobi eshi gha tu shanena yinu yoyiwa thikuma. Ghaneghedhire kwa Abrahamu eshi aye ne roruheya kukumithamo matoyedhero ghendi.\nMuthiperende thi kuna kumona kambututu Jesusi, apa dha rikanyinepo nako ha mu shamurukire mu Palestina, munyima ha di tire Israel. Dina dya nyina ne Mariya, mwana hoka wa Abrahamu na Isaka. Mariya gha karire mukamadi yu gha dhira kukara pofotji panyama na mukafumu apa ha shamurukire yu Jesusi kupitera mwa mupepo ghokupongoka. Jesus mbadi gha karire nowihe ghopanyama, Nyambi ne yo wihe. Jesusi ne yo gha retire makandadhekero mukaye kokahe. Gha shimbire ghukashu ghoyirama yoghunu mukutuhutherapo fumwa dhetu. Gheyire mu kuna kumithamo matoyedhero gha Nyambi eshi Shatani mbo hana mu witha natwe mbo tu shutuke kughupika wa Shatani. Jesusi gheyire mu ku na tu huthera twe kwa Nyambi. (Mughuma)\nThiperende 23 Yifa ya Jesusi\nHakagalasiye 3:3,14\nApa gha kurire Jesusi gha karire katughuru, gha hongire hanu mayira gha Nyambi. Jesusi gha tendire yitetukitho yoyingi mukuneghedha eshi aye ne kwa Nyambi gha tunda. Ene hanu mbadi ha tawire mumwendi. Ha mu paghire pakumupamarera pathikurushe. Ha mashurundate ha twire mumatji dhendi nodighonga\/din̂odhi mukuningera eshi gha fe yoghushemwa. Nyambi gha tongwerire Adamu eshi n̂anyi gha kufe ngeshi gha kudye kuthitondo. Twaheya twa nyatha Nyambi no twa roghera mukuwana yifa yokuroruheya. N̂anyi ghuvuruke shi Nyambi gha tapire Ndjwi kwa Abrahamu gha paghire no gha yambire mudyango dya Isaka. Mundhira dhodho dhofotji, Nyambi mu ruhakitho rwendi kukwetu, mudyango dyokutatera ndhango hanu wahe kuyifa yororuheya, gha tapire mwanendi ghopithendi Jesusi mukufa yira muyambo ghomaharwero no honyi dho hanu waheya. Nyambi ghana haka eshi twahe tu kare twa hanendi. Yoghushemwa, maharwero no honyi ya tu yakunitha kwa Nyambi. Jesus ne yo ndhira dho kuhuka kwa Nyambi. Kupitera mu mwendi Nyambi ghatuhuthera fumwa dhetu no gha kushemwathanitha netu. (Mughuma)\nThiperende 24 Jesusi ne muyumi\nJohanesi 20:19-29\nHakathishongero wendi Jesusi ha mu horekire mumbira. Aye gha karire mumbira mayuwa mahatu. Ndani po gha vumbukire mwawafu! Yifa mbadi ya konine kumukwata Jesusi, mwana Nyambi. Jesusi ghakuneghire kwawaka thishongero wendi, waheya yawatetukithire. Mu kathishongero, ghodina dyo Tomasi, mbadi gha karire po apa gha kuhokorire Jesusi kukwawo. Thomas gha ningire kukwagho eshi, \"Ngeshi mbadi sho ni mone endi nikwate yitombo yomamboha gho munyara dhendi nokutuwa minwe dhange muyitombo yomamboha, noku ngeneka nyara dhange mumatji dhendi ne, ngo mbadi sho ni yi tawe.\" Munyima dho thivike thofotji Jesusi gha kuhokorire kukwawo karo. Mone kuthiperende. Jesusi ghana kuneghedha Tomasi yitombo yomamboha ghomunyara dhendi no gha ningire kwa Tomasi eshi gha shimbe nyara dhendi gha tuwe mu matji dhendi. Dyo gha ningire kwa Tomasi eshi, \"Gha shagheke kutamangera no gha tawe.\" Na Tomasi gha tawire. Jesusi gha ghambire karo eshi, \"Hakaruviya awa hana kudhira kumona ene ha tawa.\" Mbadi twa kona kukara yira Tomasi yu gha karire no matamanyi. Vuruke, Nyambi gha ghambire kwa Adamu eshi n̂anyi gha kutume ghumweya oyu gha kuna witha Shatani apa gha fire.\nJesusi pathikurushe nokuvumbuka mwawafu, aye ghawithire Shatani. Shatani mbadi gha kara no ngcamu kwawanu awa ha tawa no kurupera mwa Nyambi no kukara ghutawedhi. Eyi ne yo gha kuruperithire Nyambi Abrahamu. Nyambi gha mu toyedhere shi mako ghomahe ghopakaye n̂anyi gha kupwe kukandadheka kupitera mumwendi. Makandadhekero gha ne: eshi tupwe kughamwena kumaharwero ghetu no kututunditha thihonyi. Tu wane moyo ghoghupya mwa Jesus. Fumwa dhetu noghundambo na Nyambi wahukerapo. Ngeshi hatu fu panyama mbo tuna kapara na Nyambi kuroruheya. Matungekero gha gheyerapo kupitera mwa Jesusi. Kukona tughawane gha makandadhekero ngeshi hatutawa mwa Jesusi, no kuku mithamo man̂ando ghendi. Muyinu yoyiheya yi Nyambi ghana kuwana fumwa dhodhikuru thikuma.\nGhuhura","id":"<urn:uuid:2844a13b-ef14-4a57-aed6-d4e1352ad01a>","dump":"CC-MAIN-2019-39","url":"http:\/\/globalrecordings.net\/en\/script\/mhw\/418","date":"2019-09-16T20:45:56Z","file_path":"s3:\/\/commoncrawl\/crawl-data\/CC-MAIN-2019-39\/segments\/1568514572934.73\/warc\/CC-MAIN-20190916200355-20190916222355-00256.warc.gz","language":"mhw","language_score":0.9999552965,"language_script":"Latn","minhash_cluster_size":67,"top_langs":"{\"mhw_Latn_score\": 0.9999552965164185}","num_words":4273,"character_repetition_ratio":0.065,"word_repetition_ratio":0.0,"special_characters_ratio":0.185,"stopwords_ratio":0.301,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}