diff --git "a/akb_Latn/mala_000002_keep.jsonl" "b/akb_Latn/mala_000002_keep.jsonl"
new file mode 100644--- /dev/null
+++ "b/akb_Latn/mala_000002_keep.jsonl"
@@ -0,0 +1,54 @@
+{"url":"","collection":"madlad400","source":"CC 20220801","original_code":"akb","text":"V Musa 30 | Alkitab TOBA\\n← V Musa 31\\nV Musa 29 →\\n30:1 Ia dung songgop tu ho sogot saluhut hata on, manang pasupasu manang torutoru, angka naung hupeakhon di adopanmu, hape dipasuang ho muse roham tu bagasan, di tongatonga ni saluhut bangso parbegu, haambolonganmu binahen ni Jahowa, Debatam.\\n30:2 Jala mulak roham sahat tu Jahowa, Debatam, jala ditangihon ho soarana, hombar tu saluhut na hutonahon i tu ho sadarion, songon i ho nang angka anakmu sian nasa roham dohot sian nasa ateatem.\\n30:3 Jadi marpangulahi ma roha ni Jahowa, Debatam mida habuanganmu, jala asi rohana mida ho, Ibana sandiri tahe papunguhon ho sian saluhut bangso parserahanmu, binahen ni Jahowa, Debatam.\\n30:4 Tung sura pe ambolong ho tu ujung ni langit sahali, ingkon papunguon ni Jahowa, Debatam ho sian i, jala alapanna ho sian i.\\n30:5 Jadi mulak ma ho boanon ni Jahowa, Debatam tu tano naung tinean ni angka ompum nian, asa teanonmu do i muse, bahenonna huhut uhum na denggan tu ho, jala tumpahanna ho tumorop sian angka ompum.\\n30:6 Dung i sunaton ni Jahowa, Debatam ma roham dohot roha ni pinomparmu laho mangkaholongi Jahowa, Debatam sian nasa roham dohot sian nasa ateatem, asa mangolu ho.\\n30:7 Alai honahonon ni Jahowa, Debatam ma saluhut torutoru on tu angka musum dohot tu angka na mangkagigihon ho, angka naung mangalele ho.\\n30:8 Alai mulak ma anggo ho jala tangihononmu soara ni Jahowa jala ulahononmu saluhut tonana, angka na hutonahon i tu ho sadarion.\\n30:9 Jadi marlobilobi ma ho tumpahan ni Jahowa, Debatam di saluhut ulaon ni tanganmu, di parbue ni bortianmu, di sinur ni pinahanmu dohot di parbue ni tanomi, manumpak tu na denggan; ai mangulahi ma Jahowa sumuang marlas ni roha mida ho manumpak tu na denggan, suang songon las ni rohana na jolo mida angka ompum.\\n30:10 Molo tung ditangihon ho soara ni Jahowa, Debatam mangaradoti angka patikna dohot aturanna, angka na tarsurat di bagasan buku patikon, molo tung mulak ho tu Jahowa, Debatam sian nasa roham dohot sian nasa ateatem.\\n30:11 Ai patikon, na hutonahon i tu ho sadarion, ndang masongkalhu di ho, manang maholangku.\\n30:12 Ndada di banua ginjang hata i, umbahen pola ingkon dohononmu: Ise ulaning singkatnami manaek tu banua ginjang, asa mangalapsa di hami dohot pabegehonsa tu hami, asa ulahononnami nian?\\n30:13 Jala ndada di bariba ni laut hata i, umbahen pola ingkon dohononmu: Ise ulaning singkatnami taripar laut mangalapsa di hami dohot patubegehonsa, asa ulahononnami nian?\\n30:14 Ai mansai donok do hata i di ho, di bagasan pamanganmu tahe dohot di bagasan roham, asa ulahononmu i.\\n30:15 Ida ma, nunga hupapillithon tu ho sadarion hangoluan dohot hatuaon, hamatean dohot hamagoan.\\n30:16 Ahu ma tutu mandokkon ho sadarion: Ingkon haholonganmu Jahowa, Debatam, jala marparange di angka dalanna, huhut mangaradoti angka patikna, angka aturanna dohot uhumna, asa pangoluonna ho jala patoroponna ho, jala pasupasuon ni Jahowa, Debatam ho di tano sitopotonmu nuaeng bahen partalianmu.\\n30:17 Alai tung sura marbalik roham, ndang olo ho manangihon, lam olo ho elaelaon marsomba tu angka debata sileban dohot mangoloi angka i:\\n30:18 Na pabotohon hian ma ahu tu hamu sadarion, ingkon mago situtu hamu, jala ndang tagamon leleng hamu mangolu di tano sitopotonmu, dung taripar Jordan bahen partalianmu.\\n30:19 Jouonku ma sadarion langit dohot tano gabe sitindangingku dompak hamu, paboa naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i, asa mangolu ho dohot pinomparmu sogot.\\n30:20 Asa haholonganmu Jahowa, Debatam, jala tangihononmu soarana, jala marsilohot roham tu Ibana, ai Ibana hangoluanmu hian dohot na paginjang umurmu, asa tongtong ho maringan, di tano, naung niuarihon ni Jahowa hian tu angka ompum, tu si Abraham, si Isak dohot si Jakkob, naeng lehononna tu nasida.","num_words":587,"character_repetition_ratio":0.084,"word_repetition_ratio":0.0,"special_characters_ratio":0.213,"stopwords_ratio":0.283,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"ESRA 5 - BIBLE & BUKU ENDE ONLINE\\n5:1 Alai anggo panurirang Haggai dohot Sakaria, anak ni si Ido rap manurirangi do nasida duansa marhite sian Goar ni Debata ni Israel tu halak Juda na di tano Juda dohot Jerusalem.\\n5:2 Jadi hehe ma si Serubabel, anak ni si Sealtiel dohot si Josua, anak ni si Josadak, jala dipungka nasida muse pajongjong joro ni Debata na di Jerusalem, jala dongannasida do angka panurirang ni Debata na papir tondinasida i.\\n5:3 Laos di tingki uju i ro ma manopot nasida si Tatnai, pangarajai ni luat i sian bariba ni batang aek i dohot si Jetar Bosenai rap dohot donganna satahi, angka ninna ma tu nasida: Ise marsuru hamu pajongjong joro on dohot pasunhon angka parik on?\\n5:4 Jadi hudok hami ma tu nasida goargoar ni baoa angka na mangkasuhuthon pajongjong joro i.\\n5:5 Alai marpanatapon do ianggo mata ni Debatanasida tu angka sintua ni halak Juda, asa unang sanga dilohai halak nasida, paima sahat pangaluani tu si Darius, jala sanga ro mulak surat balosna.\\n5:6 Alai on do hata ni surat naung tinongos ni si tatnai, pangarajai ni tano di bariba ni batang aek i dohot si Jetar Bosenai, ro di donganna satahi, i ma halak Aparsata i, angka na di bariba ni batang aek i tu raja Darius.\\n5:7 Ia hata ni surat barita na tinongosnasida tu rajai songon on do: Dame godanggodang di raja Darius!\\n5:8 Na hupabotohon hami tu rajai, nunga sahat hami tu tano Juda, tu joro ni Debata na timbul sahali, sian batu na balga angka na denggan binarbar dipauli nasida joro i, jala dorpina i dilampis dohot hau, mansai gira huhut ulaon i diula, jala manjadi marhite sian tangannasida sandiri.\\n5:9 Nunga pola husungkun hami sintuanasida i, songon on hudok hami tu nasida: Atehe, ise naung marsuru hamu pajongjong joro on dohot pasunhon angka parik on?\\n5:10 Nang goarnasida husungkun hami do tu nasida, naeng pabotohononnami nian tu ho, ala ni umbahen husurathon hami goargoar ni baoa angka na manguluhon nasida.\\n5:11 Alai on do hata alusnasida tu hami: Ia hami, naposo ni Debata sigomgom langit dohot tano on do hami, jala hupajongjong hami joro on, naung pinauli hian di tingki na robi, na pinajongjong ni sada raja ni Israel na timbul jala dipasidung.\\n5:12 Alai dung dipahehe angka ompunami rimas ni Debata sigomgom langit i, gabe dipasahat nasida tu bagasan tangan ni si Nebukadnesar, raja sian Babel, halak Kasdim i, na mangaloha joro on, jala dibuangkon bangso i tu Babel.\\n5:13 Alai di taon parjolo hinarajahon ni si Sirus, raja sian Babel, dilehon raja Sirus i ma parenta mandokkon pajongjongon joro on di Debata.\\n5:14 Nang ulaula sere dohot perak di bagasan joro ni Debata, angka na binuat ni si Nebukadnesar sian joro na di Jerusalem, jala binoanna tu bagasan joro na di Babel, nunga pola diparuar raja Sirus sian joro na di Babel, jala dipalumehon angka i tu sada halak na margoar Sesbasar, naung pinabangkitna gabe pangarajai di luat i.\\n5:15 Dung i ninna rajai ma mandok ibana: Buat ma angka ulaula on, boan ma i tu joro na di Jerusalem, jala dokkon ma pajongjongon muse joro ni Debata di hajongjonganna hian.\\n5:16 Jadi ro ma tutu Sesbasar i, saut ma tutu dibahen ojahan ni joro ni Debata di Jerusalem, jadi olat ni rasirasa nuaeng sai tole halak paulihon, alai ndang dope sidung.\\n5:17 Nuaeng pe, molo denggan di roha ni rajai, didokkon ma manigati di bagasan jabu parpeopan arta ni rajai na di Babel, manang tutu jumpang disi surat parenta sian raja Sirus mandokkon pajongjongon joro ni Debata na di Jerusalem; manang beha pingkiran ni roha ni rajai taringot tusi, ditongoshon ma tu hami!","num_words":592,"character_repetition_ratio":0.068,"word_repetition_ratio":0.003,"special_characters_ratio":0.212,"stopwords_ratio":0.363,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Hesekiel 40 | Alkitab TOBA\\n← Hesekiel 41\\nHesekiel 39 →\\n40:1 Paduapululimataonhon dung tarbuang hami, di mula ni taon i, di ari sampulu ni bulan i, i ma pasampuluopattaonhon dung na tartaban huta i, apala di ari na sasada i songgop ma tu ahu tangan ni Jahowa, laos diboan ahu tusi.\\n40:2 Di bagasan angka pangungkapon ni Debata tahe diboan ibana ahu tu tano Israel, jala dipaulon ahu tu atas ni sada dolok na timbo situtu, jala di atasna tarhinsat do songon sada huta na pinauli sambola tungkan dangsina.\\n40:3 Tusi ma ahu diboan ibana, gabe ida ma, adong disi sada baoa, rupana songon rupa ni tombaga, jala tali hori sada di bagasan tanganna dohot tolong pangungkur, jala jongjong do ibana di bagasan pintu harbangan.\\n40:4 Dung i ro ma hata ni baoa i tu ahu: Ale anak ni jolma, ida ma marhitehite matam, jala tangihon ma marhitehite pinggolmu, jala parateatehon ma saluhut na naeng pataridahononku tu ho, ai ala naeng pataridahononhon tu ho umbahen tarboan ho tuson; baritahon ma saluhut na niidam tu pinompar ni Israel.\\n40:5 Jadi ida ma, adong sada parik sian ruar ni joro i tuk humaliang, jala di bagasan tangan ni baoa i do tolong pangungkur i, onom asta ganjangna, ganup saasta santopap, gabe disuhati ibana ma bohang ni parik ni joro i sada tolong pangungkur, timbona pe laos sada ungkuran do.\\n40:6 Dung i ditopot ibana ma pintu harbangan i na tungkan habinsaran, jala dipanaek angka tanggana, jala diungkur lobulobu ni pintu harbangan i satolong pangungkur bidangna be, di ginjang dohot di toru.\\n40:7 Jala ganup bilut parjagaan satolong pangungkur be unjurna dohot bohangna, jala holangholang ni angka bilut parjagaan i lima asta do, jala lobulobu ni pintu harbangan di lambung panisioan ni harbangan i niudut ro sian joro i satolong pangungkur do.\\n40:8 Dung i disuhati ma panisioan ni harbangan i niudut ro sian joro i satolong pangungkur do.\\n40:9 Disuhati muse dohot panisioan ni harbangan i ualu asta jala partungkoanna dua asta be, jala panisioan ni harbangan i niudut ro sian joro i.\\n40:10 Jala tolu do angka bilut parjagaan ni panisioan i tungkan habinsaran angkup be, sisada ungkur do tolunsa; sisada ungkur huhut angka partungkoan i angkup be.\\n40:11 Dung i disuhati ma ruak ni pintu harbangan i sampulu asta, jala timbo ni harbangan i sampulu tolu asta.\\n40:12 Jala dalan di jolo ni angka bilut saasta do angkupangkup be, jala angka bilut parjagaan i onom asta do angkupangkup be.\\n40:13 Disuhati muse harbangan i sian tarup ni bilut parjagaan na sada sahat tu tarup ni bilut na asing, duapulu lima asta ruakna, patondong be angka pintu i.\\n40:14 Dibahen do huhut angka partungkoan onompulu asta ganjangna, jala hombarhon partungkoan i do alaman ni harbangan i tuk humaliang.\\n40:15 Jala di jolo ni harbangan haroroan sahat rodi jolo ni panisioan ni harbangan parbagasan limapulu asta do.\\n40:16 Jala marpandiloan na sompit do angka bilut parjagaan i, lohot di tiangna tungkan bagasan hombarhon harbangan i tuk humaliang, suang songon i di angka dorpi parholangan adong huhut angka pandiloan tuk humaliang tungkan bagasan, na niuhir do huhut tu tiang i gorgagorga ni hau harambir.\\n40:17 Dung i diboan ibana ma ahu tu alaman apala parduru, gabe ida ma, adong disi angka bilut dohot pantar batu, na binahen di alaman i tuk humaliang, tolupulu angka bilut i di atas ni pantar batu manangkas.\\n40:18 Jala pantar batu i di lambung ni angka harbangan mangihuthon unjur ni angka harbangan i, i ma pantar batu apala partoru.\\n40:19 Dung i disuhati muse ruakna sian jolo harbangan partoru i sahat ro di alaman parbagasan i, sian ruar saratus asta tungkan habinsaran dohot tungkan utara.\\n40:20 Alai anggo pintu harbangan na tungkan utara hombarhon alaman parduru i, unjurna dohot bohangna disuhati.\\n40:21 Tole bilutna parjagaan na tolu i angkupangkup be dohot partungkoanna ro di panisioanna, suang songon pangungkuron di harbangan parjolo i, limapulu asta unjurna jala duapulu lima asta bohangna.\\n40:22 Angka pandiloanna pe dohot panisioanna, partungkoanna ro di gorgagorgana harambir, suang songon pangungkuron di harbangan na tungkan habinsaran, jala pitu do anak ni tanggana laho tu ginjang, jala panisioanna di jolona.\\n40:23 Jala pintu harbangan ni alaman parbagasan tondong ni pintu harbangan tungkan utara dohot tungkan habinsaran, gabe manuhati ibana sian harbangan na sada sahat tu harbangan na sadanari saratus asta do.\\n40:24 Dung i ditogihon ibana ma ahu tu dalan tungkan dangsina, gabe ida ma, adong dope pintu harbangan sada tungkan dangsina, laos disuhati ibana ma angka tiangna dohot partungkoanna mangihuthon pangungkuron parjolo i.\\n40:25 Marpandiloan do nang i jala marpanisioan tuk humaliang mangihuthon angka pandiloan parjolo i, limapulu asta unjurna, jala duapulu lima asta bohangna.\\n40:26 Jala pitu anak ni tanggana laho tu ginjang, jala angka panisioanna di jolona, jala margorga harambir sada be sambariba di angka partungkoanna.\\n40:27 Adong do huhut pintu harbangan sada laho tu alaman parbagasan i tungkan dangsina, laos manuhati ibana sian harbangan na sada sahat tu harbangan na sadanari tungkan dangsina saratus asta.\\n40:28 Dung i ditogihon ibana muse ahu tu alaman parbagasan i mardalan sian harbangan pardangsina, jala disuhati harbangan pardangsina i mangihuthon ungkuran parjolo i.\\n40:29 Tole angka bilutna parjagaan, tole angka tiangna dohot angka partungkoanna mangihuthon ungkuran parjolo i. Adong do huhut disi angka pandiloan di panisioanna tuk humaliang, limapulu asta unjurna jala duapulu lima asta bohangna.\\n40:30 Jala angka panisioan tuk humaliang duapulu lima asta unjurna, jala lima asta bohangna.\\n40:31 Jala angka panisioanna hombarhon alaman parduru i, jala margorga harambir do angka tiangna, jala ualu anak ni tanggana laho tu ginjang.\\n40:32 Dung i ditogihon ibana muse ahu tu alaman parbagasan i tungkan habinsaran jala disuhati pintu harbangan i mangihuthon ungkuran parjolo i.\\n40:33 Tole angka bilutna parjagaan dohot angka tiangna dohot angka panisioanna mangihuthon ungkuran parjolo i. Marpandiloan huhut angka panisioanna tuk humaliang, limapulu asta unjurna jala duapulu lima asta bohangna.\\n40:34 Jala panisioanna hombarhon alaman parduru i, jala margorga harambir di angka partungkoanna angkupangkup be, jala ualu anak ni tanggana laho tu ginjang.\\n40:35 Dung i diboan ibana ahu tu pintu harbangan tungkan utara, laos disuhati mangihuthon ungkuran parjolo i.\\n40:36 Tole angka bilutna parjagaan ro di tiangna dohot angka panisioanna, jala marpandiloan do i tuk humaliang, limapulu asta unjurna jala duapulu lima asta bohangna.\\n40:37 Jala angka tiangna hombarhon alaman parduru i huhut margorga harambir di angka partungkoanna angkupangkup be, jala ualu anak ni tanggana laho tu ginjang.\\n40:38 Jala adong sada bilut ro di pintuna hombarhon angka tiang ni angka pintu harbangan i, disi do burionna sogot pelean situtungon.\\n40:39 Jala di panisioan ni pintu harbangan i adong dua meja angkupangkup be, disi do seaton sogot angka pelean situtungon dohot pardosaon dohot pelean parsalaan.\\n40:40 Dung i di na sambariba tungkan ruar laho nangkok tu pintu harbangan tungkan utara adong dua meja, jala di na sambariba nari hombarhon panisioan ni harbangan i adong muse dua meja.\\n40:41 Asa opat meja be di na sambariba hombarhon harbangan i, gabe ualu meja bahen paneatan ni pelean sogot.\\n40:42 Tole muse na opat meja di pelean situtungon sian batu na nidakdak do, tonga dua asta be unjurna dohot bidangna jala saasta timbona, tusi do peakkononhon sogot ulaula angka sipangkeon laho maneat pelean situtungon dohot pelean sipotongon.\\n40:43 Jala dua pasi, santopap be bidangna lohot di parik ni joro i tuk humaliang, jala di atas ni angka meja i do juhut pelean i.\\n40:44 Jala sian ruar hombarhon harbangan parbagasan i do angka bilut ni parende di alaman parbagasan i, sarinte hombarhon harbangan sambariba tungkan utara, adop dangsina do nasida, rinte na sadanari hombarhon harbangan sambariba tungkan habinsaran adop utara do nasida.\\n40:45 Dung i ro ma hatana tu ahu: Bilut on, na tungkan dangsina do di malim angka na mangaradoti ulaon di bagasan joro.\\n40:46 Ianggo bilut na tungkan utara di malim angka na mangaradoti ulaon di langgatan; i ma angka anak ni si Sadok angka na jumonok, sian halak Lepi, tu Jahowa, marhalado di ibana.\\n40:47 Dung i disuhati ibana ma alaman i: Saratus asta be unjurna dohot bohangna maropat suhi, jala langgatan i sonson di jolo ni joro i.\\n40:48 Dung i diboan ibana ahu tu bagasan emper ni joro i, jala disuhati tiang ni emper i lima asta be angkupangkup, jala bohang ni harbangan i tolu asta be angkupangkup.\\n40:49 Ianggo unjur ni emper i duapulu asta do, jala bohangna sampulu sada asta, jala martangga do laho tu ginjang, jala dua tiang na bolon hombarhon angka tiang na asing, sada be di na sambariba.","num_words":1350,"character_repetition_ratio":0.093,"word_repetition_ratio":0.028,"special_characters_ratio":0.206,"stopwords_ratio":0.296,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II RAJA-RAJA 17 - BIBLE & BUKU ENDE ONLINE\\n17:1 Pasampuluduataonhon dung bangkit raja sian Juda si Ahas, bangkit raja ma si Hosea, anak ni si Ela, gumomgom Israel di Samaria, sia taon lelengna.\\n17:2 Jala diulahon do sogo ni roha ni Jahowa, alai ndada songon raja sian Israel, angka na jumolo sian ibana.\\n17:3 Dung i nangkok ma si Salmanaser, raja sian Assur marporang dompak ibana, gabe dioloi si Hosea ma patu tu ibana dohot mangalehon sohe tu ibana.\\n17:4 Alai dung didapot raja sian Assur si Hosea mambahen parbulanon, nunga pola disuru angka suruanna manopot raja So sian Misir, jala ndang be diboan sohe tu raja sian Assur, songon na somal ganup taon. Jadi dihurungkon raja sian Assur ma ibana, jala dirante ibana di bagasan hurungan.\\n17:5 Dung i dilaum raja sian Assur ma sandok tano i sahat ibana dohot tu Samaria jala ditungkum do i tolu taon lelengna.\\n17:6 Pasiataonhon hinarajahon ni si Hosea, patu ma Samaria dibahen raja sian Assur, jala dibuangkon halak Israel tu Assur, jala didokkon nasida maringan di Hala dohot di Habor martopihon batang aek Gozan dohot tu angka huta ni halak Madai.\\n17:7 Masa pe songon i, ala naung mardosa halak Israel dompak Jahowa, Debatanasida i, na manogihon nasida nangkok sian tano Misir, paluahon sian gomgoman ni si Firaun raja sian Misir, huhut ala marsomba nasida tu Debata sileban.\\n17:8 Jala diihuthon nasida hasomalan ni halak parbegu, angka naung nionjar ni Jahowa nian maradophon halak Israel, dohot hasomalan angka na pinungkapungka ni angka raja sian Israel.\\n17:9 Ala marsibuni huhut halak Israel marparangehon parange angka na so tama maradophon Jahowa, Debatanasida i, dipauli tahe di nasida angka tambak di bagasan saluhut hutanasida i, olat ni tungkup parhalan sahat ro di huta na gonting.\\n17:10 Dipajongjong huhut di nasida angka tiang panombanombaan dohot sombaon di atas ni saluhut robean na timbo dohot di toru ni saluhut hau na rugun.\\n17:11 Huhut manutung daupa nasida disi di atas ni saluhut tambak maniru pambahenan ni halak kapir, angka naung pinabali ni Jahowa nian maradophon nasida, jala diulahon nasida angka hajahaton, asa pahehe muruk ni Jahowa dompak nasida.\\n17:12 Huhut ala marsomba nasida tu angka ganaganaan, atik pe naung marlumba Jahowa tu nasida: Ndang jadi ulahononmuna sisongon i.\\n17:13 Pola marpanindangion muse Jahowa di Israel dohot di Juda marhite sian pamangan ni saluhut angka panurirangna dohot saluhut jolma parpangungkapon mandok tu nasida: Pauba hamu ma rohamuna sian dalanmuna angka na roa i, jala radoti hamu angka tonangku dohot aturanku, hombar tu sandok patik naung hupatikkon tu angka ompumuna jala naung hutongoshon tu hamu marhite sian angka naposongku, i ma angka panurirang i.\\n17:14 Hape ndang ditangihon nasida, lam ditangkangi do tangkuhuknasida, suang songon tangkuhuk ni ompunasida, angka na so porsea di Jahowa, Debatanasida i.\\n17:15 Jala ditoishon rohanasida do angka patikna dohot padan na binahenna i tu ompunasida ro di panindangionna angka na hinatindangkonna tu nasida, jala diihuthon nasida ganaganaan angka na so hasea gabe so hasea dohot nasida, jala marparange nasida songon bangso parbegu angka na humaliang nasida, atik pe naung pola martona Jahowa tu nasida, ndang jadi nasida marparange songon angka bangso parbegu i.\\n17:16 Alai ditadingkon rohanasida do saluhut tona ni Jahowa, Debatanasida i, jala dibahen di nasida ganaganaan tuangan, i ma lombu na dua i, jala dibahen di nasida angka sombaon, pola marsinggang nasida huhut marsomba tu saluhut parangan na di langit i, jala marsomba nasida tu Baal.\\n17:17 Huhut dipabolushon nasida angka anakna dohot boruna sian api, diulahon nasida huhut pangarundingon dohot partondungon, jala digadishon dirina laho mangulahon sogo ni roha ni Jahowa, asa pahehe murukna.\\n17:18 Jadi tarrimas situtu ma Jahowa mida Israel, jala dipaholang nasida sian adopanna, ndang adong na tinggal, nda holan sasada marga Juda.\\n17:19 Alai tahe nang halak Juda ndang diradoti angka tona ni Jahowa, Debatanasida i, nasida pe diihuthon do hasomalan angka na binahen ni Israel.\\n17:20 Ala ni dibolongkon Jahowa ma sandok pinompar ni Israel jala tarjimput nasida dibahen, jala dipasahat nasida tu bagasan tangan ni halak partaban, paima Ibana mambolongkon nasida situtu sian adopanna.\\n17:21 Ai nunga mamulik Israel sian pinompar ni si Daud, jala diparaja nasida si Jerobeam, anak ni si Nebat, jala diela si Jerobeam Israel marbalik sian Jahowa mangulahon dosa na dokdok situtu.\\n17:22 Jadi diihuthon halak Israel ma tu saluhut dosa ni si Jerobeam, angka na binahenna i, jala ndang sumurut nasida sian i.\\n17:23 Paima dipaholang Jahowa Israel sian adopanna, songon naung nilumbahonna hian marhite sian saluhut angka naposona, i ma angka panurirang i. Ala ni do umbahen tarbuang Israel sian tanona tu Assur rasirasa sadarion.\\n17:24 Alai ro ma raja sian Assur disolukkon ma halak sian Babel dohot sian Kuta dohot sian Awa dohot sian Hamat dohot sian Separwaim mandokkon nasida maringan di angka huta ni Samaria singkat ni halak Israel; jadi disoluk nasida ma Samaria jala maringan di bagasan angka hutana.\\n17:25 Alai anggo di mulana nasida maringan disi ndang marhabiaran nasida tu Jahowa, gabe ditongos Jahowa ma angka singa tu tongatonganasida, angka na mambunu nasida.\\n17:26 Dung i ninna nasida ma tu raja sian Assur songon on: Bangso parbegu angka naung sinolukkonmi jala nidokkonmi maringan di bagasan angka huta ni Samaria, ndang diboto nasida sambutonna uhum ni Debata pandingini ni tano i, gabe ditongos Ibana angka singa tu tongatonganasida; jala ida ma, nunga dibunui angka nasida, ala so diboto nasida sambutonna uhum ni Debata pandingini ni tano i.\\n17:27 Dung i ro ma hata ni raja sian Assur mandokkon: Togihon hamu ma tusi sahalak sian malim angka naung binuangkonmuna sian i, asa nasida laho maringan tusi, asa diajarhon tu nasida uhum ni Debata pandingini ni tano i.\\n17:28 Dung i ro ma sahalak sian malim angka na binuangkon sian Samaria, jala maringan ibana di Betel, jala diajarhon tu nasida parturena marhabiaran tu Jahowa.\\n17:29 Hape ganup bangso masibahen debatana be jala dipampeakkon tu bagasan joro parsantian, angka na binahen ni halak Samaria, ganup bangso di bagasan huta, angka na niingananna be.\\n17:30 Ai halak Babel marsomba tu Sukot-Benot, jala halak Kuta marsomba tu Nergal, jala halak Hamat marsomba tu Asima.\\n17:31 Jala halak Awa marsomba tu Nibhas dohot tu Tartak, jala halak Separwaim manutungi angka anakna di bagasan api marsomba tu Adramelek dohot tu Anamelek, i ma angka debata ni halak Separwaim.\\n17:32 Adong do huhut sian nasida marsomba tu Jahowa, laos dipabangkit ma sian tongatonganasida halak bahen angka malim di joro parsantian, angka na marhalado di bagasan angka joro parsantian.\\n17:33 Marhabiaran do nian nasida tu Jahowa, alai huhut nasida marsomba tu angka debata sileban di nasida be, hombar tu hasomalan ni ganup bangso parbegu, haroroannasida i.\\n17:34 Rasirasa sadarion sai dijujur nasida do hasomalannasida najolo; ndang marhabiaran nasida tu Jahowa, jala ndang haru dijujur nasida hombar tu ruhut dohot hasomalannasida hian, manang hombar tu patik dohot tona, na tinonahon ni Jahowa tu pinompar ni si Jakkob, na marimbang goar Israel binahenna i.\\n17:35 Pola marpadan Jahowa dohot nasida, jala ditonahon tu nasida songon on: Unang marhabiaran hamu tu angka debata sileban, jala unang marsomba hamu tusi, jala unang hamu marpangoloion tusi, jala unang hamu mamele tusi.\\n17:36 Holan tu Jahowa, na manogihon hamu ruar sian Misir marhite sian hagogoon godang dohot marhite sian tangan na toltol hamu tama marhabiaran, jala marsomba tu Ibana, jala mamele tu Ibana.\\n17:37 Angka aturanna pe dohot uhum dohot patik dohot tona, angka naung sinurathonna tu hamu, tama ingkon radotanmuna laho mangulahon tongtong, jala unang hamu marhabiaran tu angka debata sileban!\\n17:38 Padan na hubahen i pe tu hamu, ndang jadi halupahononmuna, asa unang hamu marhabiaran tu debata sileban.\\n17:39 Ingkon marhabiaran tu Jahowa, Debatamuna i hamu, asa Ibana paluahon hamu sian tangan ni saluhut musumuna.\\n17:40 Alai ndang ditangihon nasida, sai diulahon nasida do hombar tu hasomalannasida na jolo.\\n17:41 Asa tole angka bangso on marhabiaran tu Jahowa, tole huhut marsomba tu angka ganaganaannasida nang anaknasida, nang pahompunasida, laos songon i do dibahen, maniru pambahen ni amanasida rasirasa sadarion.\\nLabel: Alkitab Bahasa Batak, II RAJA-RAJA, Padan Na Robi","num_words":1276,"character_repetition_ratio":0.067,"word_repetition_ratio":0.003,"special_characters_ratio":0.201,"stopwords_ratio":0.337,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II Musa 40 | Alkitab TOBA\\n← III Musa 1\\nII Musa 39 →\\n40:1 Dung i ro ma hata ni Jahowa tu si Musa, songon on:\\n40:2 Di artia bulan sipahasada ingkon pajongjongonmu inganan na badia, undungundung parluhutan i.\\n40:3 Ingkon bahenonmu tu bagasan ni poti panindangion i, jala hungkupanmu poti i dohot rimberimbe.\\n40:4 Ingkon boanonmu huhut meja i tu bagasan, jala patordingonmu sipatordingon hian di atasna; boanonmu huhut parpalitoan i tu bagasan jala pasangonmu angka palitona.\\n40:5 Ingkon pajongjongonmu huhut langgatan pardaupaan sian sere di adopan ni poti panindangion i, jala tipak gantungonmu rimberimbe tutup ni pintu ni inganan na badia i.\\n40:6 Alai anggo langgatan pamelean ni pelean situtungon ingkon pajongjongonmu do di jolo pintu ni inganan na badia i, undungundung parluhutan i.\\n40:7 Ia tong parburian i ingkon pajongjongonmu do di holangholang ni undungundung parluhutan i dohot langgatan i, laos bahenonmu aek tu bagasan.\\n40:8 Dung i pajongjongonmu ma rimberimbe ni alaman i humaliang, gantungonmu dohot rimberimbe tutup ni bahal ni alaman i.\\n40:9 Dung i buatonmu ma miak pamiahion i jala miakkon tu inganan na badia i dohot tu sude ugasan na di bagasanna i, jala urasonmu do i ro di sude ulaulana, asa gabe na badia angka i.\\n40:10 Ingkon miahanmu dohot langgatan pamelean ni pelean situtungon ro di sude ulaulana, jala urasonmu langgatan i, asa langgatan i gabe na badia sahali.\\n40:11 Ingkon miahanmu dohot tong parburian i ro di ojahanna jala urasonmu do i.\\n40:12 Dung i boanonmu ma Aron dohot angka anakna i ro jumonok tu pintu ni undungundung parluhutan i, jala didionmu nasida dohot aek.\\n40:13 Dung i solukkononmu ma tu Aron angka pangkean na badia i, jala miahanmu ibana, jala urasonmu, asa ibana mangaradoti hamalimon di Ahu.\\n40:14 Boanonmu huhut angka anakna ro jumonok, jala solukkononmu tu nasida angka baju na marhadohoan.\\n40:15 Laos miahanmu ma dohot nasida, songon na miniahanmu amanasida i, asa nasida mangaradoti hamalimon di Ahu; ia pamiahion na tu nasida i ingkon manjadi tanda hamalimon do i salelenglelengna ro di pinomparnasida sogot.\\n40:16 Jadi dipatupa si Musa ma sude songon na tinonahon ni Jahowa tu ibana songon i do dibahen.\\n40:17 Saut ma di artia bulan sipahasada paduataonhon dung ruar sian Misir dipajongjong nasida inganan na badia i.\\n40:18 Jadi dung dipajongjong Musa sandiri inganan na badia i, dibahen dohot angka ojahanna jala dipamasuk tusi angka papanna, dibahen muse ransangransangna jala dipajongjong angka tiangna.\\n40:19 Jala dipaherbang angka rimberimbe ni undungundung i tu atas inganan na badia i, jala dipeakkon tutup ni undungundung i tu atasna, songon na tinonahon ni Jahowa tu si Musa.\\n40:20 Dung i dibuat ma lei panindangion i jala dipeakkon tu bagasan poti i, disurukkon ma dohot haluhalu i tu poti i dibahen muse ma langkop pardengganan i tu atas ni poti i.\\n40:21 Dung i diboan ma poti i tu bagasan inganan na badia i jala digantungkon rimberimbe i bahen tutup ni poti panindangion i, songon na tinonahon ni Jahowa tu Musa.\\n40:22 Dung i dipajongjong ma meja i tu bagasan undungundung parluhutan i di lambung inganan na badia i tungkan utara di balian ni rimberimbe i.\\n40:23 Jala dipatording di atasna sipatordingon hian, i ma sagusagu di adopan ni Jahowa, songon na tinonahon ni Jahowa tu Musa.\\n40:24 Dipajongjong ma dohot parpalitoan i tu bagasan undungundung na badia i tondong ni meja i di lambung inganan na badia i tungkan dangsina.\\n40:25 Dipagalak ma dohot angka palito i di adopan ni Jahowa, songon na tinonahon ni Jahowa hian tu Musa.\\n40:26 Dipajongjong muse ma langgatan sere i tu bagasan undungundung parluhutan i di jolo ni rimberimbe i.\\n40:27 Jala di tutung di atasna daupa na hushus marragamragam songon na tinonahon ni Jahowa hian tu Musa.\\n40:28 Digantungkon ma dohot rimberimbe tutup ni pintu laho tu inganan na badia i.\\n40:29 Alai anggo langgatan pamelean ni pelean situtungon dipajongjong do i di pintu haroroan tu inganan na badia i, undungundung parluhutan i, jala dipelehon di atasna pelean situtungon dohot pelean sipanganon, songon na tinonahon ni Jahowa hian tu si Musa.\\n40:30 Dipajongjong dohot tong parburian i di holangholang ni undungundung parluhutan i dohot langgatan i, laos dibahen tusi aek parburian.\\n40:31 Asa laos aek sian i buaton ni si Musa. Si Aron dohot angka anakna i mamburi tangannasida dohot patnasida.\\n40:32 Molo masuk nasida tu bagasan undungundung parluhutan i, jala molo ro nasida jumonok tu langgatan i, ingkon jolo marburi nasida, songon na tinonahon ni Jahowa hian tu si Musa.\\n40:33 Dipajongjong muse ma rimberimbe ni alaman i humaliang inganan na badia i dohot langgatan i, jala digantungkon rimberimbe tutup ni bahal ni alaman i. Jadi sun ma sandok ulaon i dipasidung si Musa.\\n40:34 Dung i ro ma ombun i manghungkupi undungundung parluhutan i, jala hamuliaon ni Jahowa manggohi inganan na badia i.\\n40:35 Pola ndang tarbahen si Musa laho bongot tu bagasan undungundung parluhutan i, ai sai mangulon do ombun i di atasna, jala hamuliaon ni Jahowa manggohi inganan na badia i.\\n40:36 Molo tung manaek ombun i sian atas inganan na badia i, borhat ma halak Israel i mardalan, manulus sandok dalannasida i.\\n40:37 Alai molo so manaek ombun i, ndang borhat nasida, sahat ro di ari hananaekna i.\\n40:38 Ai sai di atas ni inganan na badia i ombun ni Jahowa ia arian jala api do di atasna ia bornginna i dipaidaida sandok pinompar ni Israel di sude dalannasida i.","num_words":852,"character_repetition_ratio":0.128,"word_repetition_ratio":0.009,"special_characters_ratio":0.216,"stopwords_ratio":0.381,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Parjamita 12 | Alkitab TOBA\\n← Angka Ende 1\\nParjamita 11 →\\n12:1 Sai, dipaingotingot roham ma Sitompa ho di angka ari haposoonmu, tagan so ro dope angka ari hinamago, jala ngomngom angka taon pandohonanmu: Ndang lomo rohangku di angka i.\\n12:2 Tagan so mangkolom dope mata ni ari dohot hatiuron ro di bulan dohot angka bintang, jala mardapotdapot angka ari rondo.\\n12:3 Di ari uju i angka hitir angka sijaga bagas i jala telluktelluk baoa angka na margogo jala mansohot manduda angka panduda i ala nunga lam marurus, manjadi homur dohot angka na mandulo sian panduloan.\\n12:4 Jala tarhinsu hinsuhinsu haroroan na dua i lam tu ngerngerna suara ni pandudaan i, hira tudos tu suara ni amporik na ma, jala sulon sude boru ni parendeon.\\n12:5 Pola mabiar nasida mida nangkohan, jala lan habiaran di tongandalan disura rohana, jala marurus sian unte albung angka bunga na saksak jala sorat dihilala sihapor, jala mansadi angka hisaphisap, ai laho ma jolma i manopot bagas siingananna salelenglelengna nunga pola monsong mardalan di alaman angka pangondasi.\\n12:6 Tagan so tos dope tali perak i, manang matapor guriguri sere jala malala timbatimba di lambung pansur, jala malala galapang di lambung ni sumur.\\n12:7 Jala mulak orbuk i tu tano, pambuatanna hian, alai anggo tondi mulak tu Debata, nampunasa hian.\\n12:8 Tung na so marguna do saluhutna i, ninna parjamita i, saluhutna tahe ndang hasea.\\n12:9 Angkup ni, ala pistar parjamita i, diajarhon huhut parbinotoan tu halak situan na torop i, jala didasing, jala disulingkit, jala maraturan dibahen godang poda sipaingot.\\n12:10 Mutu huhut roha ni parjamita i mandiori hata angka na tangkas marhahonaan jala torang disurathon angka hata hasintongan.\\n12:11 Ai poda sipaingot sian halak na pistar songon hujur palait do, songon labang angka na pate nilabangkon, marhite sian halak na papungupunguhon, jala na nilehon ni Sada Parmahan.\\n12:12 Angkup ni ale anaha, sai olo ma ho paingoton marhite sian angka poda on! Ai ndang marpansadian halak patoroptorop buku, jala tung na loja do daging mandatdati pajahajaha angka i.\\n12:13 Pangarimpunan ni sude poda naung itabege, on do: Habiari Debata, jala radoti angka tonana, ai i do inana siingoton ni ganup jolma.\\n12:14 Ai nasa parulaon ni jolma boanon ni Debata sogot tu paruhuman ro di saluhut na buni, nang na denggan nang na jat.","num_words":362,"character_repetition_ratio":0.044,"word_repetition_ratio":0.0,"special_characters_ratio":0.214,"stopwords_ratio":0.29,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"HESEKIEL 10 - BIBLE & BUKU ENDE ONLINE\\n10:1 Dung i maralatan ma ahu, gabe ida ma, di ratarata ni langit, na di atas ulu ni angka kerubim, adong do songon batu intan sapir, songon sumansuman ni habangsa sada idaon di atasnasida.\\n10:2 Dung i ninna ibana ma tu baoa na marulos hori: Bongot ma ho tu holangholang ni angka roda, tu toru ni kerubim, jala gomaki gara ni api gok tanganmu duansa sian holangholang ni angka kerubim, jala sampakkon tu atas ni huta i. Jadi bongot ma ibana di adopan ni matangku.\\n10:3 Jongjong do ianggo angka kerubim di sambariba ni joro i tungkan siamun laho bongot baoa i, jala ombun i manggohi alaman parbagasan i.\\n10:4 Dung i tarhinsat ma hamuliaon ni Jahowa sian ginjang ni kerubim di atas ni lobulobu ni joro i, jadi digohi ombun i ma joro i, jala gok sinondang ni hamuliaon ni Jahowa do alaman i.\\n10:5 Dung i tarbege ma soara ni habong ni angka kerubim, sahat ro di alaman parbalian, suman tu soara ni Debata pargogo na so hatudosan, uju mangkatai ibana.\\n10:6 Jadi dung martona ibana tu baoa na marulos hori, songon on: Buat ma api sian holangholang ni angka roda, sian holangholang ni angka kerubim gabe bongot ma ibana, jala jongjong tu lambung ni roda i.\\n10:7 Jadi surduk ma tangan ni kerubim na sada sian tongatonga ni angka kerubim i tu api na di holangkolang ni angka kerubim, laos dibuat sian i jala dipagolomhon tu tangan ni na marulos hori, dung di jalo ruar ma ibana.\\n10:8 Dung i tarida ma di angka kerubim sumansuman ni tangan ni jolma sada di toru ni habongnasida.\\n10:9 Dung i maralatan ma ahu, gabe ida ma, opat roda di lambung ni angka kerubim, sada be do roda i di lambung ni kerubim sadasada, jala rupa ni angka roda tudos do tu batu intan tarsis.\\n10:10 Jala sisada rupa do opatsa nasida idaon, songon di tongatonga ni roda na sada do roda na sadanari.\\n10:11 Molo mardalan nasida, tungkan na opat desanasida do ditulus, ndang manaili tu pudi nasida jumpa mardalan, ai manang dompak dia dituju ulu i, ihut tusi do nasida mardalan, ndang manaili tu pudi nasida jumpa mardalan.\\n10:12 Jala sandok daging ni kerubim i, hau tanggurungnasida, tangannasida dohot habongnasida ro di angka roda i, gok mata do tuk humaliang, opatsa do nasida marroda be.\\n10:13 Taringot tu angka roda i digoar do nasida halisungsung, pola hubege.\\n10:14 Alai opat bohi be do angka parngolu i: Bohi ni na sada, bohi kerubim do, jala bohi ni na paduahon i, bohi jolma, jala na patoluhon i bohi singa, jala na paopathon i bohi pidong raja ualu.\\n10:15 Dung i tarhinsat ma angka kerubim i, i ma parngolu i na huida na jolo di topi ni batang aek Hebar.\\n10:16 Jala molo mardalan angka kerubim i, mardalan ma dohot roda angka na di lambungnasida, molo dipaperper angka kerubim i habongnasida, asa tarhinsat sian tano i, laos so mamedu dohot angka roda i sian lambungnasida.\\n10:17 Molo ngongong nasida rap ngongong do, molo tarhinsat nasida rap tarhinsat do, ai tondi ni parngolu i do di bagasan nasida.\\n10:18 Dung i ruar ma hamuliaon ni Jahowa sian atas ni lobulobu ni joro i, jala marsijongjong di atas ni angka kerubim i.\\n10:19 Dung i dipaperper angka kerubim i ma habongnasida, jala tarhinsat sian tano i di adopan ni matangku di na ruar i nasida, jala angka roda i di lambungnasida, jala ngongong be do di baba pintu ni joro ni Jahowa tungkan habinsaran, jala hamuliaon ni Debata ni Israel mangalinggomi nasida sian ginjang.\\n10:20 I ma parngolu i na huida di toru ni Debata ni Israel martopihon batang aek Hebar, gabe hutanda angka kerubim do nasida hape.\\n10:21 Maropat bohi be do sadasada, jala maropat habong be, jala sumansuman ni tangan ni jolma di toru ni habongnasida.\\n10:22 Jala rupa ni bohinasida, suman tu bohi angka na huida martopihon batang aek Hebar, rupanasida pe, nang nasida sandiri tahe, ganup masitulus dalanna tu jolona be.","num_words":645,"character_repetition_ratio":0.088,"word_repetition_ratio":0.0,"special_characters_ratio":0.227,"stopwords_ratio":0.392,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 28 - BIBLE & BUKU ENDE ONLINE\\n28:1 Molo tung tinggil situtu roham tumangihon soara ni Jahowa, Debatam, mangaringgas roham mangulahon patikna, angka na hutonahon i tu ho sadarion, jadi pabangkiton ni Jahowa, Debatam ma ho tumimbul sian nasa bangso di tano on.\\n28:2 Songgop ma huhut tu ho sude angka pasupasuon jala pasahatonna tu ho, molo ditangihon roham soara ni Jahowa, Debatam.\\n28:3 Pasupasuonna ma ho di bagasan huta, pasupasuonna ho huhut di ladang.\\n28:4 Pasupasuonna parbue ni bortianmi dohot parbue ni tanomi, pasupasuonna ma sinur angka dorbiam, lombum dohot birubirum.\\n28:5 Pasupasuonna ampangmu dohot pangudianmu.\\n28:6 Pasupasuonna ho laho bongot, jala pasupasuonna ho laho ruar.\\n28:7 Pasahaton ni Jahowa do angka musum angka na hehe mangalo ho, asa marragean nasida di adopanmi; marhite sian sada dalan nasida borhat mandopang ho, ingkon marhite sian pitu dalan nasida maporus maradophon ho.\\n28:8 Dokkonon ni Jahowa ma pasupasu mandongani ho di bagasan angka sopom dohot di saluhut na jinama ni tanganmu, jala pasupasuonna do ho di tano na nilehon ni Jahowa, Debatam tu ho.\\n28:9 Pahoton ni Jahowa ma ho gabe bangsona na badia, songon naung niuarihonna hian tu ho, molo tung diradoti ho angka tona ni Jahowa, Debatam, jala marparange ho di angka dalanna.\\n28:10 Asa tung saluhut bangso di tano on marnida, naung targoar do ho tu Goar ni Jahowa, laos mabiar nasida mida ho.\\n28:11 Jala tumpahan ni Jahowa ma ho marlobilobi di na denggan, di parbue ni bortianmu, di sinur ni pinahanmu dohot di parbue ni tanomi di tano naung niuarihon ni Jahowa hian tu angka ompum, lehononna tu ho.\\n28:12 Buhaon ni Jahowa ma di ho parpeopan ni artana na denggan i, i ma langit i, laho mangalehon udan tu tanomi di tingki halehetanna, huhut mamasumasu sandok jadijadian ni tanganmu, gabe ho parsalian ni torop bangso parbegu, alai anggo ho na so tupa marsali.\\n28:13 Jala pabangkiton ni Jahowa ma ho gabe ulu (ihutan), unang gabe ihur (pangihutihut); ingkon tongtong do ho di ginjang, ndang jadi ho di toru, molo tung ditangihon roham angka patik ni Jahowa, Debatam, angka na hutonahon i tu ho sadarion ringkotanmu jala ulahononmu.\\n28:14 Molo tung so manimbil ho tu siamun manang tu hambirang sian saluhut hata, angka na hutonahon i tu hamu sadarion, unang tung ihuthononmu angka debata sileban laho marsomba tusi.\\n28:15 Alai tung sura so ditangihon ho soara ni Jahowa, Debatam, asa mangaringkoti mangulahon angka uhumna dohot aturanna, angka na hutonahon i tu ho sadarion, songgop ma tu ho sude angka torutoru on jala mangonai tu ho.\\n28:16 Hona toru ho di bagasan huta, jala hona toru ho di ladang.\\n28:17 Hona toru ampangmu dohot pangudianmu.\\n28:18 Hona toru parbue ni bortianmu dohot parbue ni tanomi, nang anak poso ni lombum dohot birubirum.\\n28:19 Hona toru ho laho bongot jala hona toru ho laho ruar!\\n28:20 Tongoson ni Jahowa ma tu tongatongamu torutoru, hagaoron dohot hinamago di saluhut na jinama ni tanganmu, na niulami, paima sun siap ho jala mago magira, binahen ni hinaroa ni angka pambahenanmu, ala na tinadingkonmi Ahu.\\n28:21 Sai marnehetnehet do di tongatongamu begu antuk bahenon ni Jahowa, paima siaphononna ho sian tano sitopotonmu nuaeng bahen partalianmu.\\n28:22 Toruan ni Jahowa ma ho marhite sian sahit tiarap, panepane, rojan, arun dohot marhite sian podang, sirara dohot antingano, sai lotonganna do ho paima mago ho.\\n28:23 Ianggo langit na di atas ulum gabe tombaga, jala tano na di torum gabe bosi.\\n28:24 Lehonon ni Jahowa ma horsik dohot orbuk singkat ni udan tu tanomi, madabu do i tu ho sian langit, paima mago ho.\\n28:25 Pasahaton ni Jahowa ma ho marragean di adopan ni musum; marhite sian sada dalan ho borhat mandopang musum, hape marhite sian pitu dalan ho maporus maradophon ibana, jala marsipal ho bahenonna di sude harajaon na di tano on.\\n28:26 Ia bangkem ingkon gabe sipanganon di sandok pidong na di toru ni langit dohot di binatang na di tano on, jala ndang adong nanggo sahalak na olo mangalele.\\n28:27 Toruan ni Jahowa ma ho marhite sian puru Misir, dohot marhite sian baro, gurap dohot rasa na so hadaonan.\\n28:28 Toruan ni Jahowa ma ho marhite sian roha na rintik dohot na lalaen, tole marhite sian hapitungon.\\n28:29 Jadi ingkon dadapdadap ma ho di hos ni ari, songon pandadapi ni halak na mapitung di haholomon, jala ndang mardohar ho di angka dalanmu, ingkon ripe rupaon jala pupusan ho saleleng ho mangolu, jala so adong sipalua di ho nanggo sahalak.\\n28:30 Olionmu nian sada parompuan bahen jolmam, hape halak na asing marjolmahon; pajongjongonmu do nian sada jabu, alai ndang sanga ingananmu; pungkaonmu do nian sada porlak anggur, hape ndang sanga panganonmu parbuena.\\n28:31 Seaton ni halak ma lombum di adopan ni matam, hape ndang panganonmu sian i; laumon ni halak do halodem sian jolom, hape ndang pasuangonna tu ho; ripe tabanon ni angka musum do birubirum, jala so adong sipalua di ho nanggo sahalak.\\n28:32 Angka anakmu dohot borum pasahatonna tu bangso na asing, paidaidaon ni matam maradu lotop binahen ni siholmu tu nasida manipat ari, hape ndang marnangon tanganmu martangiang tu Debata.\\n28:33 Ia parbue ni tanomi ro di sude na hinangaluthonmi, suda do i panganon ni sada bangso na so tinandam, ingkon ripe rupaon jala pupusan ho saleleng ho mangolu.\\n28:34 Ingkon mago roham bahenon ni panuluthon ni matam, paidaida saluhutna i.\\n28:35 Toruan ni Jahowa ma ho marhite sian puru na rahat di ulu ni totmu dohot di haehaem, angka na so hadaonan olat ni palak ni patmu sahat ro di pakpak ulum.\\n28:36 Pabalion ni Jahowa ma ho rap dohot rajam, na pinabangkitmi gumomgom ho tu sada bangso parbegu, na so tinandam jala na so tinanda ni angka ompum, jadi oloanmu ma disi angka debata sileban sian hau dohot sian batu.\\n28:37 Jala ingkon gabe hagigian ho, gabe pambuatan umpama dohot alingalingan di tongatonga ni saluhut bangso, habalianmu bahenon ni Jahowa.\\n28:38 Godang do nian boni boanonmu ruar manaburhon tu ladangmu, hape otik do papunguonmu, ai suda do i gagaton ni sihapor.\\n28:39 Pungkaonmu do nian angka porlak anggur jala pauliulionmu, hape ndang sanga inumonmu anggur sian i manang tapuonmu parbuena, ai suda do i panganon ni gulokgulok.\\n28:40 Tubu do nian di ho angka hau Jetun di saluhut tanomi humaliang, alai ndang tagamon miahanmu dagingmu dohot miak, ai marurus boti do angka parbue ni hau Jetunmu.\\n28:41 Tubuhononmu do nian angka anak dohot boru, hape ndang adong tinggal anggo di lambungmu, ai ingkon mardalan tu habuangan do nasida.\\n28:42 Suda do palpalan ni tamponok sude hau sinuanmu dohot parbue ni tano i.\\n28:43 Ia halak dagang na di tongatongami lam leleng ingkon lam naek manindi ho, alai anggo ho lam leleng ingkon lam surut do.\\n28:44 Balik ibana pasali ho, alai anggo ho ndang tagamon parsalianna; ibana balik gabe ulu, alai anggo ho gabe ihur.\\n28:45 Sai na songgop do tu ho saluhut torutoru on jala lotonganna ho, jala mangonai tu ho, paima siap ho, ala na so tinangihonmu soara ni Jahowa, Debatam, mangaradoti angka patikna dohot aturanna, angka na tinonahonna tu ho.\\n28:46 Ingkon gabe tanda dohot halongangan angka i di ho dohot di pinomparmu ro di salelenglelengna.\\n28:47 Luhutna i ala na so nioloanmu Jahowa, Debatam, mardongan las ni roha dohot sonang ni roham, mida hinagodang ni saluhutna i.\\n28:48 Ingkon marpandapotan nama ho tu musum, angka sisuruon ni Jahowa mangalo ho, pataontaon haraparon, hauason, parsaemaraon dohot hahurangan marragamragam, jala pampeon ni Jahowa do auga bosi tu rungkungmu, paima agoonna ho.\\n28:49 Boanon ni Jahowa ma sada bangso parbegu sian na dao, sian ujung ni tano on mangalo ho, songon parhabang ni pidong raja wali, sada bangso na so niantusanmu pangkulingna.\\n28:50 Sada bangso na murhing marbohi, na so moralangalang mida halak na tuatua, jala na so marasi ni roha mida dolidoli.\\n28:51 Suda do panganonna anak ni pinahanmu dohot parbue ni tanomi, paima sun siap ho, ndang tebahononna di ho eme, anggur, miak, angka anak ni lombum dohot birubirum, paima sun siap ho bahenonna.\\n28:52 Jala tarsosak ho bahenonna di saluhut angka hutam, paima maloha dibahen parikmu angka na timbo jala na togu, pangatauan ni roham nian di sandok tanomi; tongon tahe tarsosak do ho bahenonna di saluhut angka hutam di sandok tanomi, silehonon ni Jahowa, Debatam tu ho.\\n28:53 Lam panganonmu do parbue ni bortianmu sandiri, sibuk ni angka anakmu dohot borum, angka naung nilehon ni Jahowa, Debatam tu ho, binahen ni hagogotan dohot pardangolan na sinosakkon ni angka musum tu ho.\\n28:54 Gari baoa na buas hian di tongatongamu jala na margadombus situtu, somor pamerengna mangiburu mida hahaanggina dohot mida jolmana tuan laenna hian dohot mida pasipasi ni anakna angka na tinggal dope mangolu.\\n28:55 Asa unang nian lehononna tu sada sian nasida sian sibuk ni anakna sandiri na pinanganna; ala so adong teba di ibana agia aha di bagasan hagogotan dohot pardangolan, na pinasosaksosak ni musumi ho di bagasan saluhut angka hutam.\\n28:56 Gari parompuan na buas hian di tongatongamu jala na margadombus, pola ndang somal mangojakkon palak ni patna tu tano dibahen pargadombusonna dohot buasna, somor matana mangiburu mida baoa bangunan ni rohana dohot mida anakna dohot mida boruna.\\n28:57 Unang nian lehononna tusi pusok ni posoposo naung ruar sian holangholang ni patna, manang mida posoposo naung tinubuhonna i, ai naeng do i panganonna di sihabunian, ala hurangan ibana di saluhutna, di bagasan hagogotan dohot pardangolan na pinasosaksosak ni musumi ho di bagasan angka hutam.\\n28:58 Molo tung so ringkotanmu mangulahon saluhut hata ni patikon, angka na tarsurat di bagasan buku on, asa marhabiaran ho tu Goar na marmulia on dohot na songkal, i ma Jahowa, Debatam.\\n28:59 Marhasurungan ma torutoru tu ho dohot tu pinomparmu bahenon ni Jahowa, torutoru angka na bolon dohot na tongtong, ro di angka sahit na rahat jala na leleng honahononna tu ho.\\n28:60 Jala marsibalik mangonai tu ho bahenonna saluhut sahit na masa di Misir, angka na hinabiaranmu na jolo, i ma angka na mangonai tu ho.\\n28:61 Tole muse saluhut sahit dohot torutoru angka na so tarsurat di bagasan angka buku patikon, pasonggopon ni Jahowa do i tu ho, paima siap ho.\\n28:62 Jadi otik nama jolma tinggal sian hamu, atik pe tudoshon bintang na lohot di langit hinatoropmu na jolo, ala so ditangihon ho soara ni Jahowa, Debatam.\\n28:63 Jadi ia songon i las ni roha ni Jahowa mida hamu na jolo, mambahen uhum na denggan tu hamu dohot patorophon hamu, suang songon i marlas ni roha Jahowa mida hamu laho mangago dohot maniaphon hamu, jala butbutanna hamu sian tano simasukanmuna nuaeng bahen partalianmu.\\n28:64 Ai paserahon ni Jahowa ma ho tu tongatonga ni angka bangso, sian ujung ni tano on na sada tu ujungna na sadanari, jadi oloanmu ma disi debata sileban sian hau dohot sian batu, angka na so tinandam hian manang angka ompumu pe.\\n28:65 Angkup ni ndang tagamon marhasonangan ho di tongatonga ni angka bangso i, jala ndang adong pangulonan di palak ni patmu, ai lehonon ni Jahowa do tu ho disi roha na tongtong godoron dohot mata na rondaron dohot ateate na marpandelean.\\n28:66 Jadi gantung nama ngolum di obuk sada di adopanmu, jala marhatahuton ho borngin dohot arian, jala ndang be nalom roham di ngolum.\\n28:67 Manogotna i dohononmu: Oe aut haru bodari ma nian! Jala bodarina i dohononmu: Aut haru torang ari ma nian! Binahen ni biar ni roham do i, na mambiarbiari ho dohot binahen ni hinamago angka na niida ni matam.\\n28:68 Dung i mulak ho tu Misir boanon ni Jahowa di bagasan angka parau, sian dalan naung pola hupaboa nian tu ho: Ndang jadi be idaonmu i, jala gadison do hamuna disi tu angka musumuna bahen hatoban baoa dohot parompuan nian, hape ndang adong halak na olo manuhor.\\n28:69 On do hata ni parpadanan na nidokkon ni Jahowa tu si Musa bahenonna tu halak Israel di tano Moab, di balik ni parpadanan naung binahenna i tu nasida di Horeb.","num_words":1896,"character_repetition_ratio":0.071,"word_repetition_ratio":0.003,"special_characters_ratio":0.218,"stopwords_ratio":0.31,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I MUSA 17 - BIBLE & BUKU ENDE ONLINE\\n17:1 Jadi dung marumur siapulu sia taon si Abram, diida ma ro Jahowa na mandok tu ibana: Ahu do Debata, na sun hinagogo; sai marparange di jolongku ma ho, jala daulat roham!\\n17:2 Asa hupahot padanhu dohot ho, jala hupatorop situtu ho.\\n17:3 Jadi manungkap ma si Abram. Dung i mangkatai Debata muse dohot ibana:\\n17:4 Ianggo Ahu, ida ma, nunga hot padanhu dohot ho, jala torop angka bangso marompu tu ho sogot.\\n17:5 Ala ni ndang be si Abram goarmu dohonon, si Abraham ma goarmu, ai nunga hupabangkit ho gabe ompu ni torop angka bangso.\\n17:6 Jala sopar situtu ho tumpahanku, jala pabangkitonku ho gabe ompu parsadaan ni angka bangso, jala marroan sian ho angka raja.\\n17:7 Sai pahotonku do padanhu tu ho dohot tu pinomparmu sogot marsundutsundut, gabe padan salelenglelengna, paboa Ahu gabe Debatam dohot Debata ni pinomparmu sogot.\\n17:8 Jala lehononku tu ho dohot tu pinomparmu sogot tano paisolatanmu nuaeng, i ma sandok tano Kanaan bahen partohapan salelenglelengna, jala Debatanasida Ahu.\\n17:9 Angkup ni didok Debata tu si Abraham: Ho pe, sai ingot ma padan na hubahen i, ho dohot pinomparmu sogot marsundutsundut.\\n17:10 On do padan siingotonmuna, na hubahen i tu ho dohot tu pinomparmu sogot: Ingkon sunaton do nasa baoa sian hamu.\\n17:11 Ingkon sunatonmuna do sibuk ni sibursiburmuna bahen tanda ni padanhu dohot hamu.\\n17:12 Ia anak sunatonmuna ma molo marumur ualu borngin, nasa baoa pinomparmuna na tubu di jabum dohot na tinuhor ni hepeng sian nasa halak sileban na so sian pinomparmu.\\n17:13 Ingkon sunaton do na tubu di jabum dohot na tinuhor ni hepengmu, asa padan na salelengnilelengna do padanhu na di sibukmuna i.\\n17:14 Ia baoa parhulup, na so tarsunat sibuk ni sibursiburna ripashononhon do ibana sian bangsona, ala diose padanhu.\\n17:15 Dung i didok Debata muse tu si Abraham: Ndang be si Sarai dohononmu goar ni jolmam, si Sarah ma goarna.\\n17:16 Ai pasupasuonku ibana, jala lehononku ma di ho anak sada nang sian ibana, jala pasupasuonku ibana gabe angka bangso; gari raja ni angka bangso marroan sian ibana sogot.\\n17:17 Jadi manungkap ma si Abraham jala mengkel, didok ma di bagasan rohana: Tung tubuan anak ma jolma sisaratus taon jala manubuhon ma tagamon si Sarah, na marumur siapulu taon?\\n17:18 Dung i ninna si Abraham ma tu Debata: Asal mangolu si Ismael maradophon Ho!\\n17:19 Jadi ninna Debata ma: Tongon do, ingkon tubuhonon ni si Sarah, jolmam anak sada di ho, bahen ma goarna si Isak; pahotonku do padanhu dohot ibana, padan na salelenglelengna, ro di pinomparna sogot.\\n17:20 Taringot tu si Ismael pe, nunga hutangihon ho, ida ma, nunga hupasupasu ibana, tumpahanku ma ibana gabe, asa torop situtu ibana. Sampulu dua raja tubuna, jala bangso na bolon ibana bahenonku.\\n17:21 Alai anggo padanhu pahotonku dohot si Isak, situbuhonon ni si Sarah di ho, taon i songon on.\\n17:22 Jadi dung sun Debata mangkatai dohot ibana, manaek ma Debata sian si Abraham.\\n17:23 Dung i dibuat si Abraham ma si Ismael, anakna i dohot sude anak angka na tubu di jabuna ro di sude na tinuhor ni hepengna, nasa baoa, pangisi ni jabu ni si Abraham, jala disunati sibuk ni sibursiburnasida, laos di ari pangkataianna, songon na nidok ni Debata tu ibana.\\n17:24 Ia umur ni si Abraham di na tarsunat i sibuk ni sibursiburna i siapulu sia taon do.\\n17:25 Alai anggo umur ni si Ismael, anakna i, sampulu tolu taon do, di na tarsunat i sibuk ni sibursiburna i.\\n17:26 Laos di ari na sasada i do tarsunat si Abraham dohot si Ismael anakna i.\\n17:27 Ro di nasa baoa, pangisi ni jabuna, na tubu di jabuna dohot na tinuhor ni hepeng sian halak sileban, tarsunat do i rap dohot ibana.","num_words":593,"character_repetition_ratio":0.072,"word_repetition_ratio":0.0,"special_characters_ratio":0.233,"stopwords_ratio":0.354,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JEREMIA 39 - BIBLE & BUKU ENDE ONLINE\\n39:1 Dung i tartaban ma huta Jerusalem. Pasiataonhon hinarajahon ni si Sedekia, raja sian Juda, di bulan sipaha sampulu, ro ma si Nebukadnesar, raja sian Babel dohot sandok paranganna tu Jerusalem, jala ditungkum huta i.\\n39:2 Pasampulu sada taonhon hinarajahon ni si Sedekia di bulan sipaha opat ari pasiahon huta i dibongoti.\\n39:3 Jadi masuk ma saluhut induk pinabangkit ni raja sian Babel laos juguk nasida mardonokkon harbangan partonga: si Nergal-Sareser, si Sumgar Nebo, si Sarsekim, sintua ni angka pangarajai, si Nergal-Sereser, sintua ni angka na pistar ro di saluhut induk na asing pinabangkit ni raja sian Babel.\\n39:4 Jadi dung diida si Sedekia, raja sian Juda dohot sude halak parmusu nasida, gabe maporus ma nasida bornginna i sian huta i sian dalan tu porlak ni rajai boti tu bahal di holangholang ni na dua parik i, jala ruar sian dalan tu adaran.\\n39:5 Alai dieak parangan ni halak Kasdim ma nasida sian pudi, jala dapotsa ditangkup si Sedekia di adaran Jeriko, laos diboan ma ibana tu jolo ni si Nebukadnesar, raja sian Babel tu Ribla, di luat Hamat, jala didabu uhumna tu ibana.\\n39:6 Dung i diseati raja sian Babel ma angka anak ni si Sedekia di Ribla di adopan ni matana, ro di saluhut angka na raja sian Juda diseati raja sian Babel.\\n39:7 Alai dipulsikkon do anggo mata ni si Sedekia jala dirante ibana dohot dua rante tombaga laho mamboan ibana tu Babel.\\n39:8 Alai anggo bagas ni rajai dohot bagas ni situan na torop i disurbu halak Kasdim do dohot api jala angka parik ni Jerusalem dipanepnep do.\\n39:9 Alai anggo pasipasi ni bangso i, angka na teba di huta i dohot angka na bali tu ibana dohot pasipasi ni bangso angka na teba i, diboan si Nebusaradan, sintua ni angka parangan do tarbuang tu Babel.\\n39:10 Alai anggo sian situan na torop, angka na pogos i, angka na so pardiadia, ditadingkon si Nebusaradan, sintua ni angka parangan i di tano Juda, jala dilehon tu nasida angka porlak anggur dohot hauma di na sadari i.\\n39:11 Dung i martona ma si Nebukadnesar, raja sian Babel marhitehite si Nebusaradan, sintua ni angka parangan i taringot tu si Jeremia songon on:\\n39:12 Buat ma ibana jala marpanatap roham mida ibana, jala unang bahen tu ibana agia aha na jat, ingkon marguru sian hatana tu ho bahenonmu tu ibana.\\n39:13 Jadi marsuru suruanna ma si Nebusaradan, sintua ni angka parangan dohot si Nebusasban, sintua ni angka naposo dohot si Nergal-Sareser, sintua ni angka na pistar dohot saluhut sintua ni raja sian Babel.\\n39:14 Disuru nasida ma mangalap si Jeremia sian alama ni hurungan i jala dipasahat ibana tu si Gedalia, anak i si Ahikam, tubu ni si Sapan laho manogihon ibana tu jabuna, laos maringan di tongatonga ni situan na torop i ibana.\\n39:15 Nunga ro hian hata ni Jahowa tu si Jeremia uju tarhurung ibana di alaman ni hurungan i songon on:\\n39:16 Laho ma ho, paboa ma tu si Ebedmelek marga Etiopia: Songon on hata ni Jahowa Zebaot, Debata ni Israel: Ida ma, ahu pasintongkon angka hata lumbalumbangku tu huta on mambahen hamagoan, ndada mambahen hasonangan, jala apala di adopanmu do i songgop di na sadari i.\\n39:17 Alai paluaonku do anggo ho di ari na sasada i, ninna Jahowa, jala ndang jadi sahat ho tu tangan ni halak angka na hinabiaranmu.\\n39:18 Ai ingkon ahu sandiri paluahon ho, asa unang mate ho bahenon ni podang, jala ingkon malua hosam hira tabanmu, ala naung marhaposan ho tu ahu, ninna Jahowa.","num_words":570,"character_repetition_ratio":0.089,"word_repetition_ratio":0.0,"special_characters_ratio":0.22,"stopwords_ratio":0.379,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I MUSA 15 - BIBLE & BUKU ENDE ONLINE\\n15:1 Dung salpu angka jamita ondeng ro ma hata ni Jahowa tu si Abram marhitehite alatan, ninna ma: Unang ho mabiar ale Abram. Ahu do lombulombum, upam mansai balga.\\n15:2 Alai ninna si Abram ma: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu.\\n15:3 Angkup ni ninna si Abram: Ndi, ndang adong pinomparhu dilehon ho, jala ida, anak na tubu di bagasan jabungku na ma sitean ahu.\\n15:4 Dung i ro ma hata ni Jahowa mandok tu ibana: Ndang ibana tumean ho, na ruar sian butuham, ibana tumean ho.\\n15:5 Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.\\n15:6 Jadi porsea ma si Abram di Jahowa, gabe hatigoranna do i dietong Jahowa.\\n15:7 Dung i didok ma tu ibana: Ahu do Jahowa, na paruarhon ho sian Ur ni halak Kasdim, mangalehon tu ho tano on bahen teanteananmu.\\n15:8 Alai ninna si Abram ma: Ale Tuhan Jahowa, di aha ma tandaonku paboa ahu tumeansa.\\n15:9 Dung i ninna Tuhan i ma mandok ibana: Buat ma di Ahu sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada.\\n15:10 Jadi diboan ma i sude di Tuhan i, angka dipardostonga ma i, dung i martoradan be ma dibahen; alai anggo pidong i ndang dibola.\\n15:11 Dung i marsonggopan ma angka pidong panoro tu angka juhut pelean i, alai diosikkon si Abram ma angka pidong i.\\n15:12 Jadi dung manihir mata ni ari, tarnenep modom ma si Abram, gabe songgop ma tu ibana hasonggoton dohot haholomon bolon.\\n15:13 Dung i ninna ma mandok si Abram: Unang so diboto ho, paisolat do sogot pinomparmi di tano na so golatna, jala parhatobanonna nasida, jala paporsukporsuhonna arga opat ratus taon.\\n15:14 Alai bangso na marhatobanhon nasida pe uhumonku do; dung i ruar ma nasida mantat ugasan godang.\\n15:15 Ianggo ho topotonmu do angka ompum mardamedame, tanomon do ho dung sarimatua.\\n15:16 Dung i paopatsunduthon mulak ma nasida, ai ndang dope sun hinajahat ni halak Amori.\\n15:17 Jadi dung mate mata ni ari, jala holom marimpotimpot, ida ma, martimus ma sada pamurunan, jala disola sada sipusipu na gara holangkolang ni angka tanggotanggo.\\n15:18 Di ari na sasada i marpadan ma Jahowa dohot si Abram, ninna ma: Tu pinomparmu do lehononku tano on olat ni batang aek Misir sahat ro di batang aek na bolon, i ma batang aek Euprat.\\n15:19 Tano na niinganan ni halak Keni dohot halak Kenizi dohot halak Kadmoni.\\n15:20 Dohot halak Het dohot halak Perisi dohot halak Repaim.\\n15:21 Dohot halak Amori dohot halak Kanaan i dohot halak Girgasi dohot halak Jebusi.","num_words":466,"character_repetition_ratio":0.063,"word_repetition_ratio":0.0,"special_characters_ratio":0.238,"stopwords_ratio":0.371,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JOSUA 11 - BIBLE & BUKU ENDE ONLINE\\n11:1 Alai dung dibege si Jabin, raja sian Hazor barita i, marhara ma ibana tu Jobab, raja sian Madon, dohot tu raja sian Simron, dohot tu raja sian Aksap.\\n11:2 Dohot tu raja, angka na tungkan utara, di dolok dohot di tano adaran, tungkan dangsina sian Kinerot dohot di tano pea dohot di angka luat Dor martopihon laut.\\n11:3 Tu halak Kanaan tungkan habinsaran dohot tungkan hasundutan, tu halak Amori, halak Het, halak Perisi, halak Jebusi, angka na di dolok dohot tu halak Hevi, tungkan bona ni Hermon di luat Mispa.\\n11:4 Jadi borhat ma nasida rap dohot sude parangannasida, bangso na bolon situtu, sobokkon horsik na di pasir ni laut toropna, tole hoda dohot hureta mansai torop.\\n11:5 Marluhut ma sude angka raja ondeng, jala ro rap marsaro mardonokkon tao Merom laho marmusu dompak Israel.\\n11:6 Jadi didok Jahowa ma tu si Josua: Unang ho mabiar maradophon nasida, ai marsogot songon on pasahatonku ma nasida luhut ragehonon ni halak Israel; tangkaonmu ma ianggo pat ni hodanasida, jala tutungonmu huretanasida dohot api.\\n11:7 Jadi dirampok si Josua rap dohot nasa paranganna nasida so pangkirimanna martopihon tao Merom.\\n11:8 Jadi dilehon Jahowa ma nasida tu tangan ni halak Israel, angka na manaluhon nasida, jala dilele sahat ro di Sidon na bolon, sahat ro di Misrepot-Maim, jala sahat ro di rura Mispa tungkan habinsaran, jala diragehon nasida paima soada tading sian nasida nanggo sahalak.\\n11:9 Jadi dibahen si Josua ma tu nasida songon na nidok ni Jahowa tu ibana, ditangka ma pat ni hodanasida, jala ditutung angka huretanasida dohot api.\\n11:10 Dung i mulak ma si Josua uju i, jala dipapatu Hazor, jala ditampuli rajana dohot podang, ai Hazor do nasailaon huta sabungan ni saluhut angka harajaon i.\\n11:11 Jala ditampuli sude jolma isi ni huta i, huhut harom dibahen, ndang adong tading nanggo sada na marhosa, jala disurbu Hazor dohot api.\\n11:12 Ro di sude huta ni angka raja ondeng dohot sude rajanasida i ditaban si Josua, jala ditampuli nasida dohot podang, huhut harom nasida dibahen, songon na tinonahon ni si Musa, naposo ni Jahowa.\\n11:13 Holan sude huta angka na ojak di buntulbuntul, ndang disurbu Israel, dungkon ni Hazor sambing disurbu si Josua.\\n11:14 Dung i dibagi halak Israel ma di nasida sandok tabantaban ni angka huta i, ro di pinahan; holan jolma i luhut ditampuli nasida, paima sun siap nasida, ndang adong tading na marhosa nanggo sada.\\n11:15 Songon na tinonahon ni Jahowa tu si Musa, naposona i, songon i do ditonahon si Musa tu si Josua, jala songon i do dibahen si Josua, ndang adong tading dibahen sian sude na tinonahon ni Jahowa tu si Musa, nanggo sada hata.\\n11:16 Jadi disoluk si Josua ma sandok tano i: Tano dolok dohot sandok tano tungkan dangsina ro di sandok tano Gosen, tano pea dohot adaran, ro di dolok Israel dohot angka rurana.\\n11:17 Olat ni tor saesae, na nangkok tungkan Seir sahat ro di Baal-Gad, di rura ni Libanon, marbonahon dolok Hermon, jala sude rajanasida i ditaban, jala dibunu nasida.\\n11:18 Alai nania leleng do si Josua marmusu dohot sude angka raja ondeng.\\n11:19 Ndang adong nanggo sada huta na mardemak tu halak Israel sian dengganna, dungkon ni halak Hevi, angka na maringan di Gibeon; saluhut huta i dibuat nasida marhite sian porang.\\n11:20 Ai sian Jahowa do tangkang ni rohanasida i laho marmusu dompak Israel, asa harom nasida, jala unang nasida jumpangan asi ni roha, asa tung siap nasida, songon na tinonahon ni Jahowa tu si Musa.\\n11:21 Uju i ma huhut ro si Josua mangaripurhon halak Enak sian tor, sian Hebron, sian Debir, sian Anab, sian sandok tor Juda dohot sian sandok tor Israel, jala harom nasida rap dohot hutanasida i dibahen si Josua.\\n11:22 Ndang adong tading halak Enak di tano ni halak Israel, holan di Gaza, di Gad dohot di Asdod adong tading nasida.\\n11:23 Jadi dipapatu si Josua ma nasa tano i, sandok hombar tu na nidok ni Jahowa tu si Musa, jala diparlehon si Josua tano i bahen partalian ni Israel, hombar tu sagisagiannasida marmargamarga. Dung i sohot ma hamusuon sian tano i.","num_words":662,"character_repetition_ratio":0.065,"word_repetition_ratio":0.0,"special_characters_ratio":0.223,"stopwords_ratio":0.341,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JESAYA 11 - BIBLE & BUKU ENDE ONLINE\\n11:1 Dung i ruar ma sada tunas sian tungko ni si Isai, jala marparbue sada tubis na tubu sian uratna.\\n11:2 Jadi songgop ma tu ibana Tondi ni Jahowa, Tondi ni habisuhon dohot hapistaran, Tondi ni panuturion dohot hagogoon, Tondi ni parbinotoan dohot biar maradophon Jahowa.\\n11:3 Jala halomohononna do hadaulaton maradophon Debata, jala ndang manguhum ibana marguru tu parnida ni matana, jala ndang manguhum ibana marguru tu na binege ni pinggolna.\\n11:4 Marhitehite hatigoran tahe uhumonna angka na pogos, jala marhitehite hasintongan patingkosonna uhum tu angka na dangol di tano on, jala marhitehite batahi ni pamanganna libasonna tano on, jala marhitehite tondi ni bibirna bunuonna halak parjahat i.\\n11:5 Jala hatigoran do hohos ni gontingna, jala habonaron hohos ni akna.\\n11:6 Disi ma maringan gompul di lambung ni birubiru, jala manggompang babiat di lambung ni hambing, jala tampak do anak ni lombu, babiat dohot pinahan na pinamokmok, jala dakdanak na metmet marmahan nasida.\\n11:7 Rap manjampal ma lombu dohot babiat, jala tampak modom angka anakna be, jala panganon ni singa duhutduhut songon dorbia.\\n11:8 Jala posoposo marmeameam di lambung ruang ni ulok dari, jala dakdanak nambura sirang susu mangarorohon tanganna tu ruang ni libe.\\n11:9 Ndang be manjahati manang mangago nasida di sandok dolok habadiaonku, ai gok parbinotoan di Jahowa tano on sogot, songon aek ni laut mangalungkupi tondolanna.\\n11:10 Jadi masa ma di na sadari i: Usouso ma angka parbegu di urat ni si Isai, na pinatindang bahen partonggol ni angka bangso, jala pangulonanna do hamuliaon.\\n11:11 Dung i di na sadari i: Ulahan ni Tuhan i ma paduahalihon patoltol tanganna tumobus pasipasi ni bangsona, na teba sian Assur dohot sian Misir dohot sian Patros dohot sian Kus dohot sian Elam dohot Sinear dohot sian Hamat dohot sian angka pulo na di laut.\\n11:12 Dung i patindangonna ma sada partonggol di tongatonga ni angka parbegu, jala papunguonna angka na nilele sian Israel dohot angka na mampar sian Juda, papunguonna sian na opat desa ni tano on.\\n11:13 Jadi sohot ma pangiburuon ni Epraim, jala siap angka na manosak Juda. Ndang be iburuon ni Epraim Juda, jala ndang be sosahan ni Juda Epraim.\\n11:14 Alai rap habang do nasida tu abara ni halak Palistim tungkan hasundutan, tampak do nasida muse mamupusi angka anak tungkan habinsaran, papatuon ni tanganna Edom dohot Moab, jala pinompar ni Amon marpandapotan tu nasida.\\n11:15 Jala hona toru ni Jahowa solok ni laut Misir, jala ondamhononna tanganna dompak batang aek i marhitehite parpiar ni murukna, jala bagionna gabe pitu sunge, asa dapot hatariparan marhitehite sipatu.\\n11:16 Jadi adong ma dalan na bolon sada di pasipasi ni bangsona na teba sian Assur, songon di Israel uju di ari haruruarna sian tano Misir.","num_words":435,"character_repetition_ratio":0.054,"word_repetition_ratio":0.0,"special_characters_ratio":0.208,"stopwords_ratio":0.333,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Hesekiel 44 | Alkitab TOBA\\n← Hesekiel 45\\nHesekiel 43 →\\nAugust 17, 2008 · 12:57\\n44:1 Dung i ditogihon ibana ahu mulak sian dalan laho tu pintu ruar ni inganan na badia i na tungkan habinsaran, hape hinsu do i nidapot.\\n44:2 Dung i ninna Jahowa ma tu ahu: Ingkon laos hinsu do anggo pintu on, ndang jadi ungkapon, sahalak pe ndang jadi masuk sian i ala Jahowa, Debata ni Israel, naung masuk sian i; umbahen ingkon laos tarhinsu.\\n44:3 Taringot tu induk i, induk do ibana tongon, umbahen ingkon hundul ibana di bagasanna laho manganhon roti di adopan ni Jahowa; ingkon mardalan sian panisioan ni harbangan i ibana laho bongot, laos sian dalan i muse ibana ruar.\\n44:4 Dung i diboan ibana ahu sian dalan tu harbangan na tungkan utara tu jolo ni joro i, gabe ida ma, gok hamuliaon ni Jahowa do joro ni Jahowa huida, jadi manungkap ma ahu tu tano.\\n44:5 Dung i ninna Jahowa ma tu ahu: Ale anak ni jolma, parateatehon ma on jala ida marhitehite matam jala tangihon marhitehite pinggolmu saluhut sipaboaonku tu ho, taringot tu saluhut aturan ni joro ni Jahowa dohot taringot tu sandok patik ni uhumna, jala ingkon pampeonmu tu roham dalan laho bongot tu joro i ro di sude dalan laho ruar sian inganan na badia i!\\n44:6 Jala dohononmu ma tu pinompar ni Israel na tangkangi: Songon on do hata ni Tuhan Jahowa: Tung na torbang do hamu, ale pinompar ni Israel mangulahon luhut angka hasogiron marragamragam.\\n44:7 Tung ditogihon hamu do angka halak ruar, angka na so tarsunat rohana dohot dagingna, asa masuk tu ingananku na badia i laho paramunhon jorongki, di na pinelehonmuna rotingku, i ma tabotabo dohot mudar, tung diose nasida do padan na hubahen i marhite sian saluhut hasogiron angka na niulamuna i.\\n44:8 Jala ndang diradoti hamu ulaon ni habadiaonku, tung roharoha do dibahen hamu pabangkithon halak bahen siradoti ulaonku gantimuna di ingananku na badia i.\\n44:9 Songon on do hata ni Tuhan Jahowa: Sandok halak ruar angka na so tarsunat rohana dohot dagingna, ndang jadi masuk tu ingananku na badia i, sandok halak ruar tahe, angka na maisolat di tongatonga ni halak Israel.\\n44:10 Gari halak Lepi, angka na paholang dirina sian ahu, uju na lilu Israel, angka na lilu tumundalhon ahu mangihuthon tu angka ganaganaannasida, ingkon usungonna hajahatonnasida i:\\n44:11 Ingkon gabe parhalado nama nasida di ingananku badia i, gabe angka parjaga di lambung ni angka pintu ni joro i, gabe angka parhalado di bagasan joro i: Angka nasida do maneati sogot pelean situtungon dohot pelean sipotongon di situan na torop i, ingkon tindang nasida di adopannasida marhalado di nasida.\\n44:12 Ala na marhalado nasida na jolo di nasida di adopan ni angka ganaganaannasida, asa mambahen parbonsiran tu hajahaton di pinompar ni Israel, ala ni do hupatoltol tanganku dompak nasida, ninna Tuhan Jahowa, ingkon manginona tu nasida hajahatonnasida i:\\n44:13 Ndang jadi be nasida jumonok tu ahu mangaradoti tohonan malim di ahu, manang jumonok pe tu sandok habadiaonku, manang tu na songkal sahali, ingkon usungonnasida haurahonnasida i dohot hasogiron, angka na niulanasida i.\\n44:14 Jadi hubahen nasida angka siradoti parjagaon di joro i mangaradoti sandok ulaonna ro di sude sibahenon disi.\\n44:15 Alai anggo angka malim, halak Lepi, angka anak ni si Sadok, angka na tongtong mangaradoti ulaon ni habadiaonku, uju na lilu halak Israel sian ahu, ianggo nasida ingkon jumonok tu ahu marhalado di ahu, ingkon tindang nasida di jolongku laho umpelehon tu ahu tabotabo dohot mudar, ninna Tuhan Jahowa!\\n44:16 Ingkon nasida bongot tu habadiaonku, jala nasida jumonok tu mejangku marhalado di jolongku, jala mangaradoti ulaonku.\\n44:17 Molo naeng bongotannasida angka pintu ni alaman parbagasan i, ingkon solukkononnasida pangkean hori, ndang jadi alit tu nasida pangkean sian imput ni birubiru saleleng marhalado nasida di bagasan angka pintu ni alaman parbagasan i manang di bagasan joro i.\\n44:18 Ingkon martalitali hori nang ulunasida, jala saraoal hori di gontingnasida, ndang jadi marhohosnasida, pola hodokan dibahen.\\n44:19 Ia laho ruar nasida tu alaman parduru, tu alaman parduru sahali mandapothon halak situan na torop tahe, ingkon tanggalannasida pangkeannasida, angka na pinangkena marhalado, jala pajoponna do i di bagasan angka bilut ni habadiaon i, jala solukkononna muse angka ulos hian, asa unang diparbadiai nasida situan na torop i marhitehite pangkeannasida i.\\n44:20 Ulunasida pe ndang jadi nabunganna manang pasombuonna obukna ganjang, asal simburanna do obuk ni ulunasida i.\\n44:21 Nasa malim, ndang jadi minum anggur laho bongot nasida tu alaman parbagasan i.\\n44:22 Ndang jadi buatonna parompuan na mabalu manang na binolongkon bahen jolmanasida, ingkon namarbaju do sian pinompar ni bangso Israel, manang parompuan naung mangkabaluhon malim buatonna.\\n44:23 Ingkon podaannasida huhut bangsongku, asa diboto nasida parsirang ni na badia martimbangkon na ursam dohot parsirang ni na ramun martimbangkon na pansing.\\n44:24 Molo tubu parsalisian, ingkon tindang nasida laho manguhum, hombar tu angka uhumhu uhumonna; jala patik ni uhumhu dohot patikpatikku, ingkon radotannasida do di saluhut ari rayangku, jala angka ari Sabbathu parbadiaannasida.\\n44:25 Bangke ni jolma na mate pe ndang jadi tingkironnasida paramunhon dirina, dungkon ni ama manang ina, manang anak, manang boru, manang hahaanggi, manang iboto na so dung marharajaan, itenang diramuni nasida disi.\\n44:26 Ia dung muse diuras dirina ingkon jujuron dope pitu ari tu ibana.\\n44:27 Dung i di ari habobongotna muse tu habadiaon i, tu alaman parbagasan i, laho marhalado di bagasan habadiaon i, ingkon pelehononna pelean pardosaonna i, ninna Tuhan Jahowa!\\n44:28 Ingkon adong huhut partalian di nasida, ahu do tahe partaliannasida, asa ndang jadi lehononmuna partohapan tu nasida di tongatonga ni Israel, ahu do tahe partohapannasida i.\\n44:29 Alai anggo pelean sipanganon dohot pelean pardosaon dohot pelean parsalaan, ingkon nasida do manganhon i, jala sandok na niontongkon di tongatonga ni Israel, nasida do nampunasa.\\n44:30 Angkup ni patumonaan ni sandok parjolo tubu, ro di sude pelean tatingan sian saluhut peleanmuna i, ingkon angka malim nampunasa, nang patumonaan ni na niudimuna, ingkon lehononmuna do tu malim, asa mian pasupasu di atas ni bagasmu.\\n44:31 Alai nasa bangke manang juhut soroan binahen ni pidong manang binatang ndang jadi panganon ni angka malim.","num_words":964,"character_repetition_ratio":0.055,"word_repetition_ratio":0.0,"special_characters_ratio":0.205,"stopwords_ratio":0.301,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"PANGUHUM 10 - BIBLE & BUKU ENDE ONLINE\\n10:1 Jadi dung salpu si Abimelek, hehe ma muse si Tola, anak ni si Pua, anak ni si Dodo, sada halak sian marga Isasar paluahon halak Israel, jala maringan ibana di Samir, di dolok Epraim.\\n10:2 Jala diparenta ibana halak Israel duapulu tolu taon lelengna. Dung i mate ibana, jala tartanom di Samir.\\n10:3 Dung salpu ibana, hehe ma muse si Jair, halak Gilead, jala diparenta halak Israel duapulu dua taon lelengna.\\n10:4 Jala tolupulu do anakna, angka na marsihundul di tolupulu halode, laos tolupulu hutanasida, angka na targoar huta ni si Jair rasirasa sadarion, angka na di tano Gilead.\\n10:5 Dung i mate ma si Jair, jala tartanom di Kamon.\\n10:6 Dung i diulahi halak Israel muse mambahen sogo ni roha ni Jahowa, jala marsomba tu angka Baal dohot tu Astarot, dohot tu angka debata ni Ram, dohot tu angka debata ni Sidon, dohot tu angka debata ni Moab, dohot tu angka debata ni halak Amon, dohot tu angka debata ni halak Palistim, jala ditadingkon nasida Jahowa, jala ndang Ibana dioloi nasida.\\n10:7 Jadi marsigorgor ma rimas ni Jahowa mida Israel, laos digadishon nasida tu tangan ni halak Palistim dohot tu tangan ni halak Moab.\\n10:8 Jadi diparsipal, jala dirupa nasida ma halak Israel, mamungka di na sataon i boho sampulu ualu taon lelengna, luhut halak Israel angka na di bariba ni Jordan, di tano ni halak Amori, na di Gilead.\\n10:9 Angkupni ditaripari halak Amon do Jordan i, laho marmusu tandang huhut dompak Juda dohot dompak Benjamin dohot dompak pinompar ni Epraim, gabe targogot situtu Israel.\\n10:10 Jadi mangangguhi ma halak Israel tu Jahowa, angka ninna ma: Nunga mardosa hami dompak Ho, ala naung hutadingkon hami Debatanami, jala ala naung marsomba hami tu angka Baal.\\n10:11 Alai ninna Jahowa ma tu halak Israel: Nda hona pangarupaon hamu na jolo dibahen halak Misir, halak Amori, halak Amon dohot halak Palistim.\\n10:12 Dohot halak Sidon dohot halak Amalek dohot halak Maon? Dung i mangangguhi hamu tu Ahu, jadi Ahu paluahon hamu sian tangannasida.\\n10:13 Alai atik pe songon i, tung ditadingkon hamu Ahu, gabe marsomba hamu tu angka debata sileban; dibahen i ndang olo be Ahu paluahon hamu.\\n10:14 Laho ma hamu antong mangangguhi tu debata, angka na pinillitmuna i di hamu, nasida ma nian paluahon hamu di tingki hagogotanmunai.\\n10:15 Alai ninna halak Israel ma tu Jahowa: Nunga mardosa hami, Ho ma mambahen tu hami, hombar tu sandok lomo ni roham, asal dipalua Ho hami sadarion.\\n10:16 Jadi dipaholang nasida ma angka debata sileban sian tongatonganasida, jala marsomba nasida tu Jahowa, gabe ditostos rohana mida pardangolan ni Israel.\\n10:17 Dung i marpungupungu ma halak Amon, jala marsaro di Gilead, marpungu ma dohot halak Israel, jala marsaro di Mispa.\\n10:18 Dung i ninna sandok angka induk di Gilead ma ganup tu donganna: Manang ise na olo manguluhon laho marporang dompak halak Amon, i ma gabe jujungan ni sandok isi ni Gilead.\\nLabel: Alkitab Bahasa Batak, Padan Na Robi, PANGUHUM","num_words":475,"character_repetition_ratio":0.089,"word_repetition_ratio":0.0,"special_characters_ratio":0.223,"stopwords_ratio":0.396,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"IV MUSA 25 - BIBLE & BUKU ENDE ONLINE\\n25:1 Dung i maringan ma Israel di Sitim, alai dipungka halak situan na torop i ma marmainan tu boru ni halak Moab.\\n25:2 Angka na manggokkon bangso i uju mamele nasida tu debatanasida i, laos mangan juhut tibaltibal ma bangso i, huhut marsomba tu debatanasida i.\\n25:3 Jadi marsigantung ma Israel tu Baal-Peor, gabe marpiarpiar ma rimas ni Jahowa mida Israel.\\n25:4 Dung i ro ma hata ni Jahowa tu si Musa: Tangkup ma sude induk ni bangso i jala gantungkon nasida bahen pardengganan tu Jahowa di adopan ni mata ni ari, asa anggiat mombun parpiarpiar ni rimas ni Jahowa mida Israel.\\n25:5 Dung i ninna si Musa ma tu angka panguhum di Israel, ganup ma hamu mambunu halakna, angka na marsigantung tu Baal-Peor.\\n25:6 Dung i ida ma, ro sahalak sian halak Israel, laos diboan tu angka hahaanggina sada boru Midian di adopan ni si Musa dohot di adopan ni sandok huria ni halak Israel, tongon angka tumatangis nasida di jolo pintu ni undungundung parluhutan i.\\n25:7 Alai dung diida si Pinehas, anak ni si Eleasar, tubu ni malim Aron songon i, hehe ma ibana sian tongatonga ni huria i, huhut patioptiop sada hujur di bagasan tanganna.\\n25:8 Laos diihuthon ma halak Israel i masuk tu bagasan bilut podoman jala sahali ditullang nasida duansa, baoa Israel i dohot parompuan i torus na niabitanna be. Jadi tongkinnai mansohot ma begu masa i sian halak Israel.\\n25:9 Ia torop ni jolma angka na mate binahen ni begu masa i duapulu opat ribu halak do.\\n25:10 Dung i ro ma hata ni Jahowa tu si Musa songon on:\\n25:11 Ia si Pinehas, anak ni si Eleasar, tubu ni malim Aron, nunga dipaombun ibana rimashu mida halak Israel, di na hinamokmokkonna murukku di tongatonganasida, umbahen so sun siap hubahen halak Israel di bagasan murukku.\\n25:12 Dibahen i paboa ma tu ibana: Ida ma, Ahu marbasabasahon tu ibana padan hadameon na hubahen i.\\n25:13 Ingkon ibana do, ro di pinomparna dung salpu ibana, jujungan ni padan hamalimon ro di salelenglelengna, upana ala dihamurukkon ulaon ni Debatana, jala dibahen pardengganan tu halak Israel.\\n25:14 Alai anggo goar ni baoa sian Israel na mate binunu i rap dohot boru Midian, i ma si Simri, anak ni si Salu, sada induk ni marga Simeon marompuompu.\\n25:15 Jala goar ni boru Midian na mate binunu i, i ma si Kosbi, boru ni si Zur, sada ihutan ni angka marga marompuompu di Midian.\\n25:16 Dung i ro muse hata ni Jahowa tu si Musa songon on:\\n25:17 Ingkon marmusu hamu dompak halak Midian jala patunduk hamu nasida.\\n25:18 Ai nasida jumolo marmusu dompak hamu marhite sian angkalnasida, na niangkalannasida i hamu taringot tu Peor dohot taringot tu si Kosbi, ibotonasida i, boru ni sada induk di Midian, na binunu apala di ari hararagat ni begu masa i ala Peor.","num_words":458,"character_repetition_ratio":0.063,"word_repetition_ratio":0.009,"special_characters_ratio":0.228,"stopwords_ratio":0.389,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V Musa 6 | Alkitab TOBA\\n← V Musa 7\\nV Musa 5 →\\nV Musa 6\\n6:1 Alai on do tona, aturan dohot uhum, angka naung tinonahon ni Jahowa, Debatamuna i, podahononhon tu hamu, asa ulahononmuna di tano sisoluhonmuna i, dung taripar hamu tusi.\\n6:2 Asa marhabiaran ho tu Jahowa, Debatam jala diradoti ho saluhut aturanna dohot tonana, angka naung hutonahon tu ho, songon i ho nang anakmu nang pahompum saleleng ho mangolu, asa tung hupaganjang umurmu.\\n6:3 Antong tangihon ma i, ale Israel, jala ringkoti mangulahon angka i, asa marhasonangan ho, jala asa lam torop situtu hamu, songon naung pinorbagabaga ni Jahowa Debata ni angka ompum tu ho, di tano habaoran ni susu dohot situak ni loba.\\n6:4 Tangihon ma, ale Israel, anggo Jahowa Debatanta i, Jahowa Sasadasa do.\\n6:5 Jala ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom.\\n6:6 Jala ingkon parateatehononmu luhut hata on, angka na hutonahon tu ho sadarion.\\n6:7 Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse.\\n6:8 Jala ingkon rahuthononmu angka i bahen partinandaan di atas tanganmu, jala bahen parningotan di holangholang ni matam.\\n6:9 Jala ingkon surathononmu angka i tu tohang ni jabum dohot tu panggumbanganmu.\\n6:10 Ia dung masuk ho ditogihon Jahowa, Debatam, tu tano na niuarihonna tu ompum, tu si Abraham, si Isak dohot si Jakkob mangalehon tu ho huta, angka na bolon dohot na denggan, angka na so pinungkam.\\n6:11 Tole bagas angka na gok dohot na denggan marragamragam, angka na so niisianmu dohot sumur angka na so hinalianmu, tole porlak anggur dohot hau Jetun angka na so sinuanmu, jala mangan ho sian i pola bosuran.\\n6:12 Sai marjaga ma ho di dirim, asa unang dihalupahon roham Jahowa, naung manogihon ho ruar sian tano Misir, sian bagas parhatobananmu.\\n6:13 Tama ingkon habiaranmu Jahowa, Debatam, jala oloanmu Ibana jala maruari ho tu Goarna.\\n6:14 Ndang jadi ihuthononmuna angka debata sileban, sian debata ni bangso angka na humaliang hamu.\\n6:15 Ai Debata parrimas do Jahowa, Debatam, di tongatongamu, asa unang marpiarpiar rimas ni Jahowa, Debatam, mida ho, gabe siaphononna ho maon sian sisik ni tano on.\\n6:16 Ndang jadi unjunanmuna, Jahowa Debatamuna i, songon naung niunjunanmuna Ibana di Massa.\\n6:17 Ingkon burju hamu mangaradoti angka tona ni Jahowa, Debatamuna i, ro di panindangionna dohot aturanna, angka naung tinonahonna tu ho.\\n6:18 Asa ulahononmu na tigor dohot na denggan di adopan ni Jahowa, asa marhasonangan ho, jala asa masuk ho jala teanonmu tano na denggan i naung niuarihon ni Jahowa tu angka ompum.\\n6:19 Ingkon Ibana mangeak saluhut musum sian adopanmu, songon naung pinorbagabaga ni Jahowa hian.\\n6:20 Tung sura sungkunsungkun on ni anakmu ho sogot songon on: Dia do parmulaan ni angka panindangion, aturan dohot uhum, angka na tinonahon ni Jahowa, Debatanta i tu hamu?\\n6:21 Jadi dohononmu ma tu anakmu: Hatoban ni si Firaun do hami na jolo di Misir, gabe ditogihon Jahowa hami ruar sian Misir marhite sian tangan na gogo.\\n6:22 Jala dibahen Jahowa do tanda dohot halongangan angka na bolon jala na rahat di Misir, tu si Firaun dohot tu sandok isi ni bagasna di adopannami.\\n6:23 Alai anggo hami ditogihon Ibana do ruar sian i, asa boanonna hami masuk jala lehononna tu hami tano naung niuarihonna tu ompunami.\\n6:24 Ala ni umbahen ditonahon Jahowa uju i tu hami ulahononnami sude angka uhumon, marhabiaran tu Jahowa, Debatanami, asa marhasonangan hami ariari jala tongtong hami pangoluonna, songon na andar sadarion.\\n6:25 Manjadi hatigoran do i huhut di hami, molo huringkoti hami mangulahon sandok uhumon di adopan ni Jahowa, Debatanta i, songon naung tinonahonna tu hami.","num_words":588,"character_repetition_ratio":0.073,"word_repetition_ratio":0.0,"special_characters_ratio":0.215,"stopwords_ratio":0.32,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Psalmen 49 | Alkitab TOBA\\n← Psalmen 50\\nPsalmen 48 →\\nAugust 18, 2008 · 17:06\\n49:1 Ende sian angka anak ni si Kora.\\n49:2 Tangihon ma on, sude hamu angka bangso, tarehon ma pinggolmu, sude hamu pangisi ni hasiangan on.\\n49:3 Nang hamu situan natorop, nang raja, ro di na mora dohot na pogos!\\n49:4 Hatahonon ni pamanganku ma habisuhon, jala hapistaran do pingkiran ni rohangku.\\n49:5 Paelengonku ma pinggolhu tu umpama, papataronku ma hulingkulinganku mardongan parhinaloan.\\n49:6 Boasa ma tung tahuton ahu di angka ari parhinamagoan, di na hinaliangan ni hajengkelon ni angka na mangarupa ahu?\\n49:7 Angka na marhaposan tu sinamotna, jala dihaginjangkon hinagok ni hamoraonnasida.\\n49:8 So manang tartobus manang ise donganna manang tarlehonsa partobusna tu Debata.\\n49:9 Maargahu do partobus ni tondina i, ingkon pasohotonna do salelenglelengna.\\n49:10 Tung mangolu ma ibana ro di salelenglelengna, so idaonna tanoman?\\n49:11 Ingkon idaonna do marmatean angka na bisuk i, rap mago do na oto dohot na londongon, jadi tading di na asing ma sinamotna.\\n49:12 Ianggo rohanasida nian di bagasan: Salelenglelengna do bagasnasida i, inganannasida pe marsundutsundut, goarnasida do dibahen pambuatan ni goar ni angka golat.\\n49:13 Hape ndang mangulon jolma di hadoharonna i doshon pinahan do nasida diragehon.\\n49:14 I ma pangalaho ni angka na mangasahon haotoonna, dohot angka na mangihuthon nasida, angka na mangkalomohon hatanasida i. Sela!\\n49:15 Sobokkon birubiru do nasida dipabara tu banuatoru, hamatean do marmahan nasida, jala rajaan ni angka na tigor roha i ma nasida di na sansogot i, turtaran ni banuatoru ma pinangasahonnasida i, gabe ndang adong be inganannasida.\\n49:16 Alai anggo tondingki, sai tobuson ni Debata do sian tangan ni banuatorui, ai jangkononna do ahu. Sela!\\n49:17 Unang ma ho tahuton, molo lam mamora sahalak, molo ganda hamuliaon ni bagasna i.\\n49:18 Ai ndang boanonna sudena i di hamamatena i, ndang ihuthonon ni hamuliaonna i ibana laho tuat.\\n49:19 Ai nang pe diparhatua tondina i di ngoluna jala dipapujipuji halak ho, ala dibahen ho na denggan i tu ho:\\n49:20 Sai topotonna do sundut ni ompuna, angka na so marnida hatiuron salelenglelengna.\\n49:21 Sobokkon pinahan do rage jolma di hadoharon, molo so marroha ibana.","num_words":325,"character_repetition_ratio":0.056,"word_repetition_ratio":0.0,"special_characters_ratio":0.233,"stopwords_ratio":0.348,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"HESEKIEL 38 - BIBLE & BUKU ENDE ONLINE\\n38:1 Dung i ro muse hata ni Jahowa tu ahu songon on:\\n38:2 Ale anak ni jolma, tujuhon ma bohim dompak Gog di tano Magog, induk sian Ros, Mesek dohot Tubal, jala manurirangi ma ho dompak ibana;\\n38:3 Jala dohononmu ma: Songon on do hata ni Tuhan Jahowa: Ida ma, magira ma ahu ro marlulu dompak ho ale Gog, induk sian Ros, Mesek dohot Tubal!\\n38:4 Jala paundaronku ma ho, jala bahenonku do angka haithait tu bagasan osangosangmu, jala togihononku ho borhat rap dohot sandok paranganmu, angka hoda dohot jolma parsihundul, angka na simpan be marparhohas luhutna, sada luhutan apala na bolon, angka sitiop lombulombu na balga dohot na metmet, jala marpodang nasida luhut.\\n38:5 Halak Persia, Kus dohot Pud dongannasida, luhut nasida marlombulombu be jala martahuluk.\\n38:6 Tole Gomer dohot sandok parduaan ni paranganna, tole pinompar ni Togarma angka na sian ujung ni utara sahali ro di sandok parduaan, ni paranganna, torop angka bangso donganmu!\\n38:7 Marhobas ma ho, jala padiri hian ho ro di sandok luhutanmu, angka na marluhut tu ho, jala ho ma gabe partoginasida.\\n38:8 Di laonlaon ni ari muse ingkon masa partubolan tu ho, di ujung ni angka taon sogot tahe sahat ho tu sada luat na malua sian podang pangisina i, angka na pinapungu sian torop angka bangso tu atas ni angka dolok Israel, angka naung leleng tarulang, gabe pinaruar do nasida sian angka bangso, laos marsonangsonang maringan nasida luhut.\\n38:9 Jala nangkok do ho, songon haroro ni ari, songon ombun do ho ro manghungkupi tano i, ho dohot sude parduaan ni paranganmu, jala torop bangso hinaram.\\n38:10 Songon on do hata ni Tuhan Jahowa: Di ari na sasada i padeakdeahonmu do tubutubu ni roham, jala na roa do sangkap ni roham.\\n38:11 Jala dohononmu ma: Borhat ma ahu nangkok sumola sada luat na manaletes mangarampok halak angka na nalom, jala na marsonangsonang maringan, saluhut nasida maringan di adaran, so marparik manang marransangransang, pintu harbangan pe ndang adong di nasida.\\n38:12 Laho martabuni dohot mamupusi, laho mambahen tanganmu tu turanggong angka naung niinganan muse dohot tu sada bangso naung pinapungu muse sian angka bangso parbegu, naung umpungka pinahan jala marpangomoan, angka na maringan di pogu ni tano.\\n38:13 Ro muse hata ni Saba dohot Dedan dohot angka parboniaga sian Tarsis rap dohot sude singana na bajar mandok tu ho: Atehe na ro martaban do ho? Naeng mamupusi do ho, umbahen dipaluhut ho luhutanmi? Naeng mangalaum perak dohot sere? Naeng mambuat pinahan dohot pangomoan laho martaban godang barangbarang?\\n38:14 Dibahen i, manurirangi ma ho, ale anak ni jolma, jala dohononmu ma tu Gog: Songon on do hata ni Tuhan Jahowa: Nda apala di ari na sasada i ma botoonmu na marsonangsonang i bangsongku Israel maringan?\\n38:15 Hape ro dope ho sian ingananmu, sian ujung ni utara sahali, ho jala torop bangso hinaram, angka na marsihundul di hoda nasida luhut, sada luhutan apala na bolon, parangan apala na torop sahali.\\n38:16 Jala nangkok do ho dompak bangsongku Israel, songon ombun laho manutup tano i; apala di ujung ni angka ari ma i masa, jala ahu parohon ho dompak tanongku, asa tung ditanda angka bangso parbegu i ahu, molo huparbadiai diringku marhite sian ho, ale Gog di adopan ni matanasida.\\n38:17 Songon on do hata ni Tuhan Jahowa: Ho do i naung hulumbahon hian di angka ari na robi marhitehite angka naposongku, angka panurirang ni Israel, angka na manurirangi di angka ari uju i pola martaontaon, paboa ahu naeng parohon ho marlulu dompak nasida.\\n38:18 Di ari na sasada i, di ari haroro ni Gog tahe sumola tano Israel, ninna Tuhan Jahowa, martimpul ma rimashu di bagasan igungku.\\n38:19 Jala di bagasan piripiringku, di bagasan api ni rimashu, ahu mandok hian: Ingkon di ari na sasada i masa lalo godang di tano Israel.\\n38:20 Jadi raion be maradophon ahu angka dengke di bagasan laut dohot pidong na martongatonga langit dohot binatang di harangan, ro di sandok na manggulmit di atas tano i, nang saluhut jolma angka na di sisik ni tano on, jala maloha angka dolok jala marumpahan angka buntulbuntul batu, jala angka tompas tu tano saluhut parik.\\n38:21 Huhut ahu umpanggil podang marlulu dompak ibana sian saluhut angka dolokku, ninna Tuhan Jahowa, asa masirasipan nasida sama nasida dohot podang.\\n38:22 Jala uhumonku ibana marhitehite begu antuk dohot durusdurus di mudar, tole udan tipotipo na mangalantap dohot angka batu ambolas, dabuonku ma tahe udan api dohot barerang tu ibana dohot tu angka parduaan ni paranganna dohot tu torop bangso, angka na hinarana i.\\n38:23 Asa hupatimbul jala huparbadiai diringku, jala hupabotohon ahu di adopan ni torop bangso parbegu, asa tung ditanda nasida, ahu do Jahowa.","num_words":750,"character_repetition_ratio":0.058,"word_repetition_ratio":0.0,"special_characters_ratio":0.213,"stopwords_ratio":0.305,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II Musa 39 | Alkitab TOBA\\n← II Musa 40\\nII Musa 38 →\\nAugust 21, 2008 · 14:06\\n39:1 Dipauli nasida huhut angka pangkean tohonan laho marhalado di inganan na badia i sian bonang na rata langit, na tinubar dohot na merham; dipauli huhut pangkean na badia angka sisolukkonon ni si Aron, songon na tinonahon ni Jahowa hian tu Musa.\\n39:2 Dipauli ma baju epod i sian sere dohot sian bonang na rata langit, na tinubar jala na merham dohot sian hain na halus na nidua.\\n39:3 Dinanggari nasida ma sere i gabe purada laos diirisi ma i manjadi bonang, asa dapot tonunhonon ni parpunsa saor tu bonang na rata langit, na tinubar dohot na merham, saor muse tu hain na halus.\\n39:4 Dibahen nasida huhut dua pangabaraan di baju epod i, jala dipatunggom di tampahanna be.\\n39:5 Tole muse hohos ni epod i, sisada hapandean do i dohot baju i laos mardomu tusi, jadijadian sian sere dohot sian bonang na rata langit, na tinubar jala na merham dohot sian hain na halus na nidua songon na tinonahon ni Jahowa tu si Musa.\\n39:6 Dung i dipabongot nasida ma angka batu intan unam angka na nirusuk dohot tali sere, jala diuhirhon tusi songon uhiran sahap goargoar ni anak ni Israel na sampuludua i.\\n39:7 Dung i dibahen nasida ma angka batu intan i tu na dua pangabaraan ni baju epod i, bahen batu parningotan di angka anak ni Israel, songon na tinonahon ni Jahowa tu si Musa.\\n39:8 Dibahen nasida huhut tutup andora i, suang songon hapandean ni baju epod ditonunhon parpunsa tusi sere, bonang na rata langit, na tinubar jala na merham dohot hain na halus na nidua.\\n39:9 Maropat suhi do i dibahen jala dua lampis, sanjongkal ganjangna jala sanjongkal bidangna.\\n39:10 Jala digohi nasida do i dohot opat rinte batu intan. Di rinte parjolo: batu intan sardis, topasion dohot samarados.\\n39:11 Di rinte paduahon: batu intan rubin, sapire dohot diaman.\\n39:12 Di rinte patoluhon: batu intan opal, akat, dohot ametist.\\n39:13 Di rinte paopathon: batu intan krisolit, Unam dohot jaspis; jala marihot sere angka rinte i dibahen humaliang.\\n39:14 Jala jojor angka batu i mangihuthon partording ni na sampuludua goar ni anak ni Israel, angka na niuhirhon ni halak pandakdak batu, pulik be goarna i, mangihuthon na sampuludua marga ni Israel.\\n39:15 Dung i dibahen nasida huhut tu tutup andora i angka rante dos ganjangna, songon tali nidua hapandeanna sian sere na pita.\\n39:16 Dibahen nasida huhut ihot sere dohot dua tintin sere, dibahen muse na dua tintin i tu na dua tampahan ni tutup andora i.\\n39:17 Jala dibahen nasida do na dua rante na nidua sian sere tu bagasan tintin na dua i, angka na di tampahan ni tutup andora i.\\n39:18 Alai anggo na dua ujung ni na dua rante na nidua i dihaithon nasida do i tu haithait na dua i jala dipatunggom do i tu pangabaraan ni baju epod i patondong be.\\n39:19 Dibahen nasida muse dua tintin sere na asing, jala dilohothon do i tu na dua tampahan ni tutup andora i, apala di pangkilimanna na tungkan baju epod i dingkan bagasan.\\n39:20 Dibahen muse dope dua tintin sere na asing, jala dilohothon do i tu na dua pangabaraan ni baju epod i tungkan toru tongon di pardomuanna, di atas hohos ni baju epod i.\\n39:21 Jadi dipudunhon nasida ma tutup andora i rap dohot tintinna marhite sian bonang na rata langit tu tintin ni baju epod, asa hopos tu hohos ni baju epod i, jala unang tarbahen sirang tutup andora sian baju epod, songon na tinonahon ni Jahowa tu Musa.\\n39:22 Dipauli muse ma baju parbalian di toru ni baju epod i, sandok sian bonang na rata langit do i ditonun.\\n39:23 Jala parrungkunganna i di parsitongaanna, jala martopi na tinonun parrungkungan i humaliang, songon topi ni baju partohonan, asa unang olo maribak.\\n39:24 Dibahen nasida huhut tu rambuna humaliang angka parbue ni dalimo sian bonang na rata langit, na tinubar jala na merham huhut na nidua.\\n39:25 Dibahen nasida huhut angka giringgiring sian sere na pita, i ma disolothon tu holangholang ni angka parbue ni dalimo humaliang di rambu ni baju parbalian i.\\n39:26 Sai marsorinsorin do sada parbue ni dalimo dung i sada giringgiring tuk humaliang, sisolukkononhon do i laho marulaon na badia songon na tinonahon ni Jahowa tu Musa.\\n39:27 Dipauli nasida huhut angka baju parbagasan sian hain na halus, sipangkeon ni Aron dohot angka anakna i.\\n39:28 Tole muse tumpal ni sintua ni malim sian hain na bontar ro di angka talitali ni malim sian hain na bontar do, saraoalna pe sian hain na bontar na nidua do.\\n39:29 Hohos i pe dipauli do i sian hain na nidua dohot sian bonang na rata langit, na tinubar dohot na merham, hapandean ni parpunsa do i, songon na tinonahon ni Jahowa tu Musa.\\n39:30 Dibahen nasida huhut sangkalia i, tumpal habadiaon i sian sere na pita jala diuhirhon tusi, songon panguhiron sahap: Habadiaon di Jahowa!\\n39:31 Jala dilohothon tusi tali bonang na rata langit, asa dipadomu tu tumpal i sian ginjang songon na tinonahon ni Jahowa tu Musa.\\n39:32 Jadi songon i ma hasusun ni sandok ulaon pauliuli inganan na badia i, undungundung parluhutan i; dibahen halak Israel do antong sude hombar tu na tinonahon ni Jahowa, songon i dibahen nasida.\\n39:33 Dung i diboan nasida ma inganan na badia i tu Musa, i ma: undungundung i ro di sude ulaulana, angka haithaitna, papanna, ransangransangna, tiangna dohot ojahanna.\\n39:34 Tole muse langitlangitna sian bobak ni birubiru tunggal na tinubar, tole muse sian bobak ni pitudar, tole muse rimberimbe bahen tutupna i.\\n39:35 Tole muse poti panindangion i ro di haluhaluna dohot langkop pardengganan i.\\n39:36 Tole muse meja i ro di sude ulaulana dohot sagusagu na marhadohoan.\\n39:37 Tole muse parpalitoan sian sere na pita i ro di angka lampuna, aturanna ro di sude ulaulana dohot miak tu palito i.\\n39:38 Tole muse langgatan sere i, miak pamiahion i, daupa na hushus i ro di rimberimbe bahen tutup ni pintu ni undungundung i.\\n39:39 Tole muse langgatan tombaga i ro di handanghandang tombaga angka na masuk tusi, haluhaluna ro di sude parhohasna, tong parburian i ro di ojahanna.\\n39:40 Tole muse angka rimberimbe ni alaman ro di angka tiangna dohot ojahanna, nang rimberimbe tutup ni bahal ni alaman i, ro di angka talina, labangna dohot sude ulaula mangaradoti ulaon di bagasan inganan na badia i, undungundung parluhutan i.\\n39:41 Tole muse angka pangkean tohonan laho marhalado di bagasan inganan na badia i, angka pangkean na badia di malim Aron dohot angka pangkean di angka anakna laho mangaradoti hamalimon.\\n39:42 Luhutna i hombar tu hata na tinonahon ni Jahowa tu si Musa, laos songon i dipasidung halak Israel sandok ulaon i.\\n39:43 Dung i ditingkir Musa ma sandok ulaon i, gabe ida ma, nunga sun dibahen nasida; songon na tinonahon ni Jahowa tu Musa laos songon i dibahen nasida. Dung i dipasupasu Musa ma nasida.","num_words":1106,"character_repetition_ratio":0.096,"word_repetition_ratio":0.027,"special_characters_ratio":0.227,"stopwords_ratio":0.369,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"IV MUSA 13 - BIBLE & BUKU ENDE ONLINE\\n13:1 Dung i ro muse ma hata ni Jahowa tu si Musa songon on:\\n13:2 Suru ma di ho baoa, angka na mangkahapi tano Kanaan, na naeng basabasahononku tu halak Israel; sian ganup marga marompuompu suruhononmu sahalak, luhutna i ingkon induk do di tongatonganasida.\\n13:3 Dung i disuru si Musa ma nasida sian halongonan Elaparan, hombar tu hata ni Jahowa, saluhut baoa i induk do di tongatonga ni halak Israel.\\n13:4 Jala on do goargoarnasida: si Sammua, anak ni si Sakur sian marga Ruben.\\n13:5 Si Sapat, anak ni si Hori sian marga Simeon.\\n13:6 Si Kaleb, anak ni si Jepune sian marga Juda.\\n13:7 Si Igeal, anak ni si Josep sian marga Isasar.\\n13:8 Si Hosea, anak ni si Nun sian marga Epraim.\\n13:9 Si Palti, anak ni si Rapu sian marga Benjamin.\\n13:10 Si Gaddiel, anak ni si Sodi sian marga Zebulon.\\n13:11 Si Gaddi, anak ni si Susi sian marga Josep, i ma sian marga Manasse.\\n13:12 Si Ammiel, anak ni si Gemali sian marga Dan.\\n13:13 Si Setur, anak ni si Mikhael sian marga Aser.\\n13:14 Si Nakbi, anak ni si Vopsi sian marga Naptali.\\n13:15 Si Geuel, anak ni si Mahi sian marga Gad.\\n13:16 I ma goargoar ni baoa, angka na sinuru ni si Musa mangkahapi tano i; alai anggo si Hosea, anak ni si Nun, digoar si Musa do si Josua.\\n13:17 Jadi di na sinuru ni si Musa nasida laho mangkahapi tano Kanaan i, ninna ma mandok nasida: Ingkon nangkok hamu tu tano na tungkan dangsina, nangkok muse hamu tu dolok.\\n13:18 Dung i tangkasi hamu ma manang songon dia pangalaho ni tano i ro di bangso na maringan disi, manang na marhuaso manang na gale, manang na otik manang na torop.\\n13:19 Jala manang songon dia pangalaho ni tano, na niingananna i, manang na denggan manang na roa, jala manang songon dia pangalaho ni huta, angka na niinganannasida i, manang adaran manangkas, manang na gonting angka huta i.\\n13:20 Nang mansam ni tano i, manang na napu manang na tungil, manang na tubuan hau, manang ndang. Antong pir ma tondimuna, boan hamu huhut sian parbue ni tano i. Alai tongon masa angka ari panapuon di patumonaan ni parbue ni anggur.\\n13:21 Dung i nangkok ma nasida jala dihahapi tano i olat ni halongonan Sin sahat ro di Rehob, di dalan laho tu Hamat.\\n13:22 Nangkok nasida huhut tu tano tungkan dangsina, gabe sahat nasida tu Hebron; disi do si Ahiman, si Sesai dohot si Talmai, angka anak ni si Enak, didapot nasida. Alai anggo Hebron pitu taon jumolo dipungka sian Zoan di Misir.\\n13:23 Dung i sahat nasida muse tu rura Eskol, gabe ditallik nasida disi saraungan parbue ni anggur, pola dipausungkon hallungon ni dua halak marhaluhalu, tole muse angka parbue ni hau dalimo dohot hau ara.\\n13:24 Laos targoar inganan i rura Eskol, ala parbue ni anggur saraungan, na tinallik ni halak Israel disi.\\n13:25 Jadi dung salpu opatpulu ari, mulak ma nasida sian na mangkahapi tano i.\\n13:26 Jadi mardalan ma nasida mandapothon si Musa dohot si Aron ro di sandok luhutan ni halak Israel tu halongonan Elaparan, tu Kades, jala mamboan barita tu nasida dohot tu sandok luhutan i, huhut patuduhon tu nasida parbue ni tano i.\\n13:27 Dung i dipajojor nasida ma tu si Musa, angka ninna ma: Nunga sahat hami tu tano, sihahapannami sinurumi, tano habaoran ni susu dohot situak ni loba tutu, jala on do parbuena.\\n13:28 Alai tung na marhuaso situtu do anggo bangso na maringan di tano i, angka hutana pe na gonting situtu do jala na bolon, tole huhut angka anak ni si Enak huida hami disi.\\n13:29 Halak Amalek maringan di tano tungkan dangsina, jala halak Het, Jebusi dohot Amori maringan di dolok, jala halak Kanaan maringan di topi laut dohot mardonokkon Jordan.\\n13:30 Alai anggo si Kaleb nian paposhon roha ni bangso i di adopan ni si Musa, ninna ma: Denggan hita nangkok manoluk tano i, ai tarpapatu hita do i.\\n13:31 Alai ro ma hala ni baoa angka na nangkok rap dohot ibana mandok: Ndang tarbahen hita nangkok mandopang bangso i, ai gumogo do i sian hita.\\n13:32 Dung i dipararat nasida ma barita na roa taringot tu tano na hinahapannasida i, ninna do mandok halak Israel i: Tano na hubolus hami laho mangkahapi nian, tano na rahat do i manganhon pangisina, jala sandok bangso na huida hami disi, angka baoa na ganjang situtu do.\\n13:33 Huida hami huhut disi halak ulubalang na bolon situtu, angka anak ni si Enak, pinompar ni ulubalang, hira sihapor do anggo hami di rohanami, laos songon i nang di rohanasida.","num_words":740,"character_repetition_ratio":0.075,"word_repetition_ratio":0.0,"special_characters_ratio":0.242,"stopwords_ratio":0.376,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II MUSA 18 - BIBLE & BUKU ENDE ONLINE\\n18:1 Jadi dung dibege si Jetro, malim di Midian, simatua doli ni si Musa, sude na binahen ni Debata tu si Musa dohot tu Israel bangsona i, na pinaruar ni Jahowa halak Israel sian Misir.\\n18:2 Jadi diboan si Jetro, simatua doli ni si Musa, ma si Zippora, jolma ni si Musa, na sinuruna i mulak.\\n18:3 Rap dohot anakna na dua i, goar ni na sada si Gerson, ai ninna do: Paisolat do ahu di tano ni halak na pulik.\\n18:4 Goar ni na sada nari si Elieser, ai Debata ni damang do pangurupingku, jala dipalua ahu sian podang ni Firaun.\\n18:5 Jadi sahat ma si Jetro, simatua doli ni si Musa dohot angka anakna dohot jolmana tu si Musa, tu halongonan, tu parsaroanna di lambung dolok ni Debata.\\n18:6 Dung i ditonahon ma tu si Musa: Nunga ro ahu, simatuam doli si Jetro tumopot ho udur dohot jolmam dohot anakna na dua i.\\n18:7 Jadi ruar ma si Musa manjumpangkon simatuana i, dipaunduk ma ibana di jolona, jala diumma ibana; jadi dung masisungkunan nasida taringot tu sonangna, gabe masuk ma nasida tu undungundung i.\\n18:8 Dung i dipajojor si Musa ma tu simatuana sude na binahen ni Jahowa tu Firaun dohot tu halak Misir ala ni halak Israel, ro di sude hasusaan na mangonai tu nasida di tongan dalan dohot na pinalua ni Jahowa nasida.\\n18:9 Jadi las ma roha ni si Jetro ala sude na denggan i, na binahen ni Jahowa tu Israel, na pinaluana i nasida sian tangan ni halak Misir.\\n18:10 Dung i ninna si Jetro ma: Pinuji ma Jahowa, na paluahon hamu sian tangan ni halak Misir dohot sian tangan ni Firaun; tung dipalua bangsona sian pandondon ni tangan ni halak Misir.\\n18:11 Nuaeng pe huboto, tumongam hape Jahowa sian nasa angka debata, ai hata na hinajungkathonnasida lingkup tu nasida.\\n18:12 Dung i dibuat si Jetro, simatua doli ni si Musa ma sada pelean situtungon dohot angka pelean sipotongon di Debata. Jadi ro ma si Aron dohot saluhut sintua ni Israel laho mangan sagusagu rap dohot simatua doli ni si Musa di jolo ni Debata.\\n18:13 Tole marsogotna i hundul ma si Musa laho manguhum bangso i, gabe jongjong ma bangso i di lambung ni si Musa sian manogotna ro di botari.\\n18:14 Alai dung diida simatua doli ni si Musa sude na binahenna i tu bangso i, ninna ma: Hata dia do i na binahenmu tu bangso i? Boasa sasada ho hundul, jala sandok bangso i jongjong di jolomu sian manogot ro di botari?\\n18:15 Jadi didok si Musa ma tu simatuana doli: Na ro do bangso i tumopot ahu laho manungkun uhum sian Debata.\\n18:16 Ai molo adong parhataannasida, ro do nasida tu ahu, gabe huuhumi nasida be jala hupabotohon angka patik ni Debata dohot angka podana.\\n18:17 Jadi didok simatua doli ni si Musa ma tu ibana: Ndang denggan na binahenmi.\\n18:18 Mandate ho maon, nang ho, nang bangso on na di jolomon, ai madokdokhu ulaon on di ho, ndang tarula anggo sasada ho.\\n18:19 On pe tangihon ma soarangkon, huparrohai pe ho, asa didongani Debata ho. Ho ma mandapothon Debata singkat ni bangso i, jala ho ma pasahathon angka hata i tu Debata.\\n18:20 Jala pasingothon tu nasida angka patik dohot angka poda, jala pabotohon tu nasida dalan sidalanannasida i dohot ulaon siulaonnasida i.\\n18:21 Alai anggo ho lulu i ma sian sandok bangso i baoa angka na marsihohot marroha, angka na mangkabiari Debata, baoa parroha na sintong, angka na mangkagigihon pangomoan na so turut, i ma pabangkit bahen induk gumomgom nasida marsasaribu, marsasaratus, marlimalimapulu, jala marsasampulu.\\n18:22 Asa nasida tongtong manguhumi bangso i; alai nasa hata na balga, tu ho ma diboan nasida, anggo nasa hata metmet nasida ma manguhumi, asa paneang siulaonmu, molo nasida donganmu mangusung.\\n18:23 Molo dibahen ho songon i, jala ro tona ni Debata tu ho manolopi, jadi manahan ma ho mangkajongjongkon, muli ma dohot sandok bangso on tu ingananna be mardamedame.\\n18:24 Jadi ditangihon si Musa ma soara ni simatuana doli, jala dipatupa sude na nidokna i.\\n18:25 Dung i dipillit si Musa ma baoa angka na marsihohot sian sandok Israel, jala dipabangkit nasida bahen induk ni bangso i gumomgom marsasaribu, marsasaratus, marlimalimapulu jala marsasampulu.\\n18:26 Asa nasida tongtong manguhumi bangso i, anggo hata na maol, tu si Musa ma boanonnasida, alai anggo hata metmet, nasida do manguhumisa.\\n18:27 Dung i diloas si Musa ma simatuana doli laho, gabe mulak ma ibana tu tanona.","num_words":719,"character_repetition_ratio":0.074,"word_repetition_ratio":0.006,"special_characters_ratio":0.229,"stopwords_ratio":0.378,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JESAYA 19 - BIBLE & BUKU ENDE ONLINE\\n19:1 Uhum madabu tu Misir: Ida ma, Jahowa marhureta di atas sada ombun na doras laho manopot Misir, jadi maporus ma angka ajiajian ni Misir maradophon ibana, jala malala roha ni halak Misir di bagasan.\\n19:2 Jadi patubionku ma Misir dompak Misir, asa laos nasida sama nasida marmusu, na mardongan dohot na maraleale, huta dompak huta, harajaon dompak harajaon.\\n19:3 Jala rumar bahenonku tondi ni halak Misir di bagasan, jala muntul tahina i bahenonku, jadi usouso ma nasida tu angka ganaganaan, parsibalik mata, hasandaran dohot pangarunding.\\n19:4 Pasahatonku ma huhut halak Misir tu tangan ni tuan na posi maruhum, jala raja na murhing mangarajai nasida, ninna Tuhan Jahowa Zebaot.\\n19:5 Jadi marsik ma angka aek sian laut, marsik dohot batang aek i gabe mahiang.\\n19:6 Jadi angir ma angka sunge, rejet jala mahiang angka batang aek di Misir, malos ma angka arung dohot tolong.\\n19:7 Hasang ma angka jampalan martopihon batang aek, jala nasa panaburan boni di topi ni batang aek i malos do, rahar jala ndang gabeak.\\n19:8 Jadi marhoi ma angka pardengke, jala marsak sude angka na mandanggurhon hailna tu batang aek i, jala halak angka na manampakhon jalana tu laut, maras do.\\n19:9 Tarurak ma jolma angka na martonun hori na sinuri dohot dagangan na bontar.\\n19:10 Jadi marponggolan ma angka tiang ojahan di nasida, tarjimput situtu ma roha ni sude jolma sipangan gaji.\\n19:11 Tung angka na oto sambing do angka raja di Zoan, angka panuturi na bisuk ni raja Firaun pe, tung na oto do tahina i. Beha ma partorang ni pandokmuna tu raja Firaun: Anak ni halak na bisuk do ahu, anak ni raja sian na robi.\\n19:12 Didia do nuaeng angka na bisukmu, asa dipabotohon nasida nian tu ho manang aha sangkap ni Jahowa Zebaot dompak Misir.\\n19:13 Nunga manjadi na oto angka pangarajai di Zoan, nunga tarpaoto angka pangarajai sian Nob, jala lilu sandok Misir dibahen jujungan ni angka margana.\\n19:14 Nunga diusehon Jahowa tu bagasan nasida sada tondi ni hageduhon, asa dililuhon nasida sandok Misir di nasa jadijadianna, songon siparmabuk na manggalumangi utautana.\\n19:15 Jadi ndang adong be manjadi ulaon di Misir, na pinauli marulu manang marihur, marranting ni harambir, manang marlili.\\n19:16 Di ari na sasada i doshon inaina halak Misir, angka hitir jala tahuton maradophon pangondam ni tangan ni Jahowa Zebaot, na niondamhonna dompak nasida.\\n19:17 Jala panonditnonditon Misir mida tano Juda, nasa na marningot disi tarsonggot alani, dibahen sangkap ni Jahowa Zebaot naung sinangkapna dompak nasida.\\n19:18 Di ari na sasada i marpangkuling Kanaan ma lima huta di tano Misir, jala marmangmang tu Jahowa Zebaot; huta nasada targoar Ir Heres.\\n19:19 Di ari na sasada i adong sada langgatan di Jahowa di tongatonga ni tano Misir, jala sada tiang parningotan di Jahowa mardonokkon partalpahanna.\\n19:20 I ma gabe tanda dohot sitindangi di Jahowa Zebaot di tano Misir, ai mangangguhi ma nasida tu Jahowa maradophon angka pangarupa, jadi tongosonna ma di nasida sada sipalua dohot partogi, asa dipalua nasida.\\n19:21 Jadi papataron ni Jahowa ma dirina tu halak Misir, jala tandaon ni halak Misir Jahowa di ari na sasada i, jala pelehononnasida angka pelean sipotongon dohot sipanganon, jala marbagabaga nasida tu Jahowa, jala gararonna do.\\n19:22 Jadi posi pe paminsang ni Jahowa di halak Misir, alai pamalumonna muse; jadi mulak ma nasida tu Jahowa, gabe marpamuati rohana tu nasida, jala pamalumonna nasida.\\n19:23 Adong ma di ari na sasada i sada dalan balobung sian Misir tu Assur, jadi ro ma halak Assur tu Misir, jala halak Misir tu Assur, rap marsomba ma halak Misir dohot halak Assur tu Jahowa.\\n19:24 Jadi patoluhon ma halak Israel di ari na sasada i rap dohot halak Misir dohot halak Assur gabe pasupasu diparsitongaan ni tano on.\\n19:25 Ai pasupasuon ni Jahowa Zebaot ma nasida, dohononna ma: Pinasupasu ma hamu ale halak Misir bangsongku, jala jadijadian ni tanganku, hamu ale halak Assur, jala parjambaranku anggo hamu ale halak Israel.","num_words":626,"character_repetition_ratio":0.075,"word_repetition_ratio":0.0,"special_characters_ratio":0.216,"stopwords_ratio":0.315,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"IV Musa 10 | Alkitab TOBA\\n← IV Musa 11\\nIV Musa 9 →\\n10:1 Dung i ro muse hata ni Jahowa tu si Musa songon on:\\n10:2 Bahen ma di ho dua sarune sian perak, ingkon sian sangkimpal perak do i topaonmu jala ingkon marhite sian i paluhutonmu luhutan i, jala dohononmu borhat angka parsaroan i.\\n10:3 Molo tung duansa sarune i dipalu, ingkon marluhut ma sandok luhutan i tu lambungmu di adopan ni pintu ni undungundung parluhutan i.\\n10:4 Molo holan sada sarune i mangkuling, ingkon marluhut ma tu lambungmu angka induk, angka ihutan ni halak Israel marriburibu.\\n10:5 Alai molo marsoara toletole sarune i, ingkon tole ma borhat parsaroan angka na marsaro tungkan habinsaran.\\n10:6 Molo marsoara toletole sarune i paduahalihon, ingkon borhat parsaroan angka na marsaro tungkan dangsina; ingkon jolo marsoara toletole sarune i, asa jadi borhat nasida.\\n10:7 Alai molo naeng paluhuton luhutan i ingkon pola sangombas mangkuling sarune i, unang marsoara toletole.\\n10:8 Ingkon angka anak ni si Aron, angka naung bangkit malim mamalu sarune i; i ma aturan na hot di hamu dohot di pinomparmuna ro di salelenglelengna.\\n10:9 Tung sura borhat hamu tu parporangan di tanomuna i mangalo musumuna na manosaknosak hamu, ingkon marsoara toletole hamu marsarune, taringotanna ma hamu di adopan ni Jahowa, Debatamuna i, jala paluaonna hamu sian musumuna i.\\n10:10 Suang songon i di ari halalas ni rohamuna, di angka ari rayamuna pe naung binuhul hian dohot di poltak ni bulan, ingkon paluonmu do angka sarune i laho pasahathon peleanmuna situtungon dohot peleanmuna hamauliateon, asa mambahen parningotan di hamu di adopan ni Debatamuna; ai Ahu do Jahowa, Debatamuna i.\\n10:11 Tole paduataonhon, di bulan sipaha dua, di ari duapulu, manaek ma ombun i sian atas ni undungundung panindangion i.\\n10:12 Dung i borhat ma halak Israel mangihuthon jojornasida i mardalan sian parhorsihan Sinai, gabe mangulon ombun i muse di halongonan Elaparan.\\n10:13 Jadi borhat ma parjolo i marguru tu hata ni Jahowa marhite sian si Musa.\\n10:14 Borhat tahe jumolo partonggol ni parsaroan ni halak Juda rap dohot parduaannasida i jala ihutan ni parduaanna i, i ma si Nahason, anak ni si Aminadab.\\n10:15 Jala ihutan ni parduaan ni marga ni halak Isasar, i ma si Natanael, anak ni si Zuar.\\n10:16 Jala ihutan ni parduaan ni marga ni halak Zebulon, i ma si Eliab, anak ni si Helon.\\n10:17 Dung i diloha ma undungundung i, jadi borhat ma angka anak ni si Gerson dohot si Merari, angka na mangusung undungundung i.\\n10:18 Dung i borhat ma partonggol ni parsaroan Ruben rap dohot parduaannasida, jala ihutan ni parduaanna i, i ma si Elizur, anak ni si Sedeur.\\n10:19 Jala ihutan ni parduaan ni marga ni halak Simeon, i ma Selumiel, anak ni si Zurisadai.\\n10:20 Jala ihutan ni parduaan ni marga ni halak Gad, i ma si Eliasap, anak ni si Deuel.\\n10:21 Dung i borhat ma huhut halak Kohat i, angka na mangusung habadiaon i, asa sanga parjolo i pajongjongkon undungundung i, paima ro nasida.\\n10:22 Dung i borhat ma partonggol ni parsaroan ni halak Epraim, rap dohot parduaannasida i jala ihutan ni parduaannasida i, i ma si Elisama, anak ni si Amihud.\\n10:23 Jala ihutan ni parduaan ni marga ni halak Manasse, i ma si Gamaliel, anak ni si Pedazur.\\n10:24 Jala ihutan ni parduaan ni marga ni halak Benjamin, i ma si Abidan, anak ni si Gidion i.\\n10:25 Dung i borhat ma partonggol ni parsaroan ni halak Dan, rap dohot parduaannasida i, i ma panimpuli di sandok parsaroan, jala ihutan ni parduaanna i, i ma si Ahieser, anak ni si Amisaddai.\\n10:26 Jala ihutan ni parduaan ni marga ni halak Aser, i ma si Pagiel, anak ni si Okran.\\n10:27 Jala ihutan ni parduaan ni marga ni halak Naptali, i ma si Ahira, anak ni si Enan.\\n10:28 I ma parture ni haborhatan ni halak Israel rap dohot parduaannasida i, sai songon i do nasida borhat.\\n10:29 Dung i ro ma hata ni si Musa tu si Hobab, anak ni si Reguel, halak Midian, simatua doli ni si Musa: Na tole ma hami borhat tu inganan naung pinorbagabaga ni Jahowa hian: Ahu mangalehonsa tu hamu ninna; antong rap ma hita mardalan, marjambar na denggan pe ho bahenonnami, ai nunga diparbaga Jahowa na denggan tu Israel.\\n10:30 Alai ninna ibana ma mangalusi: Ndang olo ahu mardalan rap dohot hamu, naeng mulak ma ahu tu luathu dohot tu hahaanggingku.\\n10:31 Alai ninna si Musa ma: Ua unang tadingkon hami, ai tangkas do diboto ho manang ingkon didia parsaroan na denggan di halongonan i, ingkon ho nian hira gabe matanami.\\n10:32 Molo tung mardalan ho rap dohot hami, jala ro na denggan i, na naeng bahenon ni Jahowa tu hami, ingkon bahenonnami huhut na denggan i tu ho.\\n10:33 Jadi borhat ma nasida sian dolok ni Jahowa tolu ari mardalan daona, jala poti parpadanan ni Jahowa mardalan di jolonasida, tolu ari mardalan daona, mangalului pangulonan di nasida.\\n10:34 Jala ombun ni Jahowa di atasnasida arian, molo borhat nasida sian parsaroan.\\n10:35 Ia naeng borhat poti i, ninna si Musa ma martangiang: Hehe ma Ho, ale Jahowa, asa tung marserak angka musum jala maporus angka na mangkagigihon Ho maradophon Bohim.\\n10:36 Jala ia jumpa mangulon poti i, ninna ma martangiang: Sai mulak ma Ho, ale Jahowa tu halak Israel na marriburibu loksa toropna!","num_words":843,"character_repetition_ratio":0.109,"word_repetition_ratio":0.0,"special_characters_ratio":0.231,"stopwords_ratio":0.395,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"MATEUS 18 - BIBLE & BUKU ENDE ONLINE\\n18:1 Uju i didapothon angka sisean i ma Jesus mandok: Ise ulaning na umbalga di harajaon banua ginjang?\\n18:2 Jadi dijou Jesus ma sada dakdanak, dipajongjong ma i tu tongatonganasida, dung i ninna ma:\\n18:3 Situtu do na hudok on tu hamu: Molo so mulak rohamu, gabe songon dakdanak, tung na so bongot hamu tu harajaon banua ginjang i.\\n18:4 Asa na paoru dirina songon dakdanak on, i do na umbalga di harajaon banua ginjang i.\\n18:5 Jala na manjangkon dakdanak na songon on marhitehite Goarhu, Ahu do na jinangkonna disi.\\n18:6 Alai na manggasipi sada sian na metmet on, angka na porsea di Ahu, dengganan ma ginantungkon losung batu tu rungkungna, laho mangalonongkon ibana tu laut na umbagas i.\\n18:7 Oe, jea ni portibi on, nialap ni gasip! Ndang tarbahen so ro nian gasip; alai marjea ma jolma na parohonsa!\\n18:8 Alai molo tung digasipi tanganmu manang patmu ho, gotap jala bolongkon, ai dumenggan mate bariba manang lumpuon ho bongot tu hangoluan, sian na mardua tangan dohot mardua pat, bolong tu api sisalelenglelengna.\\n18:9 Molo tung digasipi matami ho, pulsikkon jala bolongkon, ai dumenggan marmata sada ho, bongot tu hangoluan, sian na marmata dua, bolong tu api na roko.\\n18:10 Jaga ma hamu, so tung marhu ni roha hamu mida sada sian na metmet on, ai hudok ma tu hamu: Diida angka surusuruannasida na di banua ginjang i do tongtong bohi ni Damang na di banua ginjang i.\\n18:11 (Ai naung ro do Anak ni jolma i, paluahon na mago.)\\n18:12 Beha do rohamuna: Adong ma di sahalak saratus birubiru, gabe mago sada sian i; nda tadingkononna ma na siapulu sia i di tor, laho mangalului na mago i?\\n18:13 Na sintong ma na hudok tu hamu: Anggo dung jumpangsa, lasan ma rohana mida i, asa mida na siapulu sia na so mago i.\\n18:14 Suang songon i do roha ni Amamuna na di banua ginjang i, ai dipangido do, naeng unang mago agia sada sian na metmet on.\\n18:15 Alai molo mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse.\\n18:16 Alai anggo so ditangihon ho, arahon ma donganmu sada manang dua, asa hinatindangkon ni dua manang tolu halak nasa hata.\\n18:17 Alai molo so ditangihon nang nasida, paboa ma tu na sahuria i. Molo so ditangihon nang huria i, etong ma ibana songon parbegu jala sijalobeo.\\n18:18 Situtu do na hudok on tu hamu: Nasa na niihotanmuna di tano on, hot ma i tarihot nang di banua ginjang, jala nasa na pinaluanmuna di tano on, saut ma i malua nang di banua ginjang.\\n18:19 Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i.\\n18:20 Ai anggo pungu dua manang tolu pe marhitehite Goarhu, sai dongananku do nasida.\\n18:21 Dung i didok si Petrus ma mandok Ibana: Tuhan, sintap piga hali do sesaonku sala ni donganku na dompak ahu? Pola do pitu hali?\\n18:22 Gabe didok Jesus ma tu ibana: Ndada pitu hali dohononku tu ho, tung sintap pitupulu hali pitu do!\\n18:23 Onpe, tudos ma harajaon banua ginjang i tu sada raja, na laho mardabudabu dohot angka naposona.\\n18:24 Jadi di na manungka mangetong ibana, tarboan ma tu jolona sada halak, na marutang tu ibana saloksa talenta.\\n18:25 Jadi dibahen na so adong gararna, didokkon raja i ma gadison ibana dohot jolmana ro di anakkonna ro di saluhut na di ibana, asa adong gararna.\\n18:26 Jadi marsomba ujung ma naposo i tu adopanna, ninna ma: Palambas ma roham, hugarar pe tu ho saluhutna i!\\n18:27 Jadi asi do roha ni raja i di naposona, dipalua ma ibana, ba disesa ma utangna i.\\n18:28 Alai laho tu balian naposo ondeng, tongon ma dapotsa donganna naposo sahalak, na marutang tu ibana saratus hupang, gabe ditangkup ma i jala dipongkihi, ninna ma: Garar ma utangmi!\\n18:29 Dung i marsomba ujung ma i, sumomba donganna naposo mandok: Palambas ma roham mida ahu, hugarar pe tu ho saluhutna i!\\n18:30 Alai ndang olo, laho do ibana mangkurungkon donganna, paima digarar utangna i.\\n18:31 Jadi dung diida angka donganna naposo na masa i, marsak situtu ma rohanasida, jadi laho ma nasida tu raja i paboahon sude na masa i.\\n18:32 Gabe dijou raja i ma ibana, didok ma: Ho naposo na jahat, sude utangmi husalesehon, ala dielehelek ho ahu.\\n18:33 Nda ingkon songon i ma ho nian marasi ni roha di donganmu naposo, songon ahu na marasi ni roha di ho!\\n18:34 Jadi tarrimas ma raja i, dipasahat ma ibana tu pamongkihi, paima digarar sude utangna i.\\n18:35 Songon i do bahenon ni Damang na di banua ginjang i tu hamu, anggo so disesa hamu be sian rohamuna sala ni donganmuna!","num_words":772,"character_repetition_ratio":0.061,"word_repetition_ratio":0.0,"special_characters_ratio":0.244,"stopwords_ratio":0.32,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"IV MUSA 32 - BIBLE & BUKU ENDE ONLINE\\n32:1 Alai anggo pinompar ni si Ruben dohot si Gad pardorbia na godang situtu do, gabe diida nasida ma tano Jaser dohot tano Gilead, jadi ida ma, inganan na denggan do i di halak parpinahan.\\n32:2 Dung i ro ma halak si Gad dohot Ruben mandok hatanasida tu si Musa dohot tu malim Eleasar dohot tu angka induk ni huria i, ninna ma:\\n32:3 Ia Atarot, Dibon, Jaser, Nimra, Hesbon, Eleale, Sebam, Nebo dohot Beon.\\n32:4 Tano naung pinapatu ni Jahowa di adopan ni huria Israel, tano na denggan do i di halak parpinahan, jala pardorbia do angka naposom.\\n32:5 Angkup ni didok nasida: Molo maruli asi ni roha hami di adopanmu, nilehon ma nian tano on tu angka naposom bahen partalianna, unang nian hami taripar tu bariba ni Jordan.\\n32:6 Alai ninna si Musa ma tu halak Gad dohot tu halak Ruben: Tung tama ma hahaanggimuna laho tu parporangan, ia hamu naeng tinggal dison marsonangsonang?\\n32:7 Boasa tung paganggugangguonmuna roha ni halak Israel, asa unang taripar nasida tu tano naung nilehon ni Jahowa tu nasida?\\n32:8 Suang songon i do na binahen ni amamuna, uju husuru nasida sian Kades-Barnea laho mangkahapi tano i.\\n32:9 Jadi dung nangkok nasida sahat tu rura Eskol jala dihahapi tano i, gabe dipagangguganggu nasida roha ni halak Israel, pola manjua nasida masuk tu tano, naung nilehon ni Jahowa tu nasida.\\n32:10 Pola marsigorgor rimas ni Jahowa di ari na sasada i, jala maruari ibana mandok:\\n32:11 Ndang jadi be baoa angka naung hutogihon nangkok sian tano Misir olat ni na marumur duapulu taon dohot lobi sian i marnida tano naung huuarihon tu si Abraham, si Isak dohot si Jakkob! Ala ndang marsihohot rohanasida mangihuthon Ahu.\\n32:12 Dungkon ni si Kaleb, anak ni si Jepune halak si Kenizi dohot si Josua, anak ni si Nun, ala marsihohot anggo rohanasida mangihuthon Jahowa.\\n32:13 Jadi marpiarpiar ma rimas ni Jahowa mida Israel, gabe maotaot nasida didokkon di halongonan opatpulu taon lelengna, paima sun siap na sansundut i na mangulahon hajahaton di adopan ni Jahowa.\\n32:14 Jala ida ma, hamu do nuaeng soluk singkat ni amamuna i, sada sundut halak pardosa, naeng manambai dope huroha, parpiarpiar ni rimas ni Jahowa dompak Israel.\\n32:15 Ai tung sura marbalik hamu sian Ibana, lumeleng dope pasombuonna bangso on di halongonan, jala mago do sandok bangso on bahenonmuna.\\n32:16 Dung i ro ma nasida jumonok mandapothon ibana huhut didok: Asal naeng paulihon angka pondokpondok di pinahannami hami dison dohot huta pungkaonnami di angka anakkonnami.\\n32:17 Alai hatop pe anggo hami mangkontas manguluhon halak Israel, paima sahat nasida huboan hami tu ingananna; ingkon angka anakkonnami tinggal di bagasan huta, angka na gonting i maradophon isi ni tano i hian.\\n32:18 Ndang naeng mulak anggo hami tu jabunami, nda jolo disoluk halak Israel ganup partalianna be.\\n32:19 Ai ndada naeng sapartalian hami dohot nasida di bariba ni Jordan adui, ia dung sahat partaliannami tu hami di bariba ni Jordan tungkan habinsaran.\\n32:20 Dung i ninna si Musa ma tu nasida: Molo dibahen hamu songon i, molo mangkontas hamu di adopan ni Jahowa laho tu parporangan.\\n32:21 Antong taripari hamu ma Jordan di adopan ni Jahowa, sude hamu angka na tang marsinjata, paima sun dipabali Ibana angka musuna sian adopanna.\\n32:22 Jala patu tano i di adopan ni Jahowa, dung salpu i jadi do hamu mulak, gabe lias hamu sian sala maradophon Jahowa dohot Israel, jala ingkon tano on gabe partalianmuna di adopan ni Jahowa.\\n32:23 Alai molo so dibahen hamu songon i, ida ma, mardosa ma hamu dompak Jahowa, jala boto hamu ma, ingkon manginona tu hamu dosamuna i.\\n32:24 Antong pungka hamu ma angka huta di anakkonmuna dohot pondokpondok di birubirumuna, alai patupa hamu huhut hata na ruar sian pamanganmunai.\\n32:25 Dung i ninna halak Gad dohot Ruben ma mandok si Musa: Ingkon bahenon ni angka naposom do hombar tu tona ni tuantai.\\n32:26 Anakkonnami, jolmanami, ugasannami ro di sandok pinahannami, ingkon tading dison di bagasan angka huta ni Gilead.\\n32:27 Alai anggo hami, angka naposomon, ingkon taripar sude tang marsinjata be tu parporangan di adopan ni Jahowa, songon naung nidok ni tuantai.\\n32:28 Jadi ro ma tona ni si Musa taringot tu nasida mandok tu malim Eleasar dohot tu si Josua, anak ni si Nun dohot tu sude induk ni halak Israel marmargamarga.\\n32:29 Ninna si Musa ma tahe tu nasida: Molo taripar halak Gad dohot Ruben rap dohot hamu tu bariba ni Jordan, sude halak angka na tang be tu parporangan di adopan ni Jahowa, jala naung patu tano i maradophon hamu, ingkon lehononmuna ma tu nasida tano Gilead bahen partalianna.\\n32:30 Alai tung sura ndang taripar halak angka na tang marsinjata rap dohot hamu, ingkon marpartalian nasida di tongatongamuna di tano Kanaan.\\n32:31 Jadi ro ma alus ni halak Gad dohot Ruben mandok: Manang aha naung nidok ni Jahowa tu angka naposomon, ingkon songon i bahenonnami.\\n32:32 Ingkon tang be hami marsinjata taripar di adopan ni Jahowa tu tano Kanaan jala hot di hami partaliannami di bariba ni Jordan.\\n32:33 Jadi dilehon si Musa ma tu halak Gad, tu halak Ruben dohot tu satonga marga Manasse, anak ni si Josep, harajaon ni si Sihon, raja ni halak Amori dohot harajaon ni si Og, raja ni Basan, tano i tahe ro di angka huta di sandok partalpahanna humaliang.\\n32:34 Dung i dipauli halak Gad ma huta Dibon, Atarot dohot Aroer.\\n32:35 Tole Atarot Sopan, Jaser dohot Jogbehat.\\n32:36 Tole Betnimra, dohot Betharan, angka huta na gonting dohot pondokpondok di birubiru.\\n32:37 Ro muse halak Ruben paulihon Hesbon, eleale, Kiriataim.\\n32:38 Ro muse Nebo dohot Baal Meon, angka na dipaimbar ia goarna, tole dohot Sibna, jala di paimbar do goar ni huta angka na pinaulina i.\\n32:39 Dung i laho ma angka anak ni si Mahir, anak ni si Manasse, tu Gilead, laos dipapatu do i jala dipabali halak Amori na disi.\\n32:40 Dung i dilehon si Musa ma Gilead tu si Mahir, anak ni si Manasse, laos maringan ibana disi.\\n32:41 Alai anggo si Jair, anak ni si Manasse, laho do i papatuhon angka sosor, laos dibahen goarna angka sosor ni si Jair.\\n32:42 Laho do nang si Nobah, jala dipapatu Kenat rap dohot angka sosorna, jala digoar do i Nobah mangihuthon goarna i.","num_words":997,"character_repetition_ratio":0.065,"word_repetition_ratio":0.0,"special_characters_ratio":0.227,"stopwords_ratio":0.362,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I Musa 28 | Alkitab TOBA\\n← I Musa 29\\nI Musa 27 →\\n28:1 Dung i dijou si Isak ma si Jakkob, jala dipasupasu ibana, didok ma manonai ibana: Unang buat sian angka boru Kanaan bahen jolmam.\\n28:2 Borhat ma ho laho tu Padang-Aram, tu jabu ni si Betuel, ama ni inam, sian i ma buat bahen jolmam, sian angka boru ni si Laban, iboto ni inam.\\n28:3 Sai gabe ma ho jala torop dipasupasu Debata na sun hinagogo i, asa torop bangso marompu tu ho.\\n28:4 Sai dilehon ma tu ho dohot tu pinomparmu pasupasu na tu si Abraham i, asa ho manean tano paisolatanmu, na nilehon ni Debata tu si Abraham i.\\n28:5 Jadi diparbohat si Isak ma si Jakkob i, asa laho ibana tu Padang-Aram, tu si Laban, anak ni si Betuel, halak Ram i, iboto ni si Rebekka, ina ni si Jakkob dohot si Esau.\\n28:6 Jadi dung diida si Esau, naung dipasupasu si Isak si Jakkob i, jala dipaborhat ibana tu Padang-Aram, mangalap jolmana sian i, jala na nioraanna i, di na pinasupasuna i ibana, mambuat sian boru Kanaan, bahen jolmana.\\n28:7 Jala naung ditangihon si Jakkob hata ni amana dohot inana laho tu Padang-Aram.\\n28:8 Diida si Esau huhut sogo do roha ni si Isak, amana i mida boru Kanaan.\\n28:9 Jadi laho ma si Esau tumopot si Ismael, jala dibuat si Mahalat, boru ni si Ismael, anak ni si Abraham, iboto ni si Nabaiot bahen jolmana, imbang ni angka jolmana hian.\\n28:10 Alai borhat do anggo si Jakkob sian Berseba laho tu Haran.\\n28:11 Jadi tolhas ma ibana tu sada parbornginan, gabe marborngin ibana disi, ai nunga mate mata ni ari. Dung i dipambuat ma angka batu na disini bahen halang ni uluna, laos modom ibana disi.\\n28:12 Dung i marnipi ma ibana, diida ma sada tangga, na pinagohon tu tano, tolhas ro di langit ia ujungna, jadi ida ma, sai marnaek mijur sian i angka surusuruan ni Debata.\\n28:13 Jongjong di ginjangna anggo Jahowa, jala ninna do: Ahu do Jahowa, Debata ni ompum si Abraham dohot Debata ni si Isak, ia tano pinodomanmon lehononku ma tu ho dohot tu pinomparmu.\\n28:14 Jala sobokkon orbuk ni tano on sogot torop ni pinomparmu, jala angka rarat ma hamu tu hasundutan dohot tu habinsaran dohot tu utara dohot tu dangsina, jala dapotan pasupasu sogot nasa marga na di tano on marhitehite ho do pinomparmi.\\n28:15 Ida ma, sai dongananku jala ramotanku do ho manang tu dia pe ho mangalangka, jala togihononku do ho mulak tu tano on; ai ndang tadingkononku ho, nda jolo sahat hubahen na huparbaga i tu ho.\\n28:16 Dung i tarsunggul ma si Jakkob sian na modom i, jadi didok ma: Inganan ni Jahowa do on hape, so pamotoanku.\\n28:17 Jadi mabiar ma ibana, ninna ma: Na songkal situtu do inganan on, ndang tarbahen so on bagas ni Debata, jala baba pintu ni langit.\\n28:18 Dung i hehe ma si Jakkob sogot manogotna i, dibuat ma batu pinarhalanguluna i, jala dipajongjong bahen partinandaan, jala diusehon miak tu ginjangna.\\n28:19 Dung i dibahen ma goar ni inganan i Betel (bagas ni Debata), Lus do goar ni huta i anggo na sai laon.\\n28:20 Dung i marbagabaga ma si Jakkob, ninna do: Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon.\\n28:21 Jala marsonangsonang ahu mulak ditogihon tu bagas ni damang, sai Jahowa ma Debatangku.\\n28:22 Jala batu na hupajongjong on bahen partinandaan, i ma gabe bagas ni Debata, jala sude na nilehonmu tu ahu parsampuluonku ma i tu Ho.","num_words":571,"character_repetition_ratio":0.056,"word_repetition_ratio":0.0,"special_characters_ratio":0.242,"stopwords_ratio":0.382,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 29 - BIBLE & BUKU ENDE ONLINE\\n29:1 Dung i dipaluhut si Musa ma sandok Israel jala didok tu nasida: Nunga diida hamu sude naung binahen ni Jahowa di adopan ni matamuna di tano Misir tu si Firaun dohot tu sude naposona dohot tu sandok tanona:\\n29:2 Angka pangunjunan bolon, angka naung niida ni matamu, angka tanda dohot halongangan na bolon i!\\n29:3 Hape laos so dilehon Jahowa dope tu hamu roha na marateatehonsa manang mata na marnidasa, manang pinggol na umbegesa rasirasa sadarion.\\n29:4 Jala Ahu mangiringiring hamu opatpulu taon lelengna di halongonan, ndang pola buruk ulosmuna di dagingmuna, sipatum pe ndang buruk di patmu.\\n29:5 Ndang mangan sagusagu hamu jala ndang minum anggur hamu, manang siinumon na horas, asa tung diboto hamu, Ahu do Jahowa, Debatamuna i.\\n29:6 Jadi dung sahat hamu tu inganan on, ruar ma si Sihon, raja di Hesbon dohot si Og, raja di Basan naeng manjumpangkon hita laho marmusu, hape talu do nasida itabahen.\\n29:7 Laos italaum do tanonasida i, jala italehon do i tu halak Ruben, Gad dohot tu na satonga marga Manasse bahen partalianna.\\n29:8 Antong ringkoti hamu ma hata ni parpadanan on, jala ulahon hamu angka i, asa marsihohot rohamuna di sude siulahononmuna.\\n29:9 Impi do hamu luhutna jongjong sadarion di adopan ni Jahowa, Debatamuna i, angka indukmuna, angka margamuna, angka sintuamuna, angka panuturimuna ro di sandok Israel sadasada.\\n29:10 Angka dakdanakmuna, angka jolmamuna, ro di halak dagang na di tongatonga ni parsaroanmu, olat ni halak sitaha sobanmu ro di halak sitahu tapianmu.\\n29:11 Asa masuk ho tu bagasan parpadanan binahen ni Jahowa, Debatam, dohot tu bagasan parbulanon, na binahen ni Jahowa, Debatam tu ho sadarion.\\n29:12 Asa Ibana pahothon ho sadarion gabe bangsona, jala Ibana gabe Debatam, songon naung pinarbagana i hian tu ho, jala songon naung niuarihonna tu angka ompum, si Abraham, si Isak dohot si Jakkob.\\n29:13 Ai ndada holan tu hamu ahu mambahen parpadanan dohot parbulanon.\\n29:14 Tung tu sude do tahe angka na dison jongjong rap dohot hami di adopan ni Jahowa. Debatanta, dohot tu sude angka na so dison sadarion rap dohot hita.\\n29:15 Ai tangkas do diboto hamu na maringan i hita na jolo di tano Misir, jala na itabolusi tongatonga ni bangso parbegu, angka na binolusmuna i.\\n29:16 Jadi nunga diida hamu biasbias angka na niulahonnasida i, ro di ajiajiannasida sian hau dohot batu, sian perak dohot sere, angka na pineopnasida i.\\n29:17 Dibahen i sai unang ma adong di tongatongamuna, nanggo sahalak baoa, manang parompuan, manang halak na saompu manang na samarga, tung marbalik rohana sadarion sian Jahowa, Debatanta i, asa laho mangoloi angka debata ni angka bangso on, asa unang adong di tongatongamuna urat na martumburhon na paet dohot pogu.\\n29:18 Tung sura pe binegena hata ni parbulanon on, lam dipasupasu dope dirina di bagasan rohana, ninna do: Ingkon marhasonangan do ahu nang pe ahu mardalan di hatangkangon ni rohangkon, asa rap mago halak na marlobilobi na uasan.\\n29:19 Ndang tagamon olo Jahowa marpangulahi rohana mida ibana, ingkon marpiarpiar situtu ma rimas ni Jahowa dohot pangiburuonna mida baoa sisongon i, jala ingkon manginona tu ibana saluhut torutoru, angka na tarsurat di bagasan buku on, jala siaphonon ni Jahowa goarna sian toru ni langit i.\\n29:20 Ingkon papulihon ni Jahowa huhut ibana sian saluhut marga ni Israel mambahen marhinamago, hombar tu saluhut torutoru ni parpadanan angka na tarsurat di bagasan buku patikon.\\n29:21 Pola dohonon ni sundut na soluk, anakmuna i tahe, angka na hehe dung salpu hamu, ro di halak sileban angka na ro sian tano na dao, molo diida nasida torutoru dohot parsahiton, angka na hinonahon ni Jahowa tu tano on.\\n29:22 Naung gabe barerang dohot sira naung matutung sandok tanona, tung na so tarsabur be, jala ndang martumbur disi agia aha, jala ndang tubu disi agia aha ingkau rata, suman tahe tu harorongrong ni Sodom, Gumora, Adma dohot Zeboim, angka naung marongrong dibahen Jahowa di bagasan rimasna dohot di bagasan parpiarpiar ni murukna.\\n29:23 Dung i dohonon ni sude angka bangso parbegu ma: Boasa tung songon i ulaning bahenon ni Jahowa tu tano on? Aha do ulaning parbonsiran ni parpiarpiar ni rimas na bolon on\\n29:24 Jadi dohonon ni halak ma mangalusi: Ala na tinadingkonnasida parpadanan na binahen ni Jahowa, Debata ni ompunasida i, na binahenna tu nasida, uju Ibana manogihon nasida ruar sian tano Misir.\\n29:25 Hape laho do nasida musengani mangoloi angka debata sileban, huhut marsomba tusi; debata angka na so tinandanasida i, jala na so tinurpukkonna tu nasida.\\n29:26 Dibahen i marsigorgor ma rimas ni Jahowa mida tano on, gabe manginona tusi saluhut torutoru, angka na tarsurat di bagasan buku on.\\n29:27 Jadi disiaphon Jahowa ma nasida sian tanonasida i di bagasan murukna dohot di bagasan parpiarpiar ni rimasna na godang i, jala diambolongkon nasida tu tano na asing, songon na andar sadarion.\\n29:28 Angka hahomion na buni, Jahowa Debatanta do nampunasa, alai anggo pangungkapon angka na pinapatarna i, hita do nampunasa, nang angka anakkonta ro di salelenglelengna, laho mangulahon sude hata ni patikon.","num_words":799,"character_repetition_ratio":0.059,"word_repetition_ratio":0.0,"special_characters_ratio":0.212,"stopwords_ratio":0.339,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"MALEAKI 4 - BIBLE & BUKU ENDE ONLINE\\n4:1 i ida ma, na ro ma ari na marsigorgor, songon pamurunan, jadi doshon durame sude halak na jungkat dohot halak siulahon hajahaton, gabe marsijembur ma nasida bahenon ni ari na ro sogot, ninna Jahowa Zebaot, ndang adong tadingkononna di nasida nang urat, nang ranting.\\n4:2 Alai binsar ma anggo di hamu, angka na mangkabiari goarhu mata ni ari ni hatigoran mardongan hahisaron di linggom\\nni habongna, gabe ruar ma hamu jala panihalnihalon songon anak ni lombu, angka na ruar sian bara.\\n4:3 adi degedegeonmuna ma halak parjahat, ai doshon sirabun nasida sogot ditoru ni palak ni patmuna, di ari sibahenonku,\\nninna Jahowa Zebaot.\\n4:4 Sai paingotingot hamu ma patik ni si Musa, naposongki, na hupatolhas tu ibana uju di Horeb tu sandok Israel, angka patik dohot uhum.\\n4:5 Ida ma, suruanku ma tu hamu panurirang Elia, patujolo ni haroro ni ari ni Jahowa na bolon, jala na songkal i.\\n4:6 Asa ibana paulakkon roha ni ama ama tu angka anakna, jala roha ni angka dakdanak tu amanasida, asa unang ro ahu\\nmangkonahon uhum hamagoan tu tano on.","num_words":174,"character_repetition_ratio":0.03,"word_repetition_ratio":0.0,"special_characters_ratio":0.216,"stopwords_ratio":0.345,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JOSUA 22 - BIBLE & BUKU ENDE ONLINE\\n22:1 Uju i ma dipapungu si Josua ma halak Ruben, Gad dohot satonga marga Manasse.\\n22:2 Didok ma mandok nasida: Nunga diradoti hamu saluhut na tinonahon ni si Musa, naposo ni Jahowa tu hamu, jala nunga ditangihon hamu suarangku taringot tu saluhutna na hutonahon i tu hamu.\\n22:3 Ndang ditadingtading hamu hahaanggimuna, nunga pola na sai laon rasirasa sadarion, jala nunga burju diradoti hamu tona ni Jahowa, Debatamuna i.\\n22:4 Ia nuaeng nunga marhasonangan hahaanggimuna i dibahen Jahowa, Debatamuna i, hombar tu bagabagana i tu nasida, on pe muli ma hamu nuaeng tu undungundungmuna, tu tano partalianmuna i, na nilehon ni si Musa, naposo ni Jahowa, tu hamu di bariba ni Jordan.\\n22:5 Asa burju situtu hamu mangaringkoti patupahon hombar tu tona dohot tu patik, na tinonahon ni si Musa, naposo ni Jahowa, tu hamu: Mangkaholongi Jahowa, Debatamuna i, dohot marparange di saluhut angka dalanna, huhut mangaradoti angka tonana, jala marsihohot tu Ibana, huhut mangoloi Ibana sian nasa rohamuna dohot sian nasa tondimuna.\\n22:6 Dung i dipasupasu si Josua ma nasida, jala dipamuli asa laho nasida tumopot undungundungnasida be.\\n22:7 Alai anggo tu na satonga marga Manasse, nunga dilehon si Musa hian partalian di Basan, jala tu na satonganari nunga dilehon si Josua rap dohot angka hahaanggina di hasundutan ni Jordan, dingkan laut. Jadi dung dipamuli si Josua nang nasida tu undungundungnasida be, jala dipasupasu nasida.\\n22:8 Ninna ma tu nasida songon on: Mararta godang do hamu muli tu undungundungmuna dohot marpinahan na deak situtu, marperak, marsere, martombaga, marbosi dohot marulos mansai godang; antong sai bagi hamu ma tabantaban sian musumuna i rap dohot hahaanggimuna.\\n22:9 Dung i mulak ma pinompar ni si Ruben, si Gad dohot satonga Manasse, tumadingkon halak Israel sian Silo na di tano Kanaan laho tu tano Gilead, tumopot tano partaliannasida, naung sahat tu nasida hian, hombar tu hata ni Jahowa marhite sian si Musa.\\n22:10 Jadi dung sahat nasida tu luat ni Jordan, angka na di tano Kanaan, dipauli pinompar ni si Ruben, si Gad dohot satonga marga Manasse disi sada langgatan martopihon Jordan, na bolon idaon.\\n22:11 Dung i tarbortik ma tu halak Israel, didok halak: Ida ma, nunga pola dipauli pinompar ni si Ruben, si Gad dohot satonga marga Manasse sada langgatan tondong ni tano Kanaan di luat angka mardonokkon Jordan paiparipar dohot halak Israel.\\n22:12 Jadi dung dibege halak Israel barita i, marluhut ma sandok huria ni halak Israel tu Silo martahi nangkok laho mamorang nasida. III\\n22:13 Dung i disuru halak Israel ma manopot pinompar ni si Ruben, si Gad dohot satonga marga Manasse tu tano Gilead malim Pinehas, anak ni si Eleasar.\\n22:14 Angkupni sampulu induk donganna, sada induk sian ganup marga Israel marompuompu, ganup nasida ihutan di nasida na samarga di tongatonga ni halak Israel marriburibu.\\n22:15 Jadi dung tolhas nasida tu pinompar ni si Ruben, si Gad dohot satonga marga Manasse tu tano Gilead, gabe marhata dohot nasida songon on:\\n22:16 Boti hata ni sandok huria ni Jahowa Pangoseon dia do i, na mangosei hamu dompak Debata ni Israel, umbahen marbalik hamu sadarion sian Jahowa, di na pinaulimuna di hamu sada langgatan laho manggunturi sadarion dompak Jahowa.\\n22:17 Maotikku dope huroha di hita hajahaton ni Peor, na so taruras dope hita sian i rasirasa sadarion gabe masa begu di huria ni Jahowa.\\n22:18 Marbalik muse hamu sadarion sian Jahowa, hape molo manggunturi hamu sadarion dompak Jahowa marronirimas ma Ibana marsogot tu sandok huria ni Israel.\\n22:19 Alai molo tung ramun tano partalianmuna i, ro hamu taripar tu tano partalian ni Jahowa, ojahan ni undungundung ni Jahowa, asa maruli partalian hamu di tongatonganami, alai unang hamu manggunturi dompak Jahowa dohot dompak hami di na pinaulimuna di hamu sada langgatan, pulik sian langgatan ni Jahowa Debatanta i.\\n22:20 Nda mangose do si Agan, anak ni si Jara, marhite sian ugasan na hona harom, gabe masa torutoru tu sandok huria Israel? Jala ndada sasada ibana mate ala hajahatonna.\\n22:21 Jadi ninna pinompar ni si Ruben, si Gad dohot satonga marga Manasse mangalusi angka induk ni Israel marriburibu.\\n22:22 Debata, Debata Jahowa; Debata, Debata Jahowa, Ibana umbotosa, Israel pe ingkon botoonna do: Molo tung manggunturi hami dompak Jahowa, manang naeng marbalik, unang ma Ho manolongi hami sadarion.\\n22:23 Molo tung hupauli hami sada langgatan di hami, asa naeng marbalik sian Jahowa, manang molo tung naeng mamelehon pelean situtungon manang sipanganon hami di atasna, manang molo tung naeng mamelehon angka pelean hamauliateon hami di atasna, Jahowa ma marlulu dompak hami!\\n22:24 Molo so balik sian holso ni rohanami, umbahen hubahen hami songon i mandok: Marsogot haduan dohonon ni pinomparmuna ma tu pinomparnami songon on: Aha do parsaoranmuna tu Jahowa, Debata ni Israel!\\n22:25 Batang aek Jordan on do parbolatan na binahen ni Jahowa parholangannami tu hamu, ale pinompar ni si Ruben dohot si Gad, ndang parjambar anggo hamu di Jahowa! Jadi taiton ni pinomparmuna maon pinomparnami, unang marhabiaran tu Jahowa.\\n22:26 Dibahen i hudok hami ma: Itapauli ma di hita sada langgatan, ndada bahen pamelean ni pelean situtungon manang sipotongon.\\n22:27 Ingkon bahen sitindangi nian langgatanon di hita dohot di pinomparta sogot, paboa na masuk hami marulaon tu Jahowa di jolona marhite sian peleannami situtungon dohot sipotongon dohot hamauliateon, asa unang dohonon ni pinomparmuna sogot tu pinomparnami: Ndang parjambar anggo hamu di Jahowa!\\n22:28 Jadi hudok hami ma: Molo tung songon i dohononnasida sogot tu hami dohot tu pinomparnami, gabe dohononta ma: Bereng hamu ma sumansuman ni langgatan di Jahowa naung binahen ni ompunami, ndada bahen pamelean ni pelean situtungon manang sipotongon, ingkon bahen sitindangi do i di tongatonganta.\\n22:29 Dao ma i sian hami, anggo tung manggunturi hami dompak Jahowa, manang marbalik sian Jahowa sadarion, laho paulihon sada langgatan bahen pamelean ni pelean situtungon manang sipanganon manang sipotongon pe, pulik sian langgatan ni Jahowa, Debatanta i, na jongjong di jolo ni undungundungna.\\n22:30 Jadi dung dibege malim Pinehas dohot angka induk ni huria i dohot induk ni Israel marriburibu, angka na rap dohot ibana, hata angka na pinaboa ni pinompar ni si Ruben, si Gad dohot si Manasse, gabe denggan rohanasida umbegesa.\\n22:31 Dung i ninna malim Pinehas, anak ni si Eleasar ma tu pinompar ni si Ruben, si Gad dohot si Manasse: Apala sadarion ma hutanda hami paboa Jahowa di tongatonganta, ala so naeng mangose hamu dompak Jahowa marhite sian pambaenanon. Hamu do tardok paluahon halak Israel sadarion sian tangan ni Jahowa.\\n22:32 Dung i ditadingkon malim Pinehas, anak si Eleasar dohot angka induk i ma pinompar ni si Ruben dohot si Gad, mulak sian tano Gilead tu tano Kanaan mandapothon halak Israel, mamboan barita i tu nasida.\\n22:33 Jadi denggan hata i di roha ni halak Israel, laos mamujimuji Debata halak Israel i, jala ndang be disangkap rohanasida naeng nangkok mamorangi nasida, laho mangago tano i, na niinganan ni pinompar ni si Ruben dohot si Gad.\\n22:34 Dung i dibahen pinompar ni si Ruben dohot si Gad ma goar ni langgatan i: Sitindangi, ai ninna do: Langgatanon ma sitindangi di holangholangta, paboa Jahowa do Debata.\\nLabel: Alkitab Bahasa Batak, JOSUA, Padan Na Robi","num_words":1133,"character_repetition_ratio":0.085,"word_repetition_ratio":0.013,"special_characters_ratio":0.205,"stopwords_ratio":0.344,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 26 - BIBLE & BUKU ENDE ONLINE\\n26:1 Ia dung masuk ho tu tano, silehonon ni Jahowa, Debatam tu ho bahen partalianmu, dung disoluk ho tano i laos maringan disi.\\n26:2 Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna.\\n26:3 Dung i ingkon topotonmu ma malim di angka ari uju i, jala dohononmu tu ibana: Na pabotohon ma ahu sadarion di adopan ni Jahowa, Debatam, naung masuk ahu tu tano, naung niuarihon ni Jahowa hian tu angka ompunami, lehononna tu hami.\\n26:4 Dung i ingkon buaton ni malim i ma hirang i sian tanganmu jala peakkononna do i di adopan ni langgatan ni Jahowa, Debatam.\\n26:5 Dung i dohononmu ma hatam mandok songon on di adopan ni Jahowa, Debatam: Halak Ram na madoado do anggo damang, dung i tuat ibana tu Misir, laos mardagangdagang disi, mardongan otik jolma, hape gabe bangso na bolon, na gogo jala na torop bilanganna ibana disi.\\n26:6 Alai ro ma halak Misir mambahen na so uhum tu hami, jala dirupa hami, jala diampehon ulaon na poran tu hami.\\n26:7 Jadi mangangguhi ma hami tu Jahowa, Debata ni ompunami, gabe ditangihon Jahowa do soaranami jala marpanatap rohana di pardangolan, hangaluton dohot hagogotan na huahap hami.\\n26:8 Dung i ditogihon Jahowa ma hami ruar sian Misir marhite sian tangan na gogo dohot marhite sian botohon na toltol dohot marhite sian hasonggoton bolon, mardongan angka tanda dohot halongangan.\\n26:9 Jala diboan hami sahat tu inganan on, jala dibasabasahon tu hami tano on, tano habaoran ni susu dohot situak ni loba.\\n26:10 Nuaeng pe, ida ma, ahu mamboan patumonaan ni parbue ni tano, na nilehonmi tu ahu, ale Jahowa! Laos tinggalhononmu ma ampangi di adopan ni Jahowa, Debatam jala marsomba ho di adopan ni Jahowa, Debatam.\\n26:11 Jala ingkon marlas ni roha ho mida sude na denggan naung nilehon ni Jahowa, Debatam tu ho dohot tu isi ni bagasmu; songon i ho ro di halak Lepi dohot halak dagang na di tongatongami.\\n26:12 Ia dung sun dipapungu ho sandok parpuluan ni gogo ni tanomu di taon patoluhon, i ma taon parpuluan, jala ia dung dilehon ho tu halak Lepi, tu halak dagang, tu dakdanak na sopot so marama dohot tu parompuan na mabalu, asa mangan nasida di bagasan angka hutam jala bosuran.\\n26:13 Ingkon dohononmu ma di adopan ni Jahowa, Debatam: Nunga hupaholang ugasan na badia sian jabu i, angkup ni nunga hulehon tu halak Lepi, tu halak dagang, tu dakdanak na sopot so marama dohot tu parompuan na mabalu, hombar tu sandok tonami, naung tinonahonmu tu ahu, ndang hulaosi nanggo sada sian angka tonami, jala ndang huhalupahon.\\n26:14 Ndang adong na hupangan sian i uju di hinamagongku, jala ndang adong hubuati sian i laho paramunhon, jala ndang adong hulehon sian i bahen boan ni na mate. Nunga hutangihon soara ni Jahowa, Debatangku, nunga hubahen sandok hombar tu na tinonahonmi tu ahu.\\n26:15 Sai manatap ma Ho sian ingananmu na badia i, sian banua ginjang i, sai pasupasu huhut bangsom Israel dohot tano naung nilehonmu tu hami, songon naung niuarihonmu tu ompunami, tano habaoran ni susu dohot situak ni loba.\\n26:16 Apala sadarion ma Jahowa, Debatam manonahon tu ho, ingkon ulahononmu angka aturan on dohot uhum, ingkon radotanmu jala ulahononmu angka i sian nasa roham dohot sian nasa ateatem.\\n26:17 Nunga diparbaga ho sadarion ingkon Jahowa do Debatam, jala ingkon marparange ho di angka dalanna, jala ingkon radotanmu angka aturanna, angka tonana dohot uhumna, jala ingkon tangihononmu soarana.\\n26:18 Jahowa i pe nunga marbagabaga tu ho sadarion, ingkon ho do gabe bangso hapunjunganna, songon naung pinarbagabagana i hian tu ho, jala ingkon radotanmu sude angka tonana.\\n26:19 Asa Ibana mambahen ho tumimbul sian saluhut bangso parbegu, angka naung jinadihonna bahen pujipujian dohot marbarita dohot bahen hamuliaon, jala asa ho gabe bangso na badia di Jahowa, Debatam, songon naung nidokna hian.","num_words":647,"character_repetition_ratio":0.08,"word_repetition_ratio":0.025,"special_characters_ratio":0.215,"stopwords_ratio":0.34,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"IV MUSA 35 - BIBLE & BUKU ENDE ONLINE\\n35:1 Dung i ro muse hata ni Jahowa tu si Musa di adaran Moab, martopihon Jordan, tondong ni Jeriko, ninna ma:\\n35:2 Dokkon ma halak Israel i, asa dilehon nasida angka huta sian partalian hapunjunganna be tu halak Lepi, bahen inganannasida.\\n35:3 Lehonon huhut tu halak Lepi tano upa parik humaliang hutanasida i bahen panjampalan; asa angka huta i gabe inganan di nasida jala angka panjampalan i di dorbianasida dohot di pinahannasida marragamragam.\\n35:4 Alai angka upa parik ni huta, angka silehononmuna tu halak Lepi, ingkon sian balian ni parik ni huta i suhatan saribu asta humaliang.\\n35:5 Ingkon suhatanmuna sian balian ni parik i sambariba tungkan habinsaran dua ribu asta dohot sambariba tungkan dangsina dua ribu asta dohot sambariba tungkan hasundutan dua ribu asta dohot sambariba tungkan utara dua ribu asta, asa huta i di porsitongaanna; ingkon i ma upa parik ni angka huta i.\\n35:6 Alai angkup ni huta angka silehononmuna tu halak Lepi, i ma na onom huta haporusan, angka silehononmuna, asa maporus tusi halak sibunu jolma, lehononmuna dope tu nasida opatpulu dua huta.\\n35:7 Jadi torop ni sude huta angka silehononmuna tu halak Lepi opatpulu ualu huta rap dohot upa parikna.\\n35:8 Ingkon sian partalian ni halak Israel do lehononmuna angka huta i, gumodang do sian halak na gumodang partalianna, jala ummotik sian halak na otik partalianna; ganup marguru tu partalianna na sinagihon tu ibana, lehononna sian angka hutana tu halak Lepi.\\n35:9 Dung i ro muse hata ni Jahowa tu si Musa songon on:\\n35:10 Patolhas ma hatangkon tu halak Israel: Ia dung ditaripari hamu Jordan masuk tu tano Kanaan.\\n35:11 Ingkon papulihonmuna di hamu angka huta na tau bahen huta haporusan di hamu, asa tarbahen maporus tusi halak sibunu jolma, so pangkirimanna.\\n35:12 Asa angka huta i bahen haporusan di hamu maradophon jolma parlulu, asa unang mate halak sibunu jolma i so jolo sanga jongjong ibana di adopan ni luhutan paruhuman.\\n35:13 Jala sian huta angka na pinatongonmuna, ingkon onom gabe huta haporusan di hamu.\\n35:14 Ingkon tolu huta patongononmuna di baribaon ni Jordan, jala tolu huta patongononmuna di tano Kanaan: Ingkon gabe huta haporusan do i.\\n35:15 Na onom huta i ingkon gabe haporusan nang di halak Israel, nang di halak dagang, nang di halak paisolat di tongatongamuna, asa tarbahen maporus tusi manang ise na mambunu jolma so pangkirimanna.\\n35:16 Tung sura manang ise mambunu jolma marhite sian ulaula bosi, pola mate, sibunu jolma ma ibana tutu, ingkon marutang hosa do halak pamunui.\\n35:17 Manang tung sura mate jolma i dibunu marhite sian batu na di tanganna tau pamunu hian, sibunu jolma ma ibana tutu, ingkon marutang hosa halak pamunui.\\n35:18 Manang tung sura mate jolma i dibunu marhite sian panggado hau na di bagasan tanganna, tau pamunu hian, sibunu jolma ma ibana tutu, ingkon marutang hosa halak pamunui.\\n35:19 Ingkon jolma parlulu hian mambunu halak pamunui, manang didia pe ibana dapotsa, jadi ma bunuonna ibana.\\n35:20 Manang tung sura ditenju jolma i sian hosom ni rohana, manang dituntun maninggangkon manang aha tu ibana pola mate.\\n35:21 Manang tung sura dipastap ibana ala naung musuna hian pola mate, ingkon marutang hosa jolma pamastapi, ai sibunu jolma do ibana; ingkon jolma parlulu hian mambunu halak pamunui, manang didia ibana dapotsa.\\n35:22 Alai tung sura ndada sian sangkapna hian jala ndada ala musuna hian umbahen ditenju ibana manang ditinggangkon tu ibana manang aha, ndada sian tuntunna hian.\\n35:23 Manang tung sura ditinggangkon batu tu ibana, tau pamunu hian, so botobotoanna, pola mate jolma i, alai ndada musuna hian, jala ndada disangkap hian hamagoanna.\\n35:24 Ingkon luhutan i manguhum jolma pamunui dohot jolma parlulu i, hombar tu angka uhumon.\\n35:25 Ingkon luhutan i paluahon jolma pamunui sian tangan ni jolma parlulu i, ingkon luhutan i manogihon ibana mulak tu huta haporusanna hian; ingkon disi do ibana maringan, paima mate sintua ni malim, naung miniahan marhite sian miak na badia.\\n35:26 Alai tung sura ruar jolma pamunui salpu sian parbalohan ni huta haporusanna hian.\\n35:27 Laos dapot jolma parlulu i ibana di ruar ni parbalohan ni huta haporusanna i, gabe dibunu parlulu i ma halak pamunui, ndang marutang mudar ibana.\\n35:28 Ai ingkon tinggal hian ibana di bagasan huta haporusanna i, paima mate sintua ni malim, alai dung mate sintua ni malim, jadi ma jolma pamunui mulak tu huta partalianna hian.\\n35:29 Luhutna i ingkon gabe patik ni uhum di hamu marsundutsundut di saluhut huta ingananmuna i.\\n35:30 Manang ise na mambunu jolma, ingkon bunuon ma pamunui, dung binege hata ni angka sitindangi; alai anggo holan sada do sitindangi ndang masuk maralus dompak jolma i pola marutang hosa uhumon.\\n35:31 Jala ndang jadi jaloonmuna hepeng partobus ni hosa ni halak sibunu jolma, na marutang hosa hian, ingkon saut do ibana bunuon.\\n35:32 Jala ndang jadi jaloonmuna hepeng partobus sian jolma naung maporus tu huta haporusanna, mangaloas ibana mulak maringan di tanona hian, jumolo sian na mate sintua ni malim i.\\n35:33 Unang tung ramuni hamu tano na niingananmuna i, ai mudar i do paramunhon tano i, jala ndang dapot padengganon tano i, ala ni mudar naung nidurushon disi, nda holan marhite sian mudar ni jolma na mandurushon.\\n35:34 Dibahen i unang ramuni hamu tano na niingananmuna i, pola dohot Ahu maringan di tongatongana; ai Ahu do Jahowa na maringan di tongatonga ni halak Israel.","num_words":849,"character_repetition_ratio":0.074,"word_repetition_ratio":0.019,"special_characters_ratio":0.214,"stopwords_ratio":0.274,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 19 - BIBLE & BUKU ENDE ONLINE\\n19:1 Ia dung sun siap dibahen Jahowa, Debatam angka bangso parbegu, nampuna tano silehonon ni Jahowa, Debatam tu ho, gabe soluhonmu tanonasida i, jala ingananmu hutanasida dohot bagasnasida i:\\n19:2 Ingkon papulihonmu di ho tolu huta di tongatonga ni tanomi, silehonon ni Jahowa, Debatam tu ho bahen partalianmu.\\n19:3 Ingkon parhornoponmu dalanmu tusi, jala bagi tolu bahenonmu parbalohan ni tanomi, silehonon ni Jahowa, Debatam tu ho bahen partalianmu, asa maporus tusi ganup sibunu jolma.\\n19:4 Jala on do patik taringot tu sibunu jolma i, jadi ma maporus tusi asa laos mangolu ibana: Manang ise naung mambunu donganna so pangkirimanna, jala ndada dihosom ibana hian na sai laon.\\n19:5 Songon on rupani, masuk ibana tu tombak rap dohot donganna naeng manaba hau, gabe dialbangkon tangkena naeng manaba hau i nian, hape pinsir mata ni tangke i sian songkirna, gabe hona donganna laos mate, jadi ma ibana maporus tu sada sian angka huta i, asa laos mangolu ibana.\\n19:6 Asa unang dilele parlulu i jolma pamunui, ala mohop ateatena, gabe dapotsa ditangkup ala madaohu dalan i, laos dibunu ibana maon, hape nian ndada patut dope uhum hamatean mangonai tu ibana, ala so dihosom ibana hian na sai laon.\\n19:7 Ala ni umbahen hutonahon tu ho songon on: Ingkon papulihonmu di ho tolu huta.\\n19:8 Jala tung sura lam mangonjar parbalohanmu bahenon ni Jahowa, Debatam, songon naung niuarihonna hian tu angka ompum, jala saut dilehon tu ho sandok tano, naung pinarbagabagana lehononna tu angka ompum.\\n19:9 Molo tung diringkoti ho mangulahon sandok tona on, na hutonahon tu ho sadarion, mangkaholongi Jahowa, Debatam dohot marparange di angka dalanna saleleng ho mangolu, ingkon ambaanmu dope di ho tolunari huta i angkup ni na tolu huta ondeng.\\n19:10 Asa unang tardurus mudar na so marpipot di tongatonga ni tanomi, silehonon ni Jahowa, Debatam tu ho bahen partalian, asa unang marsapata tu ho mudar i.\\n19:11 Alai tung sura naung magigi hian manang ise mida donganna, pola ibana digopgop jala dibajo ibana, jala dibunu ibana pola tos hosana mate, hape sanga ibana maporus tu sada sian angka huta i.\\n19:12 Ingkon suruan ni angka sintua di hutana i suruanna mangalapi ibana sian i, jala pasahatonna ibana tu tangan parlulu, asa mate ibana dibunu.\\n19:13 Ndang jadi moralangalang roham mida ibana, ingkon purpurhononmu do sapata ni mudar na so marpipot sian Israel, asa marhasonangan ho.\\n19:14 Ndang jadi paorotonmu talutuk sian hauma ni donganmu, angka na binahen ni ompu na jolo di bagasan partalianmu, siteanonmu di tano silehonon ni Jahowa, Debatam di ho bahen partalianmu.\\n19:15 Ndang masuk anggo holan sahalak hehe sitindangi mangalo, manang ise taringot tu manang aha hajahaton manang dosa, angka naung binahenna, ingkon tinindangkon ni dua manang tolu halak sitindangi, asa hot hata i.\\n19:16 Tung sura hehe sahalak sitindangi pargapgap mangalo manang ise naeng mangkatindangkon panundalion dompak ibana.\\n19:17 Ingkon jongjong na dua halak i, angka na marparsalisian di adopan ni Jahowa, di adopan ni malim dohot panguhum, angka na mangarajai disi.\\n19:18 Dung i tangkas ma sulingkiton ni angka panguhum hata i, gabe ida ma, andar do sitindangkon gabus do sitindangi i, sipaotooto do nialushonna dompak donganna i.\\n19:19 Jadi ingkon bahenonmuna tu ibana suang songon na sinangkap ni rohana naeng bahenonna tu donganna, asa tung siap bahenonmu hajahaton i sian tongatongamu.\\n19:20 Asa dibege halak na asing pangalahona i, anggiat mabiar nasida, jala unang be didatdati mangulahon hajahaton sisongon i di tongatongamu.\\n19:21 Ndang jadi moralangalang roham mida ibana: Ingkon hosa abul ni hosa, mata abul ni mata, ipon abul ni ipon, tangan abul ni tangan, pat abul ni pat.","num_words":574,"character_repetition_ratio":0.074,"word_repetition_ratio":0.007,"special_characters_ratio":0.211,"stopwords_ratio":0.226,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JEREMIA 44 - BIBLE & BUKU ENDE ONLINE\\n44:1 On do hata naung ro tu si Jeremia taringot tu saluhut halak Jahudi, angka na maringan di tano Misir, angka na maringan di Migdol, di Tahpanhes, di Nop dohot di tano Patros, ninna do:\\n44:2 Songon on do hata ni Jahowa Zebaot, Debata ni Israel: Nunga diida hamu saluhut jea, na huparo tu atas ni Jerusalem dohot tu atas ni saluhut huta di Juda, jala ida ma, laos tarulang do i rasirasa sadarion, jala ndang adong be pangisina nanggo sahalak.\\n44:3 Ala ni hajahaton, angka naung niulanasida i pahehe rimashu, nunga pola laho nasida manutung daupa mangoloi debata sileban, angka na so tinandanasida i, nang nasida, nang ompunasida i.\\n44:4 Jadi husuru do nian tu hamu saluhut naposongku, angka panurirang i, pola sogot ahu hehe marsuru mandok songon on: Ua unang bahen hamu hasogiron sisongon i na huhasomorhon!\\n44:5 Hape ndang ditangihon nasida jala ndang dipaeleng pinggolnasida, asa muba nian rohanasida tumadingkon hajahatonnasida i, unang nian manutung daupa tu angka debata sileban.\\n44:6 Dibahen i use ma rimashu dohot murukku jala marsigorgor dompak angka huta ni Juda dohot dompak angka alaman ni Jerusalem, laos tarulang gabe halongonan rasirasa sadarion.\\n44:7 On pe songon on do hata ni Jahowa, Debata Zebaot, Debata ni Israel: Boasa tung bahenonmuna jea bolon dompak hosamuna sandiri, laos hamu mamansingkon baoa dohot parompuan, dakdanak dohot posoposo di hamu sian tongatonga ni Juda, ndang ditebahon hamu nanggo pasipasina di hamu?\\n44:8 Lam dipahehe hamu rimashu marhitehite jadijadian ni tanganmuna laho manutung daupa tu angka debata sileban di tano Misir, hasahatanmuna i asa maisolat disi, asa tung sun siap hamu jala asa gabe sipulaspulason dohot sirehereheon hamu di tongatonga ni saluhut bangso parbegu di tano on.\\n44:9 Nunga tung lupa hamu huroha di hajahaton ni ompumuna dohot di hajahaton ni angka raja sian Juda dohot di hajahaton ni angka jolmanasida dohot di hajahatonmuna sandiri dohot di hajahaton di jolmamuna, naung binahennasida di tano Juda dohot di angka alaman ni Jerusalem?\\n44:10 Laos so dipaunduk nasida tahe rohanasida i rasirasa sadarion, jala ndang mabiar nasida, jala ndang diparangehon nasida patikku dohot tonangku, angka na hupasahat tu hamu dohot tu ompumuna.\\n44:11 Dibahen i songon on do hata ni Jahowa Zebaot, Debata ni Israel: Ida ma, nunga pola didompakkon bohingku hamu mambahen jea dohot mamansingkon sandok Juda.\\n44:12 Jala tangkuponku ma pasipasi ni Juda, angka na martahi laho tu tano Misir, asa maisolat disi, ingkon siap nasida luhut; ingkon marragean nasida di tano Misir; ingkon siap nasida marhitehite podang dohot haraparon; ingkon mate nasida sian na metmet ro di na magodang marhitehite podang dohot haraparon, ingkon gabe bura nasida, gabe hasonggoton, gabe sipulaspulason dohot gabe sirehereheon.\\n44:13 Ai marlulu ma ahu dompak halak angka na maringan di tano Misir, songon pangaluluingku dompak Jerusalem marhitehite podang, haraparon dohot begu antuk.\\n44:14 Jala ndang tagamon adong na malua manang teba sian pasipasi ni Juda, angka na sahat tu tano Misir, asa maisolat disi, asa mulak nian muse tu tano Juda di rohana, na hinalungunhon ni rohanasida naeng mulak laos maringan disi, alai holan angka na malua do mulak tusi sogot.\\n44:15 Dung i ro ma alus ni saluhut baoa, angka na umboto naung manutung daupa jolmanasida i tu angka debata sileban, dohot saluhut parompuan angka na jongjong marluhutan godang ro di sandok situan na torop angka na maringan di tano Misir, di Patros, mandok tu si Jeremia songon on.\\n44:16 Ia hata naung hinatahonmu tu hami marhitehite goar ni Jahowa, ndang patangitangionnami ho.\\n44:17 Ingkon sai bahenonnami do hombar tu sandok hata naung ruar sian pamangannami; ingkon manutung daupa hami tu raja boruboru di langit dohot mangusehon tuak tangkasan tusi, songon na somal hubahen hami, nang angka ompunami, angka rajanami dohot angka induknami di angka huta ni Juda dohot di angka alaman ni Jerusalem, bosuran ma hami uju i mangan roti, jala marsonangsonang hami, jea pe so huida hami.\\n44:18 Alai olat ni dung mansadi hami manutung daupa tu raja boruboru di langit dohot mangusehon tuak tangkasan tusi, hurangan ma hami di na saluhut, jala siap hami marhitehite podang dohot haraparon.\\n44:19 Angkup ni ia manutung daupa pe hami tu raja boruboru di langit dohot mangusehon tuak tangkasan tusi, tung so parbinoto huroha baoanami hubahen hami angka juada tusi laho mambahen sumansumanna dohot mangusehon tuak tangkasan tusi?\\n44:20 Jadi ninna si Jeremia ma tu sandok situan na torop i, tu angka baoa dohot tu angka parompuan, tung tu sandok bangso i, angka na maralus tu ibana, songon on:\\n44:21 Nda tongon do nian nunga diingot Jahowa daupa na tinutungmuna i di angka huta ni Juda dohot di angka alaman ni Jerusalem, nang hamu, nang ompumuna, angka rajamuna dohot indukmuna dohot situan na torop na di tano i, jala nunga tutu diparateatehon?\\n44:22 Jadi ndang be hatiopan Jahowa rohana mida hinaroa ni pambahenanmuna, mida hasogiron angka na niulamuna: Laos alani gabe halongonan tanomuna i, gabe tarulang, gabe sipulaspulason, so adong be pangisina nanggo sahalak songon na andar sadarion.\\n44:23 Ala na manutung daupa i hamu jala na mardosai hamu dompak Jahowa, jala ndang ditangihon hamu soara ni Jahowa, jala ndang diparangehon hamu patikna dohot angka uhumna dohot panindangionna, ala ni do tutu umbahen mangonai tu hamu jea on, songon na andar sadarion.\\n44:24 Dung i ro muse hata ni si Jeremia mandok tu sandok situan na torop i dohot tu saluhut parompuan: Tangihon ma hata ni Jahowa sude hamu ale halak Jahudi, angka na di tano Misir!\\n44:25 Songon on do hata ni Jahowa Zebaot, Debata ni Israel: Hamu dohot jolmamuna, pamanganmuna sandiri tahe mangkatahon laos tanganmuna mangulahon songon on: Ingkon sai patolhasonnami do bagabaganami, angka naung hubagabagahon hami, ingkon manutung daupa tu raja boruboru di langit i dohot mangusehon tuak tangkasan tusi! — Datdati hamu ma mangkajongjongkon bagabagamuna i dohot patolhashon bagabagamuna!\\n44:26 Dibahen i tangihon ma hata ni Jahowa, sude hamu ale halak Jahudi, angka na maringan di tano Misir! Ida ma, nunga pola marmangmang ahu tu goarhu na timbul i, ninna Jahowa: Na so tupa be jouon goarhu marhite sian pamangan ni manang ise sian halak Jahudi di sandok tano Misir, manang dohononna: Songon sintongna mangolu Tuhan Jahowa!\\n44:27 Ida ma, dungo ma ahu taringot tu nasida mambahen hamagoan, ndada mambahen na denggan, ingkon mate saluhut baoa sian Juda, angka na di tano Misir, marhitehite podang dohot haraparon, paima sun siap nasida.\\n44:28 Ia adong pe angka na malua sian podang, mulak sian tano Misir tu tano Juda, otik do bilanganna, jadi tandaon ni sandok pasipasi ni Juda ma, angka na sahat tu tano Misir naeng maisolat nian disi, manang hata ni ise na tulus manang hatangku manang hatanasida.\\n44:29 Jala on do partinandaan di hamu, ninna Jahowa, paboa marlulu ahu dompak hamu di inganan on, asa tung mananda hamu naung sintong songgop hatangki bahen hamagoanmuna.\\n44:30 Songon on do hata ni Jahowa: Ida ma, ahu sandiri pasahathon Firaun Hopara, raja sian Misir, tu tangan ni angka musuna dohot tu tangan ni angka na tumahi hosana, songon naung hupasahat si Sedekia, raja sian Juda, tu tangan ni si Nebukadnesar, raja sian Babel, musuna i, na tumahi hosana.","num_words":1142,"character_repetition_ratio":0.069,"word_repetition_ratio":0.016,"special_characters_ratio":0.203,"stopwords_ratio":0.335,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Jesaya 32 | Alkitab TOBA\\n← Jesaya 33\\nJesaya 31 →\\n32:1 Ida ma, hombar tu hatigoran do Rajai mangarajai sogot, jala hombar tu uhum angka induk manggomgomi.\\n32:2 Jadi marhaporusan tu ibana ganup jolma maradophon alogo, jala marpanisioan maradophon ari, tudoshon sunge di halongonan, tudoshon parlinggoman ni dolok batu bolon di tano na marsilopak.\\n32:3 Jala ndang mamereng dompak pudi mata ni jolma na marnida, jala pinggol ni jolma na marbinege manangihon disi.\\n32:4 Jala roha ni jolma na bodo marpanimbangon jala tiar marpangkuling dila ni jolma angka na hapot hian.\\n32:5 Ndang be targoar raja halak na oto i, manang targoar namoranami halak parjahat i.\\n32:6 Ai mangkatahon haotoon do halak na oto i, jala marsangkap hajahaton do rohana laho mangulahon haramunon, jala mandok poda haliluon dompak Jahowa asa mangarapari roha ni jolma na male, jala mangarampas siinumon ni na mauas.\\n32:7 Jala marparulaonna jahat do halak parjahat i sai angkal ditahi roha laho mangago halak na tarjepol marhitehite hata gabus, nang pe hata uhum didok na pogos.\\n32:8 Alai anggo halak parlidang i, angka halidangon do ditahi rohana, jala marsihohot ibana mangulahon angka halidangon.\\n32:9 Hamu inaina angka na marpangatauan, hehe ma hamu tumangihon soarangki! Hamu boruboru angka na nalom roha, tangihon hamu ma hatangkon!\\n32:10 Di laonlaon ni ari angka dotdot ma hamu angka na nalom roha i, ai nunga sun pamutihon di parbue ni hau anggur, ndang ro be gotilon ni parbue ni hau.\\n32:11 Angka hitir ma hamu inaina angka na marpangatauan, angka dotdot ma hamu angka na nalom roha! Ai nunga tanggal pangkeanmu, marsaemara hamu jala marabit tangki gontingmuna.\\n32:12 Masitompuk andorana be nasida, ala ni hauma hasoloan, ala ni porlak anggur na marparbue.\\n32:13 Tubu do di hauma ni bangsongku angka sihupi, tongon tahe nang di atas ni sude bagas hariburon ni huta na ribur i.\\n32:14 Ala naung tarulang bagas bolon, jala naung mansohot hariburon ni huta i, batarbatar jala parhalan gabe liang salelenglelengna, lomolomo ni angka binatang, panjampalan ni angka dorbia.\\n32:15 Paima diusehon tu hita Tondi sian ginjang, jala manjadi tano bosar halongonan hian, alai anggo tano bosar hian gabe tombak dirajum.\\n32:16 Jadi disi ma nian uhum di halongonan, jala marhabangsa hatigoran di tano bosar.\\n32:17 Jadi hadameon ma upa ni hatigoran, jala pangkorhon ni hatigoran hademakon dohot hasonangan salelenglelengna.\\n32:18 Jadi mian ma bangsongku di bagasan undungundung hadameon dohot di bagasan angka bagas nalom ni roha dohot di pangulonan hasonangan.\\n32:19 Alai ro ma ambolas di halelengse ni tombak, jala marhajimputan situtu huta i laho pesan.\\n32:20 Martua ma anggo hamu angka na manabur di lambung ni saluhut batang aek, angka na patula pat ni jonggi dohot halode.","num_words":416,"character_repetition_ratio":0.055,"word_repetition_ratio":0.0,"special_characters_ratio":0.216,"stopwords_ratio":0.298,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JEREMIA 52 - BIBLE & BUKU ENDE ONLINE\\n52:1 Marumur duapulu sada taon si Sedekia di na bangkit raja ibana, jala sampulu sada taon lelengna ibana mangarajai di Jerusalem jala goar ni inana do Nai Humuntal, boru ni si Jeremia sian Libna.\\n52:2 Jala diulahon ibana do sogo ni roha ni Jahowa, sandok songon na binahen ni si Joiakim na jolo.\\n52:3 Ai masa pe i ala ni rimas ni Jahowa do mida Jerusalem dohot mida Juda, pola nasida dipabali sian adopan ni bohina. Jadi manggunturi ma si Sedekia dompak raja sian Babel.\\n52:4 Alai tole pasiataonhon hinarajaonna i, di bulan sipaha sampulu di ari pasampuluhon, ro ma si Nebukadnesar, raja sian Babel, ibana dohot sandok paranganna mandopang Jerusalem, laos ditungkum huta i jala dibahen partanobatoan humaliang.\\n52:5 Jadi lam tarsosak ma huta i sahat ro di pasampulusada taonhon hinarajahon ni raja Sedekia.\\n52:6 Tole muse paopatbulanhon di ari sia marpotirpotir ma haleon di bagasan huta i, jala ndang adong be sipanganon tu situan na torop isi ni luat i.\\n52:7 Dung i dibongoti ma huta i, jadi maporus ma sude halak sialo musu jala ruar sian huta i bornginna i mangihutihut dalan laho tu bahal di holangholang ni na dua parik hombarhon porlak ni rajai; alai humaliang huta i do anggo halak Kasdim, jadi diihuthon nasida ma dalan laho tu adaran.\\n52:8 Dung i dieak parangan ni halak Kasdim ma rajai sian puji, jala dapot nasida ma si Sedekia di adaran Jeriko ianggo sandok paranganna nunga mampar sian lambungna.\\n52:9 Jadi ditangkup nasida ma rajai jala diboan ibana nangkok tu jolo ni raja sian Babel, tu Ribla di tano Hamat, laos didabu uhumna tu ibana disi.\\n52:10 Dung i diseati raja sian Babel ma angka anak ni si Sedekia di adopan ni matana ro di saluhut induk ni Juda diseati di Ribla.\\n52:11 Dung i dipitungi ma ia mata ni si Sedekia, jala dirante ibana dohot dua rante tombaga; jala didokkon raja sian Babel boanon ibana tu Babel, jala dipasahat ibana tu bagas hurungan sahat ro di ari hamamatena.\\n52:12 Tole muse pasampulu arihon di bulan sipaha lima, i ma pasampulu sia taonhon hinarajahon ni raja Nebukadnesar raja sian Babel, ro ma tu Jerusalem si Nebusaradan, induk ni angka parangan, na jongjong di jolo ni raja sian Babel.\\n52:13 Jala disurbu joro ni Jahowa dohot bagas ni rajai ro di luhut bagas di Jerusalem, jala saluhut bagas angka na bolon disurbu dohot api.\\n52:14 Saluhut parik humaliang Jerusalem pe dilohai sandok parangan ni halak Kasdim do angka na rap dohot induk ni parangan i.\\n52:15 Ianggo deba sian halak na pogos di bangso i dohot pasipasi ni bangso i, angka na tading di huta i dohot angka na bali tu raja sian Babel ro di pasipasi ni angka pande, tarbuang do diboan si Nebusaradan, induk ni angka parangan i.\\n52:16 Alai anggo deba sian halak na pogos isi ni tano i, tinggal do dibahen si Nebusaradan, induk ni angka parangan i, bahen angka tukang porlak anggur dohot bahen angka parumauma.\\n52:17 Alai anggo tiang tombaga, angka na di joro ni Jahowa dohot angka hundulan ro di tobat haksa na di joro ni Jahowa, diponggolhon halak Kasdim do jala diboan saluhut tombaga i tu Babel.\\n52:18 Tole angka hudon dohot angka siuksiuk, angka raut dohot saoan, angka balanga dohot sandok ulaula tombaga, angka na pinangkena marulaon na badia, dibuat nasida do.\\n52:19 Diboan induk ni angka parangan i do huhut angka mangkuk dohot angka parapiapian, angka saoan dohot angka hudon, angka parpalitoan dohot angka balanga ro di angka pinggan pasu, angka na sian sere manang sian perak.\\n52:20 Tole tiang na dua i tobat sisadasada i ro di lombu tombagana sampulu dua i, angka ondolanna di toru, angka na pinauli ni raja Salomo tu joro ni Jahowa, tung na so tardasing do tombaga ni saluhut angka ulaula i dibahen godangna.\\n52:21 Ia angka tiang i sampulu ualu asta timbona sadasada, jala sampulu dua asta lilitna humaliang, jala hapalna opat jari do, ai marruang do.\\n52:22 Jala tombaga do uluna di ginjang jala lima asta do timbo ni uluna sadasada, jala marrungkung jala mardalimo uluna humaliang, luhutna i tombaga do. Laos songon i do tiang paduahon i dohot angka dalimona.\\n52:23 Alai siapulu onom do torop ni dalimo i tungkan desa na opat i saluhut angka dalimo i saratus do di rungkungna i humaliang.\\n52:24 Dung i dibuat induk ni angka parangan i ma sintua ni malim Seraia dohot si Sepania, malim paidua dohot na tolu halak sijaga bahal.\\n52:25 Sian huta pe dibuat do sada halak parhalado na parentahon halak sialo musu dohot pitu halak sian angka na marhalado di jolo ni rajai angka na jumpang di bagasan huta i dohot juaratulis i, induk ni angka parangan, na manurati goar ni bangso isi ni tano i bahen parangan, angkup ni onompulu halak sian bangso isi ni tano i, angka na jumpang di tongatonga ni huta i.\\n52:26 I ma angka na binuat ni si Nebusaradan, induk ni angka parangan i, manogihon nasida tu Ribla tu jolo ni raja sian Babel.\\n52:27 Dung i dibunu raja sian Babel ma nasida, gabe mate nasida di Ribla, di tano Hamat. Jadi tarboan ma halak Juda sian tanona tu habuangan.\\n52:28 On ma bilangan ni bangso na binuangkon ni si Nebukadnesar: Papitu taonhon hinarajaonna i tolu ribu duapulu tolu halak Jahudi.\\n52:29 Pasampulu ualu taonhon hinarajahon ni si Nebukadnesar sian Jerusalem: Ualu ratus tolupulu dua halak.\\n52:30 Paduapulu tolu taonhon hinarajahon ni si Nebukadnesar dibuangkon si Nebusaradan, induk ni angka parangan i: Pitu ratus opatpulu lima halak Jahudi. Opat ribu onom ratus do bilangan ni halak saluhutna.\\n52:31 Tole muse patolupulu pitu taonhon, dung tarbuang si Joiakin, raja sian Juda, paduapulu lima arihon, bulan hurung, dipabangkit Epilmerodak, raja sian Babel ma, di taon hababangkitna i gabe raja, ulu ni si Joiakin, raja sian Juda, jala diparuar ibana sian bagas hurungan.\\n52:32 Jala basar do hata ni rajai tu ibana, jala huminsat habangsana dibahen sian habangsa ni raja angka donganna i di Babel.\\n52:33 Disalin huhut pangkeanna hian di hurungan, jala mangan sagusagu di jolo ni rajai ibana tongtong saleleng mangolu.\\n52:34 Jala balanjona raja sian Babel i do pasingkophon tongtong ariari saleleng mangolu ibana sahat ro di ari hamamatena.","num_words":998,"character_repetition_ratio":0.082,"word_repetition_ratio":0.0,"special_characters_ratio":0.216,"stopwords_ratio":0.372,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Josua 20 | Alkitab TOBA\\n← Josua 21\\nJosua 19 →\\n20:1 Dung i martona ma Jahowa tu si Josua, ninna ma:\\n20:2 Paboa ma tu halak Israel songon on: Papulik hamu ma di hamu huta haporusan, angka na hutonahon i hian tu si Musa.\\n20:3 Asa tusi maporus manang ise sibunu jolma so pangkirimanna, so botobotoanna, angka huta i bahen haporusan maradophon jolma parlulu.\\n20:4 Molo sanga maporus jolma i tu sada sian angka huta i, ingkon jongjong ibana di haroroan tu bahal ni huta i mangalualuhon hatana, tu pinggol ni angka sintua ni huta i, jala ingkon jangkononnasida ibana tu huta i dohot mangalehon ingananna di lambungnasida.\\n20:5 Molo tung dilotongi parlulu i ibana sian pudi, na so tupa pasahatonnasida jolma pamunui tu bagasan tanganna, ala so botobotoanna umbahen dibunu donganna, jala ndang marsunisunian hian nasailaon tu ibana.\\n20:6 Ingkon maringan ibana di huta i paima sanga ibana jongjong di jolo ni rapot paruhuman. Ia dung mate sintua ni malim uju i, jadi ma mulak jolma pamunui tu hutana dohot tu bagasna, tu huta tinadingkonna i laho lintun.\\n20:7 Jadi diuras nasida ma Kedes di Galilea, di dolok Naptali dohot Sikem di dolok Epraim dohot Kiryat-Arba, i ma Hebron di dolok Juda.\\n20:8 Ia di bariba ni Jordan, tungkan habinsaran sian Jeriko, dipapulik nasida ma Bezer di halongonan, di tano pea ni marga Ruben, dohot Ramot di Gilead sian marga Gad dohot Golan di Basan sian marga Manasse.\\n20:9 I ma huta angka na pinapulik di sandok halak Israel dohot di halak dagang, angka na maisolat di tongatonganasida, asa maporus tusi ganup sibunu jolma so pangkirimanna, asa unang mate ibana dibunu parlulu, paima sanga ibana jongjong di jolo ni rapot paruhuman.","num_words":269,"character_repetition_ratio":0.049,"word_repetition_ratio":0.0,"special_characters_ratio":0.217,"stopwords_ratio":0.349,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II MUSA 9 - BIBLE & BUKU ENDE ONLINE\\n9:1 Dung i ninna Jahowa ma tu si Musa: Laho ma ho tumopot Firaun jala dok ma tu ibana: Songon on do tona ni Jahowa, Debata ni halak Heber: Loas ma bangsongku laho, asa disomba nasida Ahu.\\n9:2 Ai molo manjua ho mangaloas nasida laho, sai gogo bahenonmu maniopi nasida.\\n9:3 Ida ma, mangonai ma tangan ni Jahowa tu pinahanmu na di ladang tu angka hoda, halode, unto, lombu dohot tu angka birubiru, hona bondil na rahat situtu.\\n9:4 Jala marhasurungan pamelok ni Jahowa di pinahan ni halak Israel sian pinahan ni halak Misir, ndang adong mate sian sandok pinahan ni halak Israel, nanggo sada.\\n9:5 Dung i dibuhul Jahowa ma tingkina, marsogot ma, ninna bahenon ni Jahowa na nidokna ondeng tu tano i.\\n9:6 Jadi marsogotna i dibahen Jahowa ma songon i: Marragean ma sandok pinahan ni halak Misir, alai sian pinahan ni halak Israel, ndang adong mate nanggo sada.\\n9:7 Jadi disuru Firaun ma maningkir, jala ida ma, ndang adong mate sian pinahan ni Israel, nanggo sada. Alai laos tangkang anggo roha ni Firaun, jala ndang diloas laho bangso i.\\n9:8 Dung i ninna Jahowa ma tu si Musa dohot tu si Aron: Gomaki hamu ma sirabun sian tataring, gok tanganmuna, jala disampakkon si Musa ma i dompak langit di jolo ni Firaun.\\n9:9 Asa gabe orbuk do i tu sandok tano Misir, jala songgop tu jolma dohot tu pinahan, gabe baro na mapultak, gabe ngenge na birong di sandok tano Misir.\\n9:10 Jadi digomahi nasida ma sirabun sian tataring, jala didapothon tu jolo ni Firaun, gabe disampakkon si Musa ma i dompak langit, manjadi baro ma i, ngenge na birong angka na mapultak di jolma dohot di pinahan.\\n9:11 Jadi ndang tarbahen angka parsibalik mata jongjong di jolo ni si Musa, dibahen angka baro i, ai baro on do nang angka parsibalik mata dohot sude halak Misir.\\n9:12 Alai dipatangkang Jahowa do anggo roha ni Firaun; jadi ndang ditangihon hatanasida, songon na nidok ni Jahowa hian tu si Musa.\\n9:13 Dung i ninna Jahowa ma tu si Musa: Pasogot ma manogot mandapothon tu jolo ni Firaun, jala dok ma tu ibana: Songon on do tona ni Jahowa, Debata ni halak Heber: Loas ma bangsongku laho, asa disomba nasida Ahu.\\n9:14 Ai anggo sahali on tongosonku ma saluhut torutorungku tu roham dohot tu angka naposom dohot tu bangsom, asa tung ditanda ho, na so adong songon Ahu on di sandok tano on.\\n9:15 Ai patoltolonku ma nuaeng tanganku jala honahononku ma tu ho dohot tu bangsom begu antuk, asa tung siap ho sian tano on.\\n9:16 Ala ni do antong umbahen na hupatindang ho, asa hupataridahon tu ho gogongku, jala asa tung tarbarita Goarhu di liat portibi on.\\n9:17 Sai datdatanmu dope mangalo bangsongki, ndang loasonmu nasida laho?\\n9:18 Ida ma, marsogot songon on paroonku ma udan ambolas na por situtu, na so dung masa songon i di tano Misir, olat ni ari haoojakna rasirasa nuaeng.\\n9:19 On pe suru ma papunguhon pinahanmu ro di sude ugasanmu na di ladang; nasa jolma dohot pinahan na jumpang di ladang, so pinapungu tu jabu, ia dapot ditinggang ambolas i nasida, rage ma i.\\n9:20 Manang ise sian angka naposo ni Firaun na mabiar mida hata ni Jahowa diluahon ma angka naposona dohot pinahanna tu jabu.\\n9:21 Alai manang ise na so marateatehon hata ni Jahowa, dipasombu ma angka naposona dohot pinahanna di ladang.\\n9:22 Dung i ninna Jahowa ma tu si Musa: Patoltol ma tanganmu dompak langit, asa ro udan ambolas tu sandok tano Misir, hona jolma dohot pinahan ro di nasa suansuanan di tano Misir.\\n9:23 Jadi dipatoltol si Musa ma tungkotna dompak langit, gabe diparo Jahowa ma ronggur dohot udan ambolas, sumiksaksiksak huhut hilap tu tano on. Jadi diparo Jahowa ma udan ambolas tu tano Misir.\\n9:24 Alai ro udan ambolas mardongan api na marhimpalhimpal di tonga ni ambolas i, na por situtu, ndang dung songon i masa di sandok tano Misir, olat ni dung gabe bangso Misir i.\\n9:25 Jadi ditinggang udan ambolas i ma sandok na di ladang di sandok tano Misir, sian jolma ro di pinahan ro di nasa suansuanan di ladang ditinggang udan ambolas i jala digashon ma sude hau di ladang.\\n9:26 Holan di tano Gosen, na niinganan ni halak Israel, ndang masa udan ambolas.\\n9:27 Dung i disuru Firaun ma manjou si Musa dohot si Aron, jala didok tu nasida: Nunga mardosa ahu anggo sahali on; na tigor do Jahowa, alai anggo ahu dohot bangsongki halak parjahat do.\\n9:28 Martangiang ma hamu tu Jahowa, nunga sae masa angka soara ronggur ni Debata dohot udan ambolas i, huloas pe hamu laho, asa unang be hamu tinggal dison.\\n9:29 Jadi didok si Musa ma tu ibana: Disi ruar ahu sian huta i, paherbangonku ma tanganku dompak Jahowa; mansohot ma angka soara ronggur, jala ndang be ro udan ambolas, asa tung ditanda ho, gok di Jahowa do tano on.\\n9:30 Alai anggo ho dohot angka naposom, huboto hian do na so mabiar hamu maradophon Debata Jahowa.\\n9:31 Ianggo hori dohot eme dapotsa ditinggang, ai boltok do ia eme, bibi ia hori.\\n9:32 Alai anggo singkoru eme dohot hadio ndang ditinggang, ai umpudi do i.\\n9:33 Dung i ruar ma si Musa sian lambung ni Firaun tu balian huta, jala dipaherbang tanganna dompak Jahowa, jadi mansohot ma angka soara ni ronggur dohot ambolas, udan i pe ndang be use tu tano i.\\n9:34 Alai dung diida Firaun naung mansohot udan dohot ambolas dohot angka soara ni ronggur dipatangkang rohana, ibana nang naposona.\\n9:35 Jadi laos tangkang roha ni Firaun, jala ndang diloas laho halak Israel songon na nidok ni Jahowa hian marhitehite si Musa.","num_words":909,"character_repetition_ratio":0.067,"word_repetition_ratio":0.036,"special_characters_ratio":0.226,"stopwords_ratio":0.331,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I Musa 6 | Alkitab TOBA\\n← I Musa 7\\nI Musa 5 →\\nAugust 21, 2008 · 14:33\\n6:1 Jadi dung mamungka lam torop jolma i di tano on, jala tubuan boru nasida.\\n6:2 Diririt angka anak ni Debata ma boru ni jolma, ala na uli do nasida, jala dibuat bahen jolmanasida guru pamillitnasida.\\n6:3 Jadi ninna Jahowa ma: Ndang be uhum on ni Tondingku jolma i di haliluonnasida, ai roha daging do ibana, jala saratus duapulu taon na ma umurna.\\n6:4 Adong ma uju i angka Nepilim (pandobo) di tano on. Ai dung ditopot angka anak ni Debata angka boru ni jolma, adong ma huhut tubunasida, i ma angka na begu, angka baoa na tarbarita sian na robi.\\n6:5 Alai dung diida Jahowa, nunga lam deak hajahaton ni jolma di tano on, jala sai na jat na ma sude tubutubu dohot pingkiran ni rohanasida gonop ari.\\n6:6 Jadi disolsoli Jahowa ma rohana, ala tinompana i jolma di tano on, jala lungun rohana.\\n6:7 Dung i ninna Jahowa ma: Ripashononku ma sian tano on jolma na hutompa i, ro di pinahan dohot na manjirir, ro di pidong angka na martongatonga langit, ai nunga husolsoli bagingku ala na hutompa i nasida.\\n6:8 Alai asi do roha ni Jahowa ianggo marnida si Noak.\\n6:9 On ma pinompar ni si Noak: Jolma na bonar jala na daulat roha do si Noak i maradophon donganna magodang, sai marparange mardonganhon Debata do si Noak i.\\n6:10 Dung i ditubuhon si Noak ma anak tolu, si Sem, si Ham dohot si Japet.\\n6:11 Alai nunga marjea ianggo tano i maradophon Debata, jala nunga gok hajahaton tano i.\\n6:12 Dung i ditingkir Debata ma tano i, jala ida ma, nunga marjea: Ai tung saluhut na mardaging paroa pangalahona di tano i.\\n6:13 Jadi ninna Debata ma tu si Noak: Nunga ro ajal ni nasa na mardaging maradophon Ahu, ai nunga gok hajahaton tano on dibahen nasida. Onpe ripashononku ma nasida rap dohot tano on.\\n6:14 Bahen ma di ho sada parau sian hau goper (marantibane), bahen ma marbilut parau i jala puli sian bagasan dohot sian balian.\\n6:15 Songon on ma singana bahenonmu: Tolu ratus elak unjur ni parau i, limapulu elak bohangna, jala tolupulu elak timbona.\\n6:16 Bahen tartungkan ginjang sada pandiloan ni parau i, saelak timbona: Alai anggo pintu ni parau i tu lambungna bahen, jala tolu lampis bilutna bahen, sada di toru, sada di tongatonga, jala sada di ginjang.\\n6:17 Ai ida, paroonku ma tu tano on aek na sumar laho mangaripashon nasa na mardaging, na marhosa hangoluan di bagasan, angka na di toru ni langit, asa tos hosa ni saluhut na di tano on.\\n6:18 Alai pajongjongonku ma padanhu dohot ho, bongotanmu ma parau i, ho dohot angka anakmu dohot jolmam dohot jolma ni angka anakmi rap dohot ho.\\n6:19 Jala pamasuk ma tu bagasan parau i sapasang be sian nasa na mangolu, sian nasa na mardaging, tunggal dohot boruboru, asa mangolu rap dohot ho.\\n6:20 Sian pidong masiboan mansamna, sian pinahan pe masiboan mansamna, sian nasa na manjirir di tano i, masiboan mansamna; sapasang be sian luhutna ro tu ho, asa mangolu.\\n6:21 Alai buat di ho sian nasa sipanganon, angka na tarpangan, jala papungu tu ho bahen bohalmu dohot bohalnasida.\\n6:22 Dung i dibahen si Noak ma sude, songon na tinonahon ni Debata tu ibana, songon i dibahen.","num_words":527,"character_repetition_ratio":0.057,"word_repetition_ratio":0.0,"special_characters_ratio":0.238,"stopwords_ratio":0.347,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"HESEKIEL 45 - BIBLE & BUKU ENDE ONLINE\\n45:1 Dung i molo disagi hamu tano i marpartalian, ingkon papulihonmuna do pelean tatingan sada di Jahowa, sapartalian tano na badia, unjurna duapulu lima ribu asta, jala bohangna sampulu ribu asta, habadiaon do i di sandok parbolatanna humaliang.\\n45:2 Ingkon masuk sian i tu inganan na badia i limaratus asta be unjurna dohot bolangna maropatsuhi tuk humaliang; angkup ni ingkon limapulu asta alamanna di ruar tuk humaliang.\\n45:3 Jala mangihuthon ungkuran i suhatanmu muse duapulu lima ribu asta jala bohangna sampulu ribu asta, ingkon di parsitongaanna do inganan na badia i, i ma inganan na songkal sahali.\\n45:4 I ma apala habadiaon di tano i, ingkon i ma partalian ni angka malim, angka na marhalado di bagasan inganan na badia i, angka na jumonok marhalado di Jahowa, i ma bahen hajongjongan ni angka bagas di nasida; jala tano na badia do humaliang inganan na badia i.\\n45:5 Jala duapulu lima ribu asta unjur jala sampulu ribu asta bohang, ingkon lehonon tu halak Lepi angka parhalado di bagasan joro i bahen partalian di nasida, duapulu bilut.\\n45:6 Jala partalian ni huta ingkon lehononmuna do lima ribu asta bohangna jala duapulu lima ribu asta unjurna patampaktampak dohot pelean tatingan na badia i: I ma di sandok pinompar ni Israel.\\n45:7 Ianggo tu induk i: Sian baribaon dohot sian bariba i ni pelean tatingan na badia i dohot sian partalian ni huta i di jolo ni pelean tatingan na badia i dohot di jolo ni partalian ni huta i tungkan hasundutan dohot tungkan habinsaran, jala unjurna patampaktampak sada sian angka partalian sian partalpahanna hasundutan sahat ro di partalpahan habinsaran.\\n45:8 Ingkon gabe tanona sandiri do i bahen partalian di tongatonga ni Israel, asa unang be rupaon ni angka indukhu bangsongki, ingkon lehononnasida do tano i tu pinompar ni Israel mangihuthon margana be.\\n45:9 Songon on do hata ni Tuhan Jahowa: Tung na torbang do hamu, ale angka induk ni Israel! Paholang hamu ma pangarupaon dohot hamagoan, jala ulahon hamu ma uhum dohot hatigoran! Pasohot hamu ma panosakmuna mangonjaronjar bangsongku sian partalianna, ninna Tuhan Jahowa!\\n45:10 Ingkon masa di hamu timbangan na sintong dohot ampang na sintong dohot poting na sintong.\\n45:11 Ianggo ampang dohot poting, ingkon dos tu tulukna, asa saparsampulu ni sada tuhukan do sada poting, jala saparsampulu tuhukan do sada ampang ingkon tuhukan do panuluhanna.\\n45:12 Alai anggo sada mas, ingkon duapulu ringgit do. Duapulu mas dohot duapulu lima mas dohot sampulu lima mas ingkon sada tail di hamu.\\n45:13 On do pelean tatingan siguguanmuna i: Saparonom ni sada ampang sian sada tuhukan dahanon, jala saparonom ni sada ampang sian sada tuhukan eme.\\n45:14 Ia aturan ni miak, ingkon marpoting do boanonna, sada poting, pasampuluhon sian sada pingkul, asa sampulu poting gabe sada tuhukan, ai sampulu poting do tongon sada tuhukan.\\n45:15 Jala sada anak ni birubiru sian duaratus birubiru sian tano ni Israel na tangkas di aek bahen pelean sipanganon, pelean situtungon dohot pelean hamauliateon, bahen pardengganan di nasida, ninna Tuhan Jahowa.\\n45:16 Ingkon sandok bangso ni tano i margugu tu pelean tatingan i di induk ni Israel.\\n45:17 Ingkon radotan ni induk i do antong angka pelean situtungon, pelean sipanganon dohot pelean siinumon di angka ari raya, di angka poltak ni bulan, di angka ari Sabbat pe ro di sandok ari raya bolon di pinompar ni Israel; ingkon ibana patupahon pelean pardosaon, pelean sipanganon, pelean situtungon dohot angka pelean hamauliateon bahen pardengganan di pinompar ni Israel.\\n45:18 Songon on do hata ni Tuhan Jahowa: Di artia di bulan sipaha sada ingkon buatonmu ma anak ni lombu sada na sa martihas, asa urasonmu inganan na badia i.\\n45:19 Jala ingkon buaton ni malim do deba sian mudar ni pelean pardosaon i, jala pistikkononna tu angka tiang ni joro i dohot tu na opat suhi ni langgatan na martagahambing dohot tu tiang ni pintu ni alaman parbagasan i.\\n45:20 Suang songon i ingkon bahenonmu papituarihon di bulan i manguras baoa na lilu manang na tarpaoto mambahen pardengganan di joro i.\\n45:21 Pasampuluopatarihon di bulan sipaha sada, ingkon masa di hamu Paska, ari raya sipitu ari padodot, ingkon sagusagu na so niasoman panganon disi.\\n45:22 Ingkon patupaon ni induk i di ari na sasada i anak ni lombu sada bahen pelean pardosaon humongkop ibana sandiri dohot humongkop bangso ni tano i.\\n45:23 Di na pitu ari raya i pe ingkon patupaonna ganup ari bahen pelean situtungon di Jahowa pitu anak ni lombu dohot pitu birubiru tunggal, angka na so martihas, huhut sada hambing tunggal bahen pelean pardosaon ganup ari.\\n45:24 Ingkon patupaonna huhut bahen pelean sipanganon, sada ampang dongan ni anak ni lombu sada, jala sada ampang dongan ni birubiru tunggal sada, jala miak sada bale dongan ni ampang sada.\\n45:25 Pasampululimaarihon di bulan sipaha pitu ingkon patupaonna suang songon i di ari raya pitu ari padodot, songon i pelean pardosaon, tole pelean situtungon, tole muse pelean sipanganon, songon i nang miahi.","num_words":790,"character_repetition_ratio":0.071,"word_repetition_ratio":0.0,"special_characters_ratio":0.205,"stopwords_ratio":0.311,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"1 TESSALONIKA 3 - BIBLE & BUKU ENDE ONLINE\\n3:1 Ala na so tartaon hami be siholnami, denggan do di rohanami, holan hami ma jolo tading di huta Aten.\\n3:2 Gabe husuru hami ma si Timoteus, angginami jala naposo ni Debata, mangkobasihon barita na uli na sian Kristus, asa dipatogu rohamuna jala dipodai hamu marhaporseaon;\\n3:3 asa unang diunggilhon angka haporsuhon i na deba sian hamu; ai diboto hamu do, tusi do hita dipadiri.\\n3:4 Ai di tongatongamuna dope hami, nunga hulumbahon hami hian tu hamu, na naeng masa angka haporsuhon tu hita, songon naung masa tutu patar di jolomuna.\\n3:5 Dibahen i ndang tartaon ahu be, gabe husuru na manangkasi haporseaonmuna, atik beha naung diunjuni sipangunjuni i hamu, gabe magopo maon na huhalojahon hami.\\n3:6 Alai dung mulak si Timoteus tu hami sian hamu, denggan do dibaritahon tu hami haporseaonmuna dohot holong ni rohamuna angkup ni i dibaritahon do burjumuna marningot hami dohot sihol ni rohamuna, naeng idaonmuna hami, songon hami na masihol di hamu.\\n3:7 Disi ma tarapul hami marningot hamu, ale angka dongan, dibahen haporseaonmuna, nang pe didondoni ragam ni hagogotan dohot haporsuhon hami.\\n3:8 Ai na mangolu ma hami nuaeng, anggo hot hamu jongjong marojahan di Tuhan i.\\n3:9 Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu?\\n3:10 Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna.\\n3:11 Alai Debata Amanta sandiri dohot Tuhanta Jesus ma pabulushon langkanami tu hamu!\\n3:12 Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu!\\n3:13 Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiana.\\nLabel: 1 TESSALONIKA, Alkitab Bahasa Batak, Padan Na Imbaru","num_words":297,"character_repetition_ratio":0.058,"word_repetition_ratio":0.0,"special_characters_ratio":0.208,"stopwords_ratio":0.323,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"II KRONIKA 8 - BIBLE & BUKU ENDE ONLINE\\n8:1 Jadi dung salpu na duapulu taon lelengna raja Salomo paulihon joro ni Jahowa dohot bagasna sandiri.\\n8:2 Dipagonting si Salomo huhut huta angka na pinaulak ni si Hiram tu si Salomo, jala disagihon halak Israel maringan disi.\\n8:3 Dung i borhat ma si Salomo tu Hamat-Zoba jala dipapatu do i.\\n8:4 Dung i dipagonting ibana ma huta Tamar di halongonan, ro di sude huta parpeopan arta, angka na pinagontingna di Hamat.\\n8:5 Dipagonting muse Bethoron julu dohot Bethoron jae, asa gabe huta na gonting situtu, marparik, marpargumbangan dohot marransangransang.\\n8:6 Tole muse Baalat dohot sude huta parpeopan arta, angka na di si Salomo, ro di sude huta inganan ni hureta porang dohot sude huta inganan ni jolma parsihundul dohot nasa esehesek ni si Salomo, na hinalomohon ni rohana naeng paulionna di Jerusalem, di Libanon dohot di sandok tano ginomgomanna i.\\n8:7 Anggo saluhut halak situan na torop i na tinggal sian halak Het i, Amori, Perisi, Hevi dohot Jebusi, angka na so sian halak Israel.\\n8:8 Pinomparnasida i tahe, angka na tinggal sian pudinasida di tano i, angka na so nirendephon ni halak Israel, angka i ma hona rodi dibahen si Salomo rasirasa sadarion.\\n8:9 Alai anggo sian halak Israel ndang adong nanggo sahalak hona ulaon rodi dibahen si Salomo; ingkon gabe jolma parmusu nasida, gabe induk ni angka ulubalangna dohot induk ni angka huretana porang ro di angka jolma parsihundul.\\n8:10 Jala on do induk angka na pinabangkit mamatamatahon ulaon na nidokkon ni raja Salomo, dua ratus limapulu halak toropna.\\n8:11 Dung i didokkon si Salomo ma boanon nangkok boru ni si Firaun sian huta ni si Daud tu jabu naung pinaulina di nasida, ai ninna do: Ndang jadi maringan jolmangku di bagasan jabu ni si Daud, raja ni Israel, ai badia do angka inganan i, ala naung masuk tusi poti ni Jahowa.\\n8:12 Olat ni ma si Salomo mamelehon angka pelean situtungon tu Jahowa di atas langgatan ni Jahowa, na pinajongjongna di adopan ni emper i.\\n8:13 Ganup di arina be dipelehon hombar tu tona ni si Musa, di angka ari Sabbat, di poltak ni bulan, di angka ari raya naung binuhul, tolu hali di bagasan sataon, i ma di ari raya sagusagu na so niasoman, tole ari raya sisaminggu dohot di ari raya parlapelapean.\\n8:14 Dung i didokkon rajai ma jongjong angka malim marguru tu gansina mangaradoti tohonanna, hombar tu uhum na binahen ni si Daud, amana i, tole halak Lepi mangaradoti tohonanna laho mamujimuji Debata dohot marhalado di adopan ni angka malim i, ganup di arina be; tole angka sijaga bahal marningot gansina be di ganup bahal; ai songon i do parenta ni si Daud, halak ni Debata.\\n8:15 Jala ndang adong nanggo sahalak na mangalaosi tona ni rajai taringot tu angka malim dohot halak Lepi dohot taringot tu sude hata dohot arta.\\n8:16 Jadi sun ma dipadiri saluhut ulaon ni si Salomo sahat ro di ari haoojak ni joro ni Jahowa, sahat ro di sunna tahe. Jadi sun ma tutu joro ni Jahowa.\\n8:17 Uju i ma laho si Salomo tu Esion Geber dohot tu Elat na di topi laut di bagasan tano Edom.\\n8:18 Dung i ditongos si Hiram ma tu ibana angka kopal marhite sian naposona dohot naposo angka na somal marlayar di laut. Jadi marlayar ma nasida rap dohot naposo ni si Salomo tu Opir, jala diboan sian i sere opat ratus limapulu talenta godangna jala diboan do i tu raja Salomo.","num_words":559,"character_repetition_ratio":0.06,"word_repetition_ratio":0.0,"special_characters_ratio":0.214,"stopwords_ratio":0.377,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 11 - BIBLE & BUKU ENDE ONLINE\\n11:1 Dibahen i ingkon haholonganmu do Jahowa Debatam, jala radotanmu pangoloion tu Ibana, angka aturanna pe, angka uhumna dohot tonana saleleng ho mangolu.\\n11:2 Jala ingkon tandaonmuna sadarion (ai ndada tu anakmuna, angka na so sanga mananda manang marnida, ahu mandok soara) pangajaran ni Jahowa, Debatamuna i dohot hatimbulonna dohot tanganna na gogoi dohot botohonna na toltoli.\\n11:3 Tole angka tanda dohot halongangan, angka na binahenna i di parsitongaan ni Misir, tu si Firaun, raja sian Misir dohot tu sandok tanona.\\n11:4 Tole muse na binahenna i tu parangan ni halak Misir, tu angka hodana dohot tu huretana, angka na nilingkupan ni galumbang ni laut arung, uju nasida mangeak hamu, gabe mago nasida dibahen Jahowa, rasirasa sadarion.\\n11:5 Tole muse na binahenna i tu hamu di halongonan, paima sahat hamu tu inganan on.\\n11:6 Tole muse na binahenna i tu si Datan, dohot si Abiram, angka anak ni si Eliab, pinompar ni si Ruben, na pinangangang ni tano i babana laos mamondut nasida rap dohot jabunasida, angka undungundungna dohot saluhut sinamotna, na pinaihutihut ni patna na sai laon di tongatonga ni sandok halak Israel.\\n11:7 Ai matamuna sandiri do marnida nasa jadijadian ni Jahowa na bolon, angka na binahenna i.\\n11:8 Dibahen i sai radoti hamu ma sandok tona, na hutonahon i tu ho sadarion, asa marsihohot rohamuna jala masuk hamu tu tano siteanonmuna i, laho taripar tusi do hamu nuaeng maneansa.\\n11:9 Jala asa leleng hamu mangolu di tano, naung niuarihon ni Jahowa tu angka ompumuna i, lehononna tu nasida dohot tu pinomparnasida i, tano habaoran ni susu dohot situak ni loba do i.\\n11:10 Ai tano sitopotonmuna i laho manean, ndada marpangalaho songon tano Misir, haruaranmuna i, ia dung disaburhon ho bonim tusi, patmu dibahen ho manirami, songon porlak paringkauan.\\n11:11 Alai anggo tano sitopotonmuna taripar tusi laho manean, tano na mardolok do i jala na marrura, mangkangoluhon aek udan do i sian langit.\\n11:12 Tano na sinarihon ni Jahowa, Debatam do i, tongtong do mangaranapi mata ni Jahowa, Debatam tusi sian mula ni taon ro di ujungna.\\n11:13 Molo tung tinggil rohamuna manangihon tonangku, angka na hutonahon i tu hamu sadarion, mangkaholongi Jahowa, Debatamuna i, dohot mangoloi Ibana sian nasa rohamuna dohot sian nasa ateatemuna.\\n11:14 Ahu ma mangalehon udan tu tanomuna di tingki halehetanna, udan di bulan sipaha pitu dohot udan di bulan sipaha sada, asa tarpapungu ho emem dohot anggurmu dohot miakmu.\\n11:15 Ahu huhut patubuhon di duhutduhut di ladangmu, hangoluan ni pinahanmu, asa mangan ho jala bosuran.\\n11:16 Dibahen i ramoti hamu ma dirimuna, asa unang tarela rohamuna laos marbalik hamu, jala dioloi hamu angka debata sileban, huhut marsomba tusi.\\n11:17 Jadi marpiarpiar rimas ni Jahowa maon mida hamu, gabe Ibana mangkinsu langit i maniopi udan, tano i pe ndang lehononna gogona, gabe tibu hamu mago sian tano na denggan i, na nilehon ni Jahowa tu hamu.\\n11:18 Antong sai parateatehon hamu ma angka hatangkon jala pamasuk hamu tu rohamuna jala rahuthon hamu angka i bahen partinandaan di atas tanganmuna, jala bahen parningotan di holangholang ni matamuna.\\n11:19 Jala ajarhon hamu angka i tu angka anakmuna, taringoti hamu angka i, molo hundulhundul ho di bagasan jabum manang mardalani ho di pardalanan, manang laho modom pe ho, nang dung hehe muse.\\n11:20 Jala ingkon surathononmu angka i tu tohang ni jabum dohot tu panggumbanganmu.\\n11:21 Asa leleng hamu mangolu nang pinomparmuna i di tano naung niuarihon ni Jahowa tu angka ompumuna i, lehononna tu nasida, songon leleng ni angka ari ni langit lelengmuna tahe di atas tano on.\\n11:22 Ai tung sura marsihohot rohamuna mangaradoti sandok patikon, na hutonahon i tu hamu laho mangulahonsa, mangkaholongi Jahowa, Debatamuna i, marparange di saluhut dalanna jala marsitiopan tu Ibana.\\n11:23 Ingkon pabalion ni Jahowa do saluhut bangso parbegu on maradophon hamu, asa hamu manoluk bangso angka na umbolon, jala na gumogo sian hamu.\\n11:24 Nasa tano na nidege ni palak ni patmuna, ingkon hamu nampunasa, olat ni halongonan dohot Libanon, olat ni sunge i, i ma sunge Euprat, sahat ro di laut tungkan hasundutan, i ma parbalohan ni tanomuna.\\n11:25 Ndang adong nanggo sahalak na manahan jongjong di adopanmuna; lehonon ni Jahowa, Debatamuna i ma roha hagodoron dohot biar mida hamu tu sandok tano sidegean ni patmuna i, songon naung pinarbagabagana i hian tu hamu.\\n11:26 Ida ma, ahu papillithon di adopanmuna sadarion pasupasu dohot torutoru:\\n11:27 Pasupasu tahe, molo tung ditangihon hamu angka tona ni Jahowa, Debatamuna i, angka na hutonahon i tu hamu sadarion.\\n11:28 Alai torutoru tahe, tung sura so ditangihon hamu angka tona ni Jahowa, Debatamuna i, gabe manimbil hamu sian dalan na hutonahon i tu hamu sadarion, lam diihuthon hamu angka debata sileban, angka na so tinandamuna i.\\n11:29 Ia dung sahat ho, ditogihon Jahowa, Debatam masuk tu tano sitopotonmuna i bahen partalianmu, ingkon hatahononmu pasupasu i di atas dolok Gerizim, jala torutoru i di atas dolok Ebal.\\n11:30 Nda duansa do i di bariba ni Jordan dingkan ujung ni dalan tungkan hasundutan di tano ni halak Kanaan, na maringan di adaran, tondong ni Gilgal mardonokkon tombak More.\\n11:31 Ai tariparanmuna nama Jordan laho masuk manean tano, naung nilehon ni Jahowa, Debatamuna i tu hamu bahen partalianmuna, laos maringan hamu disi.\\n11:32 Dibahen i sai ringkoti hamu ma mangulahon saluhut aturan dohot uhum, angka na hutonahon i tu hamu sadarion.","num_words":851,"character_repetition_ratio":0.076,"word_repetition_ratio":0.01,"special_characters_ratio":0.214,"stopwords_ratio":0.36,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I KRONIKA 15 - BIBLE & BUKU ENDE ONLINE\\n15:1 Dung i didokkon si Daud ma paulion angka bagasna di bagasan huta ni si Daud, diparade do huhut sada inganan di poti ni Debata, jala dipahembang sada undungundungna.\\n15:2 Uju i ma didok si Daud: Ndang jadi usungon ni manang ise poti ni Debata, dungkon ni halak Lepi; ai nunga dipillit Jahowa nasida mangusung poti ni Debata dohot marhalado di Ibana ro di saleleng ni lelengna.\\n15:3 Jadi dipaluhut si Daud ma sandok Israel tu Jerusalem, asa diboan nasida poti ni Jahowa nangkok tu ingananna, na pinadirina hian disi.\\n15:4 Dipaluhut si Daud huhut pinompar ni si Aron dohot halak Lepi.\\n15:5 Sian pinompar ni si Kohat: Si Uriel, indukna i, ro di hahaanggina, saratus duapulu halak toropna.\\n15:6 Sian pinompar ni si Merari: Si Asaya, indukna i, ro di hahaanggina, dua ratus duapulu halak toropna.\\n15:7 Sian pinompar ni si Gerson: Si Joel, indukna i, ro di hahaanggina, saratus tolupulu halak toropna.\\n15:8 Sian pinompar ni si Elsapan: Si Semaya, indukna i ro di hahaanggina, dua ratus halak toropna.\\n15:9 Sian pinompar ni si Hebron: Si Eliel, indukna i ro di hahaanggina, ualupulu halak toropna.\\n15:10 Sian pinompar ni si Usiel: Si Abinadab, indukna i ro di hahaanggina, saratus sampulu dua halak toropna.\\n15:11 Dung i dijou si Daud ma malim Sadok dohot si Abiatar ro di halak Lepi i ma: Si Uriel, si Asaya, si Joel, si Semaya, si Eliel dohot si Abinadab.\\n15:12 Jala didok rajai tu nasida: Hamu do angka partogi ni halak Lepi marompuompu; dibahen i parbadiai hamu ma dirimuna dohot hahaanggimuna i, asa diboan hamu poti ni Jahowa, Debata ni Israel, nangkok tu inganan naung hupadiri disi.\\n15:13 Ai na jolo, tagan so disi dope hamu, dibahen Jahowa, Debatanta i do sada parsirangan di tongatonga ni hita on, ala so italului Ibana songon patutna.\\n15:14 Jadi manguras be ma angka malim dohot halak Lepi, asa boanonna nangkok poti ni Jahowa, Debata ni Israel.\\n15:15 Jadi diusung halak Lepi ma poti ni Debata marhaluhalu di abarana, songon naung tinonahon ni si Musa hian, hombar tu hata ni Jahowa.\\n15:16 Dung i didokkon si Daud ma angka induk ni halak Lepi, asa dipadiri hahaangginasida i, angka parende mardongan parhinaloan marragamragam, angka hasapi, arbap dohot sordam, asa dipalu angka i pariburhon soara, paganda las ni roha.\\n15:17 Jadi dipadiri halak Lepi ma si Heman, anak ni si Joel, jala sian angka hahaanggina si Asap, anak ni si Berekia; jala sian pinompar ni si Merari, hahaangginasida i, si Etan, anak ni si Kusaria.\\n15:18 Jala dongannasida muse angka hahaangginasida rongkanan paduahon: Si Sakaria, si Ben, si Jasiel, si Semiramot, si Jeiel, si Uni, si Eliab, si Benaia, si Maaseia, si Matitia, si Elipelen, si Mikneya, si Obed-Edom, si Jeiel, angka sijaga pintu.\\n15:19 Alai anggo halak parende, i ma si Heman, si Asap dohot si Etan mardongan hesekhesek tombaga paribur soara.\\n15:20 Alai anggo si Sakaria, si Asiel, si Semiramot, si Jeiel, si Uni, si Eliab, si Maaseia dohot si Benaia mardongan hasapi marsoara boruboru.\\n15:21 Alai anggo si Matitia, si Elipelen, si Mikneya, si Obed-Edom, si Jeiel dohot si Asasia mardongan arbap marsoara na sihil laho marendehon.\\n15:22 Alai anggo si Kenania, induk ni halak Lepi manguluhon parendeon dohot mangajarhon parendeon, ai na pande do ibana.\\n15:23 Ia si Berekia dohot si Elkana sijaga pintu di lambung poti.\\n15:24 Alai anggo si Sebania, si Josapat, si Netaneel, si Amasai, si Sakaria, si Benaia dohot si Elieser, angka malim i tahe mamalu sarune di adopan ni poti ni Debata; ianggo si Obed-Edom dohot si Jehia gabe sijaga pintu di lambung poti.\\n15:25 Dung i borhat ma si Daud rap dohot angka sintua ni Israel ro di angka induk ni saribu halak laho mamboan poti parpadanan ni Jahowa nangkok sian jabu ni si Obed-Edom marlas ni roha godang.\\n15:26 Jadi dung ditumpak Debata halak Lepi, angka na mangusung poti parpadanan ni Jahowa, dipelehon nasida ma pitu lombu naposo dohot pitu birubiru tunggal.\\n15:27 Alai anggo si Daud marpangkean baju juba sian hain na halus, songon i nang sude halak Lepi, angka na mangusung poti i dohot angka parende, nang si Hanania, induk manguluhon angka halak parende; marpangkean baju epod sian hain na bontar do si Daud huhut.\\n15:28 Jadi sandok Israel mamboan nangkok poti parpadanan ni Jahowa mardongan olopolop dohot soara ni sarune, sordam dohot arbap dipagogo huhut soara ni hasapi dohot tulila.\\n15:29 Jadi dung sahat poti parpadanan ni Jahowa tu bagasan huta ni si Daud, gabe mandulo ma si Mikhal, boru ni si Saul sian pandiloan; jadi dung diida raja Daud i marhajingjang dohot manontori, marhu ni roha ibana mida rajai.","num_words":742,"character_repetition_ratio":0.084,"word_repetition_ratio":0.003,"special_characters_ratio":0.23,"stopwords_ratio":0.403,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I MUSA 14 - BIBLE & BUKU ENDE ONLINE\\n14:1 Dung i di angka ari uju si Amrapel raja ni Sinear, Ariok raja ni Ellasar, Kedor-Laomor raja ni Elam dohot Tidal raja ni angka bangso parbegu.\\n14:2 Dipungka nasida ma hamusuon tu si Bera raja ni Sodom, dohot tu si Birsa raja ni Gomorra, si Sinab raja ni Adma, dohot tu si Semeber raja ni Zeboim, dohot tu raja sian Bela, i ma Zoar.\\n14:3 Mardomu ma nasida luhut tu rura Siddim, i ma laut sira nuaeng.\\n14:4 Nunga pola sampulu dua taon lelengna dioloi nasida patu tu si Kedor-Laomor, alai pasampulutolutaonhon mangose ma nasida.\\n14:5 Jadi pasampuluopattaonhon ro ma si Kedor-Laomor dohot angka raja donganna i dipantaluhon ma halak Repaim di luat Asterot-Karnaim, dohot halak Susim di luat Ham dohot halak Emim, na di adaran Kiriataim.\\n14:6 Dohot halak Hori di Seir doloknasida tolhas ro di adaran Elaparan, na marbalokkon halongonan.\\n14:7 Dung i mulak ma nasida ro di mual Eumispat, i ma Kades, jala dipapatu sandok luat ni halak Amalek ro di halak Amori, na maringan di Hazezon-Tamar.\\n14:8 Dung i borhat ma raja ni Sodom dohot raja ni Gomorra dohot raja ni Adma dohot raja ni Zeboim dohot raja ni Bela, i ma Zoar, marodor be ma nasida laho marmusu di rura Siddim.\\n14:9 Dompak si Kedor-Laomor, raja ni Elam, dohot si Tidal, raja ni angka bangso parbegu, dohot si Amrapel raja ni Sinear, dohot si Ariok raja ni Ellasar; opat raja alo ni na lima i.\\n14:10 Alai mansai lan do angka lupaklupak barerang di rura Siddim i. Jadi maporus ma raja ni Sodom dohot Gomorra, angka margunopan ma tusi, ianggo angka na teba i maporus do tu dolok.\\n14:11 Jadi dibuat nasida ma sandok ugasan ni Sodom dohot Gomorra, ro di sude sipanganonna, laho ma nasida.\\n14:12 Diboan nasida ma dohot si Lot, anak ni haha ni si Abram, ro di ugasanna, ai di Sodom do ibana maringan, laos laho ma nasida.\\n14:13 Dung i ro sada halak na maporus i, dipaboa ma barita i tu si Abram, halak Heber i, na maringan di tombak Mamre, ginomgom ni si Amori anggi ni si Eskol dohot Aner, angka janji ni si Abram do nasida.\\n14:14 Jadi dung dibege si Abram barita i naung tarboan anakna i, diparsinjatai ma naposona, angka na somal, tolu ratus sampulu ualu halak, angka na tubu di bagasan jabuna, dieak ma musu i tolhas ro di Dan.\\n14:15 Dung i disagi ma angka naposona mangarampok musu i bornginna i, jala ditaluhon nasida dung i dilele nasida tolhas ro di Hoba, na tungkan hambirang ni Damaskus.\\n14:16 Jadi mulak ma diboan saluhut ugasan, dohot do si Lot anakna i, ro di ugasanna, angka boruboru dohot halak na torop i mulak diboan.\\n14:17 Jadi dung mulak si Abram sian na marporang i dompak si Kedor-Laomor dohot angka raja donganna i, ruar ma raja ni Sodom manomunomu ibana tu rura Sawe i ma rura ni raja i.\\n14:18 Alai anggo si Melkisedek, raja ni Salem diboan sagusagu dohot anggur; malim ni Debata na mamunjungi do ibana.\\n14:19 Dung i dipasupasu ma si Abram, ninna ma: Na pinasupasu do ho, ale Abram, ditumpak Debata na mamunjungi, sigomgom langit dohot tano on.\\n14:20 Jala pinuji ma Debata na mamunjungi, na pasahathon angka musum tu tanganmu, jadi dilehon si Abram ma tu ibana saparsampulu sian luhutna.\\n14:21 Dung i ninna raja ni Sodom i ma mandok si Abram: Nanggo jolma i lehon di ahu, ianggo ugasan i buat ma di ho!\\n14:22 Alai ninna si Abram ma tu raja ni Sodom i: Nunga pola maruari ahu tu Jahowa, Debata na mamunjungi, sigomgom langit dohot tano on:\\n14:23 Molo tung hubuat sian nasa na di ho nanggo sada tali ro di ihot ni sipatu, asa unang tardok ho sogot: Ahu do pamora si Abram.\\n14:24 Holan na pinangan ni angka dolidoli dohot jambar ni si Aner Eskol dohot Mamre, angka na mandongani ahu, itenang dibuat nasida turpuknasida i.","num_words":632,"character_repetition_ratio":0.065,"word_repetition_ratio":0.0,"special_characters_ratio":0.238,"stopwords_ratio":0.421,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V Musa 16 | Alkitab TOBA\\n← V Musa 17\\nV Musa 15 →\\nAugust 21, 2008 · 12:57\\n16:1 Sai ingot hamu ma bulan Abib, asa marulaon Paska ho di Jahowa, Debatam, ai apala di bulan Abib ditogihon Jahowa, Debatam ho ruar sian Misir bornginna i.\\n16:2 Ingkon seatonmu di ari raya Paska lombu dohot birubiru di Jahowa, Debatam di inganan sipilliton ni Jahowa bahen inganan ni Goarna disi.\\n16:3 Ndang jadi panganonmu sagusagu na niasoman di ari raya Paska i; ingkon pitu ari lelengna panganonmu disi sagusagu na so niasoman, sagusagu pardangolan, ai mardangoldangol do ho ruar sian tano Misir, asa dipaingotingot roham saleleng ho mangolu ari haruruarmu sian tano Misir.\\n16:4 Dibahen i ndang jadi dapot idaon di ho igarigar di sandok parbalohanmu pitu ari lelengna, jala ndang jadi marborngin sian pinahan na sineatmi di bodari ni ari parjolo sahat ro di manogotna i.\\n16:5 Ndang jadi seatonmu Paska i di bagasan sada sian hutam, angka silehonon ni Jahowa, Debatam tu ho.\\n16:6 Ingkon di inganan sipilliton ni Jahowa, Debatam, bahen inganan ni Goarna disi, seatonmu Paska i di bodari marhira manihir mata ni ari, di tingki haruruarmu sian Misir.\\n16:7 Ingkon panggangonmu jala panganonmu do i di inganan sipilliton ni Jahowa, Debatam di Ibana, manogotna i jadi do ho mardalan mulak tu undungundungmu hian.\\n16:8 Ingkon onom ari lelengna panganonmu sagusagu na so niasoman, tole papituarihon jumpang ma mata ni ari raya di Jahowa, Debatam, ndang jadi ulaonmu disi nanggo sada ulaon.\\n16:9 Ingkon pitu minggu bilangonmu di ho; olat ni dung mamungka madabu sasabi tu eme, pungkaonmu ma mamilangi na pitu minggu i.\\n16:10 Dung i marari raya minggu ma ho di Jahowa, Debatam, marguru tu pangalehon ni tanganmu di pelean sian lomo ni roha silehononmu, hombar tu pamasumasu ni Jahowa, Debatam di ho.\\n16:11 Ingkon marlas ni roha ho di adopan ni Jahowa, Debatam, songon i ho dohot anakmu dohot borum dohot naposom baoa dohot naposom parompuan dohot halak Lepi na di bagasan hutam, ro di halak dagang dohot dakdanak na tading di lampin dohot parompuan na mabalu na di tongatongami, di inganan sipilliton ni Jahowa, Debatam, bahen inganan ni Goarna disi.\\n16:12 Sai dipaingotingot roham ma hatoban do ho na jolo di Misir, asa ingkon radotanmu jala ulahononmu angka aturan on.\\n16:13 Ingkon marari raya parlapelapean ho pitu ari lelengna, ia dung dipapungu ho parbue sian pardegeanmu dohot sian pangilanganmu.\\n16:14 Jala ingkon marlas ni roha ho di ari rayamu, songon i ho dohot anakmu dohot borum dohot naposom baoa dohot naposom parompuan dohot halak Lepi dohot halak dagang dohot dakdanak na tading di lampin dohot parompuan na mabalu di bagasan angka hutamu.\\n16:15 Ingkon pitu ari lelengna ho marari raya di Jahowa, Debatam di inganan sipilliton ni Jahowa; ai pasupasuon ni Jahowa, Debatam ma ho di saluhut gogo ni tanomu dohot di saluhut ulaon ni tanganmu, dibahen i ingkon marlas ni roha situtu ho.\\n16:16 Ingkon tolu hali di bagasan sataon ro nasa baoa di tongatongamu tu adopan ni Jahowa Debatam, di inganan sipilliton ni Jahowa, i ma di ari raya sagusagu na so niasoman dohot di ari raya minggu dohot di ari raya parlapelapean, jala ndang jadi rumar boti ro manang ise tu adopan ni Jahowa.\\n16:17 Ganup tahe marguru tu na tarlehon tanganna, hombar tu pasupasu naung nilehon ni Jahowa, Debatam tu ho.\\n16:18 Ingkon pabangkitonmu di ho angka jolma bahen panguhum dohot panuturi di saluhut harbanganmu, angka silehonon ni Jahowa, Debatam tu ho di tongatonga ni angka margam, asa nasida mandabu uhum hasintongan tu bangso i.\\n16:19 Ndang jadi papeolonmu uhum, ndang jadi ho marnidanida bohi, jala ndang jadi jaloonmu silua, ai sisip do papitung mata ni halak na pistar jala pabalikbalik parhataan ni halak na tigor.\\n16:20 Hatigoran, hatigoran ma tutu ingkon eahanmu, asa mangolu ho jala teanonmu tano silehonon ni Jahowa, Debatam tu ho.\\n16:21 Ndang jadi pajongjongonmu di ho manang sian hau dia sumansuman ni sombaon Asera jonok tu langgatan ni Jahowa, Debatam sibahenonmu di ho.\\n16:22 Ndang jadi huhut pajongjongonmu di ho tiang panombanombaan, na hinagigihon ni Jahowa, Debatam.","num_words":643,"character_repetition_ratio":0.111,"word_repetition_ratio":0.035,"special_characters_ratio":0.215,"stopwords_ratio":0.291,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JOSUA 12 - BIBLE & BUKU ENDE ONLINE\\n12:1 Alai ondo raja ni tano i, angka na tinaluhon ni halak Israel, jala disoluk tanonasida di bariba ni Jordan, tungkan habinsaran, olat ni batang aek Arnon sahat ro di dolok Hermon dohot sandok adaran tungkan habinsaran.\\n12:2 I ma Sihon, raja ni halak Amori, na maringan di Hesbon, ia ginomgomanna olat ni Aroer na martopihon batang aek Arnon sahat ro di parsitongaan ni batang aek i, ro di satonga Gilead sahat ro di batang aek Jabok, parbalohan ni tano ni halak Amon.\\n12:3 Salpu adaran sahat tu tao Kinnerot tungkan habinsaran, jala sahat ro di laut ni rura i, i ma laut sira tungkan habinsaran, di dalan laho tu Betjesimot, jala di dangsina marbonahon angka tuatan ni Pisga.\\n12:4 Angkup ni luat ni si Og, raja sian Basan, sian pasipasi ni halak Repaim, angka na maringan di Astarot dohot Edrei.\\n12:5 Jala digomgomi dolok Hermon dohot Salka, ro di sandok Basan sahat tu parbalohan ni halak Gesur i dohot Maaka i dohot satonga Gilead, parbalohan ni tano ni Sihon, raja sian Hesbon.\\n12:6 Si Musa dope, naposo ni Jahowa rap dohot halak Israel manaluhon nasida, laos si Musa naposo ni Jahowa mangalehon tano i bahen partalian ni halak Ruben, Gad dohot satonga Manasse.\\n12:7 Alai ondo raja di tano i, angka na tinaluhon ni si Josua rap dohot halak Israel di bariba ni Jordan tungkan hasundutan, olat ni Baal-Gad na di rura ni Libanon, sahat ro di tor na saesae, laho nangkok tungkan Seir, jala dilehon si Josua tano i bahen partalian di angka marga ni Israel, mangihuthon sagisagiannasida.\\n12:8 Tano di dolok, di rura, di adaran, di angka tuatan, di halongonan dohot di tano tungkan dangsina: Halak Het, Amori, Kanaan, Perisi, Hevi dohot Jebusi.\\n12:9 Raja sian Jeriko sada, raja sian Ai, na tungkan lambung sian Betel sada.\\n12:10 Raja sian Jerusalem sada, raja sian Hebron sada.\\n12:11 Raja sian Jarmut sada, raja sian Lakis sada.\\n12:12 Raja sian Eglon sada, raja sian Gezer sada.\\n12:13 Raja sian Debir sada, raja sian Geder sada.\\n12:14 Raja sian Horma sada, raja sian Arad sada.\\n12:15 Raja sian Libna sada, raja sian Adullam sada.\\n12:16 Raja sian Makkedah sada, raja sian Betel sada.\\n12:17 Raja sian Tappua sada, raja sian Heper sada.\\n12:18 Raja sian Apek sada, raja sian Lasaron sada.\\n12:19 Raja sian Madon sada, raja sian Hazor sada.\\n12:20 Raja sian Simron-Meron sada, raja sian Aksap sada.\\n12:21 Raja sian Taanak sada, raja sian Megiddo sada.\\n12:22 Raja sian Kedes sada, raja sian Jokneam sada marbonahon Karmel.\\n12:23 Raja sian Dor, na di luat Dor sada, raja ni parbegu angka na di Gilgal sada.\\n12:24 Raja sian Tirza sada. Saluhut angka rajai tolupulu sada halak toropna.","num_words":429,"character_repetition_ratio":0.123,"word_repetition_ratio":0.0,"special_characters_ratio":0.247,"stopwords_ratio":0.333,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JOSUA 13 - BIBLE & BUKU ENDE ONLINE\\n13:1 Jadi dung sarimatua si Josua, didok Jahowa ma tu ibana: Nunga sarimatua ho, jala godang situtu dope tano i tading sipapatuon.\\n13:2 On do tano na tading i dope: Sandok parbalohan ni halak Palistim dohot sandok tano Gesur i.\\n13:3 Olat ni Sihor na mardalan di Misir sahat ro di parbalohan Ekron tungkan utara, na masuk etongan tu halak Kanaan: Na lima raja ni halak Palistim, raja sian Gaza, Asdod, Askelon, Gad dohot sian Ekron, ro di halak Awi.\\n13:4 Tungkan dangsina sandok tano ni halak Kanaan dohot Meara, na di halak Sidon, sahat ro di Apek, sahat tu parbalohan ni halak Amori.\\n13:5 Angkup ni tano ni halak Gebal i dohot sandok Libanon, tungkan habinsaran, olat ni Baal-Gad na marbonahon dolok Hermon, tolhas ro di Hamat.\\n13:6 Sude pangisi ni tor, olat ni Libanon sahat ro di Misrepot-Maim, sude halak Sidon, Ahu ma mangonjar nasida maradophon halak Israel. Rujirujihon sambing bahen partalian di Israel, songon na hutonahon i tu ho.\\n13:7 On pe bagihon ma tano on bahen partalian di na sia marga dohot di satonga marga Manasse.\\n13:8 Marga Manasse na satonganari rap dohot marga Ruben dohot Gad, nunga manjalo partalianna be, na nilehon ni si Musa tu nasida di bariba ni Jordan tungkan habinsaran, songon na nilehon ni si Musa, naposo ni Jahowa tu nasida.\\n13:9 Olat ni Aroer, na martopihon sunge Arnon dohot huta na di tongatonga ni sunge i, ro di sandok adaran Medeba sahat tu Dibon.\\n13:10 Dohot sude huta ni Sihon, raja ni halak Amori, na manggomgomi Hesbon sahat ro di parbalohan ni halak Amon.\\n13:11 Angkupni Gilead dohot tano ni halak Gesur i dohot Maaka i dohot sandok dolok Hermon dohot sandok Basan sahat tu Salka.\\n13:12 Sandok gomgoman ni Og di Basan, na manggomgomi Astarot dohot Edrei: Ibana do na tinggal sian pasipasi ni pinompar ni si Repaim, na pinapatu ni si Musa jala dionjar.\\n13:13 Alai ndang dionjar halak Israel anggo halak Gesur i dohot halak Maaka, maringan di tongatonga ni halak Israel do Gesur dohot Maaka rasirasa sadarion.\\n13:14 Holan tu marga Lepi ndang dilehon ibana partalian, angka pelean situtungon tu Jahowa, Debata ni Israel tahe partalianna, songon na pinarbagana i tu nasida.\\n13:15 Asa nunga dilehon si Musa hian partalian, anggo tu marga Ruben marsuhusuhu.\\n13:16 Ia parbalohannasida olat ni Aroer na martopihon sunge Arnon dohot huta na di parsitongaan ni sunge i, ro di sandok tano pea na di lambung ni Medeba.\\n13:17 Hesbon ro di sude hutana angka na di pea, Dibon dohot Bamot-Baal dohot Bet-Baal-Meon.\\n13:18 Jahaz, Kadermat dohot Mepaat.\\n13:19 Kiriataim, Sibma, Zeret Hasahar di atas dolok ni rura i.\\n13:20 Betpeor, angka tuatan ni Pisga dohot Betjesimot.\\n13:21 Dohot sude huta di tano pea, ro di sandok harajaon ni Sihon, raja ni halak Amori, na manggomgom di Hesbon, na pinapatu ni si Musa, ibana dohot angka induk sian Midian, i ma Evi, Rekem, Sur, Hur dohot Reba, angka raja wakil ni Sihon, angka na maringan di tano i.\\n13:22 Dohot Bileam, anak ni si Beor, pangarunding i dibunu halak Israel marhitehite podang, ro di dongannasida angka na tartiham.\\n13:23 Jadi parbalohan ni tano ni halak Ruben, batang aek Jordan do ro di tobingna. I ma partalian ni halak Ruben marsuhusuhu, angka huta dohot sosor.\\n13:24 Nunga dilehon si Musa hian anggo tu marga Gad, tu angka anak ni si Gad marsuhusuhu.\\n13:25 Ia parbalohannasida, i ma Jaser dohot sude huta di Gilead, dohot satonga ni tano ni halak Amon sahat ro di Aroer na di jolo ni Rabba.\\n13:26 Jala olat ni Hesbon sahat ro di Ramot-Mispa dohot Betonim, jala olat ni Mahanaim sahat ro di parbalohan ni Debir.\\n13:27 Dohot di rura Betharam, Betnimra, Sukot dohot Zapon, ebaeba sian harajaon ni Sihon, raja sian Hesbon, Jordan dohot tobingna, sahat ro di ujung ni tao Kinerot di bariba ni Jordan tungkan habinsaran.\\n13:28 I ma partalian ni halak Gad marsuhusuhu, angka huta dohot sosor.\\n13:29 Nunga dilehon si Musa hian partalian, nang tu satonga marga Manasse, gabe satonga Manasse nampunasa marsuhusuhu.\\n13:30 Jadi parbalohanna olat ni Mahanaim sandok Basan, saluhut harajaon ni si Og, raja sian Basan, dohot sude huta ni si Jair na di Basan, onompulu huta toropna.\\n13:31 Dohot satonga Gilead, Astarot, Edrei, angka huta ni harajaon ni si Og di Basan, dilehon tu angka anak ni si Mahir, anak ni si Manasse, tu anak ni si Mahir na satonga marsuhusuhu.\\n13:32 I ma na binagi ni si Musa di adaran ni Moab, di bariba ni Jordan, tondong ni Jeriko tungkan habinsaran.\\n13:33 Alai tu marga Lepi ndang adong partalian dilehon si Musa, Jahowa Debata ni Israel, Ibana do partaliannasida, songon na pinarbagana i tu nasida.","num_words":748,"character_repetition_ratio":0.069,"word_repetition_ratio":0.008,"special_characters_ratio":0.234,"stopwords_ratio":0.385,"flagged_words_ratio":0.0,"lang_id_score":0.998,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"Keluaran 39 (TOBA)\\nI. Parpaulina di pangkean tu malim 1-31. II. Bilangan ni saluhut ulaula mangaradoti pangoloion tu Debata 32-43.\\n1(I.) Dipauli nasida huhut angka pangkean tohonan laho marhalado di inganan na badia i sian bonang na rata langit, na tinubar dohot na merham; dipauli huhut pangkean na badia angka sisolukkonon ni si Aron, songon na tinonahon ni Jahowa hian tu Musa.\\n2Dipauli ma baju epod i sian sere dohot sian bonang na rata langit, na tinubar jala na merham dohot sian hain na halus na nidua.\\n3Dinanggari nasida ma sere i gabe purada laos diirisi ma i manjadi bonang, asa dapot tonunhonon ni parpunsa saor tu bonang na rata langit, na tinubar dohot na merham, saor muse tu hain na halus.\\n4Dibahen nasida huhut dua pangabaraan di baju epod i, jala dipatunggom di tampahanna be.\\n5Tole muse hohos ni epod i, sisada hapandean do i dohot baju i laos mardomu tusi, jadijadian sian sere dohot sian bonang na rata langit, na tinubar jala na merham dohot sian hain na halus na nidua songon na tinonahon ni Jahowa tu si Musa.\\n6Dung i dipabongot nasida ma angka batu intan unam angka na nirusuk dohot tali sere, jala diuhirhon tusi songon uhiran sahap goargoar ni anak ni Israel na sampuludua i.\\n7Dung i dibahen nasida ma angka batu intan i tu na dua pangabaraan ni baju epod i, bahen batu parningotan di angka anak ni Israel, songon na tinonahon ni Jahowa tu si Musa.\\n8Dibahen nasida huhut tutup andora i, suang songon hapandean ni baju epod ditonunhon parpunsa tusi sere, bonang na rata langit, na tinubar jala na merham dohot hain na halus na nidua.\\n9Maropat suhi do i dibahen jala dua lampis, sanjongkal ganjangna jala sanjongkal bidangna.\\n10Jala digohi nasida do i dohot opat rinte batu intan. Di rinte parjolo: batu intan sardis, topasion dohot samarados.\\n11Di rinte paduahon: batu intan rubin, sapire dohot diaman.\\n12Di rinte patoluhon: batu intan opal, akat, dohot ametist.\\n13Di rinte paopathon: batu intan krisolit, Unam dohot jaspis; jala marihot sere angka rinte i dibahen humaliang.\\n14Jala jojor angka batu i mangihuthon partording ni na sampuludua goar ni anak ni Israel, angka na niuhirhon ni halak pandakdak batu, pulik be goarna i, mangihuthon na sampuludua marga ni Israel.\\n15Dung i dibahen nasida huhut tu tutup andora i angka rante dos ganjangna, songon tali nidua hapandeanna sian sere na pita.\\n16Dibahen nasida huhut ihot sere dohot dua tintin sere, dibahen muse na dua tintin i tu na dua tampahan ni tutup andora i.\\n17Jala dibahen nasida do na dua rante na nidua sian sere tu bagasan tintin na dua i, angka na di tampahan ni tutup andora i.\\n18Alai anggo na dua ujung ni na dua rante na nidua i dihaithon nasida do i tu haithait na dua i jala dipatunggom do i tu pangabaraan ni baju epod i patondong be.\\n19Dibahen nasida muse dua tintin sere na asing, jala dilohothon do i tu na dua tampahan ni tutup andora i, apala di pangkilimanna na tungkan baju epod i dingkan bagasan.\\n20Dibahen muse dope dua tintin sere na asing, jala dilohothon do i tu na dua pangabaraan ni baju epod i tungkan toru tongon di pardomuanna, di atas hohos ni baju epod i.\\n21Jadi dipudunhon nasida ma tutup andora i rap dohot tintinna marhite sian bonang na rata langit tu tintin ni baju epod, asa hopos tu hohos ni baju epod i, jala unang tarbahen sirang tutup andora sian baju epod, songon na tinonahon ni Jahowa tu Musa.\\n22Dipauli muse ma baju parbalian di toru ni baju epod i, sandok sian bonang na rata langit do i ditonun.\\n23Jala parrungkunganna i di parsitongaanna, jala martopi na tinonun parrungkungan i humaliang, songon topi ni baju partohonan, asa unang olo maribak.\\n24Dibahen nasida huhut tu rambuna humaliang angka parbue ni dalimo sian bonang na rata langit, na tinubar jala na merham huhut na nidua.\\n25Dibahen nasida huhut angka giringgiring sian sere na pita, i ma disolothon tu holangholang ni angka parbue ni dalimo humaliang di rambu ni baju parbalian i.\\n26Sai marsorinsorin do sada parbue ni dalimo dung i sada giringgiring tuk humaliang, sisolukkononhon do i laho marulaon na badia songon na tinonahon ni Jahowa tu Musa.\\n27Dipauli nasida huhut angka baju parbagasan sian hain na halus, sipangkeon ni Aron dohot angka anakna i.\\n28Tole muse tumpal ni sintua ni malim sian hain na bontar ro di angka talitali ni malim sian hain na bontar do, saraoalna pe sian hain na bontar na nidua do.\\n29Hohos i pe dipauli do i sian hain na nidua dohot sian bonang na rata langit, na tinubar dohot na merham, hapandean ni parpunsa do i, songon na tinonahon ni Jahowa tu Musa.\\n30Dibahen nasida huhut sangkalia i, tumpal habadiaon i sian sere na pita jala diuhirhon tusi, songon panguhiron sahap: Habadiaon di Jahowa!\\n31Jala dilohothon tusi tali bonang na rata langit, asa dipadomu tu tumpal i sian ginjang songon na tinonahon ni Jahowa tu Musa.\\n32(II.) Jadi songon i ma hasusun ni sandok ulaon pauliuli inganan na badia i, undungundung parluhutan i; dibahen halak Israel do antong sude hombar tu na tinonahon ni Jahowa, songon i dibahen nasida.\\n33Dung i diboan nasida ma inganan na badia i tu Musa, i ma: undungundung i ro di sude ulaulana, angka haithaitna, papanna, ransangransangna, tiangna dohot ojahanna.\\n34Tole muse langitlangitna sian bobak ni birubiru tunggal na tinubar, tole muse sian bobak ni pitudar, tole muse rimberimbe bahen tutupna i.\\n35Tole muse poti panindangion i ro di haluhaluna dohot langkop pardengganan i.\\n36Tole muse meja i ro di sude ulaulana dohot sagusagu na marhadohoan.\\n37Tole muse parpalitoan sian sere na pita i ro di angka lampuna, aturanna ro di sude ulaulana dohot miak tu palito i.\\n38Tole muse langgatan sere i, miak pamiahion i, daupa na hushus i ro di rimberimbe bahen tutup ni pintu ni undungundung i.\\n39Tole muse langgatan tombaga i ro di handanghandang tombaga angka na masuk tusi, haluhaluna ro di sude parhohasna, tong parburian i ro di ojahanna.\\n40Tole muse angka rimberimbe ni alaman ro di angka tiangna dohot ojahanna, nang rimberimbe tutup ni bahal ni alaman i, ro di angka talina, labangna dohot sude ulaula mangaradoti ulaon di bagasan inganan na badia i, undungundung parluhutan i.\\n41Tole muse angka pangkean tohonan laho marhalado di bagasan inganan na badia i, angka pangkean na badia di malim Aron dohot angka pangkean di angka anakna laho mangaradoti hamalimon.\\n42Luhutna i hombar tu hata na tinonahon ni Jahowa tu si Musa, laos songon i dipasidung halak Israel sandok ulaon i.\\n43Dung i ditingkir Musa ma sandok ulaon i, gabe ida ma, nunga sun dibahen nasida; songon na tinonahon ni Jahowa tu Musa laos songon i dibahen nasida. Dung i dipasupasu Musa ma nasida.","num_words":1072,"character_repetition_ratio":0.096,"word_repetition_ratio":0.028,"special_characters_ratio":0.205,"stopwords_ratio":0.378,"flagged_words_ratio":0.0,"lang_id_score":0.999,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JEREMIA 43 - BIBLE & BUKU ENDE ONLINE\\n43:1 Jadi dung tolhas dihatahon si Jeremia tu sandok situan na torop i saluhut hata ni Jahowa, Debatanasida i, naung tinonahon ni Jahowa, Debatanasida i, umbahen disuru ibana manopot nasida.\\n43:2 Jadi ro ma hata ni si Azaria, anak ni si Hosaya, dohot si Johanan, anak ni si Karea rap dohot saluhut baoa angka na jungkat, ninna ma tu si Jeremia: Gabus do na hinatahonmu! Ndang na tutu ho sinuru ni Jahowa, Debatanami, martona songon on: Unang hamu laho tu Misir maisolat disi.\\n43:3 Na pinajuju ni si Baruk, anak ni si Neria do ho mangalo hami, asa pasahathon hami tu tangan ni halak Kasdim, asa bunuonna hami manang mamboan hami tarbuang tu Babel.\\n43:4 Jadi ndang ditangihon si Johanan, anak ni si Karea dohot saluhut induk ni parangan, ro di sandok situan na torop i soara ni Jahowa, laos maringan nian di tano Juda.\\n43:5 Dung i diarahon si Johanan, anak ni si Karea dohot saluhut induk ni parangan ma sandok pasipasi ni Juda angka na mulak sian saluhut bangso parbegu parserahannasida na sai laon, asa maringan nian di tano Juda.\\n43:6 Tole angka baoa dohot parompuan angka dakdanak, angka boru ni raja ro di saluhut hosa, angka na tading binahen ni si Nebusaradan, sintua ni parangan i, dongan ni si Gedalia anak ni si Ahikam tubu ni si Sapan, angkup ni panurirang Jeremia dohot si Baruk, anak ni si Neria.\\n43:7 Jadi tolhas ma nasida tu tano Misir, ai ndang ditangihon nasida soara ni Jahowa, gabe sahat ma nasida tu Tahpanhes.\\n43:8 Dung i ro ma hata ni Jahowa tu si Jeremia di Tahpanhes songon on:\\n43:9 Buat ma di bagasan tanganmu batu angka na bolon, jala tabunihon di bagasan tano liat di bagasan liang parmasahan batu mardonokkon pintu ni jabu ni Firaun di Tahpanhes, di adopan ni angka baoa sian Juda.\\n43:10 Dung i dohononmu ma tu nasida: Songon on do hata ni Jahowa Zebaot, Debata ni Israel: Ida ma, ahu marsuru suruanku mangalapi si Nebukadnesar raja sian Babel, naposongki, jala ahu patindang habangsana di atas ni batu on, angka naung hutabunihon, jala pahembangonna ma rimberimbe ni undungundungna di atasna.\\n43:11 Ingkon bongotanna ma jala papatuonna tano Misir: Manang ise na tu hamatean, tu hamatean ma tutu, manang ise na tu habuangan, tu habuangan ma tutu, manang ise na tu podang, tu podang ma tutu.\\n43:12 Jala pagalahonku ma sada api di bagasan joro ni angka debata ni Misir, laos soksohanna ma jala buangkononna, jala alithononna ma tano Misir, songon pangalithon ni parmahan ni ulosna, dung i muli ma ibana sian i mardamedame.\\n43:13 Angkup ni ingkon ponggolhononna do angka tiang partunggul sian Betsemes na ti tano Misir, jala surbuonna dohot api angka joro ni angka debata ni Misir.","num_words":444,"character_repetition_ratio":0.065,"word_repetition_ratio":0.009,"special_characters_ratio":0.219,"stopwords_ratio":0.387,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"I Kronika 16 | Alkitab TOBA\\n← I Kronika 17\\nI Kronika 15 →\\n16:1 Jadi dung masuk diboan nasida poti ni Debata, dipajongjong ma i di parsitongaan ni undungundung i, na pinagohon ni si Daud tusi. Dung i dipelehon nasida ma angka pelean situtungon dohot hamauliateon di adopan ni Jahowa.\\n16:2 Jadi dung tolhas dipelehon si Daud angka pelean situtungon dohot hamauliateon, dipasupasu rajai ma situan na torop i marhitehite Goar ni Jahowa.\\n16:3 Dung i diganupi raja ma sandok halak Israel, nang baoa nang parompuan, sagusagu sada be dohot anggur satabutabu be dohot lampet na tinanggulean sada be.\\n16:4 Dung i dipadiri rajai ma di adopan ni poti ni Jahowa deba halak Lepi bahen parhalado, asa nasida mamujimuji dohot mandok mauliate dohot pasangaphon Jahowa, Debata ni Israel.\\n16:5 Si Asap do ihutan parjolo si Sakaria paidua, dung i si Jeiel, si Semiramot, si Jeiel, si Matitia, si Eliab, si Benaia, si Obed-Edom dohot si Jeiel mardongan parhinaloan dohot hasapi; alai anggo si Asap dipagogo do soara ni hasapi.\\n16:6 Ia malim Benaia dohot si Jehasiel, tongtong do nasida mamalu sarune di adopan ni poti parpadanan ni Debata.\\n16:7 Di ari na sasada i do apala parjolo didokkon si Daud mamujimuji Jahowa marhite sian si Asap dohot angka hahaanggina i.\\n16:8 Puji hamu ma Jahowa, baritahon hamu ma Goarna i, pabotohon hamu ma di tongatonga ni angka bangso angka pambahenanna i!\\n16:9 Endehon hamu ma Ibana, palu hamu ma parhinaloan umpuji Ibana, marnonangi ma hamu taringot tu halongangan angka na binahenna i sudena!\\n16:10 Tanggulhon hamu ma Goarna na badia i, ingkon marlas ni roha ma angka na mangalului Jahowa!\\n16:11 Sisiri hamu ma Jahowa dohot hagogoonna i, tongtong ma lulu i hamu bohina.\\n16:12 Paingotingot hamu ma halongangan angka naung binahenna i, angka tanda halongangan naung binahenna i dohot uhum angka na ruar sian pamanganna!\\n16:13 Hamu ale pinompar ni Israel, naposona i, hamu ale anak ni si Jakkob, angka na pinillitna i!\\n16:14 Ibana, Jahowa do Debatanta i, sar tu liat portibi on do angka uhumna.\\n16:15 Sai marningot ma hamu di padan binahenna i ro di saleleng ni lelengna, di hata pinatikna i marriburibu sundut.\\n16:16 Padan naung binahenna i tu si Abraham, ro di uarina tu si Isak.\\n16:17 Jala dihajongjongkon do i tu si Jakkob bahen patik, tu Israel bahen padan salelenglelengna.\\n16:18 Ninna do: Tu ho do lehononku tano Kanaan, partalian ni partohapanmuna.\\n16:19 Uju otik dope bilanganmuna, otik tutu, jala jolma paisolat hamu disi.\\n16:20 Jala sai marbungkasan nasida sian bangso tu bangso, sian sada harajaon tu bangso na asing.\\n16:21 Ndang diloas Ibana halak mangarupa nasida, jala ditorui do angka raja ala nasida.\\n16:22 Unang hahua hamu halak angka na humiahi, jala unang sonoi hamu panurirang angka na husuru!\\n16:23 Endehon ma Jahowa, ale sandok tano on, baritahon hamu ma hatuaonna ganup ari.\\n16:24 Pajojor hamu ma di tongatonga ni halak parbegu hamuliaonna i, di tongatonga ni saluhut bangso halongangan angka na binahenna i.\\n16:25 Ai na timbul do Jahowa, jala tama situtu pujion, na songkal do Ibana mangatasi sude angka debata.\\n16:26 Ai ajiajian do sude debata ni angka bangso parbegu, alai anggo Jahowa naung manjadihon angka langit.\\n16:27 Hatongamon dohot hamuliaon di jolona, hagogoon dohot hinauli masa di bagasan habadiaonna i.\\n16:28 Hamu ale angka marga ni angka bangso, sai lehon hamu ma tu Jahowa, lehon hamu ma tutu tu Jahowa hamuliaon dohot hagogoon.\\n16:29 Lehon hamu ma di Jahowa hamuliaon ni goarna; boan hamu ma silehonlehon, dung i ro ma hamu tu adopan ni Bohina, marsomba ma hamu tu Jahowa marpangkean na marhadohoan!\\n16:30 Raion ma maradophon Ibana, ale isi ni sandok tano on, hot ma antong portibi on, ndang tagamon humordit.\\n16:31 Ingkon marlas ni roha ma antong angka langit, jala marolopolop tano on, jala paboaboa hamu ma di tongatonga ni angka parbegu, Jahowa do Raja!\\n16:32 Marhasakhasak ma laut i ro di isina! Marolopolop ma ladang i ro di nasa na disini!\\n16:33 Marolopolop ma disi sude angka hau di tombak di adopan ni Jahowa, ai nunga ro Ibana laho manguhum tano on.\\n16:34 Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana i.\\n16:35 Jala dok hamu ma: Tumpahi ma hami, ale Debata ni hatuaonnami, jala papungu, jala palua hami sian angka bangso parbegu, asa hupuji Goarmu na badia i jala martanggulhon pujipujianmi hami.\\n16:36 Pinuji ma Jahowa, Debata ni Israel, sian na saingan sahat ro di salelenglelengna, jala rim bangso i mandok: Amen! Jala pujipujian di Jahowa!\\n16:37 Dung i ditadingkon rajai disi, di adopan ni poti parpadanan ni Jahowa si Asap dohot angka hahaanggina i, asa tongtong nasida marhalado di adopan ni poti i ariari.\\n16:38 Laos songon i nang Obed-Edom dohot angka hahaanggina i, onompulu ualu halak toropna; ia si Obed-Edom, anak ni si Jedutun dohot si Hosa rap sijaga pintu do.\\n16:39 Alai anggo malim Sadok dohot angka hahaanggina i, rap malim tahe marhalado do di jolo ni undungundung ni Jahowa di dolokdolok na di Gibeon.\\n16:40 Asa tongtong nasida mamelehon angka pelean situtungon tu Jahowa di atas langgatan pamelean ni pelean situtungon manogotna i dohot bodarina i, jala diula luhut na tarsurat di bagasan patik ni Jahowa, na tinonahonna tu halak Israel.\\n16:41 Dongannasida do huhut si Heman dohot si Jedutun ro di halak na pinillit na asing, nunga pola digoar, asa nasida mamujimuji Jahowa, ai ala ro di salelenglelengna asi ni rohana i.\\n16:42 Dongan ni si Heman dohot si Jedutun huhut angka na mamalu sarune dohot sordam dohot parhinaloan ni Debata marragamragam pariburhon parendeon; alai sijaga pintu do anggo pinompar ni si Jedutun.\\n16:43 Dung i muli be ma sandok situan na torop i, ganup tu jabuna be; muli ma dohot si Daud laho mamasumasu isi ni bagasna.","num_words":914,"character_repetition_ratio":0.056,"word_repetition_ratio":0.0,"special_characters_ratio":0.228,"stopwords_ratio":0.397,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V Musa 12 | Alkitab TOBA\\n← V Musa 13\\nV Musa 11 →\\n12:1 On do aturan dohot uhum, angka na tama ringkotanmuna mangulahon di tano na nilehon ni Jahowa, Debata ni angka ompum, tu ho bahen partalianmu, saleleng hamu mangolu di atas tano on.\\n12:2 Ingkon panepneponmuna situtu sude inganan pamelean tu debata sileban di bangso parbegu, angka sisoluhonmuna, nang di atas dolok manang di atas robean, manang di toru ni saluhut hau na rata.\\n12:3 Ingkon lohaonmuna do angka langgatannasida i, jala taporanmuna ajiajiannasida, jala suda tutungonmuna sombaonnasida dohot api jala tahaonmuna do angka ganaganaan, sumansuman ni Debatanasida, ingkon pidomhononmuna goarnasida sian inganan i.\\n12:4 Ndang jadi bahenonmuna songon i tu Jahowa, Debatamuna i.\\n12:5 Ingkon di inganan sipilliton ni Jahowa, Debatamuna i, sian saluhut margamuna umpajokkon Goarna tusi bahen ingananna, ingkon disi tahe luluanmuna Ibana jala sitopotonmuna.\\n12:6 Tusi huhut boanonmuna angka peleanmuna situtungon dohot peleanmuna sipotongon dohot parpuluanmuna i dohot pelean sitatingan sian tanganmuna, angka bagabagamuna dohot peleanmuna sian lomo ni roha, ro di anak buhabaju sian lombumuna dohot sian birubirumuna.\\n12:7 Ingkon disi huhut hamu mangan di adopan ni Jahowa, Debatamuna i, jala marlas ni roha hamu mida saluhut na niradotan ni tanganmuna, songon i hamu, songon i dohot isi ni bagasmuna, angka na pinasupasuhon ni Jahowa, Debatam tu ho.\\n12:8 Ndang jadi bahenonmuna disi hombar tu saluhut na itabahen sadarion dison, ganup tahe mambahen lomo ni rohana be.\\n12:9 Ai ndang dope sahat hamu rasirasa nuaeng tu paradianan, manang tu partalian, silehonon ni Jahowa, Debatam tu ho.\\n12:10 Alai magira ma tariparanmuna Jordan jala maringan hamu di tano na binasabasahon ni Jahowa, Debatamuna i bahen partalianmuna, jala pasonangonna ma hamu maradophon saluhut musumuna humaliang, asa marsonangsonang hamu maringan.\\n12:11 Ia dung dipillit Jahowa, Debatamuna i, sada inganan di Ibana bahen inganan ni Goarna i, ingkon tusi ma boanonmuna saluhut naung hutonahon i tu hamu: Angka peleanmuna situtungon dohot angka peleanmuna sipotongon, angka parpuluanmuna, angka pelean sitatinganmuna ro di sude ugasan na pinillit, garar ni bagabagamuna, angka na binagabagahonmuna tu Jahowa.\\n12:12 Jala ingkon marlas ni roha hamu di adopan ni Jahowa, Debatamuna i, songon i hamu dohot angka anakmuna, angka borumuna, angka naposomuna baoa dohot parompuan, ro di halak Lepi, angka na maringan di bagasan hutamuna i, ai ndang maruli parjambaran manang partalian anggo nasida rap dohot hamu.\\n12:13 Ingkon ramotanmu dirim, na so tupa pelehononmu angka peleanmu situtungon di ganup inganan na denggan di roham.\\n12:14 Ingkon di inganan sipilliton ni Jahowa di tongatonga ni sada sian angka margamu, ingkon disi do pelehononmu angka peleanmu situtungon, jala ingkon disi do bahenonmu manang aha na hutonahon i di ho.\\n12:15 Alai jadi do huhut guru sandok sombu ni roham seatonmu jala panganonmu juhut, hombar tu pasupasu ni Jahowa, Debatam, na nilehonna i tu ho di bagasan saluhut ingananmu; halak na ramun dohot na ias, jadi do manganhon sian i, suang songon hije manang ursa.\\n12:16 Holan mudar i tahe ndang jadi panganonmuna, ingkon tu tano do i usehononhon songon aek.\\n12:17 Ndang jadi hamu manganhon di bagasan hutamuna i parpuluan sian ememu manang sian anggurmu, manang sian miakmu, manang anak buhabaju sian lombum manang sian birubirum, ro di sude ugasan garar ni bagabagam, angka naung binagabagahonmu ro di peleanmu sian lomo ni roha dohot pelean sitatingan sian tanganmu.\\n12:18 Ingkon di adopan ni Jahowa, Debatam do panganonmu angka i, di inganan sipilliton ni Jahowa, Debatam, di Ibana, songon i ho nang anakmu dohot borum, ro di naposom baoa dohot parompuan dohot halak Lepi, na maringan di bagasan hutam, ingkon marlas ni roha ho di adopan ni Jahowa, Debatam, mida saluhut na niradotan ni tanganmu.\\n12:19 Jaga dirim, na so tupa marlea roham mida halak Lepi, saleleng mangolu ho di atas tanomi.\\n12:20 Alai tung sura dipalambas Jahowa, Debatam parbalohan ni tanomi, songon naung pinarbagabagana hian tu ho, gabe nimmu ma: Naeng mangan juhut ahu, ala hisapan roham naeng mangan juhut, jadi do panganonmu juhut sandok guru sombu ni roham.\\n12:21 Alai tung sura holang sian ho inganan naung pinillit ni Jahowa, Debatam, paojakkon Goarna disi, jadi do seatonmu sian lombum manang sian birubirum, angka na nilehon ni Jahowa tu ho, songon naung hutonahon i tu ho, jala mangan ma ho di bagasan hutam, sandok guru sombu ni roham.\\n12:22 Tongon tahe songon papangan ni halak di hije dohot di ursa, jadi do songon i panganonmu i; halak na ias dohot na ramun, jadi do rap mangan sian i.\\n12:23 Asal marsihohot roham unang mangan mudar, ai mudar i do hosa; dibahen i ndang jadi panganonmu hosai i rap dohot sibukna.\\n12:24 Ndang jadi panganonmu mudar i, ingkon tu tano do i usehononmu songon aek.\\n12:25 Ndang jadi panganonmu i, asa marhasonangan ho dohot pinomparmu dung salpu ho, molo diulahon ho lomo ni roha ni Jahowa.\\n12:26 Alai anggo peleanmi angka na badia i sipelehononmu hian, ro di angka bagabagami, ingkon buatonmu jala boanonmu do i tu inganan naung pinillit ni Jahowa.\\n12:27 Ingkon hobasonmu anggo angka peleanmu situtungon, sibukna dohot mudarna di atas langgatan ni Jahowa, Debatam; ia mudar ni angka peleanmu sipotongon ingkon usehononmu do i tu atas langgatan ni Jahowa, Debatam, alai anggo sibukna jadi do panganonmu.\\n12:28 Sai paingotingot jala tangihon sude hata on, angka na hutonahon tu ho, asa marhasonangan ho dohot pinomparmu dung salpu ho ro di salelenglelengna, molo tung diulahon ho na denggan dohot na tigor di roha ni Jahowa, Debatam.\\n12:29 Ia dung sun siap dibahen Jahowa, Debatam maradophon ho bangso parbegu, angka sitopotonmi laho manean nasida, jala ia dung ditean ho nasida, laos maringan ho di tanonasida i:\\n12:30 Sai ramoti ma dirim, asa unang tung tarjorgong ho mangihuthon tu nasida, dung siap nasida maradophon ho, jala unang usouso ho taringot tu debatanasida gabe nimmu: Songon pangoloi ni angka bangso parbegu on di debatanasida, suang songon i do nang ahu bahenonku.\\n12:31 Ndang jadi bahenonmu songon i di Jahowa, Debatam, ai saluhut biasbias ni Jahowa na hinagigihon ni rohana dibahen nasida do i tu debatanasida i; ai gari anaknasida dohot borunasida, suda do i ditutung nasida di bagasan api umpele debatanasida i.","num_words":971,"character_repetition_ratio":0.085,"word_repetition_ratio":0.0,"special_characters_ratio":0.207,"stopwords_ratio":0.333,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"V MUSA 01 - BIBLE & BUKU ENDE ONLINE\\n1:1 On do hata, angka na pinaboa ni si Musa tu sandok Israel di bariba ni Jordan di halongonan, di adaran tondong ni laut arung, di holangholang ni Elaparan, Topel, Laban, Hazerot, dohot Disahab:\\n1:2 Sampulu sada ari mardalan daona sian Horeb mangihutihut dolok Seir sahat ro di Kades-Barnea.\\n1:3 Masa ma di taon paopatpuluhon, di artia bulan Li ro ma hata ni si Musa tu halak Israel, hombar tu saluhut na tinonahon ni Jahowa tu ibana patolhasonna tu nasida.\\n1:4 Dung tinaluhonna si Sihon, raja ni halak Amori na maringan di Hesbon dohot si Og, raja di Basan, na maringan di Astarot mardonokkon Edrei.\\n1:5 Di bariba ni Jordan, di tano Moab dipungka si Musa pajojorhon patikon, ninna ma:\\n1:6 Ro do hata ni Jahowa, Debatanta i mandok tu hita uju di lambung Horeb, ninna do: Nunga sae lelengna hamu maringan di lambung dolok on.\\n1:7 Borhat ma hamu mamedu, asa sahat hamu tu dolok ni halak Amori dohot tu sude halak hombar balokna di adaran, di atas dolok dohot di angka rura dohot di tano sambola tungkan dangsina dohot martopihon laut, di tano ni halak Kanaan dohot di Libanon, sahat ro di sunge na bolon i ma sunge Euprat.\\n1:8 Ida ma, nunga Ahu marbasabasahon tano i di jolomuna, asa bongotan jala soluhanmuna tano naung niuarihon ni Jahowa hian tu ompumuna i, tu si Abraham, si Isak dohot si Jakkob, lehononna tu nasida dohot tu pinomparnasida i.\\n1:9 Jadi ningku ma tu hamu uju i songon on: Ndang tarbahen sasada ahu mangusung hamu.\\n1:10 Ai nunga dipatorop Jahowa, Debatamuna i hamu, jala ida ma, nunga hira bintang di langit toropmuna sadarion.\\n1:11 Sai ditambai Jahowa Debata ni ompumuna i ma bilanganmuna marriburibu tumorop sian nuaeng, jala dipasupasu ma hamu, songon na pinarbagabagana hian tu hamu.\\n1:12 Tung beha ma panahanku sasada ahu mangusung halojaon hangaluton dohot parbadaan sian hamu?\\n1:13 Pillit hamu di hamu baoa angka na pistar jala na pantas marroha jala naung tartanda burju marparange sian ganup marga, asa hupabangkit nasida gabe indukmuna.\\n1:14 Jadi didok hamu ma mangalusi ahu: Denggan do hata na pinaboami sibahenonnami.\\n1:15 Dung i hubuat ma angka indukmuna marmargamarga, baoa angka na pistar jala naung tangkas tartanda, laos hupabangkit nasida bahen induk di hamu, induk sisaribu halak dohot sisaratus halak dohot silimapulu halak dohot sisampulu halak, ro di angka panuturimuna marmargamarga.\\n1:16 Ro huhut hatangku uju i tu angka panguhum di hamu songon on: Tangkas tangitangi hamu parhataan ni hahaanggimuna i jala uhum hasintongan dabu hamu tu ganup na marhahamaranggi dohot tu halak dagang.\\n1:17 Ndang jadi marmiak ni bohi hamu di paruhuman, suang songon halak na balga halak na metmet tangitangionmuna, ndang jadi tahuton hamu mida manang ise, ai Debata do nampuna paruhuman; alai tung sura adong hata na mamaolhu risihonmuna, ingkon tu ahu boanonmuna, asa ahu manulingkitsa.\\n1:18 Laos hutonahon ma uju i tu hamu nasa hata angka sibahenonmuna.\\n1:19 Dung i borhat ma hita sian Horeb jala itaaotaoti sandok halongonan na bolon jala na jorbut i, naung niidamuna i tahe di dalan laho tu dolok Amori, songon na tinonahon ni Jahowa. Debatanta i tu hita, gabe sahat hita tu Kades-Barnea.\\n1:20 Dung i ningku ma mandok hamu: Nunga sahat hamu tu dolok Amori, na naeng lehonon ni Jahowa, Debatanta i, tu hita.\\n1:21 Ida ma, nunga dilehon Jahowa, Debatamu tano i di adopanmu; dibahen i borhat ma ho, tean ma tano i, songon naung pinarbagabaga ni Jahowa Debata ni ompumu hian; unang ho mabiar jala unang ho godoron!\\n1:22 Dung i ro ma hamu sudena jumonok tu ahu, jala didok hamu: Tole itasuru ma baoa parjolonta, asa dihahapi nasida tano i di hita, laos mamboan barita tu hita taringot tu dalan sibolusonta dohot taringot tu huta angka simasukanta.\\n1:23 Jadi denggan hata i di rohangku, laos hubuat sian hamu sampulu dua halak, sasahalak sian ganup marga.\\n1:24 Dung i borhat ma nasida nangkok tu dolok, jala sahat nasida muse tu rura Eskol, laos dihahapi ma i.\\n1:25 Diboan nasida huhut di bagasan tangannasida sian parbue ni tano i, laos dipatuat tu hita huhut mamboan barita tu hita, angka ninna ma: Na denggan sahali do tano naung binasabasahon ni Jahowa, Debatanta i tu hita.\\n1:26 Alai ndang olo hamu nangkok, lam manggunturi do hamu dompak hata ni Jahowa, Debatamuna i.\\n1:27 Jala marmungutmungut hamu di bagasan undungundungmuna i, pola didok hamu: Sian gigi ni rohana hape umbahen ditogihon Jahowa hita ruar sian tano Misir, asa pasahathon hita tu bagasan tangan ni halak Amori laho maniaphon hita.\\n1:28 Tung beha ma pambahenta hita nangkok? Ai nunga malala ateatenta i dibahen angka hahaangintai, na nidokna i: Sada bangso na umbolon jala na tumimbul sian hita do i; angka hutanasida pe balga do jala pinatogu sahat ro di langit; adong huhut huida hami disi halak pinompar ni Enak.\\n1:29 Jadi ningku ma uju i tu hamu: Unang hamu godoron, jala unang mabiar hamu mida nasida!\\n1:30 Ai Jahowa, Debatamuna i mardalan di jolomuna, Ibana sandiri marporang humongkop hamu, sandok songon na binahenna i tu hamu di Misir di adopan ni matamuna.\\n1:31 Nang di halongonan naung niidamuna i, naung niompa ni Jahowa, Debatamu do ho, songon pangompa ni baoa di anakna manondong saluhut dalan, naung nidalananmuna i, nunga pola sahat hamu tu inganan on.\\n1:32 Alai atik pe songon i hatangku, tong do ndang porsea hamu di Jahowa, Debatamuna i.\\n1:33 Ibana sandiri nian mardalan di adopanmuna mandiori di hamu inganan bahen pangulonanmuna i, bornginna i di bagasan api patuduhon tu hamu dalan sidalananmuna i, jala arianna i di bagasan ombun.\\n1:34 Alai dung dibege Jahowa soara ni hatahatamuna i, marpiarpiar ma rimasna, pola maruari Ibana mandok:\\n1:35 Na so tupa idaon ni nanggo sahalak sian angka baoa na sansundut na roa on tano na denggan i, naung pola huuarihon nian mangalehon tu ompunasida i.\\n1:36 Dungkon ni si Kaleb, anak ni si Jepune, ibana masuk marnida, tu ibana dohot tu pinomparna ma lehononku tano naung nidegena i, ala marsihohot rohana mangihuthon tu Jahowa.\\n1:37 Mida Ahu pe marronirimas do Jahowa, ala hamu, pola ninna: Ho pe ndang jadi masuk tusi.\\n1:38 Alai anggo si Josua, anak ni si Nun, na marhalado di adopanmi, ingkon masuk ma anggo ibana tusi, papir ma tondina i, ai ingkon ibana marbagi tano i bahen partalian ni Israel.\\n1:39 Anakkonmuna pe, angka naung nidokmuna i ripe pupuson nasida dohot anakmuna, angka na so umboto dope sadarion na denggan manang na roa, nasida ma saut masuk tusi, jala tu nasida do i lehononku bahen teanteananna.\\n1:40 Alai borhat ma anggo hamu mardalan dompak halongonan di dalan laho tu laut arung.\\n1:41 Dung i ro ma hatamuna mangalusi ahu: Nunga mardosa hami dompak Jahowa, alai na naeng nangkok hami marporang hombar tu saluhut naung tinonahon ni Jahowa, Debatanta i tu hita; sanga hamu ganup manandang podangna be, jala hobas hamu naeng nangkok tu dolok i.\\n1:42 Dung i ro ma hata ni Jahowa tu ahu: Dok ma tu nasida: Ndang jadi hamu nangkok jala ndang jadi hamu marporang, ai ndada Ahu di tongatongamuna i, asa unang tung talu hamu maradophon musumuna i.\\n1:43 Jadi hupasahat hata i nian tu hamu, hape ndang ditangihon hamu, lam manggunturi hamu dompak hata ni Jahowa jala manjahati, laos nangkok hamu tu dolok.\\n1:44 Dung i ruar ma halak Amori na maringan di dolok i manjumpangkon hamu, laos dilotongi hamu, songon pangalotongi ni harinuan, laos ditaluhon nasida hamu di Seir sahat ro di Horma.\\n1:45 Jadi dung mulak hamu jala tumatangis di adopan ni Jahowa, ndang olo Jahowa tumangihon soaramuna i, jala ndang dipaeleng pinggolna i tu hamu.\\n1:46 Jadi tinggal hamu di Kades na nia leleng, suang songon ari tinggalmuna na jolo disi.","num_words":1231,"character_repetition_ratio":0.05,"word_repetition_ratio":0.0,"special_characters_ratio":0.216,"stopwords_ratio":0.349,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}
+{"url":"","collection":"madlad400","source":"CC 20220801","original_code":"akb","text":"JEREMIA 33 - BIBLE & BUKU ENDE ONLINE\\n33:1 Dung i ro ma hata ni Jahowa tu si Jeremia paduahalihon di na tarhurung dope ibana di bilut hurungan i, ninna do:\\n33:2 Songon on do hata ni Jahowa na pasintongkon bagabagana i, Jahowa na manjadihonsa laho pasunhon, Jahowa do goarna!\\n33:3 Joujou ma ho tu ahu, asa hualusi ho, asa hupabotohon tu ho hata angka na bolon dohot na songkal, angka na so binotomi.\\n33:4 Songon on do hata ni Jahowa, Debata ni Israel, taringot tu angka bagas ni huta an dohot taringot tu angka bagas ni angka raja sian Juda angka naung niloha on bahen partanobatoan dompak angka salosap dohot dompak angka podang.\\n33:5 Adong pe jolma masuk tu bagasan laho marmusu dompak halak Kasdim, asa gohanna angka i dohot bangke ni jolma, angka naung hubunu di bagasan murukku dohot di bagasan rimashu, ala naung hupadao bohingku sian huta on binahen ni saluhut hajahatonnasida.\\n33:6 Ida ma, ahu sandiri pahehehon tu nasida hahisaron dohot hamalumon, jala pamalumonku nasida, jala ahu papatarhon tu nasida hadameon dohot habonaron mardapotdapot.\\n33:7 Jala ahu manogihon mulak angka na tarbuang i sian Juda dohot angka na tarbuang i sian Israel, jala ahu pahothon nasida suang songon di mulana.\\n33:8 Jala ahu mangurasi nasida sian saluhut hajahatonnasida i, na mardosai nasida dompak ahu, jala marpamuati rohangku di saluhut hajahatonnasida i, na mardosai nasida dompak ahu, jala na niosenasida i ahu.\\n33:9 Jala ingkon gabe barita silas ni rohangku huta i, bahen pujipujian dohot bahen hamuliaon maradophon saluhut bangso parbegu di tano on, angka na umbege saluhut na denggan na hubahen i tu nasida, jadi tarsonggot jala angka hitir nasida mida saluhut na denggan dohot mida saluhut huta on na hubahen i tu nasida.\\n33:10 Songon on do hata ni Jahowa: Tarbege dope sogot di inganan on, naung nidokmuna i: Nunga tarulang, ndang be marisi jolma nanggo sahalak manang pinahan, di bagasan angka huta ni Juda dohot di alaman ni Jerusalem, angka naung tarulang i, ndang be marisi jolma nanggo sahalak manang pinahan.\\n33:11 Tarbege dope sogot disi soara olopolop dohot soara las ni roha, soara ni pangoli dohot soara ni oroan, soara ni angka na mandok: Puji ma Jahowa Zebaot, ai pardengganbasa do Jahowa, ai ro di saleleng ni lelengna do asi ni rohana! Tole muse soara ni halak na mamboan pelean hamauliateon tu joro ni Jahowa; ai ahu ma manogihon mulak sogot halak angka na tarbuang sian tano on, gabe suang songon di mulana, ninna Jahowa.\\n33:12 Songon on do hata ni Jahowa Zebaot: Adong dope sogot di inganan on, na tarulang nuaeng, so marisi jolma nanggo sahalak manang pinahan, jala di bagasan saluhut hutana adong muse pondokpondok ni parmahan, angka na paulon birubiruna disi.\\n33:13 Tole di bagasan huta angka na di dolok, tole di bagasan huta angka na di pea dohot di bagasan huta angka na tungkan dangsina dohot di tano Benjamin dohot humaliang Jerusalem dohot di bagasan angka huta ni Juda, mamolus dope sogot birubiru angka na niadu ni halak na mamilangi, ninna Jahowa.\\n33:14 Ida ma, na ro do angka ari sogot, ninna Jahowa, ahu ma pasintongkon disi hata na denggan i naung huparbagabaga i taringot tu pinompar ni Israel dohot taringot tu pinompar ni Juda.\\n33:15 Di angka ari i dohot di tingki i ahu ma patubuhon di si Daud sada tumbur hatigoran, ibana ma mangkajongjongkon uhum dohot hatigoran di tano on.\\n33:16 Di angka ari i ma dapotan tua Juda jala marsonangsonang isi ni Jerusalem maringanan, jala on do goarna dohonon ni halak: Jahowa parpintoranta.\\n33:17 Ai songon on do hata ni Jahowa: Na so tupa tos sian si Daud baoa na hundul di habangsa ni pinompar ni si Israel.\\n33:18 Angka malim pe dohot halak Lepi na so tupa tos sian adopanku baoa angka na mamelehon pelean situtungon dohot na manutung pelean sipanganon dohot na marhobas pelean sipotongon ariari.\\n33:19 Dung i ro muse ma hata ni Jahowa tu si Jeremia ninna do:\\n33:20 Songon on do hata ni Jahowa: Tung sura mansohot bahenonmuna aturan na hubahen i taringot tu arian dohot taringot tu borngin, gabe ndang be masa arian dohot borngin di tingkina be.\\n33:21 Mansadi ma dohot padanhu tu si Daud naposongki, ndang adong be di ibana anak na bangkit raja hundul di habangsana, mansohot dohot tu halak Lepi, nang tu angka malim, angka na marhalado di ahu.\\n33:22 Songon parangan angka na lohot di langit, angka na so tarbilang dohot horsik ni laut na so hasuhatan, suang songon i do patoroponku pinompar ni si Daud naposongki dohot halak Lepi angka parhalado di ahu.\\n33:23 Dung i ro muse hata ni Jahowa tu si Jeremia songon on:\\n33:24 Atehe ndang diparateatehon ho na nidok ni bangso on: Na dua marga na pinillit ni Jahowa hian, nunga dibolongkon muse? Jadi marhu ni roha nasida mida bangsongku, hira na so bangso be bilangan di rohanasida.\\n33:25 Songon on do hata ni Jahowa: Tung sura sohot padan na hubahen i taringot tu arian dohot borngin, sohot dohot aturan na hubahen i taringot tu patikpatik tu langit dohot tano on.\\n33:26 Ambolong ma bahenonku dohot pinompar ni si Jakkob dohot si Daud, naposongki, asa unang be buaton sian pinomparna bahen pangarajai di pinompar ni si Abraham, si Isak dohot si Jakkob. Ai mulak do togihononku angka na tarbuang sian nasida, jala marpangulahi rohangku mida nasida.","num_words":857,"character_repetition_ratio":0.077,"word_repetition_ratio":0.0,"special_characters_ratio":0.213,"stopwords_ratio":0.369,"flagged_words_ratio":0.0,"lang_id_score":1.0,"perplexity_score":500.0,"cluster_detection":1}